Нохчийн забарейоцу дошам
А кх т а р г – цхьа а стом я пайда ца болу, амма гуттар поэташа хестадо дитт.
А л а п а – цунах тешна Iа ца веза;
– цкъа а ца тоьа.
А м а л – вуо къиг вуо Iаьха;
– зудчо амал лацар – шайтIа толар.
А р з – хьо бакъ волуш, нах гуттар а харц хилар;
– мотт тоха воьдучунна ша кхаъ баккха воьду моьтту.
А р т и с т – артист ву-кх муьлхха Iедалехь а.
А х ч а – я деба, я кхачадо;
– дукха хиларо, ца тоаро а шен лаамера воккху стаг;
– мел ду резабоцурш а хир бу;
– кехат бен дац.
Б а р г а л – сица къанвелла жима стаг;
– шен дегIан Iуналла, дола деш воцург;
– хан тIехлестина жеро.
Б а ж а – бажа вац, цхьана бажош вацахь.
Б а з а р – нехан амалш йовза дика школа ю;
– къера дуйнаш буу меттиг;
– цхьаерг базара саяккха йоьду, цхьаерг – саакха хиларна.
Б е з а м – хьо холчу хIотториг я ирсе вийриг.
Б а къ д е р г – нахана бакъдерг дуьйцург ца веза;
– нахана деза бакъдерг, шайна товш дерг ду.
Б а къ о н а ш – негрийн, индейцийн а вайчул яккхий ю.
Б е р – шениг хьаста дог догIу, нехачунна тоха лаьа;
– могуш долу бер, меца а доцуш цIийзаш делахь, я наб йогIуш ду, я хи дезаш, я сара безаш;
– жимчохь делха а дина Iамор гIоли ю, коча кхиийна ша воьлхучул;
– бераш шенаш дезарх ца тоьа, неханаш а деза деза;
– да-нана дIадаьлча, стеган дуьненца йолу уьйр-марзо ца хадийта, Дала еш компенсаци.
Б е р а ш – зудчо майрачун цIийнах тосу орамаш.
Б о л х – болх бечо юу, ца бечо – кхин а дукха
– бинарг, ца бинарг велла;
– тракторшка, роботашка а байта беза;
– вала хIотталц болх барх а, ваха ца хуу.
Б о р з – ерриг берзалой къуй бац, берриг къуй берзалой яц;
– оьсийн фольклорехь – Iовдал, нохчийн – турпал;
– керла хьаькам.
Б оь х а н и г (табу) – текхарг;
– оьзда доцург.
Б у л тI а – верстина кIант;
– хIуъ-хIуъу юьйцург.
Б у х г а л т е р – ахчанах бохча дийриг;
– цуьнца гергарло лело деза.
БI аь р м и с к а – гай дуьзча а, бIаьргаш ца бузург;
– пис.
БI аь р х и ш – берийн лазам;
– зударийн герз;
– нанойн сингаттам, бохам.
БI о б у – бIо бу (эскар ду);
– берийн кхетамехь боьха хIума, адамийн цIий молург;
– тахана – ешап.
В а й м о х к – вай сица маьрша долу мохк.
В а р з а п – тусург.
Г а з а – хьан довхо;
– харцахьа бер;
– цаеза йоI.
Г а й – гайно вацавой, вацавой воь-кха стаг.
Г р и п п – къечу стеган цамгар;
– дарба лелийча кIиранна, ца лелийча – вархI денна.
Г уь й р е – хенан хIоттам йоIан дог-ойла санна хийцало.
ГI а д д а р – нахана дерг – ловзар.
ГI а й гI а – ма е, гIайгIа бе.
ГI а з кх и – лай хилла ваха ца лиъна муьжги.
ГI а л гI а з кх и – гIазкхех олу.
ГI у л л а кх – къахьегаро бен кхача ца до;
– бер делхош дийриг дац;
– ингалс маттахь: бизнес.
ГI у н д а л гI и – эрна дуьненчу кхоьллина стаг;
– товш велахь а, цхьанне а пайденна воцург.
Д а й м о х к – мел генахь хиларх, гуттар а ойла тIекхийдарг.
Д а х а р – къийсам бу: делккъалц мацаллийца, делкъал тIаьхьа набарца.
Д е кх а р – дика хIума ю, схьадала дезаш делахь;
– даьккхинчунна дицделча а, деллачунна ца дицло;
– нахана гIой а, Iедална ма гIо.
Д е п у т а т – дешан синоним «хабарча».
Д е ш а р – «маьхза» бохург, хьехархошна алапа ца луш, бохучу маьIнехь кхетадо Iедало.
Д и к а – нахана шаьш дIа ца динарг ца го, шайна схьа ца динарг бен.
Д и к а л л а – хьо виллина мел хили, Iовдала хета;
– бIозза стагана дика а дина, цкъа ахь «хIахIа» алахь, и дерриг а дайна ду.
Д и н – говр яц, иман-ислам ду.
Д о г ъ э ц а р – валаза цхьа а ца волу, АллахI воцург.
Д уь н е – мукъ карахь болчийн машен;
– диеза кхоьллина, цо Iехаво;
– горга хилар чIагIдеш дуккха нах цIерга баханехь а, тахана ша цIарах дагочарна хьалха шахматийн у санна ду;
– массарах а дуьсу дерг;
– адамийн синош зие кхоьллина полигон;
– чуьркан тIоман меха дац, кхоьллинчун гергахь.
ДI о в ш – къаьхьа дош.
Ж е р о – нехан говр, машен а санна, шен зудчул а хазахета.
Ж у к к у р – малонча;
– вехар воцу стаг;
– моз ца доккху моза.
ЖI аь л а – керчина йогIуш чIург гича мегаш дац;
– лоха мел хили а, сийдоцуш хуьлу;
– вочу зудчун майра.
З а х а л о – захало дуьйцу зударий, тхьамарех гIала юттучу берех тера бу.
З е н – цхьанна зен ца хуьлуш, кхечунна пайда ца хуьлу.
З е з а г – поэтан езар.
З е л а з а къ – закъ-аьлла зайла боллар.
З у д а – къечу стеган бахам;
– шайтIа ду, цо Iехаво, тилаво;
– стеган сий цуьнца дусту;
– майрачуьнга ларлур яц, ша ца ларъелча.
И р с – тIаьхьаидарх ца карадо, ша Дала ца делча.
И с л а м – исс лам бац, бусалба дин ду;
– Далла муьтIахь хилар.
Й о I – стиглара седа санна цIена.
К а с с и р – цкъа а галъяьлла, ахча сов ца ло.
К а п е к – ахча дац, амма баьIа капек сом ду.
К в а р т и р а – адамийн аквариум.
К н и г а – книгаш ягаярх, царна тIера ойланаш яха юьсу.
К о м аь р ш а л л а – комаьрша воцург бIаьрмиска ву;
– таронал тIех комаьрша стаг цIенна пайденна ца хуьлу;
– комаьрша хилар ша ду, Iовдал хилар – ша.
К о р р е с п о н д е н т – эладитанаш лехьориг.
К о т а м – ледара стаг.
К о ч а л л а – цхьаъ бен йоцчу йоIан цамгар.
К р и т и к – маIдулла (нохчийн критикан цIарах), яздархочунна маIаш Iуьттуш верг;
– бурчаев (нохчийн критикан фамилех), яздархочунна бурч юхкург.
КI а н т – зудчо дIавоккху;
– зуда ялийча, ненан коьртах говран корта тарло.
КI и л л о – жIаьлешна а ца веза шайх кхоьрург.
КI о й с и г – векъина стаг.
КI о р н и – иллешкахь вуьйцу йоIан везар.
Къ а н а л л а – ламаз, марха а бен, кхин дарба дац.
Къ аь р къ а – мала къонах ца веза, мелча лан веза;
– мийларх кхачор дац, саца ца дича.
Къ е л л а – цадешар – бода, дешча а – бода;
– куьйга тIера мода санна хIума ю, тахана ю, кхана яц.
Къ е п а л (ковра) – къен пал.
Къ и й з о р и г – бIаьрмиска стаг.
Къ о в з о р и г – вуо дош олург.
Къ о н а х – нахана къола дийриг;
– нехан юьртарчу къонахал, шен юьртара жIаьла тоьлу.
Кх а р д а р – кхаьрдинарг, хьайна хIун ду а ца хууш, схьаоьцу.
Кх е р а м – цо стеган сий ойу я дойу.
Л а з а р е т – больница (лазартне).
Л е р г а I а х а р – дерригенах а кхоьрург;
– пачхьалкхан транспорт тIехь маьхза леларг.
Л о р – уггар а хьалха – къинхетам.
М а й р а л л а – хьекъал кIеззиг мел хили а, сов ериг.
М а р ш а л – маршонан лай.
М о р с а – сагIа дац;
– Iуьйрана меца чоьна тIе малар чIогIа пайденна ду;
– бод морсанца хьакхийнехь, хьокхам дика хуьлу.
М о с к а л – вусавелла стаг.
М у к а т а – стеган цIе;
– дешан синоним: бIаьрмиска, ледара къонах.
М оь л къ а – меран йоI.
МI аь р г о – бIаьра-негIар тоххал йолу юкъ;
– цхьа хIума доццуш;
– Делан къинхетам ца хиллехь (цхьана маьIIаргона).
Н а н а – нанас аьлларг, тоьхнарг а чевне ца хуьлу;
– горгам елахь а, нана тоьлу.
Н а с м о р к – йогIуш ерг шура елахьара, леккъа хир яра.
Н е къ – некъ – новкъа;
– хьевзина белахь а, некъ тоьлу.
Н и з а м – хьалхара маьIна: халкъана тIехь хIоттош болу эскаран кхерам;
– тахана «къепе» бохучу маьIнехь лела.
Н о х ч и й – шайн цIоган хьал ца хуу берзалой;
– ша-ша ваьккхича дика ву массо а;
– паччахьан Iедало обаргаш бина;
– Советан Iедало – къуй;
– нехча йоккхурш бац, нах бу;
– Нохьа-пайхамаран тIаьхье.
Н о х ч и й ч оь – йоз(ц)уш йоц(л)у пачхьалкх.
НI аь н а – гуттар а ша тIехулахь хила луург.
О б а р г – Iедална таIзар латториг;
– оба ерг;
– дукха хьолахь къу;
– Маршо, Нийсо, Бакъо къуьйсург;
– дийна мел ву цхьалха ву;
– вийначул тIаьхьа – халкъан турпалхо.
Оь з д а н г а л л а – йовш лаьттарг.
Оь р с и – шен пачхьалкхехь кIай негр.
П а л с – моза лаца а карах ца долуш, къанделла жIаьла.
П е кх а – сеттина ца йолу, партала зуда.
П и в б а р – цигахь шен философи ю.
П и с у – жима йоI.
П о в а р – цуьнан декхар нахана мерза юург яр дац, доьзална напха даккхар.
П о й з а л л а – мотт тохар (стеган цIарах).
П о л и т и к – политика тоьттург;
– цкъа а ша дуьйцург кхочуш ца дечу стагах олу;
– тахана цхьаъ, кхана кхин дийца эхь ца хетарг.
П о л и т и к а – дешан синоним: ямартло;
– харцо толо некъ;
– дагахь дерг лечкъа а деш, багахь кхин дийцар;
– куьйгалхоша, халкъ Iехош, хьалха йоккхург;
– пачхьалкхийн юкъаметтиг къасториг;
– гIалгIаша «тешаболх» олу цунах;
– эрна хабарш, моттаргIанаш;
– нийса елахь, халкъаш гергара дийриг, харц елахь, нахах мостагIий бийриг;
– Iедало, шаьш лелочунна тIаьхьа ца кхиийта, леладо бахьанаш.
П о л и т о л о г – политика толлург.
П р о к у р о р – нахана вуо болх хилча, кхаж болуш верг;
– нехан сингаттамах векхаш верг.
П хь и д – девнехь эрна гIовгIа йийриг, ирх лелхарг.
С а т и й с а м – Дала вайх бина къинхетам;
– сатуьйсучура ваьлча – леш ву.
С и й – лардан – хала, дожо – атта.
C о в д е г а р – сов дезарг.
С т а г – аренца, балха тIехь, юучуьнца а вевза;
– шен зудчунна санна нахана а вовзахьара, хийламма наха юкъахь даккхий къамелаш дийр дацара.
С у – чIарх-аьлла жима къонах;
– хьан дегIах цIе латош йолу жеро.
Т а кх о р – ерстина зуда.
Т а л л а м х о – толла жIаьла.
Т а л л а р х о – хабарча, пуьтийн лежиг.
Т е л е в и з о р – бIаьргашна хьалха дерриг а дуьне;
– нахана тIехула волавелла ца лела дика ю;
– доьзалехь, эвхьазло ца йолийта, масийтта хила еза.
Т е ш а м – шех тешам боцург, нахах а ца теша;
– тешам бар – дуьне дохар.
Т о с т – ханеха: нана-Росси, дада-Кавказ а хастош.
Т р о я н и й н г о в р – тешнабехк, ямартло;
– эскарш арадохуш, Нохчийчохь оьрсаша дитина герз.
ТI а в у с – тIех кура леларг.
ТI о м – цицигна – ловзар, дахкана – балар;
– IаьгIча – жаIуьно, ца IаьгIча – барзо.
У б а р – къотIалгIа дина бер.
У н и в е р с и т е т – зударийн монастырь.
Ф и л о с о ф – фантазер.
Ф С Б – Къайлахчу канцелярин директорна ца хууш а ду дуккха а.
Х а л къ – ИбрахIим пайхамаран кIантана хьалхара бен, Дала малике баийтина уьстагI санна, цIий хьанал дина, шайна кхоьллина ду моьтту цхьаболчу политикашна.
Х а м – Нохьа пайхамаран кIентех цхьаъ (шен да чагIар мелла, тIетесна хIума дIа а яьлла Iуьллуш гича, цунна тIе хIума тосучу меттана, шен дех вийлинарг);
– эхь-иман доцург, сий дайнарг.
Х а н - з а м а – ши тIам, цхьа цIога а.
Х а п у г а – хьап олуш верг.
Х о л а – тIех хьийкъина йоI.
Х о р ш а – тIейогург дика ю, хорша елахь а.
Хь а р а м – товш, ца товш хуьлу нах;
– нахана йина, шена хьанал ду моьттурш а бу.
Хь аь к а м –Хьалакхолла (цIе);
– массеран гайнаш дуьзча а, шен цхьа гай ца дузург.
Ц и в и л и з а ц и – Iер-дахарехь – кхиам, адамийн юкъаметтигашкахь – херо.
Ц и ц и г – берашна – тайниг, дехкашна – Iожалла;
– цициг доцчохь дахках эла хилла.
ЦI е – паччахь, Iедал, идеологи а хийцало, ахь дина дика-вуо дуьсу.
ЦI о ь л къ а – къечу стеган чорпа.
Ч е ч е н - п р е с с – нохчийн эладита.
Ч е ч е н - п о ч т а – холхаза куй тиллина, верта кхоьллина бере;
– вогIу-воьдучо дIасахьо хабар (циганийн почта).
ЧI и р – вай ца дезачийн карахь герз.
ЧI и ш а л г – лекха, гIийла хилар.
Э к о н о м и с т – пис.
Э к о н о м и к а н м и н и с т е р с т в о – коьртачу писийн кхеташо.
Э с а л а – йоI тов;
– кIантана осала ца ала олу.
Э хь – доькъучу хенахь цIахь вацара, олу эхь ца хетачо;
– уггар хьалха шен доьзалх хета деза;
– хьалха эхь хилларг, хIинца сий лору, дозалла.
Ю у р г – юучохь, молучохь а бен самукъа ца долу.
Юь р т б а х а м а н м и н и с т е р с т в о – юьртара бахам дIаузу, тIепаза, доь доцуш бойу министерство.
Я з д а р х о – книга йоцу яздархо – мохк боцу эла.
Я л с а м а н е – атеисташа а къайлаха сатуьйсург;
– ненан когашна кIелахь ю, зудчун когашкахь яц.
Я м а р т л о – тоьшшуьйтий тIехьашхула катуху жIаьла.
Я хь – дукха хьолахь хьагI.
I а б б а з – дешан орам «буьрсаниг» (Iаьрб.);
– нохчийн: шера стаг;
– юкъара цIе.
I а х а р – ден цхьаъ бен йоцу йоI.
I а х а р - с т а г – зуда ялонза стаг; ахстаг.
I е д а л – наха шайн лаамехь коча оьцу бала;
– цкъа хаьржинчул тIаьхьа, тIамца а дIа ца баха лурш;
– харжамашкахь тоьлла мафи.
I о ж а л л а – эца, Iеха а ца лург.
1997
Свидетельство о публикации №211101301459