Кхин ца 1еелира...

Со  зударшна юкъахь  дукха нисло. Къаьсттина  хьехархойн балха  т1ехь  болу  зударий  гина  суна  болатан амалш а,  т1улган  дегнаш  а  долуш. Дуккха  а синъамалех кхиъна  со  суо а,  цаьрца цхьаьна  хьаьрмех   болх  беш...
  Урокаш  д1а а  евлла  Замани  йолчу  чу  гулделира  тхо:со а  , Ровзан  а.
Дуккха а хан  яра  Заманис  цхьа  бала  къуьйлу,  шен  ницкъ  кхочуш  тийжаш  1едал а дацара цуьнан.П1елг  санна ша,  шен  доьзал  кога  ирах1оттийра  цуо ,уллохь догъэца накъост  а  воцуш...Ц1ийндеца  къаьстина  яра ,аьлча  а  иза  х1орш тергалбеш  вацара.
Тахана  х1ун  ду  а  ца  хаьа,  тхо  массо  а  тхайн-тхайн баланаш  буьйцуш  1аш  ,со  1е  ца  елира ,  ц1ийндех  ца  хаьттича.Легашка хорам   боуьйтуш  дара  Заманин  дийцар.
 
«Шуьйтахь  дехаш  дара  тхо ,сан  диъ  бер  дара,-дуьйцура  цуо.Тхайн  керт-ков  а ,гобаьккхина  1аламан  аьхналла,хазалла  а йолуш.Дечиг  кхехьарца  мелла   а  хало  дара, амма  бецийн  дарбане  архьанна  юккъехь  дара  тхо:гобаьккхина лаьмнаш,х1ора  1уьйранна  шайна кийрара 1аь  х1уьттуш,шатайпа бецаш,шовданаш.
   Хаза  меттиг  дера  ю иза,дукха нах  сада1а  а  оьхуш,ирс  долчунна…
Х1ара  ц1ахь  вацара  (ц1ийнден  ц1е  йоккхуш  дац  нохчийн г1иллакхехь).
Буьйса  юккъе яха герга  йолуш, ц1еххьана  не1  туьйхи. Со  т1е  халат  а  оьллина  дуьхьал  яьлча:  «Хьайна  т1е  х1ума  йохалахь, соьца  банкера  накъостий  бу  хьуна",-элира  цуо .
   Х1ума т1е а юьйхина   араяьллачу  сан  б1аьрг кхийти   улло  яьккхина  кхоъ  мечиг  а, ши  доттаг1  а валош , схьакхаьчначу  тхайн  стагах... Когаш  чуьра  са  д1адаьлча  санна  вон а дера  хилира  суна  цкъа, делахь  а  яхь  д1а  ца  яла  1еминчу  аса:  «Марша  дог1ийла,хьеший  ,хьан  чоьхьа  довла , х1ун  деш  лаьтта  шу  ара а  х1иттина  буса  юккъе,"-элира, мелла  а йоьхна,дегочу озаца..
«Банкера хьешашкахь» мала  х1ума а , закуска  а хиллера. Шина  накъостах цхьаъ,Асланбек,  Таьнгчуьра вара и,х1инца  воцуш а ву иза (Дала декъалвойла иза), ч1ог1а  воьхна  хьаьвзира,  сан йохар  тосаделча...
 Чохь  цхьа хан яллалц  1ийра  тхо,со а хаийнера  тхан стага шена юххе  охьа. Стенна дара  а  ца хаьа …
Кхенуо  сайн  "хьеший –мехкарий" цхьацца  хьаштана  ара  эцна  яхначу  сан  къамел  тасаделира  цаьрца...
Сан  ц1ийндас  биттина  аьшпаш  гучубевлира  , царех  цхьа  а банкера  а  ца  хиллера..Уьш  цигара  боцийла  суна  дуьххьара  схьа ма-гиннехь а дера  хиира ,делахь а «Х1аъ» я «Х1ан-х1а» бен  ала бакъо йоцуш  1ийна  сан , ч1ара  хила  дийзира  .Шиъ  парикмахерскехь  болх беш  хиллера,кхозлаг1ниг-лорйиша-акушер    а.
 Тхо  чудаьхкича,  ц1ийндас шайна ялханна  сехьа  чохь  мотт  билла  элира  соьга. Асланбекан  сан  диъ  бер  гира, иза  вуьйхира  кхин  а  ч1ог1а. Амма  сайн  х1усамненан  декхарш  кхочуш  ца  дича  ца  йолура  со, сайна  сеничохь  мотт  билла  бийзира...
 Ма-дарра  схьа  хаза  доладелира  эвхьаза  къамелаш, къаьсттина  жигара дакъалацархо  сан  ц1ийнда  а  волуш… Собар кхачийра  сан.Кхин  ца  1еелира.
  Сайна  т1е  х1ума  а  йоьхна, ара  а  яьлла  ас  чу  мохь  туьйхира , Надя  яра  акушерка  ю  баьхначуьн  ц1е.
-Надя, схьа ара ялал цкъа.
Надя  араелира. Ас дегочу  озаца къамелдира  цуьнга:
-Х1ара  ц1а  а ду  шуна,лахахь  охьа доьдуш  хи а  ду  шуна,   чохь  сан  диъ  бер  а  ду  шуна, котам-бежана  а  ду  д1о  божли  чохь.Д1а1ер-кх шу шайна ма-ттов... Ткъа  хьо  со  санна  йолу  зуда  ю .Дала  бекхам  бойла  хьуна а ...
  Охьа йолаелира  со новкъа...
 Сох  эхь хетта  волу  Асламбек  т1аьхьа велира  суна... Делах  яллал дуйнаш а биира  цуо ,юха ерзахьара  хьо  бохуш..Цуо  дуй а бууш элира , шаьш  не1аре  чукхаччалц  цуо (кхуьнан  ц1ийндас)  мича  дуьгуш ду  ма  ца  хиира  шена  аьлла...
 Со  юхаеара  берийн  дуьхьа, амма  иза  дуьххьара  дацара, я  т1аьххьара а, цуо  лелийначарна  юкъахь.Къинт1ера  ца  яллал-м  хьийзира...
  Заманин легашка хорам  боху  ,ладоьг1учу  суна а санна .Цуьнга  кхин  д1а  ца  дийцаделира, б1аьргаш  хих  буьзнера , логехь  шад гулбелира... Сихха  цуьнга  хих  къурд а байтина , къамел  кхечу  т1ег1е  даьккхира  оха ...
Ровзан  шен  урок  йийцаре  ян  х1оьттира…

                2006 шо