Х1ебицибси ч1ап. 24. 02. 2009дус. 10с. 27мин

Кьяшмира дирцили сайра вишт1аси Мях1яммад калхьулри. Халадудеш ил к1ап1варес къайгъилизиври. Гьар дуги илини уршила уршилис ца сегъуна-биалра тамашала хабар бурусири. Урши хабар-личи лех1изурли ускалъи.
- Халадудеш, бурагу наб хабар.
- Сегъуна, дила урши?
- Г1ях1си.
- Сегъуна бирусив г1ях1си? Сих1рула буришав, г1ях1гъабзачила, жанивартачила?
- Г1яяла базарличи вякьунх1ели бетаурси анц1букьличила бура.
- Гьу, ит хабар х1уни балусигу.
- Жагьх1ели ну дуршла, сирмугла мурч1азивад ч1упра виркьули вираси. Дурубти, дисби, к1ач1ни, к1уц1ли, сумки ишхъянти ва царх1илти дибг1янти сек1ал хъулир г1яг1!нидиркути дирира. Базар барх1и г1яяличи духили дирцира. Гьачам, дицили вайти-г1ях1тира нура, хъули чарулхъулри. Х1ерик1ус – бях1 биц1или улелъа. Кайили укули, луц1ули левай барх1и ахъиб. Се бируси? Хъули ваэс х1ябал сяг1ятлацад гьуни лебри. Г1елакахъили х1ебицибси ч1апра нура хъули ватихьира. Зихала дубуртала лут1мау виух1ели, буц1ала авла т1амала бакьира. Бурасли бархьли – вайт1а урухиубра. Цалра галга мякьлаб къарших1ебикиб. Се бирида – буц1и дуц1ли мякьла дак1иб. Т1ашдизурли х1ердик1есдииб. Дила кьаркьала руржулри. Илх1ели бек1лизи пикри бак1иб: «Ч1апла уди кайэс». Тяп илкьяйдали ну ч1апла уди кайира. Х1ера ца халасигъуна бец1 гъамбиуб. Сунт1бикун. «Ц1ум-ц1ум» или ч1апличи абац1иб. Царх1ил бец1 кьяш ахъбуцили ч1апличи жих1бииб.
Урши ахъли дукарях1иб. Урши мурталра ил мерличи х1ерли вирусири.
- Царх1илти буц1ира гъамдиуб ва ч1ап алав кьакьадешличил къунздик1есдииб. Ца шайчирад илди хури сари эсра вири. Амма нуни балулри илди жаниварти диъни. Ч1ап гьаргх1ебиахъес нуни ч1умали  х1яруби дуцира. Х1ера ца бец1ли гьалабси кьяш ч1апла удибад бархьаиб ва мух1лиличил ч1ап гьаргбарес къайгъибариб. Бец1ла халаси къайгъи ва халаси ц1акь лебри. Илх1ели нуни хунжазибад бак1ахъили дуруб (х1ябал дуруб х1едицили чардарибтири) бец1ла кьяшлизи вируг1ев ат1ахъунра. Дурубра сабира дахъал г1яйц1ъалаличил, дахъал биса, гьуя-вявличил бец1 бебшиб. Илис г1ергъи царх1илти буц1ира дебшиб. Ца шел минута дикибх1ели, ну айзурра. Къалабали ватихьира. Эгер дурубра ч1апра дицибти виасри, х1ела халадудеш хабурта х1евгьи.   
- Халадудеш, г1ур ил ч1аплис се барри?
- Г1урла базар бухили бицира.
- Марли вик1уду ?
- Г1е, марли. Г1урх1ели нуцун х1ешира.
- Халадудеш, ца гьат1и хабар бурагу.
- Жяг1ял дуги бурис, гьанна усен. Дуги г1ях1си бак1аб.
- Х1едра дуги г1ях1си бак1аб.