Саяд ва Шихрагьим

Иштиракчияр:
Саяд
Шихрагьим
Селим
Кавха
Стха
Кьиле тухузвайди

Кьиле тухузвайди:
Дуьнья гьикьван гуьзел ятIа аку! Дуьньядин вири гуьрчегвилер, и дуьньядин вири няметар – вири инсанар бахтлу хьун патал кьисметнавайбур я. Гьайиф хьи, и гуьзелвилерикай виридавай менфят къачуз алакьзавач. Виридалайни кайибу – дишегьлияр я лагьайтIа, зун ягъалмиш жедач.
Дишегьлийрин кьисмет кIанибурун гъиле хьанач. Кьилди къачуртIа, рушарин кьисмет виринра сад хьиз туш. Абурукай – гайи вахарилай кайибур гзафя. РикIел хкин Ислидинни Кереман, Лейлидинни Межднунан кьисметар. Виликан девирда гьа ихьтин кайибурукай сад чи Саяд-Пери я.
Чна куьн фикирдиз, Саяданни Шихрагьиман кьуьсметдикай ва абурун дустаринни душманрин къастарикай пердедин са чIук гъизва. Яб акал, хъсандиз тамаш!

Саяд.
Вун гьиниз я пер къуьнеллаз?
НикIелай яд аладариз.
Зунни къведа къе вахъ галаз,
Лацу гъилер галтадариз.
Шихрагьим
Лагь лугьунал – лугьуз женни?
Вун зи рикIин сир я, Саяд.
Чун мад санал къалуз женни?
Фитне авай хуьр я, Саяд.
Саяд
Ви кьулавай гимишдин чIул,
Гимишдин чIул – къизил савад.
Зи стхадин чизва ваз тIул,
Нафт илична. Кумир Саяд. (манияр лугьуз-лугьуз фида)
Кавха
Ажеб ксар я СтIалар,
Гьар са руш – са жейран я хьи!
Нез-хъваз, ина ягъиз ялар,
Пампурандин девран я хьи. ( фида)
Стха
КIеледилай ник къачуз кIанз,
Бес жезвач заз вад виш манат.
Сабадиз ам гьакI тухуз кIанз,
Алахънава зал механат.(фида)
Селим
Зунни зи яр са дакIарда,
Мани лугьуз, шад яз хъуьрез,
Мягьтел я, дуст, зун са кардал,
Куьз ийизва на вун мерез?
Шихрагьим
Мерез жечни Пампур Гьуьсейн,
Гьатнавайла чи арада?
Вазни чизва писни хъсан,
Зун гьатнава, дуст, кьарада.
Саяд
Тарал алай пад яру ич,
Шихрагьим, са жуьре ава.
Валай артух садазни фич,
Зун – вун авай хуьре ава. (фида)
Стха
Агъа-Киши туш хьи зун мад,
Хуьре-хуьруз тагайтIа вун.
Буш рахункая авач ваз дад,
Шехьиз-шехьиз рахайтIан вун. (фида)
Саяд
Цавай фидай вили лифер,
Къурху хьана, гур хьуй, стха!
Зун кIанидаз тагай, зегьер,
Ви вилик зи сур хьуй, стха!
Шихрагьим
Саядаллай агъдин перем,
Кьве тупшунин куьруь куьзна?
Вун Исли хьиз, туна Керем,
Саяд, на зун, дили куьзна?
Саяд
Гьина ава са гьахъ-дуван?
Чун кIанибур къакъудзавай.
Аллагьдизни жезвач зи ван,
Хуравай рикI акъудзавай.
Пампур
Бес я, Саяд, ви баядар,
Хуьре-хуьре шадвал жеда.
Гуьзел рушар тир Саядар,
Вилер ишез, ядвал жеда.
Саяд
Шехьа, Саяд, вилин накъвар,
Селлер хьана, гьуьлериз фий!
Вучда гила за чандикай,
Зи чан ирид чилериз фий!
Шихрагьим
Дагъларайгъуз къведай булах.
Вун хъваз кIандай, чан къайи яд!
Сад Аллагьдин эмирдалди,
Вун гъуьл кьена, хтуй Саяд!
Кьиле тухузвайди
Шихрагьиман дуьа Аллагьди кьилиз акъудна. Саяд, гъул гадарна, чуьнеба хуьруьз хкведа. Гьайиф хьи, Саяд гъиляй акъатай Шихрагьим, бубади маса рушал эвлелмишнавай. КIаниди гъиляй акъатай Саяд, са аял хьана, рикI хъиткьинни кьена. Гила, гьуьрметлубур, а девирар амач. Чи жегьилар чпин рикIерин мурадрихъ шадлу яз агакьаррай!