Комиссия. избербаш 1999 д

БУТ1АКЬЯНЧИБИ :

Фролов Геннадий Иванович – доктор математических наук, профессор, член РАН, ВУЗла ректор.
Г1ялимов Багьаудин Мухтарович – кандидат экономических наук, доцент, проректор по учебной части.
Басиров Запир Г1ялибатирович – проректор по хозяйственной части.
Иванов Павел Викторович –ВУЗла бек1 бухгалтер.
Х1яжиев Мях1яммад Г1исаевич – кандидат исторических наук, доцент, историяла факультетла декан.
Загьиров Х1яжи Г1умарович – кандидат филологических наук, профессор, филологияла факультетла декан.
Захаров Николай Абрамович – кандидат юридических наук, доцент, юридический факультетла декан.
Г1ябдуллаев Гъазимях1яммад Г1ялиевич – кандидат экономических наук, доцент, экономикала факультетла декан.
Г1яббасов Шамил Пашаевич – доцент, библиотечный факультетла декан.
Павлов Виктор Сергеевич – доктор экономических наук, профессор, комиссияла Председатель.
Волкова Ангелина Степановна – доктор математических наук, профессор, комиссияла бут1акьянчи.
Бройтман Мария Ивановна – доктор филологических наук, профессор, комиссияла бут1акьянчи.
Сивриди Виктория Павловна – доктор исторических наук, профессор, комиссияла бут1акьянчи.
Голицын Иван Алексеевич – доктор биологических наук, доцент, комисси-яла бут1акьянчи.
Сергеев Семен Васильевич – доктор химических наук, профессор, комисси-яла бут1акьянчи.
Семенов, Исаев, Зайцев, Олейников – комиссияла бут1акьянчиби.
Зарема – детдомла воспитатель.
Камиль – Заремала дудеш.
Калимат – Заремала неш.
Мурад – Заремала гьалмагъ, вачрукья, аспирант.
Жаннат – Заремахъала унра, ВУЗла бухгалтер.
Роза – Заремала гьалмагъ рурси.
Секретарша деканла филологияла факультетла.
Секретарша ВУЗла ректорла.
Пат1имат – детдомла няня.
Заведующая детдомла.
ВУЗла бек1 бухгалтерла хьунул.
Абдульчик – детдомла дурх1я.
Чароева, Каримова, Русланова, Мариям, Г1яйшат – филфакла студенткаби.
Маргарита – Ивановла хьунул.
Вайнукьаби.
Милиционер.
Макаров
Малик, Зоя, Г1ябидат, Александр – аспирантуни, Мурадла юлдашуни.


 














                Ц А И Б И Л    А Н Ц1 Б У КЬ                Ректорла кабинет. Кабинетла ургаб халаси стол. Стол алав кабиили вец1ну урегра адам.
С У Р А Т   Ц А Э С И Л
    Ректор алзули сай. Някъби столличи удяхъили кабиибтачи х1ерик1ули сай.
Фролов (г1янц1-г1янц1ли хъех1 бушили) Гьалмагъуни! Тянишуни ! Узби ! Нуни х1уша иша дучнила се мурад саби!? Халкьлизиб бурули бирар: жих1еварибси г1ях1ял – татаричивра вайси увулхъан или. Иличибли се бурес дигулра наб?      (Т1ул ахъбурцули) Наб бурес дигуси сек1ал ца саби: нушачи Москвализибад Комиссия лябкьули саби !
Загьиров Се ? Комиссия ?
Захаров Комис…ссия ?!
Иванов Се ? Се ? Ревизия ?!
  Лебилра тамашабирули саби. Ивановла гъайличи пишбирхъули саби.
Фролов Г1е, г1е, ах1ерти юлдашуни, комиссия ! Павел Викторович, х1уалра селичи урк1ухъунсири ? Вари, вари, ревизия ах1е, урухмак1ид. Ца камси комиссия саби бак1ибси нушала багьудила даража ахтардибарес.
Г1ялимов Комиссия г1урла базличибригу бак1ес г1яг1ниси. Сен иш базличиб бак1или ?
Фролов Гьанна бег1лара г1ях1си замана саби – сентябрь: ц1едеш дикьурли сари, урхьни ванали сари гьачамлис, санаторияби, курортуни дузули сари. Вайсив гьат1и гьанна бак1ни? ца жумяг1 итара-ишара бикули бурк1ех1е замана. К1инайс – ца камси рушбат барес г1яг1нибиркур. Сегъунти дубур-ланти саррая нуша, эгер нушачи бак1ибти г1ях1ли дац1ти някъбачил бархьаах1елли ? Гьу ?
    Ректор лебилра кабиибтала х1улбачи х1ерик1ули сай. Цабех1ти столличи х1ербик1улри, цабех1ти – бурхаличи. Загьиров виалли, висулри. Ректорли Загьировла х1ер буциб.
Фролов Се биубли ? Сен висулри Х1яжи Г1умарович ?
Загьиров Сен висусира гъариб ну, пакьир, дила неш шалг1еррухъи риалли ?!
   Лебилра тамашабиубли Загьировличи х1ербилзан.
Фролов Х1елак1ун неш ириъ шалг1еррухъунсири, бунагь-хат1ала урруцаб сарину.
    Вачавархибси Загьировли селра буресси х1****ули висусила диру.
Загьиров Итк1ун дила ну варкьибси неш сарри, гьанна шалг1еррухъунси ну айкьурси неш сари. Бара гьанна багьурра ца вец1ал минута гьалаб. Наб шилизи укьес г1яг1ниси саби, Геннадий Иванович.
Фролов Чевверхи, уртахъ, нушани селра х1ебагьурра.(Някъ бурцули) Х1ед арадеш биаб.
    Лебилра абизурли Загьировла някъ буцили дец1 балахъули саби. Загьиров дураулхъан.
Фролов Г1е, вайси сек1ал бетаурли саби бег1лара нуша дархибси замана. Чардулхъех1е нушала мазначи. Комиссиялизиб вец1ал адам саби. Председатель нуни валуси сай. Набчил варх МГУлизив уч1ули калунси сай. Ну Москвализи вашух1ели итала хъули хьуравирули вираси. Адамкьяйда ил г1ях1си сай, амма х1янчи т1алаббиру. Академик Зайченколи булан илала халаси х1урмат биру. Сен-сен г1ях1ил валуси виалра, илис ца кам-гьамси сек1ал барес чебуркъар.
    Леблилра ректорла гъай г1ердурцу.
Басиров Г1е, г1е, иличирад дех1дихьес г1яг1нитира х1уша, сенах1енну гьанна чина укьялра някъбачи саби х1ербик1ути.
Г1ялимов Бархьси саби, уртахъ ! Амма х1у сен вик1улри «иличирад дех1ди-хьес г1яг1нитира х1уша» или ?
Басиров (Пишяхъили) Геннадий Ивановичли бурни х1ясибли, комиссия саби лябкьуси ревизия ах1енну. Павел Викторовичлисра набра селизибадалра урехи агара. Ах1ену гьат1и Павел Викторович ?
Иванов Г1е, саби, дила юлдаш, саби.
Захаров Т1аш, т1аш, юлдашуни ! Илкьяйда асух1ебирар. Нуша ца гамили-чирра. Ил сек1айчила хъуммартидая, ах1ерти. Ишар лерти, х1урматла  адамтани, цагъунси пай кабихьес г1яг1ниси саби. Гьай-гьай белч1удицун ах1ен комиссияли ахтардибируси. Нушани бални х1ясибли, белч1удила дурабад, илдани студентуни сен-сен дурсрачи башулил, сен-сен х1ербирулил, сегъуна сабил илдала стипендия ва царх1илти суалтира арзес асубирар. Стипендияби х1ела шайчир сари, ах1ерси Павел Викторович. Общежитиеби диалли, х1ела някъбазир сари Загьир Г1ялибатырович. Нуни бални х1ясибли, белч1удила дурабад, стипендия к1иэсил баз чебиули ах1ен дила студентуна-ни. Общежитиелизив х1ерирули ах1ен юридический факультетлизив уч1уси цалра студент, сенах1енну х1ериэс низам-кьяйда агара. Илбагьандан х1уша-нира к1илилра пай кабихьес чевкъар. Аргъираяв ? 
Фролов (Дукарк1ули) Г1ях1си бяхъ чегахъади кьалли юлдаш х1уни ишди к1елра угърашличи. Чула мерличи кабатади жагали.
Захаров Г1е, Геннадий Иванович, чебуркъули саби. Чула мер чех1еба-ахъалли, ишди бек1личи абац1ес къайгъназиб саби.
Фролов Гьу, биур гьанна жалта диркьес. Нуша илди гъайли дугьес ах1енра учидикибти. Нушаб халкьласун х1янчилизи ахъес къайгъибарес г1яг1ниси саби. Цаэсилгъуна – гьар иша кайибсини сунела пай кабихьес чевкъар. К1иэсилгъуна – комиссияла бут1акьянчиби курортуначи, санаториябази бихьес, гостиницализи хьурабарес г1яг1нибиркур. Х1ябэсилгъуна – арцла дурабад жагати дурхъати савгъатуни дарес г1яг1ниси саби: икра или, бялихъ или, кубачила ханжулти или. Г1ур иличилара пикридулхъех1е. Гьанна бурая набзи чили чейсу курортуначи бикни ?
    Ректорли очкиби г1яшдарили алавчар х1ерик1ули сай. Ахъбуцибси някъ чебиули сай.
Фролов Г1ях1си саби, Николай Абрамович. Нушала гьалабла шагьар, курортла мер-муса чедаахъа. Лертигъунти музейтази бука. Санаторияби чини чейсу ?
    Ректорли очкиби урису.
Фролов Баркалла, Гъазимях1яммад Г1ялиевич. Х1язлис ах1енри х1у эко-номический факультетла декан. Гьанна – савгъатуни. Чини чейсу илди ?
Г1ялимов Нуни чейсис, Геннадий Иванович. Иличиб гьамадси сек1ал лебси ах1ен.
Фролов Баркалла х1едра дила мургьила бек1ла вег1 проректор. Дархьли гъайдик1ех1е, арц – нуни дедлугас. Илбагьандан иш таврализи (столличи кабирхьули) кайхьес г1яг1нити сари (пикриухъи) бурах1елли, азир доллар СШАла. Къаршиси леву ? Агара. Жаг1ял сяг1ят вец1личир арц ишар диэсли.
    Лебилра абилзули саби. Барх1и г1ях1бираб или аркьули саби.
Фролов Ах1ерти гьалмагъуни ! Загьировлизира багьахъирая ит сек1айчила.
Павел Викторович, Багьаудин Мухтарович, ца минуталис т1ашдизирая, буруси лебну.
Иванов Геннадий Иванович, бура се сабил х1ед г1яг1ниси, набзибад бетаруси сек1ал итмадан бирисну.
Г1ялимов Нунира бирис.
Фролов Г1ях1си саби, г1ях1си, юлдашуни. Х1язлис ах1енра х1уша нуни чердик1ибти. Къант1ли бурасли, х1уша наб г1яг1нидикибтира иш сек1айс. Павел Викторович, х1ела ведомстволизир дахъал х1едиэсти сек1ал дургар. Иванов Г1е, Геннадий Иванович, дургар. Ихкьяйда халаси бухгалтерия гьамадли ах1ен бек1барес. Сен-сен къиянни биалра х1янчи чекайзурли ункъдирис.
Фролов Стипендияби дедес х1еръа. Бархьли буриб Николай Абрамовичли, стипендияби бег1 гьалар дедес г1яг1нити сари. Иргъулрив ? Чинад дигара дарга арц. Диур к1ел базли дак1ибти процентуни. Жяг1ял-царах1ейс студентунани к1елра базли стипендияби касесли. Ил сек1ал х1ебарадли х1ела къуллукъ нуни ибгис. Гьанна укьен.
    Иванов Кабинетлизивад дураулхъули сай.
Фролов Багьаудин Мухтарович, х1у нуни студентх1ейчивадал валусири. Х1уни нура илкьяйда вагьес г1яг1нисира. Бархьли бура гьари набзи, бархьли, наб къянала яра жагати гъай дигх1егахъис, х1уни балули кьяйда, набчил кьабуллив дила заместительти ва деканти ? Илдала ургар сегъунти гъай иргъида х1уни ? Гьанна иша кабиибх1ели социальный, биологический, математический, исторический, ва царх1илти факультетунала деканти кьабулх1ебикибтигъунтиригу арц дурчнила х1екьлизиб.
Г1ялимов Гьай-гьара илдигъунти сек1ал наб х1ейгахъис, амма бархьли бурасли: г1е, илди кьабулли ах1енри. Библиотечныйла, ит баягъи, шин думкьихъан, Шамил Г1яббасов хъутурик1усигъунари: илцад арц чинад дурчути нуни или. Дахъ далагу мискинтала г1ердарес илдигъунтани. Ишдус кабурхух1ели, вец1алцад адам лебри илала. Гьарлизирад азир-азир доллар сайсулри ил угърашли. Гьанна висули сай илдицад арц чинад дургути или. Сунела рурсила муруйс сагаси «Волга» сен-сен асибал хьарбаэс г1ях1сири. Илдигъунти «мискин-пакьирти» к1ел гьат1и балас нуни: биологическийла ва химическийла деканти. Ит, х1ела юлдаш, Загьировра сай илдигъуна. Неш ребк1или арякьунси ах1енри, арц дурчниличи шакугибх1ели сайри ил гьавухъунси. Дила узикьарла рурси тер иличир руч1ули. Илини бурни х1ясибли отличникуназибадра арц, рушбат сасес къайгъназив вирар. Аргъес вирар х1евч1уси антукьализибад сайсалли, амма ункъли уч1уйзибад сайсес – бунагь саби.
Фролов Диур, диур, бек1 изес бииб. Шин кадуха гьари, х1ера ит графин. (Шин дужули) Бати, комиссия чеббикибх1ели илдала сусани дурцисну нуни.
Гьанна нушачи гьалабван дурала улкназибад адамти башули ах1ен буч1ес. Башутира – нушачиб дург1елих1ели саби башути. ВУЗла даража ахъбуцес г1яг1ниси  саби. Россияла бег1лара г1ях1ти ВУЗанала луг1илизи дикес г1яг1нитира нуша. Илбагьандан лябкьуси комиссияра нушаб кумекли бирар. Нуни гьалабра бурра: Председатель нуни валуси сай. Ца камси сек1ал баралли, г1ях1си кьимат кабалта.
    Секретарша гьаррик1ур, ректорлизи кагъар луга.
Фролов Комиссия бак1или саби. 
С У Р А Т    К! И Э С И Л
      Захаров ух1наулхъан.
Захаров Асубиралли ца сек1ал бурес г1яг1ниси саби, Геннадий Иванович.
Фролов Гьа, товарищ, ах1ен, господин Захаров, ваши, ваши, бег1лара г1ях1си замана вак1ирину. Сагаси хабар аргъес дигадли, комиссия бак1или саби.
Захаров Г1е, аргъира, ил сек1ал бурес сайри нура вак1ибси.
Г1ялимов Х1унилра сен-сен багьурри ? Гьанна адамти шайт1унтигъунти саби.
Захаров Гье… набзи министерстволизибад багьахъур ца дила юлдашли.
Фролов Г1ях1си, г1ях1си. Гьанна илди бак1кьалли бак1или саби, гьаннара нуша ишар лералра. Г1ябдуллаевра варх ухьес г1ях1си саби. Дила пикрили авал адам биур. Ишбарх1и гостиницализи аркех1е, жяг1ял – нуни илдас дила юртлизир хъулри х1ядурдирис.Николай Абрамович, укьен гьари Гъазимях1яммад Г1ялиевичлизира жиа.
   Захаров дураулхъан.
Г1ялимов (Сунези сай) Бахъх1и агарли сессия саби, илди угърашуни биалли гьанна саби бак1ибти. Х1ебак1алра г1яйиб х1ебирира чучи.Рахли се-биалра вайли баргили, яра чи-биалра набчила г1ярзухъи, нуни итцад къиян кабихьили асибси х1янчи уббухъес… Юх, ах1ен, илкьяйда х1ебирар. (Ахъли) Геннадий Иванович, сен бирара ? нушала г1ях1лази гьарли-марли лерти къиянтачила бурах1елли. Нуша арцла шайчирад г1ердурцули ах1енра, нушаб сегъуналра оборудование бурхьули ах1ен. Ихди журналти, газетаби булан къулбасдарес ВУЗла арц агара. Илкьяйда г1ердурца1елли нуша – белч1уди дебали усалбиркур нушала студентунала. Буралли, г1ялимтира, иткъи муг1яллимтира чула багьудила шайчиб г1елакабулхъан.
Фролов Саби, илкьяйда саби. Комиссиялизира бурех1е сегъунти тях1яр-кьяйда сарил кадихьибти гьанна ВУЗла дух1нар. ВУЗлис г1ях1си кьимат кабатахъес г1яг1ниси саби. Ил кьиматли лерил сек1ал дарсдиру. Г1ях1си ВУЗ саблин сагати оборудование, компьютерти, имц1али арц дурхьу. Чисалра диг1яндеш ах1ен нушала улкализиб бег1лара бишт1аси алапа нушала биъни. Нушачиб профессорличиб, Москвализир уборщицани халаси алапа кайсули сари. (Кисалабад сяг1ят дурайсули) Замана баили саби. Чинаба ишди юлдашуни ?
   Унза гьаргдирар. Захаровра, Г1ябдуллаевра бух1набулхъан.

С У Р А Т   Х1 Я Б Э С И Л
  Фролов, Г1ялимов, Захаров, Г1ябдуллаев.
Фролов Г1ях1си барилра дак1ни. Комиссия бак1или саби или багьахъи сабину, илдачил жагали х1урматличил гьунидаэс г1яг1нитира. Нушани авлилра машинти духьес г1яг1нибирхьур, сенах1енну вец1алцад адам бак1или саби. Виктор Сергеевич набчил варх калтис, г1урилти – х1яб-х1ябли х1ушани кабатирая. Далкьаирая, юлдашуни, далкьаирая, самолет кабиибла шел минута ардякьи сари. Нуша детаайчи байхъу сяг1ят аркьян. Ц1ахли саби Виктор Сергеевичлизибад.
   Кабинетлизибад дурабулхъан.
Фролов (Унза г1ерк1ули) Ца гьат1и сек1ал, министрлизира багьахъес г1яг1ниси саби. Николай Абрамович, аэропортлизи даибх1ели, хъуммартид дила уличирад зянкъдяхъис.
Захаров Аргъира, х1ябилра дяхъиша.
Фролов (Коридорлизивад вашули) Багьаудин Мухтарович, (арц  гьабурцули) ма ишну хьунрас х1ябал хала вавнала аса.
Г1ялимов Геннадий Иванович, се сари илди ? Бати, г1яг1ниси ах1ен. Нуни исис.
Фролов Х1ебиалли, х1унира баладгу, бег1лара жагати аса. Нушала г1ях1ял хьунри разибарес г1яг1нити саби. Лебнилра балуси саби хьунул адамлис сен-сен вавни дигахъул. Рахли аргъ бак1алли, дубуртазира аркех1е жагати вавни далц1ахъес. Бархьли буралли, нушайчиб жагати вавни чинабалра х1ебургар.
    Лебилра дукарбирх1ур.

К1ИИБИЛ   АНЦ1БУКЬ
    Аэровокзал. Итара ишара къунзбик1ути халкь. Къяр барили кадихьибти скамейкаби. Чемоданти, тавруми ва царх1илти г1яг1ниахълуми.
СУРАТ   ЦАЭСИЛ
   Кьукья барили т1ашли чумал адам. Мякьла кабиили х1ябал хьунул адамра к1ел мурул адамра цализи ца ахъли лякьирбик1ули саби.
Бройтман Бишт1аси аэропорт лебкьалли. Нуни гьачамалра ишгъуна чебаибси ах1ен. (Алавчар х1еррик1ули) Адамтира урухиэсти саби. Х1еръая ит муц1урла вег1личи. Телевизорлизив чеахъибси Радуевличи мешуси сай. Х1ябилра мешуси тев. Ишара х1ерик1ули сай.
Голицын Мария Ивановна, х1уни балули рургуд чиди улкализи рак1ибсирил ? Иш бек1бяхъунала улка саби. Телевизорлизирра х1уни ишар дирути сек1ал чедаили рургуд. Илбагьандан илди х1ела кьяшми к1ап1дара. Илдачи сай ит дубурлан х1ерик1уси. Хъуммартид, х1уни х1ебагьихъадли х1ела х1ял, чинилра селра х1ебиру.
Бройтман Сейк1улригъари х1у, Иван Алексеевич ? Х1уни къадагъабирулрив наб дигути палтар чегьахъес ? Дила кьяшмачи х1ерик1алли, се биру вик1улри х1у ? Х1ела пикрили, ишаб рурсби къант1а юбкабачил х1ебашар вик1улрив ? Х1ябилра башар. Илдас селра х1ебирути, набра х1ебаресгу.
Голицын Ах1ерси Мария Ивановна, аргъа ца сек1ал : х1ед нуни, яра чини-биалракъадагъабарес вируси ах1ен. Ну, рирхаи набчи, ишав ак1убли, халава-или, вец1ал класс делч1и, университет таманбарили х1ябц1али дусичивра имц1али х1ериубсира. Нуни цабаралра жагали далас дубурлантала г1ямрура, г1ядатунира, баркьудлумира. Чула мерличиб баталли, ишдичиб х1ялалати, намуслати, урк1игьаргти халкь лебти ах1ен Россияла бух1наб. Амма сегъунти г1ях1ти биалра, цабаралра ихтияр гадли, х1у дебали пашманрируд. Ишабти мурул адамти – х1и дуц1арти халкь саби. Нушачиб кьяйда ишабти мурул адамти хьунрачил пина х1ебиркьур. Амма рикалли « вег1 агарси », хаслира урус , Аллагь берцуди !
Сивриди Бархьа саби х1ела , Иван Алексеевич. Ишабти мурул адамти марлира х1и дуц1арти саби, буц1и саби. Мях1камли диэс чебуркъар х1ушаб, рурсби. Нунира балути саби ишди. Чуйнара рак1ибсира ну курортуначи, санаториябази, конференциябачи, презентациябачи, байрумтачи иш республикализи. Саби – г1ях1ти халкь саби, амма сахъли виэс г1яг1ниси саби. Ишавси верх1ц1али дус виубси мурул адам арасагъси сай нушачивси шуц1али дус виубси мурул адамичив. Дила гъай дархьтив ? Марбара Виктор Сергеевич.
Павлов Шямван дархьти сари Виктория Павловна. Юлдашуни, хъум-мартидая, нуша халаси х1укуматла халаси тахшагьарла вакилти сарни. Нушани ахтардидирути вузанала ца вузла ректор дила вахъх1ила юлдаш сай. Гьанна ил иша вак1ес г1яг1ниси сай. Илдала гьалар нуша х1яяагартили, намус-кьимат х1едалутили урх1едухъес къайгъи барес г1яг1ниси саби.
Голицын Нушани ил сек1айчила хъумх1ертех1е, Виктор Сергеевич.                (Сяг1ятличи х1ерик1ули) Амма нушала юлдашуни кьанбирули саби.
Волкова Цабара т1ашдилзех1е, ца вец1алг1и минут, х1ебак1алли – такси буцили гостиницализи аркьех1е.
Сергеев Сен къалабатира, т1ашдизая, гьанна лябкьули тебну. Цугли к1ел минутли итди унзализибад лябкьян.
Бройтман Х1уни сели балада иличила, ах1ерси Семен Васильевич ?
Сергеев Гьа, дила къакъба, урк1или наб г1еббурули саби. ( Пиширхъули) Дила гъай дархьтил ах1енал ца гьат1и минутли балад. Итди (т1ул бях1чиаили ) унзаличи х1еррик1ен.
Сивриди (Някъби диркили) Агь, ишди жагьти ! Нушала замана чарбарес !
Павлов Селра х1ебирар, Витория Павловна. Бати, г1ямруличи разити адамти сабину. Ца гъал дус гьалар нушара ихдигъунтири.
Сивриди Ах1енри, юлдаш, ах1енри. Нуша рурсбиуруз-х1яц1ли, паргъатли, нушала мер буцили дуира.
Сергеев Ирагу х1ушази, х1рая (т1ул бях1чииули) унзаличи.

С У Р А Т    К1 И Э С И Л
   Жагали бег1биубти авал мурул адам вавначил бух1набулхъули саби. Гьа-лавсигъуна някъбира шайчи ахъдуцили разиликаьиибтачи ветулхъули сай.
Павлов Г1е, вархьли увухъади, Семен Васильевич, итди нушачи саби лябкьути. (Саибси Фроловличи к1ап1иркули) Арали ватаби, дила Геннадий Иванович.  Чум яни, чум х1еб чех1еири ?
Фролов (Някъбазивад ватулхъули) Ах1ерси, Виктор Сергеевич, сен-сен даира ?   Дамсх1едамсурраяв гьунчир ? Сен саби хъалибарг ? Нушала тахшагьар – неш-Москва сен саби ?
Павлов Лерилра г1ях1ил сари, нушара арасагълира, баркалла гьунидаънилис.
Фролов Тянишдиирая юлдашуни, иш Павлов Виктор Степанович сай – экономикалала г1илмула доктор, профессор. Иш – Г1ялимов Багьаудин Мухтарович, буч1нила шайчивси проректор, экономикала г1илмула кандидат, доцент.
Павлов (Някъ ц1ац1абирули) Г1ях1си саби, Павлов Виктор Степанович.
Фролов Захаров Николай Абрамович, юридический факультетла дакан, юридический г1илмула кандидат, доцент.
Павлов (Някъ ц1ац1абирули) Павлов Виктор Степанович
Фролов Г1ябдуллаев Гъазимях1яммад Г1ялиевич, экономикала г1илмула кандидат, доцент, нушала экономический факультетла декан.
Павлов (Някъ ц1ац1абирули) Павлов Виктор Степанович. Юлдашуни, даширая гьанна х1ушара нуни тянишдирурая комиссияла члентачил. Иш – Волкова Ангелена Степановна, математикала г1илмула доктор, профессор.
Фролов (Някъ байбирули) Г1ях1си саби, Фролов Геннадий Иванович.
  Фроловли Волковас вавни луга.
Волкова Баркалла, халаси баркалла.
Павлов (Чериахъули) Бройтман Мария Ивановна, филологияла г1илмуртала доктор, профессор.
Фролов (Някъ байбирули) Г1ях1си саби, Фролов Геннадий Иванович.
   Фроловли Бройтманнис вавни луга.
Бройтман Ой, халаси баркалла х1ед, Геннадий Иванович, Х1ябилра жагати  лер !
Фролов Сен-сен жагати диалра , х1у г1урра  жагасири.
Сивриди (Шайчи) Гьу, гьанна варгиб сунес виэсси. Х1улбира, гъинч1ра, сарира, угъраш !
Павлов (Кариибси хьунул адам чериахъули) Сивриди Виктория Павловна, бег1лара х1урматчерси комиссияла член, историяла г1илмуртала доктор, профессор.
Фролов (Някъ бурцули) Г1ях1си саби. Геннадий Иванович.
   Фроловли Сивридис вавни луга.               
Сивриди (Разириубли) Халаси баркалла. Тамандиубли ах1ен дунъяличиб халкьлагъунти мурул адамти.
Павлов Голицын Иван Алексеевич, биологияла г1илмуртала доктор. Гьалавван сай доктор ветаурси, гьачамлис доцент сай.
Фролов  (Някъ ц1ац1абирули) Г1ях1си саби, Фролов Геннадий Иванович. Тамаша саби, сен профессорла у х1егибсив ?
Голицын Профессорла у галра наб ца, х1егалра. Ну доктор виъниличира кьабуллира.
Фролов Г1е, бархьа саби юлдаш, бархьа. Профессорла у иткъира луга х1ед,
доктор виубли г1ергъи.
Павлов (Чейахъули) Сергеев Семен Васильевич, химияла г1илмуртала доктор, профессор.
Фролов (Някъ ц1ац1абирули) Г1ях1си саби, Фролов Геннадий Иванович.
Павлов Ишди авалра : Семенов, Исаев, Зайцев, Олейников. Ца жумяг1ли тянишдирудая. (Пишяхъили) Замана биур.
Фролов (Някъби дурцули) Г1ях1си саби, Фролов Геннадий Иванович. Гьанна лерилра цаличил ца тянишдиубх1ели, нушани х1уша гостиница «Москвализи» жидирулрая, ца барх1илис. Г1ур, дила юртлизи гечдирурая. Даширая, дила г1ях1ли, дурадулхъех1ену. (Аэровокзаллизибад дурабулхъули) Нушала Каспий, Дербент, Гъуниб, Г1ярбук1, Балхар чедиахъех1е х1ушази. «Сен дак1ирара» х1еэсли, разили савгъатуначил хъулира дурхьурая.
Семенов Аргъибси саби Дербентличила, амма гачамалра чебаибси ах1ен.
Фролов Ах1ерси юлдаш, юх, господин Зайцев, Дербентцунра ах1енну, лебил нушала улкара чебиид сунела жагадешличил.
Семенов Геннадий Иванович, ну Семенов сайра. Х1ера иш сай Зайцев.
Зайцев Тамаша ах1ен господин Фролов хат1аикни. Ца бишт1аси заманала бух1наб урч1емал-вец1ал адамла у дагьес гьамадли ах1ен. Х1уни бурибси Дербентличила гъай даимбарили дигахъира наб, Геннадий Иванович. Нуни чумра жузлизиб белч1унси саби Дербентличила. Тарихли бурни х1ясибли Петр Чевях1си булан вак1ибсири Дербентлизи.
Олейников Дербентла пачах1унала тилади х1ясибли сайри Петр шагьарлизи ух1навхъунси.
Фролов Гьари юлдашуни, Дербентра, Петр Чевях1сира, царх1илтира балтах1ену, даширая машинтачи кадиирая. ( Машинала унза ибхьули) Набчил варх дила вахъх1ила юлдаш Виктор Сергеевич калтас. Нушаб цализи ца дурести дахъал сари. Х1уша х1ябалра машиналичи х1яб-х1ябли кадиирая.

С У Р А Т   Х1 Я Б Э С И Л
   Автомашинала бух1нала, шофер, Фролов, Павлов.
Павлов Жагаси мер саби х1ушала., Геннадий Иванович. Дигалли мякьлаб
урхьу, дигалли дубурти шадив вашес. Нуша москвичуни дусла дух1нар гьачамалра чиналра дукьес бажардидиркули ах1енра. Эгер бажардиикибил-лисра дунъяла арцра, нервыбира харждарес чебуркъули саби. Х1ушаб биалли, лерилра х1улбала гьалар сари. Агь, х1ябилра жагаси к1еб ик1 дубура. Се дубура саби ик1 ?
Фролов Ик1 шандан дубура саби. Жяв замунтазиб бихьибси у саби. Жяг1ял-царах1ел ик1а г1яяр аркьех1е.
Павлов (Гьигь бушили) Агь, юлдаш, баркалла ну ила т1алабварнилис, амма нушаб гибти  вец1ал барх1и сари. Нуни биалли отпуск берк1ира дачаличиб. Муртбиалра г1урх1ели лявкьяс, эгер миц1ирли каласли.
Фролов (Пишяхъили) Сейк1улригъари, дила юлдаш ? Х1ед гьанбиркулив нуни х1ези вец1алра барх1и ахтардиик1ахъули дурк1ахъисра или ? Юх, илкьяйда асух1ебирар. Нушала ВУЗ х1ед гьалабра чумра комиссияли ахтардибарибси саби. Гьанна ил ахтардих1ебаралра г1ямал бирар. Ил гьалабях1цун х1ебиалли, г1елабях1 арбякьи ах1ен. Илди х1янчи х1ела юлдашунани дируну, х1у бамсри ахъес пикриик1ен. Нушачи вак1ибси г1ях1ял нушани г1яйиб баресли, вац1ли яра кьабулх1ейкахъили урхьуси ах1ен. Ишди х1янчи адурхути ах1ен, верх1на вег1 кавшабну чула. Г1е, узира ну итх1ели, проректор вирух1ели.Гьанна наб кьадин дила проректорти бузаб. Нукьяйда пикриик1ен х1ура. Г1ях1си удули, г1ях1си бужули, г1ях1си б…ли г1ямру дурк1ути бирар.
Павлов (Разили) Г1е, юлдаш, х1ябилра дархьти гъай лер х1ела. Х1уни бурибсиличи лех1изес чебуркъар. Ца сек1ал хьарбаэс дигусири х1ези, геннадий Иванович, асубирару ?
Фролов Сен х1ебирусив ? Бурили башахъен  лех1ирхъулрану.
Павлов (Пикриухъи) Иш х1еб набчи г1ях1ладли Римлизивад нуни валуси профессор вак1иб. Ца жумяг1 калун. Илала вец1ну авра дус виубси урши леври. Ил вахъ зяг1ипсигъунари, дебали ч1укьасири, назиксири. Профессорлис ца камти икра г1яг1нитири урши валхес. Нуни килограмм асили дедира. Амма, х1уни балули кьяйда, Геннадий Иванович, ца килограмм биъх1ебиур ил урши валхес. Илбагьандан наб пикри бак1иб; се биишира нуни профессорла урши г1ур дус иша х1ушала цалра санаторийлизи живарасли. Ишар х1унт1ена
бялихъла икра дираргу ? х1ейрару ?
Фролов (Някъ михъирличи кабалтули) Агь, х1ела жан дат, Виктор Сергеевич, илгъуна бишт1аси тилади х1ябилра жагали бетерхахъиша нушани. Ил профессорла уршицунра ах1енну, илала хъалибаргра, х1ела хъалибаргра дарх дак1ая г1урла дуслис. Гьанна санаторияби дайхъулра диц1или ах1енну, мерани дирар. Дигалли икра – х1унт1ена ва ц1удара; дигалли бялихъуни х1ед дигуцад дирар. Илала дурабад дахъал мераначира шадир дикурая.
Павлов Баркалла халаси, баркалла г1ях1си гъайлисра. Г1ур дус х1ябилра вак1иша. (Улкьайзи х1ерик1ули) Селрайчибра х1ушала урхьу жагаси саби. Вазес ишдях1 алк1ули саби. Г1ебшни диалра х1ушачиб дуц1румван буц1арли саби.
Фролов К1инайс, барх1и ихъух1ели урхьначира аркьех1е, дярг1иб пиволара бужех1е. Ях1бара.

Х1 Я Б Ъ И Б И Л    А Н Ц1 Б У КЬ
        Детдом.
С У Р А Т    Ц А Э С И Л
       Авэсил классла дурх1нала хъали. Воспитательница, няня, дурх1ни.
Пат1имат Пакьирти. Беркесил х1ебиули сен ч1укьабиублилгъари. Г1ябдульчикла вях1личир ранг агара. (Бек1 х1яршбирули) Укен ах1ерси.
Г1ябдульчик Пат1имат зизи, добавка дигулра наб.
Пат1имат Агь, х1у халаваъ ! Чинад гиша х1ед добавка ? сек1ал агара биалли. Х1ера иша, селра агара. Лебилра х1ушаб цуг-цугли бут1ира.
Зарема Г1е, нушала повар Г1яйшатла ляжуби гьачамичир гьачам журугдирули сари, (гьигь бушили) берц1ибси пряниклаван.
Пат1имат Бархьа саби, дила рурси, ит угърашла сегъунтилра урези агара. Сунес сумка биц1или сек1ал х1ебучили х1якьян. Заведующаяла гъай х1ясибли, гьанна продукция ках1ебухалли, лертигъунти – х1ябал барх1илис сари калунти. Се бируси ишди пакьиртас , я палтар агара, я – беркесси.
Зарема Гьанна сагали вак1ибси шагьарла бек1 вахъ гапирулигу, итизи тиладих1ебарах1елли г1ур нуша чисалра г1яг1нити ах1енра.
Пат1имат Ил пикри г1ях1си саби, амма итичи сен-сен диутира нуша ? Приемнаялизиб баз гьалабли очередьличи кабилзули саби.
Зарема Нушани иличи (т1ул ахъбуцили) кагъар лук1ех1е, дурх1нала ва нушала уличибли. Дила юлдаш рурси терси сари итила администрациялизир рузули. Илизи кагъар бедах1елли, шагьарла бек1ла столличи биур.

С У Р А Т    К1 И Э С И Л
     Заведующая ляркьян.
Заведующая (Пишряхъили) Здравствуйте, дети !
Дурх1ни (Утначибад абилзули) Здравствуйте !
Заведующая Кадиирая, ах1ерти. Зарема Камиловна, сен саби дурх1нала аги-кьяйда ? Буч1улив ?
Зарема Г1е, буч1ули саби. Иш жумяг1лизиб цалра к1ила агара. Буч1ес къайгъназиб саби. Амма х1уни чебиули кьяйда дурх1нала я беркала, я палтар агара. Ишди гьаннала г1ергъити к1ел жумяг1 диъла беркай буки ах1ен. Диъ агарси беркала букалли дурх1ни буч1есрацун ах1енну, х1язли биркьисалра х1ебирар. Иткъира ч1укьати дурх1ни, гьанна чебаэс агара.
Заведующая Бархьа саби, дила рузи. Гьанна нушаб лерил сек1ал лугах1е или бурили сай министрли. Жяг1ял-царах1ел арц дак1ес г1яг1нити сари. Илх1ели лерил сек1ал исех1е.
Пат1имат Илди гъай ириъличирадал лер, амма сек1ал къулайдеш алк1ули ах1ен. Ц1ах сен х1ебилзуси чус или бик1ес ? Х1ера ихди дурх1начи, сели бег1биублил, сели букулил. Нушабра алапа авэсил баз гили ах1ен. Сен дуутира нуша паргъатли лебил Россияла муг1яллимти забастовкабачи дурабулхъу-х1ели ?
Заведующая Ах1ерси рузи, багьларии. Нуша ца-х1ябал адам дурах1едухъах1елра ца, дурадухъах1елра. Илизибад барсбируси сек1ал агара. Даг ну министрличи приемличи рякьунра.
Зарема (Тамашариубли) Министрличи ?
Заведующая Г1е, министрличи. Лерил сек1ал дурира. Ил набчил жагали
гъайик1и. Кумекбирис или буриб. Жяг1ял сунела машиналичир илини
г1яг1нити сек1ал лерху. Нушаб арцра лугас или буриб. К1ел базла алапа.
Зарема Ил г1ях1ла хабар саби. Амма дила пикри сабри шагьарла бек1личил кагъарличил дугьаризес. Нушала юрт гьанналис вец1аличибра имц1али балбарибси ах1ен. Юрт сагабаресбагьанданра г1яг1нити сари арц.
Заведующая Бархьа саби. Иш юрт вец1ну к1ира дус сагабарибси ах1ен. Гьаларла заведующая Аминат Саламовнани дак1ибти арц чина дирхъибалра х1****ас.
Пат1имат Чина дирхъути ? Кисала кайхьутири. К1идерх1ла юрт селис т1ашбатурсири или гьанбикули х1ушаб ? Дигалли постель, дигалли беркала барахъес лугути продуктаби, дигалли палтар асахъес лугути арц, ва царх1илти: илини лерилра вец1ал дус кисала кархьутири. Гьанна сек1ал х1ебиркух1ели, дедили савгъатунира сарира, ГОРОНОлизи кариили сари шабашбаби дурчес.
Заведующая (Пишряхъили) Х1уни г1ях1ил ралулригу Аминат Саламовна.
Пат1имат Ил дила унра сари. Цацах1ели хъа гьала кариили сунени дирутачила пахрумани риркьур.
Г1ябдульчик Пат1имат-зизи, наб Расуллира, Маринанира тап лугули ах1ен х1язли виркьахъес. «Х1у вишт1али сайри»,- бик1ули саби.
Пат1имат Агь, чула турсикла резин берд ! Ваши гьари, сен х1елугусил хьарбиэх1ену.
     Г1ябдульчикра Пат1иматра дурабулхъан.
Зарема Цацах1ели наб гьанбиркур, ишди дурх1нала бег1тани сен лайбак1ибтив или ? Сен ишдала игъбар агарсив ? Дурх1ни бигутасра илди адх1елк1ули бахъ язихъбирули саби. Цацабех1ти пачниван алк1ули саби, цацабех1ти детдомлизиб. (Халаси гьигь бушили карирули сари). Нушала дурх1ни дебали саркъибти саби: дигалли буч1нилизиб, дигалли спортлизиб, дигалли х1янчилизиб. Ишар спортзал, библиотека, компьютерти диаллири сен-сен г1ях1си биишира ?
Заведующая Агь, дила Зарема, сен шалатил х1ела пикруми. Амма х1едра замана баили саби х1ела дурх1начила, хъалибаргличила пикрирухъес. Сецадх1и руусири хъаллах1ериубли ? Чум дус риублири ? 
Зарема Се дек1ардеша ? Вег1лис кьабулси къаршиикалли дусми т1ент1-
лизилра х1едиру. Гьанна мартличир гъану авра дус риублира. Институт таманбарибларг1и пикрирулхъас.
Заведующая Чилра-мага леву ?
Зарема Лев. К1ел дус г1елавад вашули сай. Амма ну иличи рирхули ах1енра, сенах1енну давлала вег1 адам марси х1ейрар.
Заведующая Гьуя, х1ераягу ишичи ца. Сен или пикрибарилри х1уни ? ахмах. Ил х1ед г1ях1илзули виалли, селичилра пикримарик1удну рукьен.
Зарема Х1****ас, валлагь, се бирусилра. Нешра ил х1у рик1уси кьяйда каризурли сари. Илини х1ебучибси сек1ал агара наб. Гьар замана дудешра вех1илзули сай, сен х1якьусири или.
Заведующая Илини сукни бархьибу ?
Зарема Г1е, бархьили сай. Х1****ас гъану гех1ра дусла ух1нав ил авна сен-сен бажардиикибсил хъайчикайили дек1арикес ?
Заведующая Ил авна дек1арикибсив ?
Зарема Г1е, икибси сай. Илала дурабад, анашалара бит1ик1ули сай или буриб набзи.
Заведующая Гьари гьари, чини буриба ил сек1ал х1ези ?
Зарема Дила юлдаш рурсили. Илини къяна х1ебуру.
Заведующая Ил дурх1я х1ела юлдаш рурсили сели валуси ?
Зарема Барх институтлизиб буч1ули калунти саби.
Заведующая Х1ебиалли, илди барх буч1ули калунти саби, ах1ену ?
Зарема Саби. Шел дус буч1ули калунти саби. Ил гьар барх1и рурсбачил варх ваши или бури.
Заведующая Х1ела юлдаш рурси шери рякьунсив ?
Зарема Г1е, к1ина рякьи дек1арриубси сари. Пакьирла г1ямру гьарх1едизурли сари.
Заведующая Х1уша к1елра чинаралра къаршидикили чедаираяв ?
Зарема Г1е, гьар вак1алли ил набчи шадир рашар.
Заведующая Агь, ахмах, агь, ахмах ! Ил х1ела юлдаш ах1енну, душман сари.
Зарема Чи ? Розавгъари ?
Заведующая Илис Роза бик1усив ?
Зарема Г1е, Роза бик1уси саби. Ил дила ришт1ах1ейчирадал юлдаш сари.
Заведующая Или биалли, хьарбаа ил дурх1ялизи х1у чуйна хъаллавиубсири или. Розани ил сунес варес дигули, х1у рирг1ярургулри.
Зарема Или биэс асух1ебирар. Роза дила юлдаш сари.
Заведующая Сарил ах1енал баладра ил дурх1яла паспорт чебаадли. Дила пикрили ил гьачамалра хъайчикайибси ах1ен. Ил гьарли-марси г1ях1гъабза ургар. Илгъуна х1ейалри, х1у жявлил рархьрати царх1ил рурги. Бура, ил х1ечил сен-сен гъайик1ара ?
Зарема Жагали, малх1ямли гъайик1ар. Амма, халкьла бурала лебси саби :     «Паргъатси шягализир шайт1унти дирути сари» или.
Заведующая Бархьа саби, бархьа. Тяп илгъуна сари х1ела юлдаш Роза. Гьари х1ердик1ех1е илгъуна х1ериалли ил.
   Заремара Заведующаяра дурабулхъан.

А В Ъ И Б И Л     А Н Ц1 Б У КЬ
   Урхьула дуб. Мякьлаб кафе «Волна».
С У Р А Т    Ц А Э С И Л
   Кафела бух1нала. Фролов, Г1ялимов, Захаров, Г1ябдуллаев, Павлов ва царх1илти комиссияла бут1акьянчиби, официант рурсби.
Фролов Ах1ерти юлдашуни, ах1ерти г1ях1ли ! Нуша иш жагаси кафела дух1нар учидикнила мурад – Москвализибад бак1ибти г1ях1лас гьунидаъни саби. Бурех1е бархьли – нушаб г1ях1ли бигути саби. Ишди бак1ибти ( сунела заместительличи х1ерик1ули ) г1ях1лицунра ах1енну, нушала коллегабира саби. Илбагьанданра х1ушала х1урмат к1иркали халаси бирар. Нуни дахъал гъай х1едурис, амма наб бурес дигуси ца саби – х1уша, х1ушала мурад барили, жагали, паргъатли хъули ардукьни, нушала ургаб сегъуналра аргъ-х1ергъибси сек1ал ках1ели, къугъали лерилра гьунчидикесли. (Пишяхъили) Нушаб г1ях1ти кьиматуни дикили, х1ушаб – г1ях1си х1янчи бетерхурли ди-гулра. (Рюмка ахъбуцили) Дерхъаб !
   Гьар мерличибад дерхъабла рюмкаби ахъдурцу.
Фролов Гьанна гъай х1езиб саби, ах1ерси Виктор Сергеевич !
Павлов (Алзули) Баркалла, ах1ерси Геннадий Иванович, гъай гибнилисра, дурибти г1ях1ти гъайлисра. Х1ушани балули кьяйда, х1урматла юлдашуни, нуша х1укуматли х1ушала вуз ахтардибарахъес, се тях1ярличиб сабил х1еръахъес, илис кьимат кабатахъес дархьибтира. Гьанналауб, нуни балули кьяйда, х1ушала республиккализибцун ах1енну, лебил Северный Кавказли-зибра вузанала цаэсти къяяназиб бирусири х1ушала вуз. Илаб бахъал г1ялимти бузули саби, вец1ал азир азиричибра имц1ати студентли чебях1си даражала багьудлуми кайсули сари. Х1ушала вуз бег1лара жагаси ва шаласи хъали саби республикализиб. Ил х1ушала дях1някъ саби, х1ушала визитная карточка саби, х1ушала дардра, х1ушала разидешра саби. Ну ташмишвирули ах1енра ишкьяйда халаси г1ялимли бек1деш дируси вузлизиб селра х1ей-геси агниличи. Ну вирхулра х1ушала вузли бег1лара черях1ти кьиматуни кайсниличи. Берхъаб х1ушала вуз ! Арали датабая, юлдашуни ! Дерхъаб !
   Гьар мерличибад дерхъабла рюмкаби ахъдурцу.
Г1ялимов Халаси баркалла, Виктор Сергеевич, х1ела берх1ила нурвант шалати, къукъу-рямкьван саркъибти, шямван дархьти гъайлис. Бархьли буралли, гьанна ну х1ябал дус варх узулра Геннадий Ивановичличил, Геннадий Ивановичли бек1деш дирух1ейчирад  вузла рейтинг чуйнара ахъ-биубли саби, дусичиб дус студентунала белч1удила даража ахъбик1ули саби, финансыбала шайчирти суалти арзес имкан лябкьули саби. Х1ушани ахтардила х1янчи дурабурк1ух1ели чебиидая сегъуна даражаличиб сабил нушала вуз. Москва, Ленинградлайчи цугх1ебикалра, Ростов, Самаралайс г1елах1ебулхъан. Нуша, лерилра ВУЗла х1янчизарти, дирхулра, Геннадий Ивановичла х1ерлиур халаси ва чебях1си даражаличи адиркни. Ца гьат1и сек1ал, наб дигулра, ах1ерти г1ях1ли, юлдашуни, х1ушани нушала вуз ва лично Геннадий Иванович г1евуцили. Илала арадешлис дерхъаб !
   Гьар мерличибад дерхъабла рюмкаби ахъдурцу.
Фролов (Пишяхъили) Гьу, гьанна х1ушазиб саби, ах1ерти г1ях1ли, гъай. Пожалуйста, Виктория Павловна !
Сивриди (Уруз-х1яц1ли) Халаси баркалла ишди дурибти ванати, малх1ямти гъайлис, иш жагали баршибси столлис, х1ушала гьаргти урк1бас. Наб къиянни саби ишгъуна гьарзати, шалати аги-кьяйдаличи бурсириэс. Бархьли бурасли, ну чиди дигара мераначи раира: дигалли Алма-Атализи, дигалли Владивостоклизи, дигалли Одессализи, амма х1ушачиб кьяйда урк1и гьаргли наб чилра гьуних1еиб. Нуни чебиулра наб къаршили кабиибти г1ях1ялдеш дирути адамтицунра ах1енну, халати г1ялимтира сабни. Ну рирхулра х1ушани бек1деш дируси вуз чебях1си даражаличиб биъниличи. Х1ушала республика бишт1асибишт1аси саби, х1ушала халкь камти саби, илбагьандан х1ушаб чевкъар иш вуз калахъницун ах1енну вуз кьяйда, илала х1урмат, рейтинг, престижра ахъдуцес. Х1ушани пахру бирес г1яг1ниси саби, ишгъуна къиянси замана лебилра Россиялис, х1ушала вуз лебниличила. Наб дигулра ил гьар дус гьачамичибра гьачам берхъили, чебях1си даражаличи айкули. Дерхъаб !
   Стол  алав кабиибти абилзан. Хъат бирхъу, г1ур рюмкаби ахъдурцу.

С У Р А Т    К1 И Э С И Л
   Жагали вег1иубси адам гъамирар. Фроловлизи диг1яй се сабил буру.
Фролов Ах1ерти гьалмагъуни, диур дурибти гъай. Даширая бамсри ихъех1е. (Лишан бирули) Нушала халкьла макьамтани х1ушала дуклуми ляркьяхъу. (Столличибад к1уц1ул касили) Ма, буца, Мария Ивановна, раши делхъ дарес.
Бройтман Ой, Геннадий Иванович, нуник1ун далути ах1ен ихди макьамтачил делхъ дарес.
Фролов Селра х1ебирар, нунира далути ах1ен.
   Цалис ца г1елабад мурул адамта хьунул адамти булхъахъес жибиру.

Ш У И Б И Л    А Н Ц1 Б У КЬ
  Филологический факультет. Зачетунала сессия.
С У Р А Т   Ц А Э С И Л
   Бишт1аси аудитория. Загьиров ва шел студент рурси.
Загьиров Х1ушаб чум сяг1ят гиша х1ядурдиахъес ? Араг1еб дус дуч1ух1ели х1ядурх1едиубти, гьанна чум сяг1ят гасра х1ядурх1едирудаяну, бег1лара жагасигьарли дашеная. (Лимонад карт1ули) Раши Чароева, х1у сарри дила бег1лара жагасигъунану.
Чароева Х1яжи Г1умарович, нук1ун гьачам х1ядурли ах1енра, асубирару бег1ла г1ергъи гъайрухъасли ?
Загьиров Раши, раши, дила чат1а. Ну г1ях1си гьавличив левай къалаба къалабали дашиная. (Някъли гьалабси парталичи кариахъес лишанбирули) Карии.
Чароева (Зачетная книжка гьала кабирхьули) Бег1ла гьамадси билет чинаб саби, Х1яжи Г1умарович ?
Загьиров (Рурсила някъ буцили гъяжбирули) Набчи х1у чум сяг1ятличир рак1ес рируда ?
    Аудиториялизиб рурсби г1яшли дукарбирх1ур.
Загьиров (Нудби кьямшдуцили) Цыц! Угърашуни. (Рурсиличи х1ерик1ули) Чум сяг1ятличир ади, дила къакъба ?
Чароева ( К1ел т1ул чедаахъили) Илгъуна ах1енра ну.
Загьиров Гьу, г1ях1си. (Т1улли к1иэсил номерла билет гакбирули) Балулрив ил билет ?
Чароева Г1е, балулра.
Загьиров (Зачетная книжкализи лук1ули) Балули риадли рукьен.
Чароева Баркалла, Х1яжи Г1умарович.
   Хъямбарили зачетная книжкара сарира рурси дурарулхъан.
Загьиров Агь, х1ела хъали мадуъ, х1ябилра сарерхурси хер ! Г1ур чи ляр- кьяна ? Раши, Каримова.
Каримова (Зачетная книжка гьала кабирхьули) Х1яжи Г1умарович, ну жагали х1ядурриубли ах1енра.
Загьиров (Кьяркьли) Сен ? Жагали, х1у х1ела гьалмагъличил дурарулхъу-х1ели, х1ядуррии.
Каримова (Рисули) Дила хала неш ребк1или .
Загьиров Се ? Хала неш ребк1или ? Чуйна рубк1уси ил ?
   Кабиибти рурсби дукарбирх1ур.
Загьиров Лех1, угърашуни ! Чум лебтивилди х1ела ? Подкурсуначибал к1елра бебк1ибти биаллири ?
   Каримова гьат1ира г1ях1ил рисириру.
Загьиров (Зачетная книжкалаб арц чебаили) Гьу, ах1ерси, биур рисес. Ну г1ясивиблихьалли,тамай урк1ец1иагарсира ах1енра. Эй, рурсби, т1ама-гьама камдарая. (Зачетная книжкализи лук1ули) Арадеш биаб х1ед, дила рурси !
Каримова Баркалла, Х1яжи Г1умарович !
   Рурси зачетная книжкара касили сарира дурарулхъан.
Загьиров Г1ур чис дигули зачет бедес ?

С У Р А Т   К1 И Э С И Л
   Лебилра итди. Унза гьаргдиру. Деканна секретарь гьаррик1ур.
Секретарь Чевверхи, Х1яжи Г1умарович, х1ечи зянкъик1уси тев.
Загьиров (Г1ясивиубли) Чех1ейулрав ну сели виркьулрал ? Чи саю ил ?
Секретарь Господин Фролов сай.
Загьиров (Т1ама барсбарили) Илкьяйда рик1ен гьат1и. Карии иша дила мерла. Х1еррик1ен ишдачи чебх1елук1ахъес.
Секретарь (Уталичи карирули) Г1ях1си, Х1яжи Г1умарович.
   Загьиров дураулхъан.
Секретарь (Шоколадла кофета кайсули) Далкьаирая рурсби, х1ушаб дигути билетуни х1ядурдарая.
    Рурсби столличи дуц1булхъан. Чус дигути билетуни х1ядурдиру. Чули дагьесли кадирхьу.

С У Р А Т   Х1 Я Б Э С И Л
  Унза гьаргдиру. Загьиров ух1наулхъан. Уталичи каръу.
Загьиров (Г1ясивиубли) Далкьаирая, чи саю гьанна лявкьуси ? Раши Русла-нова.
Русланова (Зачетная книжка столличи кабирхьули) Касишав билет ?
Загьиров (Зачетная книжка ибхьули ва арц кайсули) Каса, ралкьаи.
Русланова Цаэсил билет.
Загьиров (Зачетная книжкализи лук1ули) Гъайрик1ен.
Русланова Парт1у Пат1иматла образ… ва Черях1ти дургъбас г1ергъити дусмала проза.
Загьиров Гьари х1ердик1ех1е, лекциябачи сен-сен рашадил. (Тетрадьлизи х1ерик1ули) Духучан, цалра лекция бархьбатурли ах1ен иш рурсили. Бархьли бура, даладу илди суалти ?
Русланова Г1е, Х1яжи Г1умарович, далас.
Загьиров Х1ебиалли ишгъуна суал: чум жураличи дурт1ули Батирайла далуйти ?
Русланова Х1ябал жураличи: сунечила, г1ях1гъабзаличила ва дигайличила.
Загьиров Мисаллис белч1ен ца г1ях1гъабзачила далай.
Русланова Къийин дибил мусанир
                Азирличол дяв дикьул
                Алмас дархил мисри тур
                Хьадуцили някълизи.
Загьиров (Зачетная книжка някълизи лугули) Биур, рукьен. (Очкибала чедивад х1ерик1ули) Раши Мариям.
Мариям (Зачетная книжка кабирхьули) Х1ябц1алиэсил билет.
Загьиров Г1ях1си, гъайрик1ен.
Мариям Цаэсил суал – Сукъур Къурбанна далуйти, К1иэсил – Зияудинкьа-дила г1ямру ва творчество.
Загьиров Къант1-къант1ли бура.
Мариям Сукъур Къурбанна далуйти, Батирайла кьяйда, дархдаси сари халкь-ла мух1лила пагьличил. Фольклорличи илала лирика мешубиркули саби об-разуначибли, халкьла символикаличил, композициялашалти элементуначил, мез жагадирахъути г1яг1ниахълумачил. Фольклорлизир кьяйда Сукъур Къур-банна произведениябазир даргес вирар миц1ирбарибси образличи дугьабиз. Илар, фольклорлизир кьяйда, чедаэс вирар бех1бихьудра таманбиънира. Илала произведениябазир къаршидиркур символла дег1ти образуни : «мургьела къакъба», «кьушме мургьела тази», «х1улбе лаг1лулла бялихъ», «ккули чергес мукьара» ва царх1илти. Сунела назмуртазир поэтли дузахъули сай даргала халкьла буралаби. Масала, даргала халкьла бурала : «Мас бицес маслиг1ятчи г1яг1ниси сай», бух1набуцили буч1ули сай далай:
«Базарледил вачар
 Садил дитг1арар
 Маслих1ат баркьисе
 Гьирав г1айхванне,
 Раши, рурси иргъид
 Урккав вашиссе ».
Сунела далуйтази Сукъур Къурбанни цацадех1 фольклорла элементуницун ах1енну, араг1ерли произведениеби дух1накайули сай. Масала :
Г1ала дила диккайра,
Дерхъиб хъура хъябхъяра.
Агь ч1елланра карц1айра
Ц1уэрира маркара
Улкас далдичис вара
Айс шаласе дунеллад ?
Илбагьандан саби иш халкьла далай Сукъур Къурбанна саби или буруси. Поэтла поизведениябазиб халаси мер буцили саби дубурлан хьунул адамла образли. Илала образ мешубиркули саби фольклорла образличил. Ил чериахъули сари «Х1яжла хъулид делк1унсе дила мургьела гъайк1ар» яра «Шагьрустан кагъарлед мар ц1уттар накьиш». Поэтла далуйтазиб халаси мер буцили саби хьунул адамла палтарли. «Ч1ях1аядил к1ап1реван хамххалед далгун палтар». Хьунул адамла михъири поэтли цугбурцули сай ц1уба нусиличил : «Михъири нусилаван».
Загьиров Биур, к1иэсил суал.
Мариям Зияудинкьадила г1ямру ва творчество. Зияудинкьади ак1убси сай Къуппала шилизив 1877 ибил дуслизив.Илала бег1ти давла лебти адамти буили саби. Вишт1ах1ейчивадал илини мадрасализиб кьуръан дуч1ули сай. К1инайс ил халаваибх1ели Даргала Округлизив кьадили калтули сай. Дахъал х1укуматуни чедидяхъили г1ергъи Зияудинкьадини г1ярабла мез руркъули сай. Ил тянишиубли сай  востокла литератураличил. Зияудинкьадира г1ярабла мезличил назмурта лук1ес вех1иркули сай. Дагъистайзиб Совет Х1укумат кабизурли г1ергъи…
Загьиров Биур рурси. Илала творчестволичила къант1-къант1ли бура.
Мариям Зияудинкьадила творчестволизир дахъал къаршидешуни лер.Илар лер динна назмурти, чузирра г1ямруличи разиагни чебиахъути. Лер дарган мезличи шурдатурти назмурти. Илини дарган мезличи шурдатур цацадех1 кьуръанна сураби, цацадех1 жузи. Илис «урибси тилмаж, г1ялим» дик1а-х1елра нуша хат1ах1едиркех1е. Нушачи баили саби «Бустани Ц1удахари» бик1уси жуз. Лер илала жагати лирикала назмурти, чузирра г1ямрула гьавли халаси мер буцибти. Илала лирикализиб халаси мер буцили саби риганайла образли. Бурули кьяйда, сунела лерилра г1ямрулизир Зияудинкьадини ца хьунул адамличи дигай дихьибтири. Иличи хъайчикайэс бикибси ах1енри, сенк1ун ил мискин хъалибарглизирадсих1ели. Илди гьарх1едизурти дигайли-чила сари дахъалгъунти поэтла назмурти. Риганайла сурат бирух1ели поэт г1ярабла автортачи мешуиркули сай. Масала :
«Шагьла нур дулгахъай
 Паранг г1яббаси.
 Г1у дила ниг1матти
 Диккайла юлдаш.
 Х1ясрат халкь х1яйранил
 Гьиндустан къакъба.
Загьиров Биур. Х1уни, рурси, сек1ал балулри. Ну иличи разилира. Амма ургади х1уни наб сек1ал бихен. Илкьяйда асубируси ах1ен. Гьачам чуду хили ну вирг1ях1ергура. (Зачетная книжкализи лук1ули) Гьанна рукьен.
Мариям (Пишряхъили) До свидания, Х1яжи Г1умарович !
Загьиров До свидания. (Калунси рурсиличи х1ерик1ули) Гьу, дила ах1ерси, х1ядурлирив ? Раши, Г1яйшат, каса билет.
Г1яйшат Вец1ну х1ябраэсил.
Загьиров Вец1ну х1ябраэсил. (Зачетная книжкализи лук1ули) Баладу ? Сегъунти суалти сари? Делч1ен.
Г1яйшат Хадижат Г1ябдуллаевала творчество ва революциялис г1ергъити дусмала поэзия.
Загьиров (Рурсила мякьла карули) Даладу илди суалти? (Рурси к1ап1рурцули) Х1едаладли нуни г1ердурис.
Г1яйшат Х1яжи Г1умарович! (Ратрулхъули) Сейк1улри гъари? Абдалмага виублирив, се сайри?
Загьиров (К1ап1руцес валилзан) Ах1ерси чат1а…
Г1яйшат Уввац1и, хьунча дагъа. (Гакирули) Агь, х1ечи няг1на бак1! Адамрив х1у ?!
Загьиров Т1аш, рурси, т1аш ! Хъуммартид нуни сабни х1ед зачет кабалтни.
Г1яйшат (Зачетная книжка хъямбирули) Х1ези нуни г1ур зачет х1елугас, комиссиялизи бедлугас. Х1уни х1****ули виадли, багьи: дила авал узи леб. Илдани х1у пишипях1явирури, бухъна г1ежа !
Загьиров Гьу, рурси, черрерхи. Иткъи масхара саби барибси.
   Г1яйшатли рируг1ер гакрикили Загьиров каркахъу.
Г1яйшат Т1ашизи, угъраш, т1ашизи !
   Г1яйшат дурарулхъан.
С У Р А Т    А В Э С И Л
   Загьиров сайцун.
Загьиров Агь, къугъаси тер ит Г1яйшат ! Т1ашризи, дила микьи, ца багьа наб сарри х1у риркусину. Х1ед чуйнара набчи рак1ес чебуркъар.
   Кьут1ла т1ама.
Загьиров (Лук1усила дарили) Да, даширая.
   Унза гьаргдарили секретарь ляркьян.
Секретарь Х1яжи Г1умарович, ишди табельти къулбасдарес г1яг1нити сари.
Загьиров Се табельти сари ? (Х1ердирули) Гьа, дирис, сен х1едирути. (Къул-басдирули) Х1ябилра дирис.
Секретарь Ишара (т1ул кабатурли) кабати.
Загьиров (Рурсила кьяшличи някъ архули) Иша ках1****ишав ?
Секретарь (Някъ убисули) Г1яг1нили ах1ен.
   Секретарь дурарулхъан, илис г1ергъи Загьировра.

У Р Е Г  И Б И Л    А Н Ц1 Б У КЬ
   Ректорла кабинет, деканти, проректорти, бек1 бухгалтер.
С У Р А Т    Ц А Э С И Л
   Ректор алзули сай. Бак1ибтачи х1ерик1ули сай.
Фролов (Г1ялимовличи дугьаилзули) Х1яжи Г1умарович чех1ейулрагу, чинава ? Х1ек1илив шилизивад ?
Г1ялимов Х1****ас шилизи вякьунал-х1якьунал, амма даг зачетуни дурцули факультетлизив леври. Илизира бурибси саби. Гьанна вак1ес г1яг1ниси сай.
Фролов Х1ебиалли, иличи х1ерли ках1едирэх1е, иткъира замана камси саби.
Цаэсилгъуна суал нушала – арц дучни саби. Иша кабиибти цацабех1тани бала комиссия нушачи лояльно х1ербик1ни. Илис сабабли диубти чумра шарт1 лер. Цаибилгъуна – Председатель комиссияла, х1ушанира балули кьяйда, дила узигъуна адам сай. К1иибилгъуна – нушала г1ях1лас дубурланти г1ях1ли бигути, урк1игьаргти адамти саби или гьанбиркули саби. Илбагьандан нушала чебла – г1ях1ялдеш дарни. Х1ябэсилгъуна – ну вирхулра, нушала ВУЗла преподавательский коллективра, студентунира бег1лара чебях1си даражаличиб биъниличи. Наб гьанбиркули саби нушала къайгъни ва цацадех1 реформаби дуг1ли арх1ядякьун или. К1иэсил халаси суал нушани арзес г1яг1ниси – нушала г1ях1ли бамсри ахъахъес шадиб бикни. Аргъая ца сек1ал : бак1ибтани, бахълира, Москвала дурабад цар-х1илти мерани чедаибти ах1ен. Илдас чумра дус курорт-санаториялизи гьанналис букьяс бикили ах1ен. Гьанна илдас дет1ести ахтардлумази ахъесванра ах1и, урхьула дубличиб, Дербентлизиб, Кубачилизиб, Домбайлизиб, « Орлиное гнездо » курортличиб шадиб башес дигахъу. Эгер нуша бажардидикках1елли, нушала г1ях1лас илдигъунти сек1ал бек1дарес, илди нушачиб кьабулли бирар. Илала дурабад бег1лара г1ях1ти ресторантази аркех1е. Хъули аркьух1ели х1унт1ена бялихъ, икра, г1ярбук1ла мургьи-арцла сек1ал пешкешдирех1е. Нушаб « авла » биалра кабатахъес г1яг1ниси саби. Илбагьандан юлдашуни… (унзаличи х1ерик1ули)…
    Загьиров ух1наулхъан.
Загьиров Чевверхи, Геннадий Иванович, кьанкайубра…
     Мякьлаб цугбикибси уталичи кайрар.
Фролов Селра х1ебирар. (Кабиибтачи дугьаилзули) Илбагьандан юлдашуни нушани, азир-азиралра доллар дучес г1яг1нити сари. (Кабиибтачи х1ерик1ули) Кадухираяв ? Кадухибтани иш кагъарлизи (чебиахъули) х1ушала у белк1еная ва къулбасбарая. Арц иша кадирхьеная. Иш нуни лук1улра (сунела у лук1ули) цаэсил дила у, х1ера ишди арцра.
   Бак1ибтани уми лук1а, арц кадирхьу. Арц дедибил гьавли дураулхъан.
Фролов Баркалла юлдашуни, г1ях1си х1янчи саби. Господин Захаров – х1ура, господин Г1ялимовра, х1ура – Иванов ца минута т1ашдизирая.
 
С У Р А Т    К1 И Э С И Л
     Ректорла кабинетлизиб Фролов, Иванов, Захаров, Г1ялимов.
Иванов (Бек1 ахъбуцили) Цугли вец1ну цара азир  лер.
Фролов Г1ях1си саби. Жяг1яйчирадал харждирес дех1дирхьех1е. Мургьила тукейзирад цаца жагати мургьи-арцла сувенир-савгъат исех1е. Председатель-лис – ц1уба варгьира, арцли някьишбарибси шушкара исех1е. Илди сек1ал дарах1елли, нушаб дигусигъуна кьимат кабалта. Гьанна г1яг1нити ах1ен илди исес, к1инайс – саби хъули аркьух1ели. Жяг1яйчибадал бех1бихьили илди шадиб бихьес г1яг1нити саби. Х1унирив, Николай Абрамович, илди сек1ал чесибти ?
Захаров Г1е, сарри.
Фролов Х1ебиалли (арц кайсули) бех1бихьудлис к1ел азир каса. Дарсда-рахъили нушала арц саса. Сен-сен саби долларла курс ?
Иванов Ишбарх1и х1ябал азирлим верх1даршлим шуц1али саби.
Фролов Агь, сунела вег1 вебш ! Х1ябилра хъярхъли халабик1ули х1ебиалли.
Иванов Халах1ебик1ес бирару гьат1и, дахъалгъунти завод-фабрика т1ашли диалли, шила хозяйство кабушили биалли ? Дурала улкназирад дедили дахъал-дахъал мургьи « окорочкаби » сари или забван хьанц1а х1ябал г1яр-г1яла кьяш дихули сари. Нушачир г1ярг1ни адилкьни пайдаагарсили уббулхъули саби. Г1ялимов Агь, иш Абрамовичлис гъайухъес бихьалли, г1яжаибси доклад биру. Илди сек1ал нушанира далути сарину, х1ези гибти арцличи х1еръа. Цалра студентли лут1арину (пишяхъили) мях1камли вии.
Иванов (Гьимук1или) Х1елут1ара, ну хъяша х1ейишагу. Бег1 гьалаб х1еби-алли нуни ишгъуна сумма някълизи касибси сен лут1усира ? 
Захаров Ваши набчил варх нура бухгалтериялизи аркьулрану. Бурес хъумартурра, Геннадий Иванович, студентунас стипендия бут1илра.
Фролов Г1ях1си саби, г1ях1си. Х1ела бухгалтериялизиб умудеш бара, Абрамович, се дигара биэс асубирарну.
Иванов (Гьимук1ибсин) Бухгалтериялизир лерилра сек1ал чула мерличир сари, лерилра документуни жагали далкьаурли сари.  Г1яйиб баресси тях1яр агара.
   Лебилра кабинетлизибад дурабулхъан.
В Е Р Х1 Ъ И Б И Л    А Н Ц1 Б У КЬ
    Иванов Сунела машинализивад дураулхъан някълаб арцли биц1ибси тав-рара сайра. Хабарагарли хапли илала тавра к1ел жагьил адамли хъямбиру.
С У Р А Т    Ц А Э С И Л
   К1идерх1ла юрт, мякьлар машинти, милиционерти, учибикибти хьунри ва муйли.
Милиционер Гьалмагъ, Иванов, х1уни бурни х1ясибли, х1ела таврализир ВУЗла арц сарри.
Иванов (Бек1 ахъбурцули) Сарри.
Милиционер Илди сен х1уни бухгалтерияла сейфлизи ках1едихьибтири ?
Иванов (Висули) Ягъари, аргъа х1уни, илди долларти сарри нушала арцлис дарсдарахъибти. Илди нуни сейфлизи кадихьес или х1ядурдарибтири. Х1еба-лас итди угърашуни чинад багьарибиубтирил…
Милиционер Х1ера ит следователь. Гьанна итизи гъайик1ен.
Макаров (Х1унт1ена книжка чебиахъули) Следователь Макров.(Ивановлизи) Х1у сайрив потерпевший ?
Иванов Сайра.
Милиционер Гьалмагъ майор, нушала вузла бек1 бухгалтер Иванов сай иш.
Макаров Г1ях1си саби, г1ях1си…
Иванов Гьачамлис селра агара г1ях1си. Г1ях1си бииши илди х1ушани гьанналис буцили диадаллири.
Макаров Г1ях1си бииши х1ела арц чула мерличир датурти виадри. Се арц сарри илди ?
Иванов вузла арц сарри. Доллар барх1ичиб барх1и ахъбик1ни багьандан дарсдарахъибтири.
Макаров Чум къуруш лерри х1езир ?
Иванов Аъ, (урк1ухъи) буссяг1ят.
Макаров Пакьирли урк1ухъи чум къуруш леррил булан хъумкарти сай. Чум къуруш лерри ?
Иванов (Пикриухъи) Гьа, цугли урегц1али миллион.
Макаров Се ? Урегц1али…
Лебилра Урегц1али… Урегц1али миллион… Урегц1али миллион къуруш. Ах1ен, урегц1али миллион доллар иб…
Макаров Илдицад арц касибх1ели сен охрана агарли вашусири х1у ? Ишаб се сабил леб…
Иванов Вирхаи, гьалмагъ следователь, охрана лебри. Иша ну кили арбякьун. Дигадли чузи хьарбаа. Илди г1елабикьибмадан, чинад багьарибиубал х1****ас, к1ел жагьти адам чебухъун. Цали бек1 буциб ч1ярх1ейк1ахъес, цали някълизибад  арцли биц1ибси тавра хъямбариб.
Макаров Нуни охрана хьарбиис.Гьанна бура сен-сен бег1биубтирил ? Ахътирив ? Г1яштирив ? Х1улби. Гъез, дях1някъ сегъунтири ?
Иванов Валлагь, селра гьанх1ебиркур.Цала суранна ц1удара куртка сабри. Царх1илла манавшагъуна ч1янк1ила  сабри. К1елра ахъти, дяг1ути хъуц1-румар жагьилти сабри.
Макаров (Тетрадьлизи лук1ули) Гъез сегъунтири ?
Иванов Гъез ц1удара дииши… Цаличиб спортла кьап1а сабри. Итилличиб, суранна курткала вег1личиб, Жириновскийлагъуна кьап1а сабри.
Макаров Илдани цала цали уми ахъибу ?
Иванов (Пикриик1ули) Кино… гонг. Кин…гонконг… ах1ен. Ца г1яжаибси сабри цала. «Уца конгонг, уца конгонг»,- или вявик1и ца.
Макаров Гьа, вагьурра, кинконг х1ейиши ?
Иванов Г1е, г1е, сайри кинконг. Кинконг бик1и. Х1ебиалли, ил х1уни валусив, гьалмагъ следователь ?
Макаров Ишар суалти нуни сари лугути. Чинабях1 гьаббухъуна илди ?
Иванов (Т1ул бях1чиаили) Ит юртла г1елабад бебшиб.
Макаров Селра х1ебирар илди ца багьа бурцех1е нушани. (Пикриличил) Кинконг, кинконг, т1ашизи виркурину дила някъбази.
Иванов Гьалмагъ следователь, илди угърашуни бурцниличи умут лебу ?
Макаров Леб, эгер (пишяхъили, г1яшли) вец1ал процент наб гадли.
Иванов Вари, вари. Илдик1ун дила ах1ен, ВУЗла сари.
Макаров Х1у нуни язихъирулри, ах1ерси бухгалтер. Нуни ибси х1ебарадли,
лерилра арц кайхьес чевкъар х1ед, барадли – вец1ал процентцун. Пикриухъен
вец1ал гьамадлил, даршал гьамадлил.
Иванов Ил х1ела (г1ясили) х1янчи биалли…
Макаров Биалра х1ебиалра ну вик1уси бара. Х1ебарадли – урегц1али миллион гьамадли ах1ен чардарес.
Иванов Г1ях1си, х1у вик1уси биаб, ну кьабуллира.
Макаров Х1ебиалли, ишдуги лявкьясну х1ядурдара.
Иванов Х1уни илди даргили х1ейадли !
Макаров нуни илди даргасли х1у наб селис сайри г1яг1ниси? (Пишяхъили) Лерилра наб дараслира ну чили сайра х1елтуси?
Иванов Х1ед илкьяйда вик1ес асух1ебирар. Х1уни х1ела х1янчи бархьли бузахъен !
Макаров Вявмайк1уд ! Х1ушани бузахъулраяв? Ириъ дила урши кархахъес багьандан юридический факультетлизи шел азир доллар т1алабдариб. Нуни биалли, ца камти сари т1алабдирути. Х1ед дигуси бара. Дигадли урегал мил-лион хъатла кайхьа, х1ейгалли – жяг1ял х1ушала Геннадий ивановичли урег-ц1али миллион детахъниличила бала. Г1ур х1ержик1ех1е  сен-сен уч1удал. Илди вузла ах1енну, х1ушала чила-биалра сари. Эгер вузла диаллири, илди ВУЗла кассализир дири. Илбагьандан, ах1ерси, пикриухъен !
Иванов (Къагъиубли каркули) Дила арц…

С У Р А Т    К1 И Э С И Л
   Вяв-ч1яррик1ули Ивановла хьунул ляркьян.   
Маргарита Гьуя, Дила мургьила к1инч1, се биубли ? Ва дила мургьила г1я-бул, се балагь бак1или ? (К1ап1урцули) Ва дила ах1ерси, нуцун маралтаба.
Иванов (Х1улби ибкули) Сен абдулта ругьулри, ах1ерси ? Х1уни ну вебк1ибсилизи халилулрав ?
Маргарита Ах1енри, дила суб. Ну урк1рухъи балуси агара. Ваши хъули, ах1ерси, ваши. (Айзахъес кумекбирули) Гьанна иш шагьарлизив х1ериэс къиянни саби. Нушала Ват1айчи аркьех1е дик1ули бек1 бац1биубли саби.
Макаров Гьалмагъ Иванов, х1ебиалли нуша вяг1даладиублира, ах1енрав ? Ишдуги урч1емличив лявкьяс.
Маргарита Се вяг1да саби х1ушани барибси ?
Иванов Ил х1ечи хъарси ах1ен.
Маргарита Х1у ишав геризурли убк1ух1ели набчи сайри хъарикибси. (Михъири буцили тямхъярирули) Бура, се вяг1да сабил х1ушала ?
Иванов Ца ити…(урк1ухъи) Хъулиб бурисну раши, дила ах1ерси.
Макаров (Дукарк1ули) Г1яжаиб мурул-хьунул лебкьалли ишди. (Сунези сай) Хьунуй руржахъулигу, мурул.
    Бек1ра гьак1-гьак1барили сайра следователь аркьян. Учибикибти т1ут1у-кабирар.

Г Е Х1 Ъ И Б И Л    А Н Ц1 Б У КЬ
    Шагьарла дублабси кьакьаси мер.
С У Р А Т    Ц А Э С И Л
   Кьакьакад аркьуси рурсиличи хъяч1бикили к1ел жагьил адам дуц1ли аркьули саби. Хаприки хъямварили ца урцу.
Зарема (Г1ясили) Угърашуни, х1ушала х1улби агарав ? Се балагь бак1или х1ушачи ?
Жагьси адам (Ватулхъули) Агь, х1ела…(жярга гъай дуру). Се дигулри гьаларизурли ? (Гакрирули) Уррац1и гьаларад.
Зарема (Някъ кьярт1лук1ули) Гьу, чи саю илгъуна ? (Някълизибси тавра кабиркахъули) Х1ела нуни илди к1елра сек1ал ца мерла кадирхъис, угъраш, аргъирив ?
Жагьси адам Конг, конг, чарии, кумекбара. Ай, дила някъ. Бархьаа х1ела…Ай..
Зарема Се? (Някъ кьярт1лук1ули) Гьари гьачам гьат1и тикрарбара.
Жагьси адам (Висули) Ватаба, х1ела жан дат, ватаба.
Зарема Гьала гьала черрерхи а, г1ур биалли х1еррик1ус.
Жагьси адам Аллагь багьандан черрерхи, рузи. Г1ур х1ейк1ус. Ай, ай, дила някъ.
Зарема (Някъ батиули) Сегъуна х1енз кьацбики х1ушачи къалабатира, г1елабтира бялч1ули, гьалабтира гакбирули.
Жагьси адам (Някъ суркбирули) Нушала неш вайг1ир хъябшли сари или аргъили дуц1духъунтира.
Зарема Илкьяйда буилив ? Х1ебагьурра, чевверхи.
   Жагьил адам харчизурли алзан ва убшар.
Зарема Эй, т1ашизи. Гражданин, т1ашизи. Х1ела тавра, т1ашизи.

С У Р АТ   К1 ИЭ С И Л
    Зарема сарицун.
Зарема Пакьиртала  неш зяг1ипли руили дуц1ли сабри, нуни биалли илдала ца витира. Агь, мех1ур, агь, мех1ур. Жярга гъайли х1евгьаллири селра х1еби-рира, ахмах. Сунела тавра булан батурлигу. (Х1еррик1ули) Се саригъари иш-ди ? (Урк1рухъи) Агь, сунела вег1 ват. Долларти !
   Зарема къагъриубсин багьлали хъули аркьян.

С У Р А Т   Х1 Я Б Э С И Л
   Заремахъала хъа гьалала. Хъа гьалаб стол. Стол алав Заремала бег1ти чайли бужули.
Калимат (Разили) Рак1ирив, дила рурси ? Раши нешли чайла карт1исну. Рамсурсигъунаригу ? дила ах1ерси. Гьай г1яйиб, жявливан сен х1ерак1ири ?
Зарема Сен жявли рак1ес г1яг1нисири ?
Камиль Ца адам леври х1ечи вак1ибси.
Зарема Мурадрив ?
Калимат Г1е, Мурад сайри.
Зарема (Х1унт1енриубли) Чинава ил ?
Калимат Чинав виэса ? Х1у чарх1ерулхъух1или, х1ела х1янчила арякьун.
Зарема Абдалмага виублив ил се сая ?
Камиль Рирхаи, рурси, Мурад – г1ях1си адам сай.
Зарема Г1ях1си сай, амма ну иличи рирхули ах1енра.
Калимат Сенгъари ? дила рурси.
Зарема Розани итичила дахъал сек1ал дуриб набзи итичила: дигалли хьунча,
дигалли жярга, дигалли увях1си сай рик1и. Розачил варх ил шел дус уч1ули
калунси сай.
Калимат Агь, сунела х1улби айт1, сунела лезми беръ ! Се х1яжар адам сари ит Роза-Медоза ?!
Зарема Сен или рик1уда неш, дила юлдаш рурсилис ?
Калимат Сен х1ерик1усира ? Гьанбикахъа ил адам х1ябал дусла рух1нар к1ина шери рякьниличила. Г1ях1си хьунул адам гьачам сари шери аркьуси сунела г1ямрулизир. Гьанна х1ела Мурад сунег1евли варес кьас барили сари ил угърашли.
Зарема Агь, неш, ратигу дила юлдаш рурси. Г1ямрулизиб Гьарлис гьарбил-зуси ах1ен.Селис г1яг1ниси илис Мурад ? илала мурул адамличи гьимидухъи диалли.
Камиль (Дукарях1или) Гьимидухъи ?
Калимат (Г1ясириубли) Лех1ризи рурси, абхьа х1ела хьанц1а х1улби. Мурул адамличи гьимидулхъниличила х1****ас, амма Мурад гьарли марси мурул адам сайни балас.
Зарема Неш, иличибли се бурес дигулри х1ед ?
Калимат Се дигуси ? (Рурсила х1улбачи х1еррик1ули) Мурад ишавад аркьу-х1ели, гурда кьяйда дурарухъи, някъ буцили, «гьи-гьи-гьи» или пишряхъили гъайрик1ули аррякьун рарх. Макьлат1ис !
Зарема Гьу, х1ера гьанна, однокурсникунас гъайбик1ес асух1ебирули саби. Се леба илаб тамашаласи ? урехиласи ?
Камиль Селра агара, амма х1у гьанк1лизирад чераргъадри г1ях1сири.
Зарема Тамашала сек1ал х1ебиалли.
Калимат Се гъари?
Зарема Тяп х1уша кьяйда пикририк1ули сари нушала заведующаяра.
Калимат Гьа, илинира балулив Мурад х1ечи вашни ?
Зарема Балули сари.
Калимат Х1ебиалли, нушакьяйда пикририк1уси ца гьат1и адам руили сари.
   Гьарахълабад Розара Мурадра лябкьули чебиу.

С У Р А Т   А В Э С И Л
     Итдира, Роза ва Мурад.
Мурад Ассаламуг1ялайкум !
Камиль Ваг1ялайкум ассалам ! Ваши, Мурад. Раши, Роза, х1ура. (Чай кар-т1ули) Чайла бержая. Чай селисалра дарман сари, хаслира мархъила варъа-личил.
Мурад Баркалла, адавзи Камиль. Наб ца минуталис Заремачил гъайухъес г1яг1ниси саби. Асубирару ?
Калимат Розани ихтияр баралли асубирар.
Роза (Х1унт1енриубли) Нуни сен ихтиярбируси, зизи Калимат ?
Калимат Х1ед ну зизи ах1енра, угъраш ! Се сари х1уни Заремази дурути ?
Зарема Неш, г1яг1нити ах1ен гьанна илди гъай ахъдурцес.
Камиль Т1аш, рурси, т1аш ! Лерил сек1ал чула мерличи кадатес г1яг1нити сари.
Мурад Нуни сек1ал иргъули ах1енра. Се сек1ал сари  чула мерличи кадалтути ? Нук1ун Заремачи сайра вак1ибси. Наб х1ушала шут1ни-къунби г1яг1нити ах1ен.
Калимат Бура, Мурад, х1ед чи сари г1яг1ниси ва г1ях1рилзуси ишди к1или-зирадалра ?
Мурад (Тамашавиубли) Наб гьанна баайчи Зарема сарри г1ях1рилзуси.
Калимат Агьа. Гьаннабаайчи… Гьанна х1ерилзулив ? Бура – сен ?
Зарема Чебиулрив, неш, Ну рик1уси бархьли уббухъи ? Баралра къуруш учи-бикалли мурул адамти дебали барсбирути саби.
Мурад Иличибли се бурес дигулри х1ед ?
Зарема К1ед дус г1елавад се багьандан вашусири, эгер ишбарх1и, х1уни бурни х1ясибли, г1ях1х1ерилзули риасли ?
Камиль Т1аш, т1аш, т1аш, т1аш. Къалаба мадик1удая, дила дурх1ни. Къала-бадик1ути шин гьунчир делгъан. Ца суал Мурадличи. Сен х1ед ишбарх1и баайчи г1ях1рилзули дила рурси Зарема, ишбарх1и г1ях1х1ерилзуси ?
Мурад (Бек1 г1яшбуцили) Сенк1ун иличила наб х1ейгести сек1ал аргъиб-х1ели.
Камиль Се аргъири х1уни ?
Мурад Нуни аргъира Зарема чумал жагьил адамличил дубуртази шадир рукьниличила.
Зарема (К1ант1ирик1ули) Илди къунби сари…
Камиль Т1аш, рурси. (Мурадлизи) Илди къунби сари. Илди къунби диъни нуни х1ези иргъахъис. Илгъуна мурул адам виадли, илкьяйда бархьдеш дигуси, бура, дила урши, чини буриба х1ези ил хабар ?
Мурад (Шайчи х1ерик1ули) Ил сек1айчила нуни х1ушази бурес х1ейрус.
Калимат Агь, х1ябилра туск1ух1уилри х1у. (Шайчи тудирхъули) Ч1умавии, вари каршурину ил адамли.                Камиль Лех1яхъи гьари, хьунул. Бура, дила рурси, сен х1у, к1ел дус вашух1елира, ихгъуна, жагати куц-кьаркьалара сайра, жагьси адам, ихис х1якьяс или каризурсири ?
Зарема Сенк1ун ил усал гъабза сайх1ели.
Камиль Вари, дила рурси, ил усал ах1ен. Усал к1инасван х1ушани чейидая. Бура, рурси, х1уни сели балусив Мурад сегъуна саял ?
Зарема (Г1ясили) Нуни чейух1ели ?
Калимат  Х1улби дурадухъаб х1ела, угъраш. Се саби х1уни чебиуси ? Мур-гьира х1яйванна декра дек1ардарес х1****улригу гьаннара.
Камиль Лех1яхъигу, хьунул. Гьари, дила рурси, Мурад усал гъабза сай или х1ези г1еббурибси адамличи х1еъа. Х1уни, Мурад, Зарема шадир рашан сари ибсиличи х1еръа.
    Мурадра Заремара Розачи х1ербик1ар.
Камиль Чебиулраяв, чи саял, бархьли буралли, чи сарил къунба ругьуси ?
Мурад Х1уривгъари, Роза ?!
Зарема (Нургъби ушкули) Роза, х1у дила юлдаш рурси риадли, бархьли бура, чи саял Мурад.
Роза (Рисули) Черрерхи, ах1ерси Зарема, ну ралк1ли уррухъунра. Мурад жа-гаси ва умуси адам сай. Иш наб цаэсил курсличивадал г1ях1изурсири. Мурад икахъес багьандан ну сегъуна дигара вайбаркь барес г1елумх1ерилзаси. Ахирра ахир багьурра – ну ишис г1яг1ниси х1ериъни. Чевверхи Мурад – дила гьарх1едизурти дигай, черрерхи Зарема – дила гьарх1еризурси юлдаш !
Мурад Роза, х1ебиалли, Зарема умуси рурси сари ?
Роза Алмасичирра умуси сари.
Зарема Роза, х1ебиалли Мурад хьунча ва жяргаси адам ах1ен ?
Роза Мурад – бег1лара марси ва жагаси адам сай.
Камиль Г1ях1си саби, г1ях1си, дила дурх1ни, ишкьяйдали лерилра сек1ал гьуйчи диркни.
    Рисули Роза аркьян.
С У Р А Т   Ш У Э С И Л
Роза ах1енти лебилра итди                Камиль Ишбарх1и ну сагали ак1убх1еливан кайзурра. Чумал дус кьакьати барх1и-дуги дерк1ира – бег1тала чебла саби вег1ла дурх1я г1ямрула гьуйчи ушни. Бура, дила Зарема, х1у кьабуйрив Мурадличи ?
Зарема (Х1унт1енриубли) Дудеш…
Камиль Кьабуйри. Мурад, х1у кьабуйрив Заремачи ?
Мурад Кьабуйра.
Камиль Х1ебиалли, дила юлдашуни, даширая (шампанское ибхьули) цаца шампанскоела рюмка дужех1е.
Калимат Ил багьандан (торт булъули) иш тортра букех1е. Иш торт кьяйда мурити диаб х1ушала г1ямру, дила дурх1ни.
Мурад Баркалла, неш.
Зарема (Дукарк1ули) Се ? Неш ?
Калимат Г1е. Неш. Сен тамашариубсири ? Мурад наб гьанналис к1ел дус гьалавал урши ветаурси сай.
Камиль (Рюмка ахъбурцули) Гьари касая цаца гьат1и бужех1ену. Нушала дурх1нала талих1 биэсли. Дерхъаб !
Мурад Дерхъаб !
Зарема Дерхъаб !
Калимат Амин я Аллагь !


С У Р А Т    У Р Е Г Э С И Л
    Итди лебилра. Жанна ляркьян.
Камиль Раши, раши, Жанна, арац1и. (Тамашавиубли) Се биубли х1ед унра ?
Калимат Сен урк1рухъири ?
Зарема Се бетаурли, ах1ерси Жанна ?
Жанна Се биэса. Аргъираяв нуша ВУЗла урегц1али миллион къуруш керасили сари ?
Зарема Чини ?
Калимат Сен-сен ?
Мурад Чизирад керасили ?
Жанна Нушала бек1 бухгалтерлизирад.
Камиль Павел Викторовичлизираду гъари ?
Жанна Г1е.
Камиль ВУЗла дух1нар керасилив ?
Жанна (Гьигь буршули) Ах1ен, гьаннаван унрубани бурули аргъира. К1ел жагьти адам буцили саби. Илдани дуили сари керасибти, амма, илдани бурни х1ясибли, чузирадра ца рурсили керасили сари. Ца сек1ал нуни иргъули ах1енра: ВУЗла ца кепекалра агара кассализиб – лерилра алапаби, стипендия-би дедили адерхурли сари. Чинад дак1ибтив илди арц ? Илала дурабад: урег-ц1алилра миллионнис долларти асили дуили сари.
Зарема Т1аш, долларти рик1уду ?
Жанна Г1е, долларти, урч1емал азир. Вахъ язихъилзулигу ил наб, пакьир.Эгер ил рурси х1ераргалли, Павел Виктороровичлис урч1емал азир доллар гьамадли ах1ен кадихьес.
Камиль Г1е, гьамадли ах1ен.
Зарема (Пишряхъили) Дигадалли дирхаирая, дигадалли дирхмалъадая, амма илди долларти керасибси рурси нуни ралас.
Мурад Чи сари ?
Жанна Бура, дила ах1ерси, чи сари ?
Калимат Х1уни сели ралуси ил ?
Камиль Х1у х1ерииши, дила рурси 7
Калимат Се ?
Зарема Г1е, бархьа саби, дудеш. Ил рурси нук сарра.
Мурад (Карули) Се ? Илди вайнукьабала бек1 х1у саррив ?
Зарема (Дукарк1ули) Ах1енра. Ах1енра. Жагали лех1дизирая нуни бурусиличи. Ишбарх1и дила гьуни буцили ляркьулри, ит баягъи кьакьаси меркад. Х1еррик1ус – цали ца бялч1ули к1ел жаллад арцурли. Нура дяйдяй рати сабира гьабг1ебли аркьулри. Г1ясириубдешли ца хапварили уцира ва някъ кьярт1белк1унра. Илини наб жярга гъай дуриб. Нуни биалли ил, някъ кьярт1белк1и, кьукьмуцватурра ва чевверхни тиладибарахъира. К1инайс ил вик1есииб, валлагь, чула неш дек1ли зяг1иприкили къалабали биъни. Наб, бархьли бурасли, дебали ц1ахбизур. Нуни х1улби абхьайчи ил пакьир пях1ли ветахъиб. Г1еларад вяврик1ули калунра «х1ела тавра каса» или, амма цалра илди чаралра х1ебяхъиб. Ил тавра (кайсули) х1ера иш.
Мурад Илар урч1емал азир доллар леру ?
Зарема Х1****ас, нуни илди делг1х1еделг1унра.
Жанна Милициялизи зянкъдяхъяя.
Камиль (Дураулхъули) Нуни дирхъис.
Калимат Жанна, селра биайчи гьари дейг1ен чум доллар херал.
   Жанна арц дейг1ес кариръур.
С У Р А Т    В Е Р Х1 Э С И Л
  Лебилра итди.
Жанна (Сунези сари) Урч1емдаршлим шуц1али… Азир. (Гьигь бушили) Лер, урч1емал азир доллар. Баркалла, дила Зарема. Ну гьаннара рирхули ах1енра х1уни илгъуна х1янчи барниличи.
Зарема Се х1янчи ?
Жанна Ишди арц чардарни.
Зарема (Тамашариубли) Се дирути илди наб ?
Жанна Сен-сен се дирути ? Бриллиантуни исути сари, жагати палтар, авто-мобиль. Камлив асести ?
Зарема Наб бриллиантуни г1яг1нити ах1ен. Палтар диалли, лдила лер.
Жанна Валлагь, тамашала рурсири х1у, Зарема.
Мурад Г1е, ишгъуна х1ериаллири ишичи дигай х1едирхьира нуни.
Калимат Г1яг1нити ах1ен нушала рурсилис илди долларти. Илдани хъули г1ях1деш х1еху. Ил нушани ришт1ах1ейчирадал духусили арикьурси сари. Жанна Баркалла х1ушаб, Калимат, ил рурсилис. Х1ед г1ях1си рурси сари кьабулрикибси, Мурад. Талих1черли диабая х1уша ! Нушала ВУЗла шайзи-бад х1ед халаси баркалла. Ну шадлира х1у дила г1ях1си унра ва юлдаш риъниличи. Гьачам гьат1и баркала. Гьанна, Мурад, х1ези тилади саби – ишди арцличил ну хъули раахъаба. Эгер милиционерти бак1алли, набчи бархьаая.
    Мурадра Жаннара дурабулхъан.

У Р Ч1 Е М Ъ И Б И Л    А Н Ц1 Б У КЬ
    Дербент. Нарын-къала.
С У Р А Т   Ц А Э С И Л
  Х1яжиев, Захаров ва  комиссияла бут1акьянчиби.
Х1яжиев (Къалала лацличи аръули) Даширая, гьамагъуни, гъамдиирая. Ишад х1ушани жагати мер0муса чедиидая.
   Лебилра гъамбирар.
Х1яжиев Х1ера иш (гьавличил) нушала бег1лара халаси, дурхъаси мер – Дербент. Иш шагьар чумра азир дус биубли саби.Набзи тиладибариб гидла мер буцахъес. Илбагьандан нуни х1ушази чумра жагати ва тамашала мер чедиахъис. Х1еръая, багьеслил буркьа, «древний Дербент» ? Гьалабла Дер-бент алавти луцрала ургабси бяг1удеш дебали бишт1аси бирусири. Цацадех1 источникунани бурни х1ясибли, ца лацличи т1ашизурси адамли ургилизибад игьубси гъуц царх1ил лацличи бетиуси буили саби. Шагьарла луцрала ургабси бяг1уд авдарш – урегдарш мертрлацун буили саби. Х1унира балули рургуд, Виктория Павловна, ца камси биалра Дербентличила хабар.
Бройтман Ах1ерси, Мах1яммад Г1исаевич, х1уни бахъ жагали бех1бихьа-дину хабар , даимбара. Тилади саби.
Х1яжиев Баркалла. (Някъ бях1чииули) Х1ерая ит урхьула дубличи. Чеби-улраяв ?
Лебилра Чебиулра, чебиулра… Къиянни саби чебааэс. Дирихьли к1ап1барили
 саби.
Х1яжиев Их урхьуличи, дубличи даайчи дуили сари шагьарла муцурти. Илала дурабадра, урхьнази дух1надухъунти дуили сари. Урхьула дубкадра белши буили саби ца лац, баягъи итди к1елра муцарла ургаб. Я урхьначибад, я диркьаличибад, я дубуртачибад чевхъес чилра вируси ах1енри. Илкьяйда биалра Дербент чуйнара чумра пачях1ла някълизи бихьибси саби. Иш къалара, их шагьарра халаси пикриличил дарибти сари. Азиялизибад Европализи гьуни г1ерк1усири Дербентли. Х1еръая х1ушани, сен бишт1асил мер дубурталара урхьулара мякьлаб. Их гьалабарибх1ели г1ур чинабадалра лебси ах1енри гьуни. Шагьар чуйнара гъят1аибсири, амма иш «стратегиялашал» г1ях1си мер саблин сагадан лушусири. Цаццабех1ти г1ялимтани бурни х1ясибли, Дербент нушала эра ак1айчи шел азир дус гьалаб т1аш-батурси саби. Илкьяйда сабил ах1енал х1уша пикридухъеная, эгер х1ушани чебиуси ихцад их халаси шагьарла мер гьалабла замана х1ябрани буцибси буили саби. Гьанна бусурмантала сари дахъалгъунти х1ябри калунти. Чини бала сегъуна миллат сабрил аслу-минала Дербентла ?
Волкова Дагъистайзиб бег1лара бахъал к1арахъанти саби. Дербентра к1арахъантала бургар.
Х1яжиев (Пишяхъили) Ах1ен.
Бройтман Дагъиста юглизиб х1ербирути лезгиби саби. Дербентра лезгибала бургар яра азербайжантала.
Х1яжиев Юждагъ лезгибала саби, амма Дербентла аслу-минала халкь лезгинти ах1ен.
Сергеев Жугьут1уни бургар.
Х1яжиев Ах1ен.
Олейников Персуни бургар.
Х1яжиев Ах1ен.
Сивриди Дербентла ишдира эсти аслу-минала халкь лебти ах1ен.
Х1яжиев Нура х1ечил кьабуллира, Виктория Павловна. Дербент бег1лара камли даршналра цала цала някъбази бикибси саби. Гьарх1ели цабех1ли гъя-т1иусири, цабех1ли т1ашбалтусири. Даширая гьанна ишарти мер-муса чедиэ-х1ену. Х1еръая, ишди бузути адамти чебаая – муцурти сагадирули саби. Дай-хъала муцурти граждан дургъбала замана гамурбачибад биртули гъят1аиб-тири. Цацадех1ти мераначирти къаркъа шагьарлантани диг1унтири чус хъул-ри дарес. Гьанна илди муцурти сагадарили сари. Бурни х1ясибли, ишаб леб-сири шагьарла пачала х1ямам. Ила шагьарла халкь башахъес ихтияр ба-рибсири. Х1ямамла хъалчиб (чебиахъули) х1ера ихаб, ца адам карцари мер лебсири. Ила карусири пачях1ла нукер шагьарлантани се дурулил лех1изес. К1инайс аргъибси пачях1лизи бурусири.
    Лебилра бак1ибти тамашабиубли х1ямам х1ербиру.

С У Р А Т    К1 И Э С И Л
    Ит мер. Х1ямамла бух1нала. Бройтманра Олейниковра сабицун.
Бройтман Гьу, кьанни биалр (гьигь батурли) арбякьун.
Олейников Жагаси мер лебкьалли.
Бройтман Наб ишар издаги рурси сарра или гьанбиркули саби. Х1у – дила рыцарь.
Олейников Ну (тамашавиубли) х1ела рыцарь ?
Бройтман Г1е, рыцарь. Се биубли гьат1и ? Х1ед рыцарь виэс асух1ебирусив ?
Олейников Нушала замана рыцарьти лебтив гьат1и ?
Бройтман Г1ур чихъали сартираяв х1уша мурул адамти ?
Олейников Кавалерти.
Бройтман (Дукарк1ули) Ка-ва-лер-ти.
Олейников Г1е, кавалерти.
Бройтман (Ласряхъили) Х1ебиалли, дила кавалер, х1ера, дила хъап1а батбухъину, бетелг1ен.
Олейников (Хъап1ни датиули) Агь, х1ябилра жагаси хъяб леб. Пилжакьала лигалагъуна саби.
Бройтман К1ап1руцаба,  дила  рыцарь.
Олейников (Байрирули) Агб, дила муриси, дила дурхъаси…
    К1елра кабиркур.

С У Р А Т    Х1 Я Б Э С И Л
    Ит мер. Бройтманра Олейниковра ах1енти лебилра.
Г1исаев (Г1яшли Зайцевлизи) Х1ера гьари, алавчарли.
Зайцев Селичи ?
Г1исаев Х1еръагу гьала-гьала.
Зайцев (Алавчар х1ерик1ули) Се леба илкьяйда тамашавиэсси ? Мях1яммад Г1исаевичли дурутачи лех1изигу.
Г1исаев Х1еръагу жагали.
Зайцев Чина ?
Г1исаев Х1уни х1ясиббарадив ца сек1ал ?
Зайцев Се сек1ал ?
Г1исаев (Х1ямамличивях1 х1ерик1ули) Нушала гьалмагъуни беткахъни.
Зайцев Се ? Чи саби илди ?
Г1исаев Чи бирути ? (Пишяхъили) Бройтманра Олейниковра.
Зайцев (Алавчар х1ерик1ули) Г1е, марлира агарагу.
Г1исаев Дила пикрили, илди ца мерлаб саби.
Зайцев Чинаб ?
Г1исаев Х1ед багьес дигулрив ?
Зайцев Се суалти сари ? Бурули виадли бура, х1ебурули виадли мабурид. Наб илдала г1яг1ни агара.
Г1исаев Гьу, лех1яхъи. Х1еръа ит пачях1ла х1ямамлизиб теб.
Зайцев Х1уни сели балада ?
Г1исаев Нуни илдала «агь-угьла» т1ама-гьама аргъира.
Зайцев Г1ур се биубли гьат1и ? Чус биганта биркьаб. Вахъ г1ях1иил дец1ли-зи маркуд. (Пишяхъили) Рахли х1едра бигули х1ейиши ?
Г1исаев (Урк1ухъи) Се ?
Зайцев Се ? Се ? Ца сек1ал ! Багьи, гьалмагъ Г1исаев ца сек1ал: вирадли х1унира бара, х1ейрадли – лех1яхъили уэн. Илди – пайдаагар хьунча авара сари.
Г1исаев Сейк1улри х1у ? Наб селис г1яг1ниси ил харабат ? Дила илиб дарш-нали жагати рурсби теб итаб.
Зайцев Тебх1ели илдачила пикриик1ули уэн.
    Семенов илдала жалтачи ласирхъу.   

С У Р А Т    А В Э С И Л
   Лебилра итди.
Семенов Юлдашуни, нушазира дураягу се сарил х1ушани ирзути нушазирад диг1янни.
Г1исаев (Пишяхъили) Селра агара, юлдаш, иткъи нушала ургар гъай сари.
Зайцев Селра агара диг1яналаси. Бархьли бурасли, Бройтманра Олейниковра чинабара или кьакьавак1или сай гьалмагъ Г1исаев.
Сергеев Марлисра, юлдашуни, чинаба илди ?
Зайцев Пачях1ла х1ямам г1ях1бизурли, ил жагаливан х1ербарес кали саби.
Голицын Х1ера итди лябкьули.
Сивриди Чинаба ?
Захаров Итдигъари (някъ бях1чиаили) чех1ебиулраяв ? Илдас селра биубли ах1енну даширая тарихлизи нушала гьуни даимбирех1е.
Х1яжиев Даширая. Х1ушани лебтанилра балули дургудая Петр Цаибил  Дагъистайзи вак1ниличила ? Ил гьала-гьала т1ашизурсири Г1янжикъалали-зив, гьаннала маяк к1ебси мерличив. Ил мер Петрлис г1ях1бизурсири. Азир-лим верх1даршлим гъану к1ира ибил дусла июльличив Астрахайзивад дурав-хъи халаси, х1ябдаршлим шуц1али гамиличилси, флотличил Аграханна к1ав-ла дубла вак1ибсири. Вец1ал барх1и дикибх1ели югличивях1 ватихьибсири. Дербентличибад ца километрла тяйдили т1ашизурсири. Пертлис Дербентла наим Имам-Кьули гьуниваибсири. Илини, адамтала шайзирад гъайра дурили сайра, императорлизиарцла умхьни дедибтири. Ил заманаличибад Дербент ва алавчарти ванзурби Россияла юрисдикциялизи кадерхуртири. Иранна, Тур-цияла чябхъинчибани х1****тнила сабабли Дербент Россиялизи каберхур-сири. Ца г1яжаибси анц1букь биубсири Петр Чевях1си Нарынкъалализи ва-к1ибх1ели. Лерилра мер-муса х1ердирули къалала ил дубуртази х1ердик1ути къапуличи вак1иб. Илизи буриб: « Ишди къапу ц1ахдешла къапу сари», - или. (Къапу чедиахъули) Ишди къапулавад дуравхъунсилис халаси ц1ахдеш г1еббиусири. Илди къапулизивад дурах1евхъалли, ихад (чебиахъули) алави-убли укьес г1яг1нисири. Петр Чевях1силис илад алавик1ес дигули ах1енри. Илх1ели Петрли: «Ну ишад дуравхъасра ц1ахдеш ах1ен», - или къапу абхьахъиб. Гьанна х1ушани чебиуливан, ишди къапуларад дехла машинти дашули сари. Илдани къаркъа, гъум, цемент ва царх1илти сек1ал гечдирули сари. Гьалаб къалализиб дярг1иб шинна г1иниз бирусири. Гьанна ил агара. (Някъ бях1чииули) Х1ера ит мерличиб пачях1унала к1алг1я бирусири. Илра заманали ва адамта гъят1аили агара.

С У Р А Т    Ш У Э С И Л
    Бройтманра Олейниковра лябкьули чебиу. 
Захаров (Пишяхъили) Ягъари, гьалмагъуни, детмайхъидаягу х1уша. Ц1ах-дешла къапу гьаргли сари. Ихад цалра дубурлан вак1или урчиличив варгьи-лизи рергурли гьаррилт1ари х1у, Мария Ивановна, Х1у кьалли, гбалмагъ Олейников, шикьухъесалра бажардих1еркуд.
Олейников Дила газла тапанча леб. Лев мерличив гериис.
Захаров  Х1ера гьанна, газла тапанча. (Дукарк1ули) Се тапанча бируси, итала метругъуна ханжал биалли.
Олейников Илгъуна виалли, нура аркьяс иличил варх.
    Лебилра дукарбирх1ур.
Захаров Даширая, юлдашуни, къалала туснакъличи гъамдирех1ену. Х1ера их (чебиахъули) гьарахъла ах1ен. Гьалабла замана иха бух1найутири пачях1унани чула душманти, чус г1ях1х1ебизурти, чус мут1иг1х1ебирути г1ях1гъубзни.
Х1яжиев Бархьа саби, Николай Абрамович. Ила Бух1наибтас я кьац1, я шин лугути дуили ах1енри. Катурси пакьир мут1иг1х1ек1алри, вебк1айчи валтусири. Гьанна иша башути туристунани арцла монетаби лайдик1ули дирар. (Арц лайдик1ули) Бархьли бурасли, нуни балас, к1инайс лерилра арц, баягъи, нушаб къапу абхьибси дурх1яли луц1ни. Х1ялал диаб сунес ! Илала бег1ти ишаб къараулти саби.
     Цацабех1тани арц лайдик1у.
Г1исаев Г1е, тамашала мер саби. Чум азир дус дикили ? Нарын гьаннара
къараул кьяйда т1ашли саби.
Голицын Наб багьес дигулра г1урра чум гьат1и дус т1ашли буарал.
Сивриди Ил сек1ал багьес г1яг1ниси ах1ен.
Голицын Сеннира наб багьес дигахъаси.
Сивриди Эгер адамли г1ур лябкьусичила гьар сек1ал балуси виаллири, г1ямру анц1дукьестили дири.
Х1яжиев Ну х1ечил кьабуллира, Виктория Павловна. Эгер цалра гъармукали лябкьусиличила балуси виалри, масала, Надиршагьли, Гитлерли, илди гьача-малра удих1ебири, мурталра тарихлис гьалабулхъи.Чумра дяв чедаибси бухъна къала саби иш. Батирая пакьир бамсри ахъахъес. Пенсияличи бархьес замана баили саби.Музей бетаурли калаб саби г1ур гьачамалра дяв чех1ебаили. Гьанна къиянни бирар ишис тупла х1ярх1убачилра, ракета-бачилра бургъес. (Гьигь батурли) Гьанна даширая,  ца гьат1и, юго-западла шайчибси лацла мякьлаб ца т1ярхъи тебси саби. Ил халаси дек1ар ах1ен. Бурни х1ясибли, ил ванзала удибад барибси гьуни саби. Ик1а чина сабил дубуртази дурабулхъуси саби. Гьанна ил лебал агарал нунира балули ах1енра.
Волкова Х1ябилра тамашала сек1ал леб. Наб чебаэс дигахъира кьалли.
Х1яжиев Ил гьуни жявлил заманали к1ап1кабарили агара. Эгер баргалли, туристунази чебаахъес ибхьу.
    Гьарахълабад марк1ач1ала иргъу.
Захаров (Сяг1ятличи х1ерик1ули) У-У-У. Юлдашуни, сяг1ят шел дикили сари. Бахъх1и агарли барх1и ихъур. Дубуртазир жявли ц1ябдиркути сари. Гьанна ца байхъала сяг1ятцадх1и къунздик1еная, г1ур – суратунира касили нушара Мях1ячкъалализи аркьех1е.Гьалмагъ Сегеев, бак1ахъа х1ела фотоаппарат.
   Хабарагарли къукъу дирхъу. Багьла багьлали зак гъагултани бурцу.
Сивриди (Закличи х1еррик1ули) Г1е, тамашала мер саби – Дагъистан. Нушачир гьанна г1ебшни сари. Мер-мерличиб дях1и теб. Ишаб биалли, гьаннара къукъубик1ули саби. Даширая ардукьес замана баилину.
   Къукъудирхъу.

В Е Ц1 Ъ И Б И Л    А Н Ц1 Б У КЬ
   Филологияла факультет. Фролов, Г1ялимов, Павлов, Бройтман, Г1исаев, Загьиров.
С У Р А Т    Ц А Э С И Л
   Загьировли комиссияла члентази факультет чебиахъули сай.
Загьиров Даширая, ах1ерти юлдашуни, чебиэх1е гьала-гьала нушала факультетла юрт. (Някъли лишан бирули) Х1ушани чебиули кьяйда, юрт жагаси саби, амма чумра дус балбарес имкан лябкьули ах1ен.
Фролов (Кьабулх1ейкили) Вахъ к1ант1имайк1ид, дила юлдаш, арц дак1алли бег1 гьалаб балбирехъех1ену. Ишцун ах1ен вайси даражаличибси. Вузла г1урра чумра юрт лер ишичирра вайг1ир даткадухъи.
Павлов Г1е, жагаси юрт саби, амма балбарес г1яг1ниси саби.
Фролов Илбагьандан, х1ези халаси тилади, Виктор Сергеевич, ца камти арц дархьаахъес кумекбара нушаб. Х1унира чедаади лерилра юртани. Ца нушала ректоратцун саби г1яг1ниси даражаличиб. Илра шагьарла администрацияла бек1 господин Карловли кумекбарили балбарибси.
Павлов Х1ердик1ех1е, арц гьанна къитдиубли сари. «Дефицитный»  сек1ал сари гьанна арц.
Загьиров Иш юрт гьлабла райкомла юрт саби. Гьанна нушала саби.
Бройтман Гьалмагъ Загьиров, х1ера гьари ишди улкьайтачи. Ишди дирцесра арц г1яг1нитив ? Чум рурси буч1ули ишаб ?
Загьиров (Урк1ухъи) Валлагь х1ябалас. Бахъалгъунти лебилра рурсби саби.
Бройтман Х1ебиалли, ца барх1и субботник барахъану, дирцахъа. Ц1ахли саби, ВУЗла улкьайти ах1енну, х1яйвантала дярхъла сари.
Загьиров Гьари т1ашризаб, их комендант хьунуйс се бирисал.
Фролов Комендант хьунуйс ах1ен селра барес г1яг1ниси. Х1ела лих1би сари дит1ак1ес г1яг1нити.
Загьиров Г1е, сари. Чевверхи, Геннадий Иванович, бирахъис ишаб умудеш. Г1яжаибли бирахъис.
Г1ялимов Валлагь тамаша саби: гьар барх1и вашулри х1у лагра катх1елра, иш
«безобразие» чех1ебаили валанри ? (Шайчи) Рушбатуни сасес кьалли баладра.
Г1ур царил сек1айчи х1еруди агара.
Зайцев (Някъ бурцули) Багьлали, гьалмагъ Г1ялимов, бананна кам чебаа.
Г1ялимов (Г1яшли) Агь, х1ушачи няг1на бак1, чина х1еръалра нясдеш сари.
Загьиров (Жибирули) Х1ера иш - деканат. Даширая дух1на.
    Комиссияла членти бух1набулхъан. Деканатла бух1нала х1ербиру.
Бройтман Иш се г1яламата ? Лебил юрт вебк1ибсилагъуна саби, деканат биалли шиша кьяйда лямц1бик1ули саби.
Загьиров (Пишяхъили) Гьи, нушани леблилра гьар баз арц кадирхьули алапализирад балбарибси саби.
Зайцев Г1ях1си идея саби, г1ях1си.
Фролов Иш лебилра юртра илкьяйда балбарес г1яг1ниси саби.
Загьиров Гьу гьари, лебил юрт балбарес имкан лебсив нушала, пакьиртала ?
Павлов Сен биалра балбикили ах1ен: ишгъуна – деканат, дярхъгъуна – фа-культетла юрт.
Бройтман Тамашала адамтира х1уша.
   Секретарь-рурси рух1нарулхъан.
С У Р А Т    К1 И Э С И Л
    Лебилра итди. Секретарьли Загьировлис лишан биру.
Секретарь Лерилра х1ядурли сари, господин Загьиров.
Загьиров Гьи, чуйна ибси х1ези «господин» марик1уд или ?  Иш рурси ряркъес вирули ах1енра нуни.
Фролов Се декан сайри х1у, эгер х1ела секретарь ряркъес х1ейрули г1ергъи?
   Лебилра пишбирхъур.
Загьиров Даширая, гьалмагъуни, даширая. Лерил сек1ал х1ядурли сари.
Павлов Гьала-гьала чиди курс ахтардибирех1е ?
Фролов «Столовая» бик1уси.
Бройтман Сегъуна ?
Фролов Ца минута ях1 барая, сегъуна сабил чебиидаяну. Гьалаики, Х1яжи Г1умарович.
Загьиров Даширая.
   Лебилра деканатлизибад дурабулхъан.
С У Р А Т    Х1 Я Б Э С И Л
    Жагали Балкьаурси факультетла столовая. Унзурбачир ва лямц1дик1ути улкьайтачир дурхъати занавескаби, бурханир люстраби, бях1яначир дях1имц1ули. Вец1алцад адамлис баршибси стол.

Загьиров Даширая, юлдашуни, иша саррая х1уша нуни т1алабдирути. Селис г1яг1нити х1ушаб ахтардила х1янчурби ? Дахъалдег1 дарадая. Диур. Гьанна – бамсри ихъех1е.
Фролов Агьа, х1ера сегъуна сюрприз сабил иш мялг1унни х1ядурбарибси. Сунела иш г1ярг1нала пукья ахтардих1ебарахъес багьандан се пикрибарилил ишини ? (Павловлизи) Гьа, Виктор Сергеевич ?
Павлов (Пишяхъили) Нушани ишдигъунти сек1ал жагали ахтардидирех1е.
   Лебилра пишбирхъур.
Бойтман Юлдашуни, ишкьяйда асух1ебирар. Гьар барх1и нуша пачниван дахес х1ушала чебла ах1ен. Нушаб, аргъая, ц1ахли саби. Г1яг1ниси ах1ен ишдазир диркьес х1ушаб.
Зайцев Марлисра, нушаб ц1ахбилзули саби, юлдашуни, х1ушала хъябличи кадиэс.
Загьиров Селра х1ебирар, лерил сек1айс арц дедибти сари нушала спонсорли.
Бройтман Диг1яндеш х1ебиалли, бура чи саял х1ушала спонсор.
Загьиров (Х1улби рурх1ахъули) Диг1яндеш саби. Иличила буруси ах1ен.
Фролов Датирая гъайну, кайирая.
   Лебилра кабиръур.
Фролов Гьу, гьалмагъ яра господин Загьиров, х1у сайри нушала тамада. Х1еръа столличи.
Загьиров (Алзули) Х1ебиалли, х1и ца бара дуц1ардиахъес гьала-гьала цаца бужех1е, г1ур – х1ердик1ех1е.
Павлов Бархьа саби, бархьа.
Загьиров Мария Ивановна, х1ед иш кагорла.
Бройтман Ой, баркалла, бег1лара дигути чягъир сари наб.
Фролов Нушала Х1яжи Г1умаровичли бала хьунул адамличи х1еруди барес. Хаслира – х1угъуна жагасиличи.
Бройтман (Пишяхъили) Наб илдигъунти бигахъис. Илдала х1урматра бирис.
Загьиров Х1ебиалли, цаэсил бужех1е иш Мария Ивановнагъунти исбагьибала арадешлис. Дерхъаб !
Лебилра Дерхъаб ! Дерхъаб !
Загьиров Гьанна гъай лугех1е нушала бег1лара дурхъаси, бег1лара шаласи бек1ла вег1 г1ях1ял Виктор Сергеевичлис.
Павлов (Алзули) Нушани цаэсил бержира жагаси Мария Ивановнала арадеш багьандан. Гьанна бержес дигулра наб х1ушала ва дила халаси юлдашла арадешлис. Нуша ишкьяйда жагали хьурадиънилис халаси баркалла. Нушази лебил х1ушала улка чебаахънилис халаси баркалла. Г1ур (пикриик1ули) нушала х1урмат барнилис баркалла. Х1ушала кьац1лис, дебали бизиси, Х1шала шиннис, дубуртала г1инзурбазирад дашути, баркалла. Шалати ва разити дях1лис баркалла. Г1ур дусра дак1ес къайгъи бирех1е, эгер миц1ирли калех1елли, комиссия кьяйда ах1енну, иткъи – шадир. Х1ушала арадешлис. Дерхъаб !
Лебилра Дерхъаб ! Дерхъаб !
Загьиров Гьанна, ах1ерти юлдашуни, лех1дизадалли, ца тост бурис. (Рюмка някълизи касили) Левли сай, уили сай ца мискин адам. Ил вахъх1и х1ери-убли сай мискинни. Давла учибяхъес багьандан илини чумра г1ямал дуцили уили сай, амма гьарбилзули буили ах1ен. Ахирра ахир илис гьарбизурли саби. Гьар дус илала маза, х1яйванти дахъдик1есдиили сари. Алавчарти шимазив ил бег1лара халаси давлала вег1 адам ветаурли сай. Гьачам, ил сунела к1алг1ялизив левай, иличи ца мискин ухъна адам вак1или сай. Илини гуши-убли беркесил тиладибарили сай. Хъа вег1ли диртиб ниъли биц1ибси хъаба дурасили бедили сай. Ухъна адамли ахъбуцили бержили сай. Хъа вег1 урк1у-хъи вик1или сай : « Се дирути ишди маза-мас, х1яйван-къача, иш халаси к1алг1я, мургьи-арц, эгер иш ниъли биц1ибси хъаба бержес х1ей-рули виасли ? лебилра дила давла лугира нуни ил х1елагъуна арадешлис ! » Илх1ели ухъна адам вик1ули сай : «Арадеш асес вируси ах1ен, ил вишт1ах1ейчибадал мях1камбарес г1яг1ниси саби». Илбагьандан, ах1ерти юлдашуни, наб дигулра х1ушаб леблисалра халаси арадеш гили ик1 Чевях1си Аллагьли.
Фролов Агь, духучан, х1ябилра г1ях1си тост бурри кьалли. Баркалла халаси х1ед.
Павлов Баркалла х1ед, Х1яжи Г1умарович. Г1ях1си тост бурри. Дерхъаб !
Лебилра Дерхъаб ! Дерхъаб !
Загьиров Гьанна ца г1ях1си приз лугас иш бишт1аси х1исаб арзибсилис. «Вец1лизирад ураса к1ел, каса х1ябли.» Чум дирара ?
Бройтман (Някъ ахъбуцили) Нуни !
Загьиров Бура.
Бройтман Гъану авра.
Загьиров Ах1ен.
Бройтман Сен ах1ена ?
Загьиров Сенра. Жагали пикрирухъен.
Бройтман Вец1лизирад к1ел урасалли дирар гех1ел. Касалли х1яйна дирар гъану авра. Х1едирару гьат1и ?
Загьиров Х1едирар.
Бройтман Х1едирару гьат1и, Геннадий Иванович ?
Фролов Дирар, дила чат1а, дирар.
Бройтман Чебииду, дирули дуили ?
Загьиров Буррагу х1ушази х1едирар или.
Г1ялимов Авал дирар.
Бойтман Се ?
Г1ялимов Авал.
Бройтман Сен-сен авал ?
Г1ялимов Гьала0гьала кайснила саби бируси х1исаб: к1ина х1ябал – урегал. Урегал убаса вец1лизибад – дирар авал.Аргъирив ?
Загьиров (Шиша дурайсули) Х1ера иш Дербентла коньяк, буца.
Г1ялимов Баркалла, баркалла. Г1ях1ти коньяк сари, амма нуни коньякла бужуси ах1ен. Эгер Мария Ивановнани ихтияр баралри, нуни иш коньякла шиша пешкешбирира.
Бройтман Ой, бирис, сен х1ебирусив ?
Г1ялимов Бег1лара жагаси хьунул адамлис. (Шиша лугули) Ма, арадешлис
бержаби !
    Лебтанилра хъат бирхъу. Бройтманни коньякла шиша сайсу ва столла уди кабирхьу.
 
С У Р А Т    А В Э С И Л
   Лебилра итди. Секретарь ляркьян. Загьировличи гъамриубли диг1янни шивк1иврик1ар.
Загьиров (Г1яшли) Г1ях1си, х1ура рак1и.
Бройтман (Пишряхъили) Э…э. Х1уша сели диркьулрая адамтала гьалар ?
Байдик1улраяв, се сартира ?
Павлов Ах1ен, Мария, ах1ен. Паргъатрии.
Бройтман Гьи, ах1ену ? Или биалли буис.
   Ургар, чинад сарил халкьла макьамти гурдулхъан . Унзалабад х1ябал урши ва х1ябал рурси бух1набулхъан. Халкьла делхъли кабулхъан.
Фролов Агь, х1ела жан дат, Х1яжи Г1умарович, х1ябилра г1ях1си барри нушала шадлихъ жагабарес делхъла устни т1алаббарни.
Бройтман Ой, х1ябилра жагати уршби теб !
Павлов (Г1яшли Бройтманнизи) Лех1яхъи, абдулта маругьудну. Х1ед иш стриптиз клуб ах1ен.
Бройтман Гьи, Виктор Сергеевич, чевверхи. Сен биалра (Т1ул бях1чиаили) ит наб г1ях1илзули сай.
Павлов Г1ях1си сабину, лех1яхъи.
   Бройтман арилзан ва булхъутачи ретулхъан. Лебилра хъатбик1ар.

В Е Ц1 Н У   Ц А Р А И Б И Л   А Н Ц1 Б У КЬ
   Х1ябдерх1ла к1алг1я. Шала. Макьамти.
С У Р А Т   Ц А Э С И Л
   Хъулиб баршибси стол. Шайчиб музыкантуни. Стол алав Фролов, Х1яжиев, Загьиров, Захаров, Иванов, Г1ялимов, Басиров, Г1ябдуллаев, Г1яббасов, Павлов, Волкова, Бройтман, Сивриди, Голицын, Сергеев, Семенев, Г1исаев, Зайцев, Олейников. Стола дублав Г1ялимов. Гъайби-к1утала т1ама-гьамали цала ца
бикьули ах1ен.
Г1ялимов (Рюмкализи кьут1ик1ули) Ах1ерти юлдашуни, ца сек1ал. Иша… иша лех1дизирая. Ну, иш жагаси к1алг1яла вег1ли, тамадали катурлира, х1уша кьабулли диадалли. Къаршиси  леву ? (Х1ерик1ули)  Агара виалли, нуни тамадала дураз кайсис. Х1ушани балули кьяйда, ах1ерти юлдашуни, нуша ишбарх1и иша, иш жагаси ванаси к1алг1ялизи учидикнила сабаб – итог каъни, нушала х1янчила итог. Бархьли бурасли, ахтардила х1янчи дураберк1ни – къиянси х1янчи саби. Х1ера ишди нушала коллегабани халаси ахтардила х1янчи дураберк1или саби. Нуни балули кьяйда, комиссияла членти лебилра разили, кьабуй саби нушала вузла белч1удила даражаличил. Илбагьандан х1ушалара мнениеличи лех1дизес нушаб дигахъира, ах1ерси Виктор Сергеевич.
Павлов (Алзули) Баркалла, Багьаудин Мухтарович, гъай гибнилис, сенах1енну, дила дахъал лер дурести. Бархьси бурасли, иша ляркьух1ели нуша, гьанх1ебикиб ишкьяйда жагали нушаб гьунидиъни. Нуни Геннадий Иванович вахъх1и валуси сай, амма наб гьанх1ебикиб х1ушала иш бишт1аси улка илкьяйда г1ях1ли бигуси биъни. Нуша аэропортлизир лералли, нушаб г1еларад дак1или гостиницализи хьурадарра. Халаси баркалла х1ед лично, Геннадий Иванович, х1ела адамдеш багьандан.
  Фроловли пишяхъили бек1 гьак1биру.
Павлов Г1ур х1ушази бурасли нуни, ах1ерти юлдашуни, вузла даражаличила – гьаннала замана х1ясибли ил ца г1ях1цадла ахъли саби: дигалли белч1удила шайчиб, дигалли царх1ил х1янчила шайчиб. Нушани почти лерилра факультетуни ахтардидарира. Наб бег1лара г1ях1бизур (Загьировличи х1еръили х1ули линк1бирули) филологияла факультет. Юрт кьалли г1ях1си даражаличиб ах1енри, амма белч1удила шайчиб ил ахъси мерличиб саби. Факультет нушани авлаличил кьиматлабарира. Гьанна лебил вузличила къант1ли бурис. Х1ушала вузла белч1удила даражаличил нуша кьабуллира. Ил цугбуцес вирар хала халати шагьуртала вузанала белч1удила даражаличил. (Пишяхъили) Бахъх1и  агарли МГУ, ЛГУлисра гьаладулхъадая.
Г1ялимов Чевверхи, ах1ерси Виктор Сергеевич, х1ела гъай къябаънилис…
Павлов Селра х1ебирар, нуни иткъира таманбирулра.
Г1ялимов Касая леблилра рюмкаби.
Павлов Х1ушагъунти г1ях1гъубзнала арадешлис, дерхъаб !
Лебилра Дерхъаб ! Дерхъаб !
Г1ялимов Гьанна гъай гес дигулра нушала ректор, член-корреспондент РАН Геннадий Ивановичлис.
Фролов (Алзули) Баркалла х1ед, ах1ерси тамада. Наб гьалав гъайухъунси ораторли буриб нушала вузла белч1удила ва х1янчила даражаличила. Илала гъай лерилра дархьтири. Нушала вуз МГУ, ЛГУлис гьалах1ебухъаллира, царх1илти халати шагьуртала чумра вузлис г1елах1ебулхъан. Ах1ерти гьалмагъуни, х1уша разидарес дигулра наб. Х1укуматла Аттестацияла Комиссияли нушала вузлис «Авла» кабати саби.
  Леблилра хъатбик1ар.
Фролов Илцад халаси чедибдеш сархибси вузли х1ушала ва дила къайгъиличибли саби. Илбагьандан ахъдуцая рюмкаби, бужех1е нушала вуз багьандан. Дерхъаб !
Лебилра Дерхъаб ! Дерхъаб !
Г1ялимов Гьанна, ах1ерти юлдашуни, наб ца ишгъуна сек1ал барес дигулра. Нушачиб, г1ях1ял гьарахълавад вак1алли, се биалра пешкешбирули бирар. Илбагьандан нушанира ил г1ядат х1ебулэх1е. Х1уша нушачи дак1нилис, нушачил дарх к1ел жумяг1 дузнила х1урматлис х1ушаб ца камти савгъатуни дарахъес ихтияр гая.
   Хъат бирхъу. Унза ибхьу ва цаван къугъали бег1биубти верх1ел жагьил рурси ва х1ябал жагьил урши бухьнабулхъан.
Г1ялимов (Рурсилизирад вавни сайсули) Ах1ерси Виктория Павловна, х1уни халаси х1янчи барнилис ца бишт1аси савгъат.
  Вавнира духибира дедлуга.
Сивриди Халаси баркалла вавнас, амма духиби имц1ати сари.
Г1ялимов Вари ах1ен, каса Виктория Павловна, каса. Ках1есадли, нуша гьимдурк1ех1е.
Сивриди  Баркалла ах1ерти, баркалла.
Г1ялимов (Рурсилизирад вавни сайсули) Х1едра ишди вавнира духибира,
ах1ерси Ангелина Степановна. Баралра нуша гьандиркахъаба.
Волкова Ой, халаси баркалла. Х1ушачира ва х1ушала вузличила чумлизира бурис нуни Москвализиб. Халаси баркалла.
Г1ялимов Бег1лара къугъаси исбагьи, Мария Ивановна, х1едра вавнира духибира.
Бройтман Халаси, халаси баркалла. Х1ябилра жагати вавни лер, (сунт1дирули) къугъаси гяг1ла духибира. Баркалла х1ушаб халаси.
Г1ялимов (Рурсбази) Х1ерая, дедая савгъатуни нушала г1ях1лас. Нуша хъумх1ертесли ! Нуша гьандиркахъабая илдачи х1ердик1ули.
  Рурсбани комиссияла члентас цаца жагати сяг1ят луга. Гьарилли баркалла балахъа.
Г1ялимов Гьанна нушала бег1лара х1урматла г1ях1ял, юлдаш, узи Виктор Сергеевичлис ца камси савгъат. (Уршилизибад сайсули) Х1ера иш ц1уба, нушала дубуртала бургиван, г1яндан варгьи.
Павлов (Челгьули) Агь, х1ябилра халаси леб.
Г1ялимов Нушала дубуртази шадив вашахъес.
Павлов Халаси баркалла. Ишваргьиличил делхъ дирис нуни. Гьари, музыкантуни, дяхъяя макьамти !
  Макьамти гурдулхъан. Павловли делхъ диру.
Г1ялимов  (Уршилизибад сайсули) Иш, г1ярбук1ан устала ханжал. Эгер Москвала шагьарлизивад къугъаси рурсиличил къунзик1ух1ели, чилра чевхъалли, ч1ях1барили бурх1яли бархьаа !
Павлов (Х1ербирули) Ягъари, ишцад иш ханжал ч1ях1х1ебарили чебаахъаслира, ил куппаюгъли падализи жих1иръугу.
  Лебилра дукарбирх1ур.
Г1ялимов  Илбагьанданра барша ириличину бихен.
Павлов Халаси баркалла. Ишдицад дурхъати сек1ал х1едарадра г1ямал биишигу. Селис г1яг1нитири илди дарили ?
Фролов Дагъиста г1ядатуни нушани дуэс дирути ах1енра. Лугуси сек1ал сасес г1яг1ниси саби.
Павлов Х1уни балули кьяйда, нушалара лебси саби ца г1ядат. (Мегьла арц
лугули) Гьалмагъ Багьаудин Мухтарович, х1ера иш къуруш. Гьанна иш ханжал нуни х1езибад асилра. Нушачиб яракь пешкешбируси ах1ен, ил – исуси саби.
Г1ялимов Х1ябилра г1ях1си г1ядат леб. Наб ца камси биалра арц бикиб.
  Лебилра дукарбирх1ур.
Г1ялимов (Уршилизибад сайсули) Ца гьат1и савгъат леб х1ед, ах1ерси Виктор Сергеевич.
Павлов (Пишяхъили) Г1ур гьат1и се савгъат саби ?
Г1ялимов Ишичи гьар барх1и х1ерик1ули, Дубуртар Улкализиб берк1ибси
замана гьанбиркахъен.
Павлов  Агь, х1ушала Жан дат ! Баркалла, ц1акьси халаси баркалла. Ишгъуна къугъаси сяг1ятра нура дуравхъес урухк1ус – белики гьавит1иша ?
  Лебилра дукарбирх1ур. 
Г1ялимов  (Рюмка ахъбурцули) Нушала Виктор Сергеевичла арадеш багьандан, илала х1урмат багьандан, илала г1якьлу багьандан, дерхъаб !
Лебилра  Дерхъаб ! Дерхъаб !   
С У Р А Т    К1 И Э С И Л
 Спальня. Къугъали даршибти кроватуни, стол, шкаф. Ч1ябарличиб дурхъаси кьалтин.
Фролов (Шала улкули, унза кьяп1дирули) Ваши, Виктор Сергеевич. Агь, х1ябилра бет1иб итди адамти наб чула пайдаагар гъай-мезра сабира. Ваши, герухъен, багьла бара ца байхъу сяг1ят. Бек1 изесбииб итдала т1ама-гьамали. Гьалабван илди сек1кал чекасес вирули ах1енра. Лекциябачивра баралра  гъайик1уси дурауршули вирус.
Павлов Г1е, ах1ерси юлдаш, дусми сари аркьути нушала. Ухънадешла г1яламатуни сари илди. Лебри нушалара замана общежитие гудур или буч1ахъух1ели. Гьанбиркуру ит коммунизмла замана ? Гьанна се замана сабилра х1****ас: я социализм ах1ен, я капитализм ах1ен. Конечно гъари коммунизм ах1ен. Гьанна хъямчибалара, рушбатчибалара замана саби. Рушбат агарли ца ганзалра кац1ес вирули ах1ен.
Фролов Г1е, саби илгъуна дунъя гьанна. Савгъат яра рушбат агарли селра барес вирули ах1ен.
    Павлов Ягъари, Геннадий Иванович, х1уша г1яжаибти адамти леррая кьалли.
Набзи х1уша вец1алра барх1и агьи или дисадая арц агара или. Вузла юрт балбарес - арц агара, г1яг1нити сек1ал асес – арц агара, газетаби-журналти къулбасдарес – арц агара, алапаби-стипендияби дедес – арц агара. Илдигъунти мискин-пакьирти диадалли х1уша, лерилра харжани ахъес, дурхъати савгъатуни исес, гьар барх1и ресторантази дашес, ишдигъунти к1алг1ни лушесарц чинад дашутив х1ушаб ?
Фролов (Г1як-г1якбяхъили) Х1ера гьари ца, сегъунти пикрума х1елтулил дила юлдаш. Агьа, х1у Аллагьли ват ! Илди сек1ал х1ушани, московлантани гьаннара х1едалули диадалли, нуни сен-сен илди х1ушази дагьахъиша ? Нура, ректорли кайайчи, илкьяйда пикриик1усири. Амма х1у вирхаи, дила узи, нуни ах1ен илди лерилра рушбатунира, савгъатунира, арцанира пикридарибти. Эгер ну илди адамтачи къаршили кайзурси виасри, жявлил вузлизивад булан дурауршира. Г1ур се биру ? Х1укуматла хала бургани ил даражаличи душилра нуша. Х1ушаб Москвализиб биулив алапа ?
Павлов Г1е, биули саби.
Фролов Нушаб биули ах1ен. Улкализиб бег1лара бишт1аси алапа нушала саби. Илбагьандан сари рушбатунира, савгъатунира, арцанира сайсути. Эгер сайсули г1ергъи, сайсен дахъал. Дахъал ибх1елира дебали дахъал. Камли сайснилизиб г1ях1деш лебси ах1ен. Камти сах1есили жяргах1ейубли гьалаб саби, сасили илди х1ябал кепекра жяргавиубличив. Къант1ли бурасли; гьаннала замана илдани х1еркьуси мех1ур сай. Бег1 гьалав ил х1у.
Павлов Г1е, х1у вархьли виэс асубирар, юлдаш. Амма илцадра дахъал рушбатуни дирару х1ушаб ишдигъунти к1алг1ни т1ашдатесли ?
Фролов Диахъалли – дирар. Ил сек1ал вег1ла аппетитлизибад саби дигахъуси. Камси сайсадли – камси луга, халаси сайсадли – халаси луга, сах1ейсадли – баркалла бик1ар, юх, цацабех1тани биалли – баркаллара х1ейру.
Павлов Х1ерагу, сен буилил.
Фролов Х1у нуни иша духуварес ах1енри живарибси. Х1ед цакамти арц сари.
Павлов Се арц?
Фролов (Тавра гьабурцули) Ишар вец1ал азир доллар лер. Х1ела даршал алапа, х1ела вец1ал дусла х1екь саби.
Павлов Иш рушбату ?
Фролов Иш дила шайчибад савгъат саби. Гьар вякьунси шагьарлизи ишгъуна сек1айчи х1ерик1ен х1у. Х1ела байхъайзи агарти нутукьуни арцла кумекличил академикуни бетаурли саби жявлил.
Павлов Ягъари, юлдаш, савгъатуни кьалли дуэс, арц сен-сен сайсути нуни юлдашлизирад рушбат кьяйда ?
Фролов Ишар дилацун ах1ен арц, ит хъули кабиибталара сари.
Павлов (Сайсули) Х1****ас валлагь, арцра г1яг1нити сари, сасесра ц1ахли саби. Фролов Арц, бик1ар, вебк1ибсилицун сари г1яг1ниагарти. Амма илди хат1абиркур; вебк1ибси х1яриихьесра г1яг1нити сари илди. Арц миц1ирси адамлис бег1лара г1яг1нити сек1ал сари.
Павлов Г1е, сари.
Фролов Илала дурабадра, сайсух1ели азартлизи виркуси сай. Гьар барх1и имц1али дурчес ибси пикри алк1ан.
Павлов Марлирав?
Фролов Г1е, марлира. Г1ур се лебси муриси ва бизиси гьар барх1и кьялши биц1или арц дак1алли?
Павлов Ил сек1айчи ну пикриулхъас.
Фролов Пикриик1ес замана агарану, сайснила х1янчилизи бяхъя.
Павлов Сен-сен баралли г1ях1сира?
Фролов Сен-сен бируси? Х1ечи г1яг1ниикибси адамлизи ихцад саби дила багьа или къант1ли бура, таман. Дигалли – луга, х1ейгалли – «пошел»!
Павлов Бархьли бурасли, чумлира наб, ил сек1ал гьалабихьиб, амма гьанналауб нуни х1ебарибси х1янчи саби ил.
 Фролов Уч1ес гьачамалра кьанни бируси ах1ен. Х1ела сагаси школа ишбарх1иличибад бех1бикнилизи халбара.
Павлов (Някъ бурцули) Халбирулра.
Фролов Х1ебиалли, уртахъ, ишди арц ишар далтех1е к1инайс хъули аркьух1ели касесли, гьанна ваши нушала юлдашуначи.
  К1елра кабиибтачи дурабулхъан.

С У Р А Т    Х1 Я Б Э С И Л
  Павловра Фроловра ах1енти лебилра
Г1ялимов (Рюмкализи кьут1ик1ули) Товарищи-юлдаши ! Клублизиб шумно саби ! Иван Алексеевич, гьари ца х1ябал гъай дура нушала вузличила.
Голицын (Алзули) Баркалла цаэсилгъуна гъай гибнилис, ах1ерси тамада. Г1ур бурасли, ишбарх1ила вузла х1яйчила, ил ункъли ах1ен. Дигалли разидиая, дигалли хумардиая, амма белч1удила шайчиб х1ушала вуз ца кьяшличиб лянк1бик1ули саби. Мисаллис, нуша дякьунси курслизиб урегц1али студент буч1улри, лекцияличиб лебти – гъану х1ябра. Илдазибадра байхъу студентунас лех1бизес ва лук1ес дигули ах1енри: г1еларти партабачи кабиили яра бусулри, яра лук1усила дирулри.
Захаров (Шайчи) Х1ед гибсира сасили х1ура уэн мух1ли буцили, се курега мез сари чекаибти ?               
Г1ялимов (Ахъли, масхарличи шурбалтули) Нушала доктор-доцентли бержибси имц1абарили сай, сейк1улил балули ах1ен. Илбагьандан нушани илис «штрафной» карт1ех1е.
Голицын Ах1ен, ах1ен. Ну кепли ах1енра.
Г1ялимов (Биц1ибси рюмка гьабурцули) Гьала-гьала иш ахъбуца, г1ур гъайик1ен.
Голицын Х1ушала арадешлис, дерхъаб !
Лебилра Дерхъаб ! дерхъаб !
С У Р А Т    А В Э С И Л
  Павловра Фроловра бух1набулхъан.
Г1ялимов (Разили) Гьа, ишдигъари ишаб к1елра мялг1ун, чина бикибти вара
дик1ули нуша. Лебилроссияла розысклизи дедилраягу х1уша. Чинарри к1елра х1уша ? Тамадази хьарх1ебаили гьардухънилис х1ушаб «штрафнойти».
  Г1ялимовли коньякра г1ярякьира гъудурдарили к1илисалра гьадурцу.
Фролов (Шайчи) Т1ашизи, угъраш, жяг1ял х1ед се бирисал нуни.
Павлов Ах1ерси Багьаудин Мухтарович, ну г1яйибла вег1 ах1енра.
Г1ялимов Сайрину каса х1ед карт1ибси.
Павлов (Кайсули) Х1ебиалли, х1ушала арадешлис дерхъаб !
Лебилра Дерхъаб ! Дерхъаб !
Павлов Агь, х1ябилра ц1акьси гъудурмай лебри.
Г1ялимов Г1урх1ели тамадазибад ихтияр сайсидра. Чус гьанбикибтани биркьалли лебилра, се бетарара ? Дила ихтияр агарли х1улбилра ч1ип1мадиридая х1ушани.
Бройтман Х1ябилра кьяркьси тамада леври кьалли.
Г1ялимов Цыц, хьунул адам !
Фролов Багьаудин Мухтарович, (кьяркьли) багьладара ургьур.
Г1ялимов Гьи, ах1ерси Геннадий Иванович, ца ити саби дурабухъунси. (Гьарли-марли кайзурли) Ах1ерти гьалмагъуни, г1ур чи лева гъайухъес дигуси ? Гьалмагъ Г1исаев, гьари ца х1ябал гъай дура.
Г1исаев (Алзули) Се буриша ?
   Лех1деш.
Олейников Х1ед дигуси бура, х1ела урк1иличибси бура.
Г1исаев Ну иша вак1ибх1ели, х1ушала къугъаси улкализи, дебали тамашавиубра адамтала дигиличи, хаслира нушачи. Нуша гьар чина дукьях1еллира, жагали, разили, урк1игьаргли гьунибии. Х1ушаб – вузла руководстволис халаси, их жагаси Каспийцад, баркалла, ит Шалбуздагъ, Базардюзуван ахъси баркалла. Я Аллагь, х1ушала лерилра г1ях1ти пикруми г1ямрулизи детерхаб ! Х1ушалагъуна улка, х1ушалагъунти жагати, урк1би гьаргти адамти иш нушала дунъя Ванзаличиб нуни чех1ебаира. Къавкъазла адамтичиб г1ях1ли бигути адамти лебти ах1ен. Илдазибад бег1лара урк1и гьаргти х1уша сарая. Тамашагу, х1ябц1али-авц1али миллатла адамти ишкьяйдали уржили, жагали, цабех1 узби-рузби кьяйда х1ердирни. Ту-ту (столличи кьут1дирхъули) х1ули маагаб! Шадли диая, ах1ерти юлдашуни! Арали диаяба, ишгъуна къушум х1ушала камх1ебиэсли. Мурталра ишкьяйдали жагатили диэсли. (Фроловла андаличи байдирули) Х1ушала арадешлис, дерхъаб!
Лебилра Дерхъаб! Дерхъаб!
Сивриди (Шайчи) Агь, мялг1ун  я! Агь, мялг1ун! Х1ябилра жагати гъай дуриб.
Г1ялимов Баркалла ц1акьли халаси, ах1ерси Г1исаев, жагаси дархьти гъайлис. Илгъуна отзыв нушаб г1яг1ниси саби умуси гьава кьяйда. Нушала х1урматла доктор исторических наук, профессор Виктория Павловнас гъай х1ебедах1елли, ц1ахли бирар. Виктория Павловна, пожалуйста, ца х1ябал гъай.
Сивриди Наб гьалав гъайухъунси ораторли дурибти гъайличи нура рархриркулра.
Илди г1ях1ти, жагати, дархьти гъайри, амма илини ца сек1айчила хъумартур: белч1уди ца кьяшличиб ах1енну, Иван Алексеевичли кьяйда бурули, к1елра кьяшличиб лянк1бик1ули саби. Илбагьандан, ах1ерти юлдашуни, х1ушани белч1удиличи халаси пикри бях1чиаая. Х1язлис ах1енри Владимир Ильичли бурибси «Уч1ес, уч1ес ва уч1ес». Илди мургьила гъай сари. Гьанна къиянси замана саби. Беч1уди агарли чиналра укьяс вируси ах1ен. Компьютерти, гьар дус сагабик1уси техника ва царх1илти сек1ал дагьес г1яг1нити сари. Уч1х1евч1алли, заманала ганзлис г1евх1ейур. Ах1ерти юлдашуни, дила узби, рузби, дигалли дурх1ни, наб къянала жагати гъай х1ейгахъис. Нуни бархьли, урк1игьаргли бурулра: белч1удиличи х1еръая. Ачамлис кьанни ах1ен, к1инайс, ца шел-урегал дусли, кьанни бирар. Пикридухъеная дила гъайличи. Г1уррара баркалла х1ушала г1ях1ялдешлис, х1ушала гьаргти урк1бас, х1ушала шалати дях1лис ва рух1лис. Х1уша багьандан дерхъаб !
Лебилра Дерхъаб! Дерхъаб!
Г1ялимов (Алзули) Баркалла, Виктория Павловна, дархьти гъайлис. Нушанира цаэсилгъуна суал ирзуси ил саби – белч1удила суал. Ил нушани ирзра ирзех1е. Ириъ сай нушала сагаси ректор вак1ибси. Нушани дахъал сек1ал дарсдарес бажардидиубли ах1енра. Амма ириълара ишдуслара «показательти» цугдуцибх1ели, ишдусла вец1ал, вец1ну цара процентла ахъли сари. Баркалла г1урра халаси дархьти гъайлис. Х1ера арадеш багьандан, Виктория Павловна, цаца бужех1е. Дерхъаб !
Г1ялимов Гьанна, г1ур чисалра гъайухъес х1ейгули г1ергъи, (музыкантунази) эй, х1еръая, нушала г1ях1лас «лезгинкаби» дяхъяя !
Макьамти гурдулхъан, лебилра абизурли булхъан. 

В Е Ц1 Н У    К1 И Р А И Б И Л    А Н Ц1 Б У КЬ
  Мекъ. Уршила бег1тала юрт. Бег1лара г1елабси хъали.
С У Р А Т     Ц А Э С И Л
 Халасиах1енси хъали. Ц1икруми. Кабиибти ургаб: Жанна, Фролов, Г1ялимов, Павлов, Роза. Букули ихтилатбик1ули.
Г1ялимов (Алзули) Гьалмагъуни, ца мунут лех1дизирая. Гьанна ну чинавалра тамадали калтулра. Илбагьандан халаси х1ушаб баркалла. Наб, иш нушала къугъаси исбагьис, Заремала абала узи сайлин, ца г1ях1си тост бурес дигулра. Буили саби, лебли саби верх1ел, зурма кьаркьлумала бег1ти, цайчиб ца жагати узи. Илди гьар барх1и берх1и ахъайчи бузули саби. Замана ургаббухъалли, г1яяр башули буили саби. Руили сари илдала ца рузи. Дях1-някъ, иш нушала Заремалаван, ц1уба ниъла дуили сари. Сунела жагадешли бацра берх1ира кьяскадирахъули дуили сари. Узбас ил дебали ригахъулри, сенах1енну, цаэсилгъуна – ришт1алх1ели, к1иэсилгъуна – ца рузи сарх1ели. Илис узбира дебали бигахъулри. Ца замана илдала къалаличи душманти чебухъи саби. Илди къалала къапу г1ек1или диг1янбикили саби. Къала алав дугелира х1ерилира душманти къунзбик1ули буили саби. Душманти ургав левли уили сай ца жагати бек1-кьяшра сайра жагьси урши. Х1ера иличи ахирра ахир дигай дихьили сари ит рурсили. Ил уршили гьар барх1и далуйти дуч1ули уили сай. Илдала к1илалра дигай узбас г1ях1дизурли ах1ен, сенах1енну урши душман сайри. Уршила адавзи пачях1 уили сай. Илини рурсилизи бурили сай: «Эгер нушаб къапу абхьадли, х1у дила узила уршилис кариръури». Бахъ х1ейгукъира рурсили къапу абхьес пикрибарили сари. Кьярт1алабази зуйти шин карт1или къинжулти чула мераначи черях1яхъили сари. Дугели къапу абхьили душманти бак1ахъили саби. Узбани харчбизурли къинжулти касалли, цалра дурасес х1ебирули. Итмадан душмантани верх1елра узи кабуршули саби. Ца узини, сай кавшес гьалав, бардаличил х1ябал душман кабушили саби. Илдазив уили сай, баягъи, ит дигай дихьибси, къугъал урши. Сунела верх1елра узира, сунес игуси уршира бебк1или чебаили г1ергъи, рурси къалала бек1личирад т1ях1рухъи сари. Рурси ванзаличи караайчи ц1уба лагьа ретаурли сари. Къала х1яйна алавбарили закир к1унрац1или сари. (Гьигьбатурли) Ах1ерти дила Зарема, Мурад, наб дигулра х1ушалара диубли ил рурсилара уршиларагъунти ц1акьти дигай, амма мурадличи даибти, гьардизурти, талих1черти. Х1уша ургар я къалмакъар, я гьими х1ебиэсли. Бахъал дурх1ни ак1если. Ак1убти урк1и аргъибтили халабаэсли. Талих1чертили диая, дила дурх1ни ! Х1ушала арадешлис дерхъаб !
Лебилра (Абизурли) Дерхъаб! Дерхъаб!
Роза (Заремази г1яшли) Агь, х1ябилра духуси абзи к1ев х1ела. Хьунул к1еру ик1ала?
Зарема (Г1яшли) Гьанналра абдулта маругьуд, лебилра нушачи х1ербик1улину.
Г1ялимов Гьанна гъай бедис дигулра наб нушала х1урматла адам, нушала ректор Геннадий Ивановичлис.
Фролов (Алзули) Ах1ерти гьалмагъуни, Зарема Багьаудин Мухтаровичла рузила рурси риалли, ну иша вак1ибсира Мурадла научный руководитель кьяйда. Х1ушанира балули дургудая иш урши аспирантурализив заочно авэсил курслизив уч1ули виъниличила. Илала дурабадра, Мурад ца камси вачрукьяра сай. Нуни балас: иш къугъаси юрт илала кумекличил саби т1ашбатурси. Вахъх1и агарли Мурадли кандидатла диссертацияла защитара биру. Ишис лерилра гьундури гьаргли сари. Г1ях1си гьуни биаб х1ед, дила урши. Арали ватаби х1у ва х1ела Зарема. Бахъал дурх1ни ак1аб, давла габ, талих1чертили диабая ! Х1уша к1илалра арадешлис, талих1чебдешлис, х1ушала адамти ургаб х1урмат биэсли, дерхъаб !
Лебилра Дерхъаб! Дерхъаб!
 Мурад Баркалла, Геннадий Иванович, г1ях1ти, ванати гъайлис. Баркалла гьанна урч1емэсил дус уч1ахънилис, наб г1якьлу бурнилис. Баркалла х1у иша вак1нилис, дила х1урмат барнилис. Наб дигулра х1ед халаси арадеш гили. Иш рюмка х1ела арадеш багьандан ахъбурцулра нуни. Дерхъаб !
Лебилра Дерхъаб! Дерхъаб!
Г1ялимов Молодец, Мурад, жагати гъай дурри нушала Геннадий Ивановичлис. Гьанна ца камси бамсри ахъах1елри, г1ях1сири нушаб. (Музыкантунази  лишанби-рули) Дяхъяя гьари хъярхъти делхъла «лезгинкаби».
   Макьамти гурдулхъан. Мурул адамтани хьунул адамти жибарили делхълизи кабулхъан.
С У Р А Т    К1 И Э С И Л
  Лебилра итди стол алав кабиили.
Г1ялимов Угь, вамсурра. Гьанна ца камси кьац1ла ч1ямбаралра асубирар. (Г1яр-г1яла урдур кайсули) Иш г1ярг1яла урдур кьяйда бизити диаб х1ушала г1ямру. Наб деркестазибад бег1лара бигахъуси: берц1ибси г1ярг1яла диъра, парличир дарибти хинк1ира. Агь, х1ябилра бизити дирар тамат гъудурси зеличил илди.
Жанна Ишдуги тяп х1у вик1утигъунти хинк1и дирахъех1е ц1икурлизи.
Г1ялимов Дирахъиду Мурад ?
Мурад Г1е, дирахъис. Х1ушаб х1едарибти, г1ур чис дирути ?
Роза Хинк1и дарес балав гьат1и илини ?
Мурад Ишини х1ебагьалли, х1уни дирид.
Роза Х1едирис, ну х1ела ц1икури ах1енра.
Жанна Заремни хинк1ицунра ах1енну, гьар жура журала тортани, пирогуни булан дала дарес.
Фролов Дални г1ях1си саби. Хъулир хьунул адамли беркалара баррили, умудешра баррили, дурх1начира х1ерудира барес багьес г1яг1ниси саби. Хъалиц1аличи х1ерэс – илала чебла саби. Илди сек1ал х1едалух1ели саби бахъалгъунти жагьилти дек1арбиркути.
Павлов Х1у вик1усигъуна хьунул нуни гьанк1лизирра чех1ериис нуни.
Фролов Ягъари юлдаш, х1ела Лена илгъуна ах1ену ?
Павлов (Някъ гьак1бирули) Чина хабара !
Роза Нушачиб бахъал леб г1ях1ти: дигалли рурсби, дигалли дек1арбикибти хьунри. Илгъуна кариа ца х1едрану ишав уэн.
Павлов (Пишяхъили) Чи ляркьяна наб, ухъна т1акьас ?
Роза Чи дигара ляркьян, хаслира х1у профессор сайни багьалли.
 Павлов Профессорла имц1аси мукеки лебсив ?
Роза Г1е, лебси саби.
Павлов Мисаллис, х1у ляркьядив наб ?
Роза (Разириубли) Т1ях1рик1ули ляркьяс.
Жанна Астахфируллагь, астахфируллагь. (Шайчи) Тамай ц1ахдеш детихъулигу иш ахмахла.
Фролов Гьу, юлдаш, марлисра хъайчикайили кален нушачив. Гьалмагъра раргилри, х1янчира бургис, заведующий кафедрала вирури, баягъи итди дила дурсрира кадирхьис.
Павлов Г1ях1си предложение саби. Ну иличи пикриулхъас. Ленани вархьаасли лявкьяс.
Фролов (Дукарк1ули) Ленани вархьаасли ! Х1ела Лена ралуси сари нуни сегъуна
 сабил. Илини иша вархьаъниличира тамашавиублира ну.
  Рахли унзализи кьут1дтрхъу. Чумал адам бух1набулхъан.
С У Р А Т   Х1 ЯБ Э С И Л
  Итди лебилра ва сагали бак1ибти.
Г1ялимов Чи сабигъари ишди бак1ибти  уршби-рурсби ? Гьа, к1ел багьурра, к1ел балули ах1енра.
  Леблалра някъби дурцули сагали бак1ибти стол алав кабиръур.
Мурад Ишди набчил барх аспирантурализиб буч1ути дурх1нисаби: Маликра, Зояра, Г1ябидатра, Александра.
Г1ялимов Александрра, Зояра балути саби, Маликра, Г1ябидатра – гьала-гьала чебиулра.
Малик Багьаудин Мухтарович, х1уни нуша хъумартурли ургуд. Нуша чуйнара вузла дух1нар къаршидикибтира.
Г1ялимов Х1ерагу ца, наб гьанбиркули ах1ен.
Фролов Г1е, Багьаудин Мухтарович, ухънадешла къиликъуни сари гъамдик1ули.
Г1ялимов Ну, Геннадий Иванович, вец1у гех1ра дус виубсигъунара.
Фролов Ил тях1ярличив даршал дусла г1ямруличи ветааби, дила Багьаудин Мухтарович.
Г1ялимов Х1ура илкьяйда ветааби, ах1ерси Геннадий Иванович. Гьанна сагали бак1ибтас гъай лугех1е. Малик айзи, гъайухъен.
Малик Дила вахъх1ила юлдаш хъаллавиъниличила ну дебали разилира. Наб дигулра илала хъалиц1а гьардизурли. Иличибад жагати, духути бахъал дурх1ни ак1аб. Агри-гаши чех1едаили г1ямру дерк1абая ! Цалис ца дигули, разили х1алабит1аб х1ушала. Х1ушала арадешлис дерхъаб !
Лебилра Дерхъаб ! Дерхъаб !
Г1ялимов Александр, х1ед гъай лугулра.
Александр Наб дурес дигути гъай ишдани дуриб. Амма, дурибти гъайла дурабад, наб дигулра х1уша давлачертили диубли. Гьаннала замана давла, арц – дурхъати сек1ал сари. Илди агарли ганз кац1ес агара. Х1ед Мурад, х1ела вачар-чакарлизиб гьарбизаб. Х1ед Зарема, илис кумекла риубли г1ях1си хьунул ретааби. Цалис ца дигутили, ца агарли ца дуэс х1едирули г1ямру дерк1абая х1ушани ! Аспирантунала х1ушаб ца камси савгъат. (Гьабурцули) Ишичир делк1унти гьарли-марли детерхаб х1ушала г1ямрулизир.
Мурад (Савгъат лябкьяхъули) Агь, х1ябилра къугъаси сяг1ят леб ! Х1ера гьари, жагати вавнира лер. (Белк1унси буч1ули) «Гьарил секунда иш хъулиб талих1чебсили биаб». Бракалла юлдашуни, баркалла. Х1ушалайчиб дурхъаси савгъат нушаб г1ур чинилра х1ехиб.
Г1ялимов Или майк1уд урши, нушала г1ях1ял Виктор Сергеевичлис се сабил савгъатбарес дигулину. Гьар мурталра  гач-гачра иркули сай. Гьари, Виктор Сергеевич, гъайухъен.
Павлов Дила пикри жагали аргъади юлдаш х1уни. Ишди, гьанна бара хъалла-биубтала г1ямрулизир лерилра сек1ал гьалар-гьалар сари. Илбагьандан наб дигулра илди цали цала х1урмат бирули, цалис ца бигули, аралии-ункъли, талих1чебли х1ербиуби. Г1ямрулизир сегъунти дигара къияндешлуми къаршидир-кути сари, сегъунти дигара дукъани дирути сари. Наб дигулра къияндешлуми гьамадли, т1ент1лизилра х1едарили, ихъули, дукъани – алавдирули г1ямрула гьуникадли шадли, хамли, бек1 ахъбуцили дашули. Цала цала х1улбачи х1ердик1еная. Ца къияннизи викибх1ели, итилил кумекладиреная. Талих1ра дигайра х1ушаб, ах1ерти дила юлдашуни. Ишди дурибти гъайла дурабад наб ца гьат1и сек1ачила бурес дигулра. Дунъяличив Адам ца гьачам сай х1ерируси. Г1ямру дерк1ес г1яг1нити сари хат1а х1ебарили. Гьалабван нуни х1ушала газетализиб белч1унра (гьигь буршули), иш къугъаси ц1икури Заремани (пишяхъили) вузла арц даргниличила. Илгъуна баркьуди гьар гьарра мурул адамли х1ебиру. Ил гъабзадеш лерси рурси сари. Нуни г1урра багьурра ил рузуси детдомлизир агри-гаши диъниличила. Илбагьандан (бергараг кайсули) Заремас нуни пешкешдирулра вец1ал азир доллар.
Г1ялимов (Тамашавиубли) Се ?
Жанна (Ч1ямбируси кьяриули) Чум ?
Роза (Сунези сари) гьарбилзан кьалли Заремас мурталла. Ихгъуна жагаси мурулра, вец1ал азир доллара набра дигахъира.
Павлов Дила пикрили Заремани ишди арц г1яг1ниси тях1ярли харждиру.
Зарема (Арц сайсули) Баркалла Виктор Сергеевич, х1ела благотворительность
чинилра хъумх1ерту. Арц мар-марлисра г1яг1нити сари ц1уръа дурх1нас. Илди гьар барх1и белкъайчи букули х1ебирар. Ишди арцлис дурх1нала г1ямру вавнадя-хъяхъес вирар. Баркалла х1ед г1уррара, Виктор Сергеевич !
Г1ялимов (Кисалабад арцла бергараг дурайсули) Илгъуна г1ях1си х1янчи нунира г1еббурцис. Миллион къуруш нунира лугулра.
Фролов Детдомличила, бархьли бурасли, нуни бег1 гьалаб саби иргъуси. (Арц дурайсули) Ишди к1ел азир къуруш нунира лугулра.
Зарема Баркалла х1ушаб юлдашуни, халаси ванаси баркалла.
Мурад Тамашагу, Заремани набзи гьачамалра х1ебуриб дурх1ни гушли-дяг1ли биъниличила. Дила шайзирад шел миллион къуруш кадирхьулра нуни.
Зарема Х1едра баркалла Мурад. Ну х1ечир хат1ах1ерикира.
Павлов Илбагьандан «горько» ! «горько» ! «горько» !
Лебилра Горько ! Горько ! Горько !
  Мурадра Заремара уруз урузли цаличи ца байбилкан. Макьамти гурдулхъан. Лебилра делхъли кабулхъан.

В Е Ц1 НУ    Х1 Я Б Р А И Б И Л   А Н Ц1 Б У КЬ
  Ректорла кабинет. Кабинетла ургаб халаси стол. Столличир х1унт1ена розаби. Стол алав кабиили вец1ну урегра адам.
С У Р А Т    Ц А Э С И Л
  Ректор алзули сай. Някъби столличи удяхъили кабиибтачи х1ерик1ули сай.
Фролов Коллегаби, х1уша дучнила сабаб – итог каъни нушани иш базлизиб барибси х1янчила. Бархьли бурис, лерилра нуша жагали дузира, амма дахъал нукьсандешлуми Лер х1янчилизир арзес г1яг1нити. Х1ушанира балули кьяйда, бег1лара цаэсил х1исаб нушаб арзес г1яг1ниси – белч1удила даража ахъбуцни. Ил ахъбуцах1елли ишдус вец1ал процентла, нушаб халаси плюс саби. Х1ера ишди, дила някъбазир, буч1нила х1екьлизирти результатуни. Чумра факультетли илди лерг1ер ахъдуцили сари. (Делк1унти х1ердирули) Захаров, юридический факультет, х1уни белк1ни х1ясибли, х1ушала белч1удила даража вец1ну шура процентла гьалабях1 арбякьи саби.
Захаров Г1е, Геннадий Иванович, вец1ну шура ва к1ел вец1лихъла гьалабях1
арбякьи саби.
Фролов Гьарли-марли или биаллири бахъ дигахъира.
Захаров Саби, саби Геннадий Иванович.
Фролов Г1ях1си х1ебиалли. Илкьяйда г1уррара дузеная, дуч1еная. Библиотечный факультет – гъал процентла. (Г1яббасовличи х1ерик1ули) Илкьяйда сабив, Шамиль Пашаевич ?
Г1яббасов Г1е, саби Геннадий Иванович. Гъану цара ва урч1емал вец1лихъ процентла гьала арбякьи саби.
Фролов Сен гьат1и гъану к1ира белк1ири ?
Г1яббасов Округлитьбарилра.
Фпролов Г1яг1нити ах1ен нушаб округлитьдарибти результатуни. Нушаб гьарли-марти результатуни лугеная ! Иргъулраяв ?
Г1яббасов Иргъулра, Геннадий Иванович.
Фролов Кайи. Х1унира, Николай Абрамович, г1урх1ели цугли луген.
Захаров Г1ях1си, Геннадий Иванович, лугас.
Фролов Исторический факультет – гъану авра процент. (Очкибала удивад х1ерик1ули) Мях1яммад Г1исаевич, леру илдигъунти багьудлуми х1ушала факуль-тетлизир ?
Х1яжиев Лер, Геннадий Иванович.
Фролов Г1ях1си саби, г1ях1си, лердиалли. Ахтарди дирудаяну багьи.
Х1яжиев Пожалуйста, муртдигара дарабая: нуша х1ядурлира.
Фролов Экономический факультет - вец1ну цара процент. Сабив, Гъазимях1яммад Г1ялиевич ?
Г1ябдуллаев Саби, Геннадий Иванович, вец1ну цара процентла гьаладях1 ардякьира нуша.
Фролов Г1ях1си саби, г1ях1си, илкьяйда дуч1еная. Ну тамашавиубси шуц1али процентличира х1ушала, Х1яжи Г1умарович. Нушазира бура х1уни сен-сен шуц1али процентличи даираял х1уша.
Загьиров Жагали дурабурк1уси х1янчили дак1ибти сари илди процентуни, Геннадий Иванович. Лебилра г1ялимти нушала факультетла дурсрала г1ергъи бузули бирар студентуначил барх.
Фролов Гьаларван к1ина дак1ира нуша, Г1ялимовра нура, амма илгъуна сек1ал чех1ебаира нуни. Комиссиялисра г1ях1х1ебизур х1ушала факультет.
Загьиров Илди нушала факультетличила гапбик1игу.
Фролов Х1уни балусив се сабил ирония ? Ирония бух1набуцили сабри илди гъайбик1ути. Х1ед гьанмабиркахъид жагаси стол баршадли шуц1али процент адиути сари или. Каса х1ела результатуни. (К1ап1и гьабурцули) Шел роцентталра ахъбуцадли баибси саби.
Загьиров (К1ап1и сайсули) Сагали барес чебуркъар ахтардила х1янчи.
Фролов Чебуркъалли – бара. Гьалмагъуни, гьанна гъай бедес дигулра нушала проректорлис. Х1ера, Багьаудин Мухтарович, гъайик1ен.
Г1ялимов Х1урматла коллегаби, х1ушанира балули кьяйда, нушала вуз гьалабях1 арбукес багьандан ректорли ва леблилра х1ушани х1ушала ц1акьани ва багьудлуми ах1ерх1едарадая. Нушала х1янчи дуг1ли арх1ебякьун – нушани халати результатуни сархира. Нушала х1янчи Москвализибад бак1ибси комиссиялира ахъли кьиматлабариб. Лебилра вузла х1янчилис «авла» кабатур. Дирхаирая, ил халаси кьимат саби. Лерилра Россияла вузанала цаэсил гъалихълизиббуйг1ули саби нушала вуз. Илбагьандан нушаб гьар дус убях1х1ебушили белч1удила даража ахъбурцес чебиркур. Ишдус гъал аспирант имц1абиубли саби ириичиб. К1идаршцад жагьти специалист имц1али дурабухъун ириичиб ишдуслизиб. Илра г1ях1си х1янчилизи халбарес вирар. Гьар дус нушала г1ялимтира имц1абик1ули саби. Ишдус вец1ну к1ира аспирант кандидат г1илмула бетаур, х1ябал доктор г1илмула, ца член-корреспондент РАН.
Басиров (Шайчи) Селис г1яг1нити илди арцлис асибти бурги ?
Г1ялимов Ишбарх1иличирад дех1дихьили студентуни дурсрачи башни ахтарди-биреная. Студентуни дурсрачи х1ебашни багьандан нушаб замечание бариб. Кьанируси, х1ешуси студент гьаирхъеная. Илдигъунти студентуни нушаб г1яг1нити ах1ен.
Басиров (Шайчи) Илдигъунти саби х1ушаб бег1лара г1яг1нити. Гьабяхъили, г1ур к1инайс чарбатахъесра арц сайсес багьандан. Ишаб духутала диру, дурабухъалли – шайт1унтигъунти саби.
Г1ялимов Вузла факультетунази царх1илти адамти башули саби или аргъира.
Бак1или буч1ути рурсбачи ц1ап1акес аварали биркьули саби. Илди х1ебашахъес дежурствоби кадизахъес г1яг1нити сари…
  Кьут1ла т1ама.
Г1ялимов Да, да.
  Унза гьаргдиру, секретарша ляркьян.
С У Р А Т    К1 И Э С И Л
  Лебилра ва секретарша.
Секретарша Чевверхи, Геннадий Иванович.
Фролов Се бетаурли ?
Секретарша Ца студентли ишди чинар-сарил даргили кадухили сари.
Фролов Се сари ?
Секретарша Кагъарра леб Москвализи бархьес белк1унси, тетрадунира.
Фролов (Сайсули) Семеновла сари ишди. Гьари се лук1улил ишини. (Ахъли уч1ули) Ах1ерси юлдаш, Василий Борисович, г1яжаибси мерличи даира нуша. Бурасли – вирхх1ергьад. (Т1ашаили) Се сари ишини лук1ути ?
Г1ялимов Рахли г1ярза х1ебиэс нушачила ?
Фролов Ах1ен. (Уч1ули) Нуша, дурала улкала пачниван, х1урматличил хьурадарира. Чина или гьанбиркули х1ед ? Ах1ен, гостиницализи ах1ен. Вузла ректорли сунела х1ябдерх1ла к1алг1ялизи. Гьарлис ца-ца хъали гиб. (Т1ашаили) Вях1, ишк1ун нушачилагу лук1уси.
Г1ябдуллаев Гьари белч1ен г1урра сейк1улил.
Фролов (Уч1ули) Хъали гиб. Вуз ахтардибарес нушаб имкан х1ебак1иб. Сен адли, сенах1енну шадир дашули шалих1ебаиб: гьачам Дербентлизи, гьачам Гъуниблизи, гьачам Г1ярбук1и, гьачам турбазализи. Агь, бахъ г1ях1си мергу иш ! Дедили дахъал долларти дурала улкнази се барес вашуси, ишгъуна х1улбала гьалаб гьалжана лебх1ели ? Сецад дигара х1унт1ена бялихъ леб, икра лер: к1уц1ул  к1уц1уй укалра тамандарес х1ейрар. (Тамашавиубли) Х1ерагу ца сегъуна симсир уилил.
  Лебилра пишбирхъур.
Фролов М…м…Гьа, ишгъари. (Уч1ули) Адамти ишабти урк1игьаргти саби, г1ях1ти саби, амма вузла преподавательти байхъала белч1удила шайчиб бахъ усалти саби. Ишаб арц, рушбат, савгъат агарли селра барес вирули ах1ен. Г1ялимтанира рушбатуни сайсули сари, муг1ялимтанира. (Т1ашаили) Х1ераягу ца, Америка абхьибсиличи !
  Лебилра дукарбирх1ур.
Фролов Муг1ялимтанира… Набра ца камси сек1ал бикиб. Белч1удила даража бахъ усалли саби. Байхъу студентуни дурсрачи башули ах1ен. Набзи чумлира буриб зачет-имтих1янтас дахъал арц сайсули сари или. Илгъуна сек1ал Москвализибра леб, амма ишаб бахъ вавалибяхъили саби. (Т1ашаили) Х1ераягу ца, тамашала сек1ал чебаили х1ейалли. (Уч1ули) Лебилра деканти рушбатунази г1елабикили саби. Тамашагу, илди нушази цаличила ца г1ярзбик1и. (Т1ашаили) Агь, х1ушачи няг1на бак1 ! Илгъуна усалдешг1и сабри х1ушазиб камси. (Уч1ули) Бег1лара рушбат сасес балуси «виртуозлизи» халирули сай филологияла факультетла декан Загьиров. Илала чебях1си бурни «набчи дашух1ели кьяшмани унза ибхьеная» лебилра вузлизиб урк1иличиб балули саби.
  Лебилра ахъли дукарбирх1ур.
Фролов (Пишяхъили) Гьу, угъраш, агь, угъраш, се или лук1улил. Г1ях1си бетаурли саби иш кагъар чиналра х1ебаъни.
Г1ялимов Или биалра анц1букь, сунес лугути азир долларра савгъатра сасибгу сунени, г1ела хъянт1анирад дак1абну сунела.
Фролов Илис дикибсигъуна ах1ен. Дикили диаллири, ишкьяйда зигарх1ейк1и.
Г1ялимов Нуни лично дедира.
Фролов Гьари даимбирех1е. (Уч1ули) Наб бахъ ц1ахли саби ишдачила угьес, сенах1енну нунира сасира рушбатра – азир доллар СШАла, савгъатра. Дила пикри леб ца вузла мякьлабси школа-интернатлис дедес ибси. (Т1ашаили) Х1ерагу сен дагьричевси увухъил. (Уч1ули) Лебилра рушбатунази г1елабикили саби: муг1яллимличивад бех1бихьили ректорличи баайчи. (Т1ашаили) Гьу, Гьанна набчира ваиб. Гьари, се лук1улил ? (Уч1ули) Геннадий Иванович – халаси г1ялим сай, амма илра арцла кьяч1алиув сай. (Т1ашаили) Арц чис х1ейгахъути ? Ректор дек1ар адам ах1ену ? (Уч1ули) Илини вуз гьалабях1 аркниличи умут бирхьулра. Ну иличи вирхулра. Ишавси главбух лев г1ебшнила к1ап1иван руржуси, рахли сунела «мохинацияби» налоговая инспекцияли гьаргдиру или. (Т1ашаили) Гьу, Павел
Викторович, х1елара х1урмат баррили саби.
Иванов Илгъуна х1урмат сунела ца мерличи баршаб. Нунилра се вай барилра  илис набчила г1ярзх1ейк1али сай ?
Фролов Гьанна уусира х1елтуси замана саби.
  Кьут1ла т1ама. Унза гьаргдиру. Жанна гьаррик1ур.
С У Р А Т     Х1 Я Б Э С И Л
Лебилра ва Жанна.
Жанна Чердерхирая, Геннадий Иванович, Павел Викторовичлизи ца сек1ал бурес дигулра.
Фролов Бура ахъли, нушала гьанна диг1яндарести агарану.
Жанна Бухгалтериялизи бак1или шел налоговый инспектор теб ахтардиличи.
Иванов (Михъири бурцули) Налоговый инспектор… (Каркули) Чина…
Фролов Шин дихая !
Жанна Улкьай абхьая ! Гьава бак1ахъая ! Умуси гьава г1яг1ниси саби !
  Лебилра ита иша дуц1бик1ар.
 
                12.11.1999д. 23с. 19мин.