ЮГЬАНДИН САБПИ КАГЪАЗ
(1-ое письмо Иоанна, перевод на табасаранский язык )
Дюн’я ккебгъхъанмина Айирикан, учуз Гъеебхьурикан, ич улариинди учуз Гъяркъюрикан, учу лигури Гъахьирикан, учу ич хилариинди кучри Гъахьирикан, яна уьмрин Гафнакан – Иешуайикан учу ктибтурача. Му вари учуз гъябкъюнчуз, мидин шагьидар учу вуча. Му – учуз гъяркъю уьмрин Гаф, Заанур Адашдихь хьайи. Дугъу Думу Гаф учуз улупну ва учу учвуз мидкан хабар дебккрача.
Учуз гъябкъюбдикан ва гъеебхьубдикан, гьамус учвура учук ктикьбан бадали, учвуз ктибтурайидар вуча. Хъа учу, Заанур Адашдик ва Дугъан Бай Иешуа Машихдик кидикьнайидар вуча. Учу му, учуз гьубк1у шадвал хьпан бадали, бик1урача.
Магьа учуз Заанурикан гьамциб хабар гъеебхьунчуз: Заанур – акв ву. Дугъаъ гьич саб жюрейин муч1ушин адар.
Эгер ухьу, Дугъак ктикьунхьа ккураш, хъа муч1увалиъди гъяраш, ухьу куч1лар ап1урахьа ва гьякьвалиъди яшамиш шуладархьа. Эгер, Заанур аквнаъ айиси, ухьура аквнаъди яшамиш шулаш, ихь арайиъ аьлакьйирра хьиди, ва ихь гьарсаб гунагьнахьан Дугъан Балин – Иешуайин ифди марцц ап1ура. Эгер ухьу, гунагь ктарчук ккураш, ухьу ухьуз куч1лар ап1урахьа ва ухьуъ гьякьвал адар.
Эгер ухьу ачухъди ихь гунгьар к1ул’ин дисуруш, Дугъу, Гьякьлури, хъугъвал Алири, ихь гунгьарилан хил алдабгъиди ва ихь гьарсаб гьякьсузвалихьан ухьу марцц ап1иди. Хъа эгер ухьу, гунгьар гъап1ундархьа ккураш, ухьу Заанур куч1лях вуйирси дерккрахьа ва Дугъан Гаф кьабул ап1урадархьа.
Йиз веледар, узу му, учву гунагь дарап1бан бадали, бик1ураза. Хъа эгер шли аьгъдарди гунагь гъап1ишра, Адашдин улихь ухьхъан гаф Йиврур хьа. Думу – Иешуа Маших, дугъри Кас ву. Ари Гьадму, гъурбан духьну, ихь гунгьариккан, неинки ихь, хъа гьацира вари дюн’яйин гунгьариккан Ккадаур ву. Дугъан табшуругъар тамам ап1ури гъашиш, ухьуз Заанур дугъридан аьгъю гъахьунхьуз дупну, архаин хьуз шулухьхьан.
Шли, узуз Думу аьгъязуз к1ураш, хъа Дугъан табшуругъар тамам ап1дарш, дугъу куч1лар ап1ура ва дугъаъ гьякьвал адар. Хъа фуж Заанурин аьгъюваларихъ хъпехъураш, думу дугъриданра Заанурин масанвали ац1на. Магьа гьамци, ухьу Заанурикди кидикьнайивал аьгъю ап1уз шулу. Шли Заануриз ккуниси яшамиш шулаза к1ураш, думу Иешуаси духьну ккунду.
Йиз масан вуйи, дустар, узу учвуз таза табшуругънакан бик1урадарза, хъа – учвуз сифте бинайиан тувнайибдикан. Му кюгьне табшуругъ, учвуз ухдихъанмина деебхьнайи, гаф ву. Хъа жара терефнаан, узу учвуз бик1урайиб, ц1ийи табшуругъ ву, гьаз гъаапиш, му гьякьвал, Иешуа Машихдин ва ичв уьмри улупура; миди муч1ушназ кьяляхъ йивура, ва гьякьвалин аквну гьамуст1анра нурар рагъура.
Шли, чав аквнаъ аза к1ури, гъардаш ккун дап1надарш, думу мегьел муч1ушнаъ ами. Шлиз чан гъардаш ккундуш, думу аквнаъ а, ва дугъаъ фук1ара учв алдакруб хьибдар. Гъардаш даккнир муч1ушнаъ а. Дицир муч1ушнаъ яшамиш шула ва дугъаз учв наанди гъягъюраш аьгъдар, фицики муч1ушну думу кур дап1на.
Узу учвуз, йиз ккуни веледар, ичв гунгьарилан Иешуа Машихдилантина хил алдабгъну к1ури бик1ураза.
Узу учвуз, абйир-бабар, дюн’я-бина хьайиз Айир аьгъю гъахьунчвуз к1ури бик1ураза.
Узу учвуз, жигьилар, Писубдиин гъалиб гъахьунчва к1ури бик1ураза.
Узу учвуз, биц1идар, Адаш аьгъю гъахьунчвуз к1ури гъибик1нийза.
Узу учвуз, абйир-бабар, дюн’я-бина хьайиз Айир аьгъю гъахьунчвуз к1ури гъибик1нийза.
Узу учвуз, жигьилар, кьувватлу вучва, Заанурин Гаф учвуъ яшамиш шула ва Писубдиин гъалиб гъахьунчва к1ури, гъибик1нийза.
Му дюн’я ва дидиъ айиб ккун мап1анай. Эгер шлиз дюн’яйинуб ккундуш, дугъан к1ваъ Адашдихьна вуйи масанвал адар. Гьаз гъапиш му дюн’яйиъ айи варибдихъ ихь гунагькар жандин тямягь хъа.
Ихь уларин тямягь хъайиб ва гьаму уьмриъ адмийиири фурс ва дамах ап1урайиб вари – гьич фук1ара Адашдихьан вуйиб дар. Хъа му вари – дюн’яйихьан ву.
Му дюн’я ва инсандин тямягь зибгруб – вари гъюдубч1вну гъябгъруб ву, хъа Заанурин ниятар тамам ап1руризт1ан гьаргандин уьмур хьибдар.
Баяр-шубар, аьхиримжи вахтар улукьура! Учвуз гъеебхьиганси, Машихдиз Къаршур гъиди дупна. Лигуруш, дурар, ихь Машихдиз къаршу касар гизаф духьна. Магьа гьаддиз ухьуз, аьхиримжи сяаьт улубкьнайиб рябкъюрахьуз.
Месигьдиз къаршу вуйи гьадму касар ихь арайиан удуч1вдар вуйи, хъа дугъридан, дурар ухьукди кидикьнайидар дайи. Эгер дурар дугъриданра ухьукди кидикьнайидар вуйиш, дурар ихь арайиъ гъуздийи. Аммаки дурар вари гьергну – гьамди дурарин ухьук кидикьну адрувал улупура.
Учвуз Гирамири Чав туву багъиш ачвуз ва варидариз, аьгъювалар фу вуш, аьгъю гъабхьунчвуз.
Узу учвуз, гьякьвал аьгъдарчвуз к1ури бик1урадарза, хъа думу учвуз аьгъюган ва диди куч1ал арайиз дархиган, бик1ураза.
Фуж ахъа сарун, Иешуа – Маших дар, к1урурт1ан аьхю куч1лях? Гьацир кас Машихдиз къаршу ву. Дицири я Адаш, я Бай кьабул ап1урадар.
Шли Бай кьабул ап1урадарш, дугъу Адашра кьабул ап1урадар. Шлиз Бай аьгъяш, дугъаз Адашра аьгъя.
Сифте бинайиан гъеебхьубдихъди гъузай. Эгер учву, учвуз сифте бинайиан гъеебхьубдихъди гъузиш, Балихъди ва Адашдихъди хьидичва.
Ухьуз Бали туву гаф – магьа гьаму ву: гьаргандин Уьмур!
Узу му учвуз, учву алдатмиш ап1рударикан бик1ураза.
Хъа учвуз кайиб: Машиахдихьан учвуз дурубкьнайи багъиш учвухьди гъубзди, ва, гьаддиз, учву, шлин вуш дарсариз ккилигурайидар дарчва. Гирамирихьан учвухьна гъафи Рюгьну учвуз гьякьвалин дарсар кивра, ва гьич саб вахтнара Дугъу учвуз куч1ал ап1идар.
Гьаци вуйиган, Гьадгъу улупурайибси ап1инай, ва Заануриъди гъузай.
Гьаци вуйиган, Машихди к1уруб гьаци ап1инайки, йиз веледар, Думу хъадакну гъафиган, Дугъан улихь учвхьан, я гуч1’вал, я нач’вал адарди, дугъужвуз шлуганси!
Эгер учвуз Думу дугъри вуйиб аьгъяш, учвуз гьацира аьгъячвузки: дугъривалиинди яшамиш шулайидар Заанурин веледар вуйибра.
Ихь Адашди ухьуз Чан – Заанурин веледар пуб’инди фукьан зурба вуйи масанвал улупнуш, учву фикир ап1инай. Ухьу гьаци хьузра вухьа!
Му дюн’яйиндари ухьу кьабул ап1урадар, гьаз гъапиш дурари Думу кьабул гъап1ундар.
Йиз ккунидар, гьаму ражари ухьу Заанурин веледар вухьа, хъа гъюру вахтари ухькан фужар шулуш, сабан мялум дар. Саб аьгъяхьуз, Иешуа Маших хъана жилариина гъафиган, ухьу Гьадгъаз ухшар хьидихьа, фицики Думу Учв фицир вуш, гьацирди рякъидихьуз!
Шли чан миж Гьадгъак кивраш, дугъу, марцци Машихдиз ухшар вуди, чан уьмурра марцц ап1ура.
Шли гунагь ап1ураш, дугъу къанунсузвал ап1ура, фицики гунагь – къанунсузвал ву.
Учвуз аьгъюганси, Маших инсанарин гунгьар Чаина гъадагъуз Гъафир ву. Дугъак гунагь ктар. Дугъахъди яшамиш шлу гьич сарира гунагь ап1идар. Хъа гунагь ап1уб давам ап1урайириз Думу я гъяркъюндар, я аьгъю гъахьундар.
Багьалу вуйи веледар, лигайки, учву гьякь рякъхъан хътаърударин куч1ларихъ мехъебехъанай. Гьякь’вали т1алаб ап1урайиси ап1рур Машихси гьякь кас ву.
Гунгьар ап1рур иблисдинур ву, фицики иблисдира, чан сифте бинайианмина гунгьар ап1уйи.
Заанурин Бай жилариина магьа гьамциб метлеб ади гъафир ву: иблисдин т1улар терг ап1уз.
Заанурин веледар гъахьидарикан гьич сарира гунгьар давам ап1дар, гьаз гъапиш дицир касдиъ Заанурин тум а. Гьаддиз дицирихьан гунагь т1улар ап1ури гъузуз шулдар, гьаз гъапиш думура Заанурин веледарикан сар духьна.
Фуж – Заанурин, хъа фуж иблисдин велед вуш, магьа гьамци аьгъю ап1уз шулвухьан: гьякьвалиинди дарап1рур ва чан гъардаш даккнир Заанурихьан дар.
Сари сар ккун ап1инай. Магьа учвуз сифте бинайиан деебхьнайи гаф: сар сарихьна масанди йихьай.
Ухьу иблисдин тереф дибисну, чан чве йивну гъак1и Каиндиз ухшар духьну ккундар. Дугъу думу гьаз гъак1ну? Гьаз гъапиш дугъан ляхнар писдар вуйи, хъа чан чвуччвун – ужудар.
Чвйир, мюгьтал махьанай, эгер учву му дюн’яйиз ккундарш. Ухьуз аьгъяхьуз ухьу аьжалнахьан гьаргандин уьмрихьна дуфнайиб, фицики ухьуз ихь гъардшар ккундухьуз. Хъа шлиз ккундарш, думу, чан дук1найир, дук1ну гъузди.
Гьарсар, чан гъардаш даккнир, адми йивну гъач1ир гьисаб ву, хъа учвуз аьгъячвуз, адми йивну гъак1ириз гьаргандин уьмур даршлуб.
Масанвал фу вуш, ухьуз, магьа, наънан аьгъяш: Машихди ухьхъанди Чан уьмур тувну. Ухьура гьаци ихь гъардшарихъанди ихь уьмрар тувну ккунду.
Эгер шли, девлет ади, хъа чан гъардаш аьжузди яшамиш шулайиб рябкъюри, кюмек ап1дарш, дицириъ Заанурин масанвал фици шул?
Йиз веледар, ихь ккунивал садар гафарииндина улхбариинди дубхьну ккундар, хъа – ляхниинди, ва якьин вуйиб дубхьну ккунду.
Ухьу гьякьвалин рякъюъ айиб гьамци аьгъю шулу: гьеле ихь намус сикинди даршра, ухьхьан Заанурин улихь архаинди хьуз шулухьхьан, фицики Заанур ихь намуст1ан артухъ ву ва Дугъаз вари аьгъя.
Йиз ккунидар, эгер ихь намус сикинди вуш, ухьхьан саб гуч1 адарди Заануриз багахь хьуз шулухьхьан. Гьаддиз Заанури, Чаз ккарагну Чакан фу т1алаб гъап1иш, гьадму тамам ап1урухьуз, фицики Дугъан табшуругъарихъди гъярахьа, ва Дугъаз ккуни ляхнар ап1урахьа.
Магьа ухьуз Заанури фициб табшуругъ дебккнаш: ухьу Дугъан Бай – Иешуа Машихдихъ хъугъну ккунду, ва Иешуайи ухьуз табшурмиш гъап1иганси, ухьу сари сар ккун дап1ну ккунду.
Шли Заанурин табшуругъар тамам ап1ураш, гьадму кас Заануриъ яшамиш шула ва гьадму касдиъ Заанур яшамиш шула.
Наънан аьгъя хъа ухьуз, ухьуъ Заанур яшамиш шулайиб? – Дугъу ухьуз багъиш гъап1у Рюгьналанмина аьгъяхьуз.
Йиз ккунидар, фунуб рюгьнахъ вушра, яна адмийихъ, мехъеебехъанай. Хъа дурар Заанурихьан вуйин–дарин, гьарган ахтармиш ап1ури йихьай, фицики дюн’яйиз куч1лин бегьем пайгъамбрар ачмиш духьна.
Магьа Заанурихьан вуйи Рюгь фици аьгъю ап1уз шулуш: Иешуа Маших Заанурихьан жилиина инсандин суратнаъди гъафну к1уру гьарсар рюгь Заанурихьан вуйир ву. Хъа Иешуа кьабул дарап1ру рюгь – думу Заанурихьан вуйир дар. Мицдар касари Машихдиз Къаршур рази ктаура.
Къаршур гъиди к1ури, учвуз деебхьнайчвуз ва магьа думу сарун му дюн’яйиъ а.
Йиз веледар, учву Заануриндар вучва, куч1лин пайгъамбрариин гъалиб духьначва, гьаз гъапиш, учвуъ айи Заанур му дюн’яйин эйсивал ап1урайирт1ан кьудратлу ву.
Ари гьадрар – му дюн’яйиндар ву. Гьаддиз дурари к1урайибра гьаму дюн’яйикан ву ва дюн’яйиндар гьадрарихъ хъпехъурира ву. Хъа ухьу Заануриндар вухьа ва шлиз Заанур аьгъяш, думу ухьухъ хъпехъуру. Хъа фуж Заануринур дарш, ухьухъ хъпехъидар. Магьа гьамци ухьхьан гьякьвал хру Рюгь куч1лин рюгьнахьан жара ап1уз шулу.
Багьалу вуйи дустар, гъачай чиб чпи ккун ап1ухьа, гьаз гъапиш масанвал Заанурихьан гъюрайиб ву. Масанвал айи гьарсар касди гьаци ап1уру, гьаз гъапиш думу Заанурин веледарикан сар гъахьну ва Заанур дугъаз аьгъя.
Шлиъ ккунивал адарш, дугъаз Заанур аьгъдар, фицики Заанур Учв масанвал ву.
Магьа фици Заанури Чан масанвал ухьухьна улупнуш: Дугъу Чан айина-адру сар Бай, Гьадгъулантина ухьуз гьаргандин уьмур хьпан бадали, гьаму дюн’яйиз гьаъну.
Дугъри вуйи ккунивал, ухьу Заанур ккун гъап1ну к1ури, гьаддиъ адар, хъа Заанури Чав ухьу ккун гъап1ну ва Чан Бай ухьу гъап1у гунгьарихъанди гъурбан хьуз гьаъну – магьа гьякь вуйи ккунивал.
Йиз ккунидар, Заануриз ухьу масанди вуйиган, ухьура чиб чпи ккун дап1ну ккунду.
Гьич саризра Заанур зат гъяркъюр дар, хъа эгер ухьуз сар-сар ккундуш, Заанур ухьуъ яшамиш шула, ва Дугъан масанвал ухьуъ гьубк1ну артмиш хьибди.
Ухьхьан, ухьу Дугъаъ ва Думу ухьуъ яшамиш шулайиб, ухьухъди пай гъап1у Гьадгъан Рюгьниинди, аьгъю ап1уз шулу.
Му вари учуз гъябкъюнчуз ва Адашди Чан Бай дюн’я уьбхюз гьаувалин шагьидар гъахьунча.
Эгер фуж Иешуа Заанурин Бай вуйивалихъ хъугъраш, гьадму касдиъ Заанур яшамиш шула, ва учвра Заануриъ гъузра.
Учуз Заанурин ухьухьна вуйи му масанвал аьгъю гъабхьунчуз, ва думу кьабул гъап1унча. Заанур – масанвал ву. Масанвали ац1найир Заануриъ гъузра, ва Заанурра гьадму касдиъ яшамиш шула.
Ухьуъ бегьем гъабхьи масанвалиинди, ухьхьан гъияматдин йигъ хъугъвал алди кьабул ап1уз шулу, гьаз гъапиш гьаму дюн’яйиъ ухьу, Машихди фици гъап1нуш, гьаци ап1урахьа.
Масанвал гьич саб жюрейинра гуч1 айиб дар. Гьубк1у масанвали гуч1 ут1убккуру. Гуч1 жазайихъди аьлакьа айиб ву, ва гуч1руриз бегьем гьубк1у масанвал адар.
Заанури ухьу сифте ккун дап1найиган, ухьура Думу ккун ап1урахьа.
Узуз Заанур ккундузуз к1уруриз чан гъардаш даккунди вуш, думу куч1лях ву, гьаз гъапиш, улариз рякъюрайи чан гъардаш даккнирихьан, улариз дярякърайи Заанур ккун ап1уз даршул!
Машихди учуз гьамциб насигьят тувунчуз: Заанур ккунири чан гъардашра ккун дап1ну ккунду.
Иешуа – Заанурин Маших вуйивалихъ хъугънайидарикан Заанурин веледар ктуч1вура. Адаш ккунириз, Гьадгъулантина гъахьирра ккунду.
Ухьуз Заанурин веледар ккунивал магьа гьамци аьгъю ап1уз шулу: Заанур ккун дап1ну, Гьадгъан табшуругъар тамам ап1руриз Дугъан веледарра ккун шулу.
Заанурихьна вуйи ихь масанвал Дугъан табшуругъар тамам ап1биинди улупурайиб вуйишт1ан. Хъа Дугъан табшуругъар тамам ап1уб думукьан читин ляхин дар. Гьаз гъапиш, Заанурихьан вуйи гьарсар му дюн’яйиин гъалиб хьиди. Хъа дюн’яйиин гъалиб гъабхьи кьувват ихь хъугъувал ву.
Дюн’яйин зиин гъалиб фуж шулу? Иешуа Заанурин Бай вуйивалихъ хъугърур. Ари Гьаму ву штииндина ифдиинди гъафи Иешуа Маших. Думу, штииндиси, жарасира, ифдииндира гъафну. Мидин шагьид Рюгь ву, фицики Рюгь – гьякь ву. Гьаз гъапиш, дидин шубур шагьид а: Рюгь, шид ва ифи – гьамрари варидари к1урайиб саб ву.
Ухьу адмийирин шагьидвал кьабул ап1ури шулхьа, хъа Заанурин шагьидвал хъана зина ву, гьаз гъапиш му шагьидвал Заанури Чан Балкан к1урайи шагьидвал ву.
Заанурин Балихъ хъугърайири му шагьидвал чан к1ваъ дибисна. Хъа Заанурихъ хътругърайири Заанур куч1ляхиз илт1ик1ура, гьаз гъапиш, Чан Балкан вуйи Заанурин шагьидвалихъ дурар хъугърадар.
Магьа думу шагьидвал: Заанури ухьуз гьаргандин уьмур тувну, ва думу уьмур – Дугъан Балиъ а.
Шлиз Бай аш, дугъаз гьадму уьмурра а. Хъа шлиз Заанурин Бай адарш, дугъаз гьадму уьмурра адар.
Ухьуз гьаргандин уьмур багъиш дап1на.
Гьаму варибдикан узу учвуз, Заанурин Балихъ хъугънайидар, учву вари, гьаргандин уьмрин эйсйир вуйибдикан аьгъю хьпан бадали, бик1уразачвуз.
Заанурикан, гуч1 ктарди, т1алаб ап1уз шулухьхьан: эгер ухьу, Гьадгъан ниятнахьди гъюруб, фу вушра, Дугъкан т1алаб гъап1иш, Дугъаз ебхьуру.
Эгер ухьуз, ухьу фу ккун гъап1ишра Дугъаз ебхьруб аьгъяш, ухьуз гьацира, ухьу ккун гъап1уб вари туврубра аьгъяхьуз.
Эгер шлиз чан гъардши йик1рувалихьна дару гунагь ап1ури гъяркъиш, гьадгъухъанди думу ккарагри, ва дугъаз уьмур тувди. Узу аьжалихъна дархру гунгьариъ ахъурикан к1ураза. Аьжалихъна гъахру гунагьра а, ва узу учвуз гьацдар гунгьарихъанди ккарагай к1урадарза.
Гьарсаб ч1уру ляхин – гунагь ву, хъа аьжалихъна дархру гунагьра а.
Ухьуз аьгъяхьуз, Заанурин велед гъахьир гунгьарихьан ярхла шула. Думу Заанурин Бали уьрхюра ва иблисдихьан дугъак кучуз шулдар.
Гьеле вари дюн’я иблисдин гьюкмикк ккашра, ухьу Заануриндар вуйиб аьгъяхьуз.
Ухьуз, Заанурин Бай гъафиваликан ва гьякь Заанур аьгъю хьуз ухьу гъаврикк ккауваликанра аьгъяхьуз. Ухьу гьякь Вуйириъ айибра аьгъяхьуз, фицики ухьу Дугъан Бай – Иешуа Машихдиъ ахьа. Думу – гьякь вуйи Заанур ву. Думу – гьаргандин уьмурра ву.
Йиз веледар, аллагьарихьан ярхла йихьай.