Чужыя сусветы
…Як я іх ненавідзела, оптам і ў розніцу. Хоць, гэта была не нянавісць. Нянавісць занадта моцнае пачуццё. А тут была абыякавасць. Я проста стала лічыць, што яны ўсе - на прыступку ніжэй па сваім развіцці. Самаўпэўненыя і самаўлюбёныя эгаісты, якім на ўсё напляваць, акрамя сябе. Хоць, хто ведае, можа, я была і не далёка ад праўды. Бо, калі б было не так, то хіба давялі б яны нашу планету да таго жудаснага стану, у якім яна цяпер знаходзіцца?
…- Прыходжу дадому, - паведамляе неяк Зянон, - гляджу - пліта не вымыта. Цэлы дзень дома сядзіць - і пліту не вымыла…
- А ты б узяў - і вымыў, - з глухой нянавісцю сказала я, - яна дома з двума маленькімі дзецьмі, а гэта вельмі цяжка. А ты тут прахалоджваешся… Кнопачкі націскаеш, працаўнік…
…І ўспомнілася…
… - Мужчына жэніцца для таго, каб атачыць сябе камфортам, - сказаў Ён.
А што я магла на гэта адказаць? Я ж не мужчына, каб тлумачыць, навошта мужчына жэніцца…
І перанёс ён крэсла-ложак на кухню, каб мы не заміналі яму спаць уначы.
А я хадзіла і хадзіла па пакоі, з кута ў кут, з сынам на руках. Строга па графіку, з паўночы да трох гадзін. Стоіла мне спыніцца, як маляня пачынала плакаць. У тры гадзіны ён засынаў і спаў да шасці. А з шасці да паўночы - чарговы, распланаваны цвёрдым графікам, дзень. І нельга было з гэтага графіка збіцца… І круцілася я як цвёрда замацаваная шрубка ў вялікім аўтамаце…
А побач бестурботна жыла, ні пра што не клапоцячыся, нейкая істота… І пакрылася душа мая цвёрдай скарынкай адчужанасці і непрыязнасці да ўсіх іх, разам узятых, эгаістаў …
…Было свята. Дзень Абаронца Айчыны. Мы сядзелі за доўгім святочным сталом. Я нядаўна працавала ў гэтым калектыве, і ўсе твары для мяне былі малазнаёмыя ці зусім незнаёмыя. Чужыя і абыякавыя твары. І вырашыла я трошкі паздзеквацца. І пачала распавядаць Верш Вялікага Паэта пра Каханне і Адданасць, пра Дапамогу ў Цяжкую Хвіліну. А ўсярэдзіне мяне ў гэты ж час крыўляўся, высалопліваў язык і звінеў званочкамі дурань маляваны. І забаўлялася я такім кантрастам.
І раптам заўважыла, як усе ўзрушаны Вершам. Усе сядзелі ціха, апусціўшы галовы. І ў шматлікіх на вачах былі слёзы.
…І растала скарынка адчужанасці і непрыязнасці…
...І падумала я: а яны, здаецца, таксама людзі, ані горш за нас...
Свидетельство о публикации №214072401396