Арыгинальная мадэль

Арыгінальная мадэль

 Распавяла Вольга Міхайлаўна

 …Цік-так, цік-так, цік-так,… - мерна адбіваў такт часу маятнік ходзікаў. І павольна рухаліся па крузе ўзорыстыя стрэлкі. Сінхронна ім рухалася касая калона сонечнага святла з маленькага акенца, адбіваючы свой след у выглядзе залатых, няправільнай формы ромбаў на драўлянай падлозе з шырокіх хваёвых дошак. 
 Надзея Андрэеўна сядзела за швейнай машынкай і кроіла са сваёй любімай сукенкі, з папліну, сукеначку для Волькі. Сукенка гэта Надзеі Андрэеўне стала зацеснай, да таго ж на швах пацерлася і расцягнулася. А дзіцячая сукеначка абяцала атрымацца прыбранай і прыгожай. 
 Волька сядзела за сталом, абклаўшыся падручнікамі і сшыткамі. Перад ёй ляжала вялікая агульная фатаграфія іх класа разам з настаўнікамі на навагоднім ранішніку ў вёсцы Васільчыцы. І Волька  старанна малявала настаўніцы біялогіі Аляксандры Фролаўне чорныя акуляры і вялікія вусы. 
 ***
 Тут адчыняюцца дзверы, і заходзіць Аляксандра Фролаўна. Волька ўздрыгвае і хавае фатаграфію пад сшытак па матэматыцы. Але Аляксандра Фролаўна, перавальваючыся як качка з боку на бок, мінула яе, нават не паглядзеўшы на дзяўчынку, прайшла адразу да Надзеі Андрэеўны.
 - Дабрыдзень, суседка. У мяне да цябе просьба. Пашый мне кофтачку. - і дастае з торбы шырачэнныя і велічэзныя жаночыя шаўковыя панталоны светла-блакітнага колеру. - Латку пасярод можна выразаць - гарлавіна атрымаецца. Тут - бачыце - рэглан… Гумку выцягнуць, разрэзаць па баках і ўцягнуць стужачку…
 ***
 На наступны дзень перад заняткамі настаўніцы, тоўпячыся вакол Аляксандры Фролаўны, захапляліся яе арыгінальнай і прыгожай кофтачкай.
 Волька з сяброўкамі, назіраючы з боку, пагардліва пракаментавала:
 - Гэта яна рытузы на галаву нацягнула…
 А хлапчукі, пачуўшы яе словы, радасна закрычалі:
 - Аляксандра Фролаўна, здыміце з галавы рытузы!...
 ***
 Што такое? - захваляваліся настаўнікі. І прыйшлося Аляксандры Фролаўне распавесці гісторыю стварэння арыгінальнай кофтачкі.
 ***
 …На наступны дзень у Капыльскім універмагу жанчыны вельмі хутка, літаральна на працягу гадзіны, расхапалі ўсе шаўковыя панталоны, павыкуплялі ўсе залежы, назапашаныя там за доўгія гады…