Св. Евангелие от Матфея, глава 2

1. Иисусу же рождшуся в вифлееме иудейстем во дни ирода царя, се, волсви от восток приидоша во иерусалим, глаголюще:

2. где есть рождейся царь иудеиский? видехом бо звезду его на востоце и приидохом поклонитися ему.

3. Слышав же ирод царь смутися, и весь иерусалим с ним.

4. И собрав вся первосвященники и книжники людския, вопрошаше от них: где Христос раждается?

5. Они же рекоша ему: в вифлееме иудейстем, тако бо писано есть пророком:

6. и ты, вифлееме, земле иудова, ни чимже менши еси во владыках иудовых: из тебе бо изыдет вождь, иже упасет люди моя Израиля.

7. Тогда ирод тай призва волхвы, и испытоваше от них время явльшияся звезды,

8. и послав их в вифлеем, рече: шедше испытайте известно о отрочати: егда же обрящете, возвестите ми, яко да и аз шед поклонюся ему.

9. Они же послушавше царя, идоша. И се, звезда, юже видеша на востоце, идяше пред ними, дондеже пришедши ста верху, идеже бе отроча.

10. Видевше же звезду, возрадовашася радостию велиею зело,

11. и пришедше в храмину, видеша отроча с мариею Материю его, и падше поклонишася ему: и отверзше сокровища своя, принесоша ему дары, злато и ливан и смирну.

12. И весть приемше во сне не возвратитися ко ироду, иным путем отидоша во страну свою.

13. Отшедшым же им, се, ангел Господень во сне явися иосифу, глаголя: востав поими отроча и Матерь его, и бежи во египет, и буди тамо, дондеже реку ти: хощет бо ирод искати отрочате, да погубит е.

14. Он же востав, поят отроча и Матерь его нощию, и отиде во египет,

15. и бе тамо до умертвия иродова: да сбудется реченное от Господа пророком, глаголющим: от египта воззвах Сына моего.

16. Тогда ирод видев, яко поруган бысть от волхвов, разгневася зело и послав изби вся дети сущыя в вифлееме и во всех пределех его, от двою лету и нижайше, по времени, еже известно испыта от волхвов.

17. Тогда сбыстся реченное иеремием пророком, глаголющим:

18. глас в раме слышан бысть, плачь и рыдание и вопль мног: рахиль плачущися чад своих, и не хотяше утешитися, яко не суть.

19. Умершу же ироду, се, ангел Господень во сне явися иосифу во египте,

20. глаголя: востав поими отроча и Матерь его и иди в землю Израилеву, изомроша бо ищущии души отрочате.

21. Он же востав, поят отроча и Матерь его и прииде в землю Израилеву.

22. Слышав же, яко архелай царствует во иудеи вместо ирода отца своего, убояся тамо ити: весть же приемь во сне, отиде в пределы галилейския.

23. И пришед вселися во граде нарицаемем назарет: яко да сбудется реченное пророки, яко назорей наречется.


(Св. Евангелие от Матфея 2:1-23)

Ссылки по теме:
===============
[2] Мф 21:5; Лк 2:11; 19:38; 23:3,38; Ин 1:49; 12:13; 18:37; 19:12-15,19; Лк 1:78,79; Откр 22:16; Мф 2:10,11; Ин 5:23; 9:38; 20:28; Евр 1:6

[3] Мф 8:29; 23:37; Ин 11:47,48; Деян 4:2,24-27; 5:24-28; 16:20,21; 17:6,7

[4] Мф 21:15,23; 26:3,47; 27:1; Ин 7:32; 18:3; Мф 7:29; 13:52; Мк 8:31; Лк 20:19; 23:10; Ин 8:3; Деян 4:5; 6:12; 23:9; Ин 3:10

[6] Мф 2:1; Ин 7:42; Мф 28:18; Еф 1:22; Кол 1:18; Откр 2:27; 11:15

[7] Мф 26:3-5; Откр 12:1-5,15

[8] 1Кор 3:19,20; Мф 26:48,49; Лк 20:20,21

[9] Мф 2:2; 2Петр 1:19

[10] Лк 2:10,20; Деян 13:46-48; Рим 15:9-13

[11] Лк 2:16,26-32,38; Мф 2:2; 4:9,10; 14:33; Ин 5:22,23; Деян 10:25,26; Откр 19:10; 22:8-10; 5:8

[12] Мф 2:22; 1:20; 27:19; Деян 4:19; 5:29; 1Кор 3:19

[13] Мф 2:19; 1:20; Деян 5:19; 10:7,22; 12:11; Евр 1:13,14; Мф 10:23; Откр 12:6,14; Мф 2:19,20; Деян 16:36; Мф 2:16; Деян 7:19; Откр 12:4

[14] Мф 2:20,21; 1:24; Деян 26:21

[15] Мф 2:19; Деян 12:1-4,23,24; Мф 2:17,23; 1:22; 4:14,15; 8:17; 12:16-18; 21:4; 26:54,56; 27:35; Лк 24:44; Ин 19:28,36; Деян 1:16

[16] Иуд 16:10; Откр 17:6; Мф 2:7

[17] Мф 2:15

[18] Откр 8:13

[19] Мф 2:13; 1:20

[20] Мф 2:13

[21] Евр 11:8

[22] Деян 9:13,14; Мф 2:12; 1:20; 3:13; Лк 2:39; Ин 7:41,42,52

[23] Ин 18:5,7; 19:19; Деян 2:22; Мф 26:71; Иуд 13:5; Ин 1:45,46; Деян 24:5


http://bibleonline.ru/bible/csl/40/02/#1-23