Эч1ела

Рассказ.

 Пагь а йиф, а сегьат тир гьикьван гуьзел,
Зун, цавуз килигиз, къвазнавай муькъвел.
Явашдиз эцигнай за гъил вин гъилел-
Хъуьренай вин п1узар варз алай йифиз...

   Музыкантри нубатдин "Варз алай йифиз" макьам  тамамарна, ял ягъун малумарна. Далдамчиди суварин сагълугъдай са-са "вишер" хъивегьун теклиф авуна. Амай музыкантар и теклифдал рази тир.

   Эч1елрив эгеч1ай сад лагьай югъ Сталинан т1варунихъ галай колхозда сувар хьиз къейд авун адет хьанвай кар тир. Зуьрнечидинни ч1агъанчидин иштягь ачух хьанвай, вучиз лагьайт1а,абурун вилик квай, ник1ин къерехда къурмишнавай столдал, колхоз квелди девлетлу ят1а, вири алай - гьам чимиди, гьам къайиди.

Дишегьлийри ашкъидалди эч1ел эч1езва, эркекри- музыкантри,абурун гьевес хкажун патал, манияр лугьузва. Кеф-кефият, чан Сефият!

-Яъ,-лагьана юкьвай т1екв акъатай Десте-бажиди,-итимри - нез-хъваз, чпиз кеф ч1угваз, чна, дишегьлийри, к1валахун- им ягьанат я. Чу-у-у-ун- гьазабдик, итимар лагьайт1а, нез-хъваз- кефиник! Гьуррра, жемятар! Зунни фена жуваз столдихъ ацукьда, нез-хъваз!

-Ша,ша, буюр!-лагьана далдамчи Къафлана - я чан Десте-бажи, чазни вун, атана,чи патав ацукьна к1анзава. Ша, неъ,хъухъ жуваз. Къала,гада,Тариверди, цуз и рюмкадиз са виш граммни...

    Хъчарай къацу хьанвай гъилерни хуругандин  къваларай экъягъна, Десте-бажи атана столдихъ ацукьна. Адахъ галай эч1ел эч1езвай юлдашарни, акван ина вуч жедат1а лугьуз, вил алаз акъвазна.

   - Къала яхъ, дустар, гъилевайбур, и жейрандин нек чна куь сагълугъдай хъвада,-лагьана зуьрнечи Махсуда,- квез и т1ебиатдин цуьк акъудай  майдандал къурмишнавай  гуьзел сувар мубаракрай, квез аллагьди  мадни къуватар гурай!

  Са жизви хкажна сивихъ агалдаррай эрекьди Десте - бажидин сивер алугарна, жигерарни кваз кана.

    - Я гуж хьайибур, куьне заз вуч авуна-а-а?- лагьана гьарай акъатна Десте- бажидай...

    -Бес вуна, чан Десте- бажи,куьн юкьвай т1екв акъатиз гьазабдик, чун - кефиник ква лугьузвай,- жаваб гана кеменчи Тариверда,- чнани а зегьримар к1анз хъвазвайди туш, чунни гьа куьн хьиз гьазабдик квайди я....

    Са вил столдихъ ацукьнавай итимриз, са вилни эрекь авай птулкадиз яна, Десте-бажи элкъена ник1евай эч1елчийрин патав рекье гьатна.
   -За,валлагь-биллагь, а гьарам байгьуш хъвадалди, югъди ник1е к1валахда,- тикрарзавай вичи-вичикди Десте-бажиди...