Къучияр алцурарай Кьасумбег

   Алатай асирдин эхирра хьайи агьвалат я. Хуьре уьмуьрзавай лежберар тир Кьасумбегни Къенбер, чпихъ авай-авачир келемар чувалра туна, уртахдаказ машин кьуна, Ростовдиз рекье гьатда. Бахтунай хьиз, абур фейи базарда, келемар авай машинар кьериз-цlаруз авай. Абуру, муьштери къалин хьана, хъсан къиметдай са къатда маса гузвай. Алвердин гъиляй абуруз гьатта каш-мекьдай декьикьаярни жагъизвачир. Ингье саки вири келемар маса гана акьалтlарзава. Аламайди кьуд-вад чувал я. Бирдан муьштерияр кьери хьайи чlавуз, Кьасумбеган рикlел кафедиз фин акьалтда.
   - Къенбер, зун исятда атlа къвалахъ галай кафедиз фена хкведа. Зун хтайла, нубат види хьурай.
   - Акъваз вун, са герендилай машиндиз дапlар яна, чун кьведни санал фида. Тади къачумир, текдиз фин хаталу я, ваз чизва, кьуд пад къучиярни къачагъар я. Чаз хьанвай пулни вири ви жибинра ава. Вахчуда вавай пулни вири, беябур жеда чун, залум, - лагьана Къенбера.
   - Къучиярни къачагъар вучтинбур я?! – лагьана Кьасумбега. 
   - Алад, алад! Анжах игьтиятвал квадармир! - тагькимар хъийизва Къенбера.
   Кафедиз фидай рекье Кьасумбег яракьлу къучийрин хурук акатна.  Жибинравай пул вахчурдалай кьулухъ  къучийрикай сада:
   - Вун гьинай я?
   - Зун Дагъустандай.
   - Маса гудай келемар мад амани?
   - Ваъ, амач. Вири маса гана куьтягьнава, - кьуд-вад чувал амайди хиве кьунач Кьасумбега.
   - Акl ятlа, ватандиз хъфидай рекьин билетдин пул тада за ваз, - са къучиди Кьасумбегаз рекьин пул туна.
   Кьил агъуз аватна, теспача хьана хтай Кьасумбег акурла, Къенбера адан кьилел са вуч ятlани атанвайди гьасятда кьатlана.
   - Къенбер, кепеюгъли къучийри зав гвай пул вири вахчуна.
   - Я ахма-а-кь! Бес за ваз лагьаначирни… - Къенбера Кьасумбеган кьилел хар къурна.
   - Амма а къучияр за алцурарна, - хвешивални авамвал акахьай жуьреда лагьана Кьасумбега.
   - Гьикl, гьикl? – пул чкадал хкведай хьиз хьана, шад хьана, жузуна Къенбера.
   - За абурун «маса гудай келемар мад амани?» лагьай суалдиз «Амач» лагьана, жаваб гана.
   - Бармакдин кlаник кьий вун, Йиртихбег, - авайдалайни гзаф ажугълу хъхьана Къенбер.