Шоршаллий, стаггий
- Хецахь со дIа, хIай комаьрша стаг!, - дукхачу дохнан, яккхийчу реманийн да вара хьо! Дукха уьстагIий, стерчий диьнера ахь, сел дукха рицкъа даарх ца вуьзна, вузар вуй хьо хьан буйннал а йоцу со яарх?
Ялийтахьа со, тIам тоьхха, стигал! – лур ма ду ас хьуна кхо хьехар: цхьаъ хьан карахь доллашехь, шолгIаниг – хьан цIийна тхевна йистте хиъна, кхолагIаниг – кху йоккхачу уьйтахь IиндагI даржийна лаьттачу дитта гаьн тIе хиъна! – аьлла.
- Сан хьехаршка ла а доьгIна, ахь уьш схьалацахь - дуьненан рицкъа лаха ца оьшуш, нехан ирсе са ца туьссуш Iер-вахар хир ду хьан кху маьлха дуьненахь!
Ду хьуна кхааннах хIара хьалхара хьехар: теша ма тешалахь чулацам а боцуш дуьйцучу хабарех, дуьйцург Iилманан да велахь а!
Елира стага шоршална маршо, хиира иза, тIам тоьхна, тхевнан йистте охьа…
Исбаьхьа эшарца кхайкхийра шолгIа хьехам:
- Юха ца догIу долчу хIуманна велха ма велхалахь, дуьненан рицкъа хьайн дайча, ма дихкалахь сардамаш! – лахарх каруор а доцуш, мехе диллича, мах а боцуш, ше дозаллина хьан куьйга айа а лур доцуш деза жовхар дара сан харданг чохь! – вели-кха хьо цунах, хир ма вара хьо бIешарахь эла сана вехаш – ца хилла-кха иза а хьуна доьгIна…
Дуьнен чу дала кечделлачу беро нанна туху лазар санна лазар туьйхира шоршалан дешнаша стеган даг чу, белира шийла мохь…
Цуьнан лаьтта керчаре а хьаьжна, узаршка ла а доьгIна, элира шоршало:
- Къора ву хьо, хIай сутара стаг, дуьйцарг ца хеза?!, я Iовдал ву хьо, деллачу хьехарх ца кхета?! – ас ала ма элира хьоьга чулацам боцчу хабарех теша ма тешалахь!, - аьлла.
Дуьненан меха а долуш, дозаллина куьйге ла а лур доцу жовхар сан харданг чохь муха хуьлу, со-суо шина шайнал бен деза а ца хилча?!
Халла меттава волавелира стаг, элира шоршале:
- Схьалуохьа кхоалгIа хьехам! – аьлла.
- Ас хьалха кхайкхийначу шина хьехаре ла дуьйгIи ахь,
Кху кхолагIачу хьехаро доккхийла серлонга хьан хьекъал! – Iовдал стаг Iамо гIертар – туьха доккхучу аренца хIу дер санна хIума ду хьуна, Iуьрг даьллачу хьекъална йома йилла гIертарх, Iовдалаллин Iуьрг шор - далар бен хIума а ца хуьла хьуна!
Долуш хуьлу-кха Iуьрг… хьекъална а…, маттана а…
Свидетельство о публикации №214012102290