Тахьайт1а ви рик1елай алатда

Новелла.

   Зи хуьруьнви Келбихан акьалт1ай темпел тир. Адан са к1валах авуникни кьил квачир. Вири инсанар сад тама, сад сала, сад векье хьайила,Келбихан, са хъвадай юлдаш гьатдат1а акваз, хуьруьн майдандал алай алачухдик-кьурук ацукьна жедай.
   
   Колхоздин тракторист Селим нисинин фу нез к1вализ хъфизвай. Адав прицеп галай " Беларусь" гвай. Ам акурвалди,булахдилай яд хъвана, ц1ару сериндик хквезвай Келбихана, гъилин ишарадалди трактор акъвазарун истемишна. Гьикьван нарази тирт1ани, Селимавай истемишун инкар ийиз хьанач.Вучиз лагьайт1 адаз Келбиханан ч1уру къилих чизвай."И киц1 зи вилик гьинай аватна?"- рик1яй хиял фенат1ани, Селима ракьун балк1ан са легьзеда акъвазарна, вич тадиз рак1ар ахъайна, чилел эвич1на.
   
    - Лагь, чан Келбихан, ви къуллугъ, ваз вуч гереквал ава?
  Са декьикьада инал инхъай - анхъай физ-хквезвай инсанарни к1ват1 хьана.
 
 -Пака вун фидай чка-зат1 авани, сивиз кьейди? -хабар кьада Келбихана.
 -Зун зи ихтиярда авай кас туш, чан Келбихан, пака зун председателди гьиниз ракъурдат1а низ чида? Ваз вуч герек ят1а заз лагь.
 -Заз пака ви трактор герек я!
 -Ваз хкидай векь-к1арас авани,к1вал эцигдай къванер-кирпичар авани, лагь. зазни чир хьурай? За,чарасуз вахт жагъурна, ви к1валах туьк1уьрда!
  К1ват1 хьанвайбур сад-садаз килигиз, чинеба хъуьрез башламишна. Келбихан гьинай, дерди-бала гьинай!
 - Ам ви буржи туш, гьайван! Заз вун пака сятдин ц1удаз, мих хьиз, инал хьана к1анзава. Заз вуч дерди ават1а, за ваз ахпа лугьуда.
 Гатун чими югъ тирт1ани, Селиман далудиз бирдан къайи гьекь акъатна.
 - Хъсан я, чан Келбихан, гьа вуна лагьайвал, зун сятдин ц1удаз, мих хьиз,  инал жеда! Мад ваз лугьур-талгьур авани?
 - Авач...
 Ихтилат куьтягь хьайиди малум хьайи Селимаз трактордиз хкаж хъижез к1ан хьана.
 - Эй, бейниван,акъваз, са гаф ама!
     Вилик вегьей кам  кьулухъ эхцигна, Селим мад рахазвайдахъ элкъвена: - Мад вуч хьана, чна акьалт1ай къарар акъуднай эхир, вунни рази хьанай...
 
 И арада, гаф сиве амаз, Келбихана Селимаз вижевай сад куькуьмарна.
  - Зи тахсир вуч я, вуна зун вучиз  ягъна?-хабар кьуна чара ат1ай трактористди.  Къал акъатдайди чир хьайи к1ват1 хьанвайбур, лаш акур нуьк1верин луж хьиз, гьарма са патахъ чк1из башламишна.

 - Жуван мукъаятвал жува ая лагьанвайди я , Селим,- лагьана Келбихана, эрч1и гъилин къалурдай т1уб виниз хкажна,- Тахьайт1а,ви рик1елай алатда!