« Сказка о царе Салтане» на цыганском языке
(Часть 1)
Дуй, дуй, дешудуй,
Тэ чумидав парно муй.
Парно муй ме чумидав,
А кало ме чикамав!
Шун та, Брэ, э парамичи- Сар ашундем, кадя мотцав :
«Трин пхея, трин тхагарня,
Бахтале, тай шукарня
Телай рят кхэрэ бешенас,
Ай пе песте драбарэнас.
«Те авав Эмпэратиса»,-
Кирадемас паприкаш,
Ай пеклемас савияко-
Те авел гаженгэ ляко!
Мук гаже те зумавен
Романо лащё хабен!»
Кавер щей, кадя пхендяс,
Ле вастенца маладяс:
«Касаво похтан кэрава,
Кэтрынцы, гхоти мэ сувава
Те авел свако гуряди! (Мек пхагхадёл ленго ди!»)
Трито, кай сас май тэрни,
Май шукар, ай май сани
Ле якха теле мукля,
Ай кадя локхэс пхендя:
«Ме дикхлем андо суно,
Те на ущав па кадо пато,
Кэ бияндем мэ щавого,
А щавого сас - Эмпэрато!»
Фери э ворба вой пхендя,
О вудар путэрдиля –
Анде цера, кал щея,
Эмпэрато авиля!
Со денас дума тэрнэгар,
Ашундя во анде бар!
Со пхендя э май тэрни,
Плачая лес! Сар авдин,
Лакэ ворби! Пашуля,
Пало васт ла ща во ля,
Ай пхенндя : «Эмпэратиса!
Манца леса те траиса!
Пало ром ме лава тут,
Те авен ма глати бут!
По Симпэтри, Сар камес,
Щаворэс те биянэс!»
Эмпэрато ущиля пел чанга – Девлес мангля!
Май пхурякэ ла пхеякэ
Пески ворба во пхендя:
«Ту пекэса савияко,
Те авел аменгэ ляко!
Киравес Шах Тхулярдо - Те авел свако правардо!»
А каврякэ – диниляке,
Те инкэрэл анде годи,
«Мек сувел кэтрынци, гхоти,
Те авел свако гхуряди!»
Акана, щея, гиленца
Андектан туменса жяв
Анде мури бари цера
Те кэрас Баро Обяв!»
Дуй, дуй, дешудуй,
Те чумидав парно муй…
На сов!.. Шун э парамичи -
Со май кэрдиляс май дур :
Касаво кэрдя Обяв –
Нас пе лумя май шукар!
Муро как пхуро, о Ромка
Ся пхенелас па обяв:
«Со сас бре пе скафеди?
Биняло, барёл тё ди!
Мас пеко, пурум, ранташ,
Паприкаса паприкаш,
Сарми, папина, тай рэци,
Шах шукло, тай крестевецы,
Шонко, тай шах тхулярдо,
Тявел свако правардо!
Касаво лащё хабе,
Чи халян ту инкэ, бре»!
Саворэ хале, пиле,
Ай гиля гилабаде.
Бахт тэрненгэ! Лаще дес!
Те траин пескэ лащес! Ай по пато традине лен - Те кэрэн ле щаворэс !
Фери, дуй пхея чаче
Матиле, сар балище!
Чи гилабен вон гиля,
Э холи бари лен ля -
«Эмпэратиса» ленги пхей?
Май дикхаса инкэ, щей!..
Пе тегара Эмперато,
Ащадя ромня по пато,
Лаки чунгха, лакэ буки,
Лакэ вушт во чумидя,
Ай по маримос традя.
Лес о кхаму петярэлас,
Лескэ вушт во шутярэлас,
О брышынд баро марэлас,
Э балвал шудри пхурдэлас,
Амаро о Эмпэрато
Саворэен Бэнгэн марэлас!..
О Симпэтри авиля,
Эмппэритиса биандя –
Касаво лащё пуици,
Со э лумя чи дикхля!
Ай пхея , по Дес Баро
Фуипэн кэрде баро!
Траден лил, лаще роменца,
Те жянел о Эмперато,
«Канна ингэрдя по пато, Амаря тэрня пхея, Атунчи , во атхадиля! Щаворо «Дуе шингэнца»
Лесте аракхадиля!»
Канна ашундя кодо,
Эмпэрато , чороро ,
Ля традя ромэнца лил:
«Щавро мек те траил!
Щаворэс те на азбан!
Ме кхэрэ сыго авав,
Пел чанга Девлес мангав!
Ай о Дел ман сытярэла,
Со ме лава тэ кэрав?»
Ле пхея, ле Магриме
Ромэндар лил кодо чорде,
Ай ле Рангэ, ле Барэнгэ
Касаво грамосарде:
«Ме камав, мура ромня,
Ла глатаса кэтане
Андо Пай Баро те щуден,
Мек те хан ле ле Маще!»
Эл Барэ Рая ровенас,
Ай со пхендя о Дад , кэрэнас:
Ви тэрня, ви щаворэс
Кидине вон андек дес,
Ай спиделе ле анде дежа,
Сас о кырдо - тай манай, Ай щуделеле андо Пай.
Дуй, дуй дешудуй,
Те чумидав парно муй.
Май пхенав э парамичи, Шун, со кэрдиля май дур : Кхам стрефял,
Балвал пхурдел,
Пай э дежа ингэрэл,
Анде дежа щаворо,
Бариля, сар муршоро!
Лески Дей - Эмпэратиса
Ся мангэлас ле Девлес,
Мек те щудел пхари дежа
Анда пай пе пхув, локхэс.
Зоралес э Дей мангля,
Ай о Дел жютисардя:
Э Балвал бари кэрдя,
Ай э дежа манушенца
Ля пе пхув, ай ингэрдя!
Ай о щав, сар зумадя
Пхув тела пхунгэнде,
Ля, ай шерэса путэрдя
Э дежа ле ромэнги ! Ай анклистя , тертис, аври, Дужмаенгэ пе холи.
Ай путэрдиляс якхэнгэ:
Плай, тай Маря англа ленде,
Ви май дур дикхэнас, кай, О Кхам наёлас андо Пай…
Ся дикхля о щаворо
Пе кодо шукаримо,
Ай пхендя во песка Дакэ,
Кэ дукхал лес о шеро,
Ви о ди дукхал, чачес - Кханчи чи халя трин дес!
Тела дэмбо зэлэно,
Кэ барёл по плаёро
Вон бешэнас дуй жене,
Ай гэндинас кэтане,
Сар вон лену те траин –
Кэ ленго траё - най авдин!
Катар дембо о баро
Пхагля гхай о щаворо,
Андал зелено патря
Во ровли барии кхувдя -
Анклистя леске - чукни,
Те авел сумнакуни!
Бах пхаро во аракхля,
Ай по пай баро гэля,
Кай туткая авиле -
Акэ тукэ, ви хабе!
Сар ка пай во пашуло,
Ай дикхэл, сар Чирикло
Касаво баро, кало
Леско накх банго лоло, Сар о састри, харкуно
Анзарэл ла Папина!
Э Папин ципил, ровел
Лес пакхэнса малавел!
Э Папин - ся парнёры,
Касави шукарёры!
О щаво ля бах баро,
Ай щудя андо шеро
Ле калескэ Чириклескэ –
Мудардя лес, по яро!
Э Парни Папин- щавэстэ!
Ай мотцол- гилабел лескэ:
«На Папин ме - Щей Бари -
Ле дадески щеёри!
Ай пхенав тукэ чачес,
Мудардян, на Чириклес!
Муро траё шай те лес,
Ту мудардян Кале Бенгэс!
Шогха тукэ чи бистрава,
Со мангэса – ся кэрава,
Фери манн те акхарэс!
Акана, жя те совес.
Дуй, дуй дешудуй,
Те чумидав парно муй,
Лунго, лунго парамичи?
Эртисар, мангава Ту!
Дидимняцы ущиля,
Ле якха Сар путэрдя,
Ай дикхел, по плай баро
Тэрдо форо баруно !
Кхам стрефял пел кхангэря
Ай ашундён о гиля!
Песка Да во ущадя,
Форо лакэ сыкадя,
Андо гындо пескэ ля:
«Э Парни Папин кэрдя!»
Андо форо Эл гаже
Пел чанга ся ущиле,
Ай ле васт ленгэ чумиден,
Канна жянас дуй жене.
«Мук теавел о щаворо
Эмпэрато амаро!
Ай анав Леско авела
Ишван! Ишван Барвало!»
Ся! Тумаря пативакэ, Щявале - Петру Дэмэтро!