Вини дережадин кlамаш

   Кьасумбега мектебдин сифтегьан классра кlелзавай. Муаллимди гузвай тарсар ерли адан кьиле гьатзавачир. Иллаки математикадин тарсуна ада муаллимдин келледин къалпагъ зурдай чкадан гъизвай.  Зигьиндиз зайиф хьуниз килигна, муаллимди адаз вичин кlвалени кьилди тарсар гун кьетlна. Саки кlелунин йисан эхирни хьана, амма Кьасумбег гьа Кьасумбег яз амай, чирвилерин патахъай са нетижани хьанач. Муаллимни адакай бизар хьана. Гатун тlатlиларни алатна. Кьасумбег 3-классдиз акъатнава. Математикадин тарсуна муаллим мадни алахънава адаз гьисабунар чириз. 
   - Къарагъ кван, Кьасумбег, садакай сад хкудайла, шумуд жедатlа лагь.
   - Низ чир хьуй, я муаллим…
   Муаллимди мисалар гъиз башламишзава:
   -  Месела, вахъ ава са ич. Вуна а ич тlуьна куьтягьна. Ваз вуч амукьна? - Муаллимди адан сивяй «са затlни» гафар акъатун гуьзлемишнавай.
   Хъвер акатна авам ученикдик.
   -  Авай са ич тlуьна вуна, ваз са затlни амукьнач. Садакай сад хкудайлани «ноль» я, - хълагьна муаллимди.
   - Мад хьанач хьи, я муаллим, гила квез зун лап вини дережадин кlамаш я лугьуз кlанзавани? Ич тlуьрла, кlап амукьдайди гьар са ахмакьдизни кваз чида эхир. Им вучтин математика хьана, кlапарни кваз незвай? – жузазва муаллимдивай аялди…