Ичlи къажгъан

   И кар хьайидалай кьулухъ кьуд йис алатнава. Са кlелетви къунши хуьруьн кимел са вуж ятlани гуьзлемишиз акъвазнавай. Кимелни агьалияр тlимил алачир: жегьиларни агьилар. Са пата кlватl хьанвай жегьилри ийизвай ихтилатрик кlелетвини экечlна. Адаз кlанзавайди вичи гуьзетзавай кас хкведалди са жуьреда вахт серф авун тир.  Вич пара рахазвачиртlани, яб акализ, секиндиз акъвазнавай. Са арадилай суьгьбетар ягьанатар квайбуруз элкъвезва. Кlелетвидиз абурун бинесуз, манасуз ихтилатар ерли бегенмиш жезвачир.
   Вичи ара атlуз, сад-кьве гаф лугьуз, секиндиз акъвазнавай кlелетви акурла, кlватl хьанвайбурукай бязибуруз ам акьулдикай кьериди хьиз жезвай. Кlелетвиди кьатlана, гила кимеллайбуру вичикай ягьанатарзавайди. И кар хуш тахьай адаз хъуьруьнни атана. Гьа и арада вичин яшда авай хьтин сада адаз суал гузва:
   - Ваз къизилрив ацlанвай къажгъан кlандайни, тахьайтlа – акьулдив?
   - Хьанайтlа, исятда заз чарасуздаказ са ичlи къажгъан кlандай, - жаваб гана кlелетвиди.
   Ихьтин жаваб гайила, кlватl хьанвайбур вири векъидаказ хъуьрена. Ахпа са маса жегьилди жузазва:
   - Яда, виридаз къизилар, акьул авай къажгъанар кlан хьайила, вуна ичlи къажгъан хкягъунин сир вуч я?
   - Кьей рухваяр, - хъел атана кlелетвидиз, - куьне ийизвай ахмакь ихтилатрин ван тахьун патал а ичlи къажгъан за жуван кьилел акьалждай.
   Ихьтин жаваб япарихъ галукьай кимел кlватl хьанвай гъвечlи-чlехи, са гафни ахкъат тийиз, кис хьана.