ЦIИЙИ МЯЛИМ
ЦIийи мялим дуфна кIури бицIидарин хабар вари школа вуйибси дарабгънайиган, Малла Гьяжи Эфендийиз гизаф бегелмиш гъабхьнийи ва сабпи йигъхъан хъюгъну чан аьраб чIалназ гъюру бицIидарикан бегьем мусурмнар ктаурза кIури кьаст кIваъ дибисну сифте классдиз гъафири гъапи:
– Учву бусурмнар вуйчва?
Чара имдру сакьюдар бицIидари "Ав" пну жаваб туву. Малла Гьяжи Эфендийиз мициб жаваб кьабул гъабхьундайи ва бицIидариз "алифба" кивуз хъюгъю:
– Учвуз мусурмнар вуйчва гъапиган "ав" макIанай, хъа дишла гьамциб жаваб апIинай: "Аллагь cap Мюгьюмед пайгъамбар гьякь", йипай.
Классдиъ дишла рази дару гьарйир ахьу ва староста Радикди гъапи:
– Я мялим, увуз диндикан сакьюдар суалар тувуз хай шулин?
– Тув.
– Ухьу вари инсанар Аллагьди халкь гъапIдар дарин?
– Bу.
– Дугъу ухьуз гьардиз чан хусуси фикир–фагьум тувнадарин?
– Тувна.
– Ухьуси халкь гъапIур Мягьямадра дарин?
– Bу.
– Дугъазра чан хусуси фикир тувнадарин?
– Тувна.
– Увхьан яв хилариинди, мялим, фу апIуз шулвухьан?
– КIаж.
– Дици вуйиган, фици хьибдивуз эгер учу: Малла Гьяжи Эфенди cap, хъа уву гъапIу кIаж гьякь ву дупну гьадму кIажуз икрам апIури гъабшиш?
– Хъа гьаци апIурира адарин? Узу гьардин гардандиъ гьялкья ипрайир вуза.
– Ари гьадму яв Мягьямад пайгъамбар гьякь, имбудар тарс ву кIури гьялкья ипуз аьвамарихьна гъарах, мялим. Учуз ич Иса кIури ччвур алди Чав халкь гъапIу инсанаригъна гъафи cap гьякь Аллагь чIяаьн вучуз – гъапи Радикди ва вари классдиъ: Иса Месить, Иса месить, кIури гьарай абхъу.
– Ту таркусалатар, ту таркусалатар, учву вердиш гъапIу бабариин няъна алибшриячв! – кIури му "мялим" школайиан агьрар апIури гьергну гъушу.