Гумбатl

   Гатфарин са чlимел юкъуз хуьруьн кимел инсанар гзаф алай. Агьалийри,  санал кlватl хьана, Къенберан гвеж гьер ни тlуьнатlа веревирдзавай. Къенбер вични ала инал. Гзафбуру, «Гумбатl» лакlаб алай кьуьзекал шакзавай, вучиз лагьайтlа, ам гъил квай кас тирди хуьруьнэгьлийриз виридаз малум тир.  Ада чарадан лапагар са шумуд сеферда чуьнуьхна, сад-кьве юкъуз къазмада хвена, ахпа биргенд авунай. Адал ихьтин лакlаб хьунни дуьшуьшдин кар тушир.
    Шак физвайтlани, гьакъикъи делилар жагъур тавунмаз, успат ийиз жезвачир. Гьа и легьзейра Гумбатlни кимел атана. Салам-калам авурдалай кьулухъ Гумбатlа жузуна:
   - Вуч ихтилатарзава куьне, хуьруьнвияр?
   - Накь ваъ, вилик галай юкъуз Къенберан гьер парахдай акъатна, хуьре гьатна. Къени жагъуриз хьанвач ам. Чаз гвеждиз къаст авурди вуж ятlа чириз кlанзава. Са сят я чи ихтилат гьадакай физ, - жаваб гана са агъсакъалди.
   - Вилик квай юкъуз квахьнавай гьер къе жагъуриз алахъун лазимсуз кар я. Низ чир хьуй, адакай исятда биргенд авуна ни незватlа?! Чlехи хуьре акьван угърияр ава хьи, - лагьана Гумбатlа.
   - Мисалда лагьайвал, «угъридиз вири угърияр хьиз жеда». Гила вунани жуван «пеше» гзафбурал илитlзава. Чир хьухь хьи, гьер тlуьрди вуж ятlа мукьвара чир жеда, кичlе жемир ваз, - хъел кваз лагьана Къенбера.
   - Хва текьей Къенбер, са успатни авачиз, вуна зун элдиз бедлем ийимир. Нагагь зал шак физватlа, атана килиг зи цурриз… Ахпа жуван мезни яргъи ая, - лагьана яшлу Гумбатlа.
   - Цурриз килигдач зун. Ша кван, чна хуьруьн къерехдихъ галай ви къазмадал са кьил чlугван, - гьер къазмада авайди аян хьана Къенбераз.
   Гумбатlаз маса чара амукьнач. Фена кьведни къазма галайвал. Килигайтlа, гьерен кlвачер са пипlе, келле маса пипlе, жендекни  -  къавукай куьрснавай.

2011-й.