Смайликар

               
   Гьакъикъи уьмуьрда ваъ, Интернетдин алемда шаз хьайи кар я.  Саки датlана лезгийрин сайтра, форумра кхьинар ийизвай ва анрай малуматар кlелзавай Гьамидаз акур са гъвечlи аламат я. 
   - Пагь, ваз къаргъишдай са кас кlандай исятда,  смайликар лугьудай лишанар акъудай фланэгьли! – лагьана «одноклассникар» сайтдин лезги форумдай са бязибурун къейдер кlелай Гьамида.  – А лишанар себеб яз вуч жезватlа аку! Чи чlехи шаирдин устадвилел шак гъизвайбур аку садра! Амай чlавуз ватанперес лезгияр я. Гьурра-ватанпересар.
   Инал Гьамидан гафарал тажуб тахьанани амукьдач: смайликрив вуч гва кьван?! Вич лугьумир, «одноклассникриз» гьахьзамазни, анай парани-пара аквазвайбур гьа чпикай Гьамид икрагь хьанвай смайликар я. Группайра, махсус чинрин къейдерин чкайра… - вирина гьа-гьабур. Абуракай сад: кьве тlуб виниз хкажнавай лишан къалурзавайди я. Имни гьич. Муькуьди –  кlанчlал тlуб хкажуналди «лап хъсан» мана къалурзавай  смайлик.
   Килигзава Гьамид са лезги форумда кхьенвай къейдериз. Са ни ятlани са затlунин тариф авунин лишан яз, «кьве тlуб» хкажнава. Гуьгъуьнлай пайда хьайи интернетчидини вичин фикир кхьинралди ваъ, смайликралди ачухна. Ида лап а смайликар жумартвилелди  цlиргъинда туна. Артухлама  «лап хъсан» манадин пуд смайликни гилигнавай.
    - Фикир гайитlа, им бязибурук акатнавай "хесет" хьизни аквазва. Гьакl, вуч хьайитlани хьуй лагьана, анжах тарифдин смайликар ишлемишзава. За кьатlайвал, гьа икl я и кар. Им къерехдай фикир гайила чир жезва. Тахьайтlа, гьикьван гьа са-садбур жеда. Цlиргъинда аваз. Бес са ни ятlани «хъсан я, лап хъсан я» лугьуналди, виридаз адет жедани?! Акl жедач эхир. Гьардахъ вичин гьакъикъи зенд хьана кlанда, - лагьана Гьамида, къаншарда авай столдаллай компьютердихъ ацукьнавай Гьалимаз.   
   - Ийиз кlанзавай асул ихтилатдал къвен гила, - давамарзава лезгийри чпин сайтра вуч кхьизватlа кlелзавай Гьамида. - Са лезги интернетчиди килиг вуч кхьизватlа:  «Етим Эмин са акьван хъсан шаир туш. Адаз вичин девирдин яшайишдин шартlари шаир хьуниз куьмекнава. Адан бахтуни гъана. Гьавиляй хьанвайди я адакай шаир. Тахьайтlа… ».
   Лезги эдебиятдин гьакъиндай вичин терхеба веревирдер форумда кхьизвай лезгидикай хуш татай Гьамидан фикирдалди, ахьтин кхьинарзавайди, гьинвачтlани, кlашкlум жакьвадайбурукай я. Гьакъикъат тийижирда хьиз, бинесуз ихтилатарзавайдан фикирар гурлу капаралди, разивилин лишан квай смайликралди кьабулдайбурни кими хьаначалда. Аламат жедай кар ам я хьи,  сада са зарарлу къундарма акъудайтlа, бязибуруз хуш къведа адакай, чlалахъ жеда адан.Балугъ хьиз кlирина гьатда. 
   - Лезги шииратдин «буба» тир Етим Эмин хьтин зурба арифдардин бажарагъдал шак гъун аку! Вирини анихъ акъвазрай,  са кьадар яш хьанвай лезгиярни кваз ава гьа и арайра. Ибуруни керчекдайни тапаррай кьил акъудна кlани чкадал, чпин фикирар разивилин смайликралди къейдзава. Гаф-чlал кхьиз жезмачирбуру хьиз. Лезги Нямета лагьайвал, ша гила хъел къвемир ваз! Са масада са нин ятlани шиир, кьиса форумдиз акъудайла, мадни тарифар… Смайликралдини. Ялтахвилин смайликралди. Ахпа  давам жезва абур. Тум-кьил амукьзавач.
   Са гьакъикъатдин гьакъиндай жуван хъсан майил руьгьдалди ачухун, лугьун яз ишлемишайтlани, маса чlавуз шит жезва эхир а смайликар. Бес са касди лацу рангуниз чlулавди лагьайла «баркалла, вун гьахъ я!» лугьудани?! И смайликар за мад Интернетда герек чlавузни ишлемиш хъийидач, такlан хьанва. Квахьрай абур! – къалабулух квай тегьерда акьалтlарна Гьамида вичиз акур аламатдикай ихтилат.