Так што там было?
Прабіраючыся да Мора, патрапіла ў тупік.
Апынулася на слізкім, стромкім і камяністым схіле. Уніз вяла вузкая сцяжынка, якая ля вады раздвойвалася на два вузкіх каменных мастка. І гэтыя масткі рознымі шляхамі вялі да трохкутнага пяшчанага пляжу. І абодва мастка былі такія вузкія і слізкія з выгляду, што з іх можна было лёгка зваліцца ў ваду.
Я ляжала на стромкім схіле, учапіўшыся ў камяні, каб не спаўзці ўніз. І думала, па якім з гэтых двух слізкіх шляхоў дабрацца да берага.
А, можа, вярнуцца зваротна, і пашукаць зручнейшы шлях? Я паглядзела назад, угару, адкуль сюды патрапіла. Там была суцэльная сцяна. І ў ёй - вузкая, цёмная нара, у якую зусім не жадалася лезці.
Павагаўшыся трохі, я падумала, а, можа, нічога страшнага не здарыцца, калі я там сарвуся з мастка ў ваду? Там жа быццам бы не глыбока. Ці, усёткі, вярнуцца ў нару?
***
Ад гэтых разважанняў мяне адцягнуў малюнак, чорна-белы графічны малюнак, які я ўбачыла там, на трохкутным пляжы.
Змрочная панурая скала навісала зверху і атачала з усіх бакоў маленькі трыкутнік шэрага пяску. А далей рассцілаўся бяскрайны акіян сталёвага колеру.
…Яны нарэшце сустрэліся! Грузны мужчына старэчых гадоў, у лёгкай кашулі навыпуск і шырокіх штанах і дзяўчына, Язмін. Яны стаялі далёка адзін ад аднаго і глядзелі ў процілеглыя бакі.
Потым дзяўчына працягнуўшы руку да акіяна, пытальна азірнулася. Мужчына моўчкі кіўнуў.
А дзяўчына хутка і лёгка пайшла да акіяна, збіраючыся скокнуць у ваду.
А мне раптам стала так жудасна. Мне здалося, што ў вадзе стаілася нешта жудаснае. І я хуценька прачнулася, каб не даць адбыцца гэтаму жудаснаму.
***
А напярэдадні, засынаючы, я замовіла: пакажыце мне сюжэт для арыгінальнай казкі.
Вось, атрымлівай, - сказаў Дыспетчар сноў.
Свидетельство о публикации №214080700600