Любовь предателя

Трагедия

БУТ;АКЬЯНЧИБИ:

Карим – жагати куц-кабизла вег; студент
Залина – рухъна нешличил х;еррируси исбагьи рурси
Гульнара – Залинала халал рузи, студентка
Г;яли – Каримла дудеш, кьяркьси адам
Микаил – Залинала халал узи
Патимат – Залинала неш, г;ямру дерк;ибси, малх;ямси хьунул адам
Г;яйшат – Залинала халал рузи
Марзи, Бат;а – Ахмахла жинслизибадти хьунул адамти
Саният – Залинала ралликьяна
Ислам – жагьил адам, машинала вег;
Ахмах – жагьил адам
Хадижат – Ахмахла неш
Х;ябиб – жагьил адам
Шамил – Каримла халал узи
Мямми – Гульмирала мурул
Муса – маслиг;ятчи
Милица ва ца-чумал адам







АНЦ;БУКЬ  ЦАИБИЛ

Сурат цаибил

Залинала хъали. Бишт;аси диван, улкьайла гьалаб жузала бек;аличилси стол. Залина дивайчи кариили руч;ули сари. Хъули ариц;ули сари Гульнара.
ЗАЛИНА (харчризурли) Гьуя, Гульнара! Х;у мурт рак;ири? Х;ела сессия таманбиублив? (рузила ляжиличи байрилкули) Х;у агарх;ели бахъ анц;букьири наб.
ГУЛЬНАРА Набзира ца дев бурахъа…
ЗАЛИНА Бура, бура, дила рузи! Х;ела белч;уди сен саби? Дура лерилра хабурти.
ГУЛЬНАРА (дивайчи карирули) Х;уни наб ца чяйла керт;а, нуни х;ед биалли ца тамашала хабар бурис: суратличи дигай дихьибси студентличила.
ПАТИМАТ (хъули рух;нарулхъули) Г;яжаибси хабар х;ебиалли! Секьяйда вируси суратличи дигай дихьес? Рамсуррив, дила рурси? (Гульнара к;ап;рурцули) Ч;укьариубсигъунаригу?
ГУЛЬНАРА  Ах;енра, неш. К;ел килограммла ц;ерхькариублира.
ПАТИМАТ Гьаннала жагьилти ах;макьли саби, эгер суратуначира г;яшикькабирули биалли. Нуни биалли, г;япабаркь, х;ушала дудешличилалра дигай дихьес х;ебагьурра. Гьу, гьу, х;ушала диг;яндешуни дурахъес датурли, кухнялизи аркьяс.
ЗАЛИНА (Гульнарас чяй дарес алавризурли) Духуси неш лерри кьалли х;у нушала!  (Гульнарази) Гьаригу суратличила хабар бура.
ГУЛЬНАРА Нушала университетлизив ца х;екьли жагаси урши хев. Ил бахълис ургаикили сай. Ца рурси кьалли ил урши багьандан ребк;есра х;ядурли сари.
ЗАЛИНА (дукарк;ули) Университетлизив ца ах;енси жагаси урши агарсив?  Чи сая ил илцадра жагаси?!
ГУЛЬНАРА Илис Карим бик;ар. Мемух;ела шилизивадси урши сай. Цагьачам  общежитиелизир учидикили чумал урши-рурси лерри. Илди-ургав Каримра леври. Нуни дила жузи кадирхьуси кьаси умубирух;ели,  ца жуз кабикиб ва илизибад сурат дурабикиб. Жузра суратра Каримли ахъдуциб. Илини суратличи х;ерик;ули ишкьяйда иб: «Чинар риалра, чила риалра, иш суратлизирси рурси дила рирар!»
ЗАЛИНА Чила сабрив гьат;и ил сурат?
ГУЛЬНАРА Х;уни багьи гьари чила сабрил ил сурат.
ЗАЛИНА Нуни сели багьиша! Бурадли балас…
ГУЛЬНАРА Ил сурат х;ела сабри. Х;у сарри илис г;ях;ризурси.
ЗАЛИНА Илдицад сунечи г;яшикьти рурсбани алавуцибси илис дила суратлизиб се г;ях;бизурси вара?
ГУЛЬНАРА Х;ура исбагьи сарри, Залина. Ил х;ела суратличи г;яшикьиънилизиб нуни селрацад тамашадеш чебиули ах;енра. Руч;ес карерхадли ил х;унира чейид. Университетлизир руч;ес кьас агарав?
ЗАЛИНА Руч;ес кьалли дигулра. Ил дила ришт;ах;ейчибадси хьул саби. Амма имтих;янти дедес бажардирикишара или урухк;улра.
ГУЛЬНАРА Урусуни бик;уливан, халбарни – г;язабверк;ни ах;ен. Халбара, белики гьарбилзан ва студентка ретарад.
Т;АМА Гульнара!
ГУЛЬНАРА  Неш жирик;ули сари (аркьян).
ЗАЛИНА (сунези сари) Карим, Карим… Сегъуна саяра ил рурсби г;яшикьбирахъан жагьил?! Наб кьалли г;ях;ти, малх;ямти т;абиг;ятла вег; адам вирар имц;али г;ях;илзуси. Куц-келпатла жагадешличиб т;абиг;ятла жагадеш даршнали гьаларра сари. Амма ил чеэс багьанданра университетлизи карерхес г;яг;нибиркур.
               
(пардав)


Сурат к;иибил

Университетла жанях;. Расписание чеббелк;ес т;ашбизурти Залиначи ва Саниятличи Карим гъамирули сай.
КАРИМ (Залиначи гъамиубли) Агь, исбагьи! Х;у нуни чинар саррил чераибсири!  (бек; хъарсбирули) Чинаррив х;у нуни чераибси? Гьаригу, инжитх;ейахъес х;ед чи бик;арал бура.
ЗАЛИНА Гьар-гьарилтачил тянишрирес дила сегъуналра кьас агара. Наб чи бик;алра х;ед села авара?
ГУЛЬНАРА (илдачи гъамриубли) Салам жагаси къушум! Х;уша гьаннара тянишх;едиублирав?! (Каримлизи) Иш дила ришт;ал рузи Залина сари, иш илала ралликьяна Саният сари…
КАРИМ Гьанна шакикира! Суратлизирси рурси Залина!
ГУЛЬНАРА (рурсбази) Иш Карим сай.
ЗАЛИНА Карим!? (Дукарк;ули) Х;у хабарла адам уилри…
КАРИМ Сен дукарк;улрив? Набчила се-биалра вайси хабар аргъирив?
ЗАЛИНА Дукарк;ахъесра х;ералтарав гьат;и? Дила ихтияр набзиб ах;ену?
ГУЛЬНАРА Урасая х;ушала жалти. Жалтани къавгъа дургу.
ЗАЛИНА Х;ябилра гьанк; чебикиб кьалли ишбарх;и лекциябачиб.
САНИЯТ Чуйнара г;урра гьанк; чебикес нушачи. Гьанна нушала г;ямру дарсдиубли сари – кьанни кадилхьули, жявли адилзес чевкъар. Цацах;ели дусесра х;ебиркур…
КАРИМ (Залинала лих;илизи) Х;ед чичил русес дигулрив?
ЗАЛИНА Се гъай сари х;уни дурути? Мех;уриубли х;ейиши?!
КАРИМ Юх, виубли ах;енра. Масхара балулрил х;у ахтардирирулри? Х;уни «Г;янайчил русес дигулра» или, жаваб чарбатес рирусири, амма…
ЗАЛИНА Наб илдигъунти масхурти бек;лил г;ях;дилзути ах;ен.
САНИЯТ (Залинази шивк;иврик;ули) Духуси ва разиси урши лев кьалли. Ишис х;у г;ях;ризурсигъунари, Залина.
ЗАЛИНА Наб х;ушала гъай анц;дукьун. Ну аркьулра.
(Залина аркьян)
КАРИМ (Залинас г;ергъи х;ерик;ули) Агь, Залина, Залина! Суратлизирсиличир х;уруц;лизир х;у азирнали жагасири! Х;угъуна исбагьи дунъяла къакъличир г;ур агара.
(Урк;бухъунти Гульнарара Саниятра батурли, ил улхъули аркьян)

Сурат х;ябъибил

Университетла азбарлизибси скамейка. Ила кариили пикрумазиахъибси Залиначи Х;ябиб гъамирар.
Х;ЯБИБ Залина, дебали рачарархибсигъунаригу? Се бетаурлив?
ЗАЛИНА Ца имтих;яй рархахъилра, Х;ябиб, – философияла.
Х;ЯБИБ Азир къурушра кабихьили, зачётка биха. Ил имтих;ян к;ел минутли кабалтахъис.
ЗАЛИНА (Арцра кабихьили, зачётка бедлуга) Ма, вирули г;ергъи кумекбара.
Х;ЯБИБ Ну вак;айчи х;у итар – дила машинала рух;нар т;ашризи. Ма, ишди машинала умхьнира, нуни х;ела масъала гьунчибуршис.
(Х;ябиб аркьян, амма ца минутла г;ергъи чариубли лявкьян)
Х;ЯБИБ Преподаватель арякьири. Жяг;ял кабалтахъех;е. Ма, зачётка. Х;у сен ишар т;ашлири? Раши иха машиналичи.
ЗАЛИНА Х;ела машиналичиб нуни бируси селра агара.
Х;ЯБИБ (Залинала хъуц;арличи някъ кабихьили) Наб х;ези бурес дигуси леб…
ЗАЛИНА (Х;ябибла някъ къужбирули) Х;ела някъби паргъатли дати! Бурес дигуси лебли биалли, ишаб бура.
Х;ЯБИБ Наб х;у г;ях;рилзулри, Залина. Наб х;ечи хъайчикайэс дигулра. Шагьарлизиб дила хъалира леб. Кьабулрики, Залина!
ЗАЛИНА Х;у наб г;яг;ниси адам ах;енри. Х;у х;ела хьунуйчилара дурх;начилара пикриик;ен.
Х;ЯБИБ Гьа, х;ебиалли, х;ечилара Каримличира дурути дархьти дуили сари…
ЗАЛИНА Ил х;ела къуллукъ ах;ен (Залина аркьян).

(пардав)

Сурат авъибил

Залинала нешла хъали. Дивайчи хъаррихьи сари Патимат. Хъули ариц;ули сари Залина.
ЗАЛИНА Салам, неш? (Неш к;ап;рурцули) Сена х;ела арадеш?
ПАТИМАТ Гьар сек;ал ункъли сари, дила рурси. Ца дусла рух;нар х;у сецад раскариублирил, жагариублирил?! Рамсуррив гьуйчир?!
ЗАЛИНА Бек; изули саби, неш.
ПАТИМАТ Иша хъаррихьен. Нуни беркеси х;ядурбирисну. Дила х;ези буресси ца хабарра лебси саби.
ЗАЛИНА Г;ях;си хабар биалли ил, къалабали бура.
ПАТИМАТ Х;ед сукни бак;ибти лебри, дила рурси…
ЗАЛИНА Неш?! Чихъали сабрив илди? Х;уни се жаваб бедирив?
ПАТИМАТ Зигаррик;ес г;яг;нили ах;ен, дила рурси. Илди нушала гъамтазибадти адамти саби. Г;ях;ти адамти саби.
ЗАЛИНА Х;уни сегъуна жаваб бедирив, неш?
ПАТИМАТ Кьабулрикира, дила рурси…
ЗАЛИНА Кьабулрикира?!. Х;у саррив гъари шерри аркьуси?! Набзи хьарбаирив х;уни?! (рисирирар)
ПАТИМАТ Ну ах;енра шерри аркьуси, амма ну х;ела неш сарра, жаваб бедес набзиб ихтиярра леб. Аргъирив х;уни?!
ЗАЛИНА Дила г;ямрула ихтияр набзиб саби.
ПАТИМАТ Дила гъайличи лех;ризадли х;ед г;ях;ил бирар. Нуни кьалли х;ед вайси х;ебирис. Илди давлачебти адамти саби. Х;ед дигуливан жагали х;еррируд…
ЗАЛИНА Ва, дила неш, наб илдала давла се бариша? Дила давла дила урк;илизив левли виалли?!
ПАТИМАТ Се ири?!
ЗАЛИНА Ну Каримлис ах;енси чисалра х;якьяс!
ПАТИМАТ Чи сайси ил Карим?
ЗАЛИНА Х;ела шан урши сай. (хъулирад дурарухъес ралрилзули) Г;ур наб г;язизси жан чинабалра агара.
ПАТИМАТ Гьари, т;ашризи, Залина.
ЗАЛИНА (т;ашрилзан) Се бурида, неш?
ПАТИМАТ Нуни я Карим, я Х;яким х;елас. Нуни гъай бедибси уршилис шери аркьяд. Х;уни мучлаагарвареси урши ах;ен ил…
ЗАЛИНА Неш! Х;ейгуси х;ейгули вирар. Х;ейгусиличил г;ямру дерк;ес вирусив?
ПАТИМАТ Х;ейгусира дигичеввирахъу илдалагъуна масли.
ЗАЛИНА Се дариша наб урх;ла мас-мургьи?
ПАТИМАТ Г;урх;ла ах;енну, гьанна илди лерилра сек;ал х;ела сари.
ЗАЛИНА (ахъли рисириили) Рубк;ус, амма х;якьяс!!!
ПАТИМАТ Ребк;и! Гьанна илдази х;у х;якьули сари или буресичиб, наб х;у х;яририхьес гьамадли бирар! (унзара чедяхъили, хъулирад дурарулхъан).
ЗАЛИНА (дис кайсули) Сеннира рубк;ус! (дисли някъла х;ила туми кьисдиру ва къагъриубли кариркур)
(камси заманала г;ергъи неш хъули ариц;ур)
ПАТИМАТ Гьуя, шанти, кумекбарая! Дила рурси! Залина! (Залина ахъруцес ралрилзан, музабухъунтани кумекбиру ва Залина дивайчи хъаррихьахъи, дяхъи бигьес алавбулхъан)
ЗАЛИНА (г;яшли) Неш, ну ратаба!
ПАТИМАТ Къалабали тухтур живарая!
УНРА ХЬУНУЛ Патимат, паргъатрии. Х;уни хъумартурлитрив ну тухтур риъни. Селра урехи агара, сенк;унал дахъал х;и ардякьи ах;ен. (Залинази) Илди абдал авара датину, нешличи лех;ахъи. Нешли вайси х;ебиру. Гьанна дяхъи бигьи саби. Паргъатриубли, русаэс къайгъибара.
(лебилра хъулибад дурабулхъан)
ЗАЛИНА Се г;ямал бирусира?! Дурхъаси, аллагь, кумек чили бирусира?! (аризурли ручкара к;ап;ира кайсу ва къалабали се-сабил хилт;рабарили, дивайчи чаррулхъан. Гульнарала мурул Мямми хъули айц;ур)
МЯММИ Се сарив х;уни дирути, Залина?! Мех;урриубли  х;ериадли, х;ук;ун духуси адам сарри?!
ЗАЛИНА (сунези сари) Аллагьли иш берцудилис вархьибси ургар. (Мяммизи) Аллагь багьандан, дила узи Мямми, х;уни наб кумекбара. Х;у ах;енси урк;и бирхеси адам агара. Кумекбара, жан узи!
МЯММИ Буралра бура се бирусил, нуни вируси бирисрану.
ЗАЛИНА Мемух;ела шилизивси Карим бик;уси уршиличи иш кагъар баахъа, тилади саби х;ези! Ч;янк;ли дила неш шакх;ерикахъили. Вируду ил барес?
МЯММА Уф, халаси къиян х;ебиалли! Ишбарх;ил биахъисра, ца инсан шакх;ейкахъили. Жаваб-мага лебхусив?
ЗАЛИНА Г;е, г;е лебхуси саби, Мямма. Жавабра ха, ил кагъарра чарбарили, набчи баахъа.
МЯММА Г;ях;на. Х;ед дигуливан бирисра.
(Мямма дураулхъан, Залина пикрумазиахъили карирар)

(пардав)





АНЦ;БУКЬ  К;ИИБИЛ
Сурат цаибил
Шила дублабси хъу. Залина хъучир арц;и ирц;ули рузули сари, г;яшли далайрарик;ули.
ЗАЛИНАЛА ДАЛАЙ:  Х;у вашуси гьуникад
Рашусра ну гьар даим,
Х;у агарси мерличиб
Гьанк; х;якьянгу наб Карим.

Набчил къаршиикахъес
Аллагьлизи рулгулра,
Х;ечибра г;яг;ниси жан
Чинабалра агара…
(Залиначи Бат;а ва Марзи гъамбирар)
БАТ;А Х;янчи гьамаддираб! Далай кьалли ункъли рик;улри, х;янчи тамандарес рирулрив?
ЗАЛИНА Арадираба! Ишбарх;и лерилра х;янчи ахирличи диркур ва хъули чаррухъес рирусра или гьанбиркули саби.
(Машинала т;ама чеху. Марзира Бат;ара гъамбиубли Залиначил рузуси  рурси рурцу. Хапли багьарбиубти к;ел жагьил адамли Залинала някъби дурцу)
ЗАЛИНА (пялхъяррик;ули) Се сабив х;ушани бируси? Х;ушаб се г;яг;нилив? (ч;яррик;ар)  Эй, адамти, кумекбарая! (жагьил адамлизи) Батаа дила някъ, угъраш! Х;ушани ну чина аркулра? Чина рукаслира чаррирусира, дила гьалмагъ левси сай… Бикьулрав х;ушани?! (къябрик;ули) Х;уша  г;янц;лирав, бек;бяхъуни?!
ЖАГЬИЛ Къайрики!
(Залина к;елра жагьиллизирад ратрулхъан, амма илдазивад цали кьяш гьалакайц;у ва кариркахъу)
ЖАГЬИЛ Чина аркьяс или гьанбикиба?
ЗАЛИНА Духъна т;акьни, х;ушани ну чис аркусирав, х;ушагъуна т;акьа бек;лисрав?
ЖАГЬИЛ Илра нушаван жагьил сай, амма х;угъуна хъяша ах;ен.
ЗАЛИНА Нуни иличил г;ямру х;едурк;ис. Аргъирав?!
ЖАГЬИЛ  (Залина аркули) Х;уван гьаббилт;ути лебилра рурсби илкьяйда бик;ути саби.
                (пардав)

Сурат к;иибил
Давлачебли баршибси Ахмахла хъали. Г;ямзилар рисули кариибси Залина.
АХМАХ Рисулихьалли гьанна селра бетх;ерар. Ураса биса!
ЗАЛИНА Биса-яс кадихьаб х;ед! Ну х;ечил г;ямру дерк;ес руус или гьанбиркулив х;ед? Х;у хат;аиркулри, х;яйван! Халал балагьли юрт къирбараб х;ела! Нажас адам!
АХМАХ Чина аркьусири х;у, авлахъла гурдаван дила т;имкьлизи рикили риадли?! (гъамиубли Залинала гъез х;яршдарес валилзан)
ЗАЛИНА (г;елумрирули) Уввац;и гьалавад, пях;ли ветахъи!! Х;ела нясти някъби набчи гъаммадирахъид!!!
АХМАХ (някъбачи х;ерик;ули) Х;елайчир нясли х;едиэсгу вик;улра.
ЗАЛИНА (Ахмахла гъай г;ердирули ва гъарац;дирули) Вик;унна, вик;унна! Вик;ес ахъри магаб х;ед!
(Илзамана унра хьунул рух;нарулхъан)
УНРА ХЬУНУЛ (пишрик;ули) Гьуя, дила Ахмах,  бурдибси х;евара сарра, иш гьаррит;и се рирусири х;ед?! Илх;елира дураша ваили, шилизиб рурсби камлирив гьат;и?!
АХМАХ Ишис чумра сагати х;ева асес арц лер дила. Иличила х;у дец;марик;уд унра.
(ута касила унра хьунул аркьян)
ЗАЛИНА Ну сеннира х;ечир х;еруусирану, дила г;ямру заямадирид. Бунагь чемайсид х;ечи, ратаба ну аллагь багьандан…
АХМАХ Залина, ураса дуг;ла гъай. Х;у дила хьунул ретаурх;ели наб бунагь сен бируси?  (Залинали шивк;ивбируси бакьили) Чи Каримла у сабив х;уни шивк;ивбируси?
ЗАЛИНА Ил х;ела къуллукъ ах;ен. Аргъирив?! Дила мух;лила къуллукъ набзиб саби!
АХМАХ Х;елара, х;ела мух;лилара ихтияр гьанна набзиб саби!
ЗАЛИНА Се бирути лебли гъамти? Иш къиян бак;ибх;ели кумекбиэс х;ебирути? Чилилра ах;ергъибтира дила т;амала?!
(Хурегличил Бат;а ариц;ур)
БАТ;А Гьари, рузила, аризи кьац;ли рукес…
ЗАЛИНА Загьру деркаби х;уни. Ца гъамалра х;ерирус!
АХМАХ (Бат;ази дурарухъахъес лишанбиру. Ил дурарухъунх;ели, Залинази) Касану, рукен. мурталра гушли сек;ал рууду?
ЗАЛИНА Руус! Гашали ребк;асра руус!
                (Г;яйшат ариц;ур)
Г;ЯЙШАТ Се тях;яр леба?
ЗАЛИНА Сен х;уша наб кумеклах;едиубтирав цалра? Илкьяйда анц;рукьи риасли, ишди хурази х;ерикахъили карушасри (рисирирар).
Г;ЯЙШАТ Или марик;уд, Залина. х;уни селра балуси агара.
ЗАЛИНА Се сабив нуни хебалуси?
Г;ЯЙШАТ Х;у керасес или г;ергъибухъунти узира, илала юлдашунира бех;емц;лизибикили больницализиб саби…
ЗАЛИНА Гьуя! Се рик;усири х;у? Сена илди? Миц;ирли сабив?
Г;ЯЙШАТ Дяхъи-хъаслабиубли саби. Бек;-кьяш дячи кали саби. Илдала машина чебаибх;ели адам миц;ирли кали сай или гьанх;ебирки.
ЗАЛИНА Ну х;ечил ляркьяс…
АХМАХ Х;у чиналра х;якьяд. Карии лерси мерличи.

                (пардав)

Сурат х;ябъибил

Залинала нешла хъали. Пат;иматличи маслиг;ятличил вак;ибси Мусара чумал адамра.
ПАТ;ИМАТ Дила дях;ладизес х;ушаб ц;ахалра х;ебизуру?
МУСА К;алт;а бячун – шин ардякьун. Гьанна гъайик;ули хьалли се г;ях;деша? Ца буруси гъайличи лех;ризи…
ПАТ;ИМАТ Дила гьалавад к;унвац;и. Илдачи бикайчи кьяш бячи калунси ах;енри дила рурси.
МУСА Ягъари, шимазибси г;ядат саби. Х;ушала рурсилис вайси мер ах;ен. Яшав бареси мер саби, дила рузи…
ПАТ;ИМАТ Яшав агарси мерличирад урк;ец;и духъи аррукибсив? Итабичиб яшав камлирив дила рурсилис?
МУСА Гьачам ишдази гъайик;ни дуг;ла саби. Паргъатбиайчи балтех;е. (Муса аркьян, лебилра лех;кахъибси замана унра хьунул ариц;ур)
УНРА ХЬУНУЛ Х;ушачивад дураухъунси Муса ца чяйалра х;ебержахъиб вик;улригу, марли маслиг;ятх;едиубраяв?
ПАТ;ИМАТ Загьру держаб сунени. Чяйра дигулиахъилив илис?
МИКАИЛ Чис дигулив чяй? Ит вак;ибсилис? Жяг;ял вак;ахъес бурая.
ПАТ;ИМАТ Жяг;ял вак;или се вирусив ил?
МИКАИЛ Их азбарлизибси шел тоннала цистернализи вец;ал шин руржахъанти кадихьили, ит чяйли х;елкъунси велкъахъес чяй дирис.
ПАТ;ИМАТ (унрачи шурряхъили) Ургаб бурибси илгъуна гъай цаличи ца бихуси х;ебираргу, иткъира юрт къалмакъарлизи гш;елабикили саби.
УНРА ХЬУНУЛ Черрерхи, Пат;имат. Микаилли ил гъай илцад вайт;а кьабулбирни пикрих;ебарира
(Унра хьунул аркьян, Г;яйшат ариц;ур)
Г;ЯЙШАТ Неш, се бирулри?!
ПАТ;ИМАТ Селра бирули ах;енра. Узичи больницализи гьаррак;ирив?
Г;ЯЙШАТ Гьаррак;ира. Гьанна вайт;а ах;енри.
ПАТ;ИМАТ Гьанна ит уршила заябиубси машиналичилара пикрухъес г;яг;нили саби – балбарахъес.
Г;ЯЙШАТ Ил ушила бег;ти чебаира, илкьяйда дархибти х;уша машиналичила пикримадик;удая бик;и.
ПАТ;ИМАТ Илди се бик;ули хьалли, вег;лара ях;-ламус диэс г;яг;нити сари.
МИКАИЛ Нуни арц лугули уира машина балбарахъес, итала дудешли сах;есиб.
ПАТ;ИМАТ Сах;ейсули биалли, бати. Г;ур се биру? Чула г;ямрулизиб г;ур хат;а кьадармабиаб чус. Илдигъунти урк;би х;ялалти адамти камли саби, аллагьли г;еббуцабну саби.
МИКАИЛ Лерил иша учих;едикили х;ушала бируси барая. Вебк;ибис агара ишав (айзурли аркьян).
                (парадав) 

Сурат авъибил

Ахмахла хъали.Столличиб башибси кьумур. Уталичи кариили Залина, кагъарлизи хилт;ик;ули милицала х;янчизар.
МИЛИЦА Х;ед чи бик;ара, рурси?
ЗАЛИНА ?!
МИЛИЦА Х;ед чи бик;ара?
ЗАЛИНА Наб чи бик;арал х;****ули иша вак;илрив? Залина бик;ар.
МИЛИЦА Гьанна анц;букь ишкьяйда саби. Дахъал авара агарли иш кагъарлизи ца-чумал гъай делк;ес г;яг;нибиркур.
ЗАЛИНА Сегъунти гъай лук;утив?
МИЛИЦА Иша х;у г;ях;ъулали рак;ибсира или белк;ен. Илх;ели х;едра къулайли бирар, ишдасра, набра…
ЗАЛИНА Х;уни ну мех;урсилизи халрирулрав? Ну г;ях;ъулали иша х;ерак;ни х;унира балуси саби, х;угъунти царх;илти урк;и агарти х;ярамзадабанира…Чум мазала кьак гиба х;ед?
МИЛИЦА Т;аш, гьари… Илкьяйда х;укуматла х;янчизар мучлаагрирули гъайрик;адли х;ед вайт;адиркур… Ну къуллукъличивси адамра… Юх, асух;ебирар…
ЗАЛИНА Набчи агри чебихьес х;ед асубирули, наб бархьдеш буресра асух;ебирули балан!
МИЛИЦА (андаличибси майъа ушкули) Ягъари узила се дирутив имц;а гъай. Кьабуллира или белк;ен – абикиб къуллукъ! Х;****к;адли х;ела валликьяна туснакъиру. Илини х;ябал дус дерк;айчи х;ура иш юртлизи дебарирури. Х;ед х;яжатлив илди авара?!
ЗАЛИНА (тирхьрухъи) Х;ябал дус! Х;ябал дус ишар каласли ну мех;уррирусра (ручка касили къулбас кабалта ва рисирирар).
             (Милица аркьян, Малла ва к;ел гьат;и адам абиц;ур)
МАЛЛА Гьанна, рурси, рисмарисудну набчира лех;ризи.
ЗАЛИНА Наб х;ушала ва царх;илтала гъай анц;дукьи сари.
МАЛЛА Анц;дукьалра х;едукьалра, х;у гьанна урх;ла юртлизир сарри…
ЗАЛИНА Рахъх;и х;еруус!
МАЛЛА Ураса ришт;а рурсилагъунти гъай.  Магьарлис пурбан биха.
ЗАЛИНА Сегъуналра пурбан х;ебирис.
МАЛЛА Х;ебарадли, магьар агарли урх;ла уршиличиб дуги берк;ибси сари, бик;ар х;ед адамти. Ил биалли халаси ц;ахдеш ва убях;деш саби.
ЗАЛИНА Юх, наб магьар г;яг;нили ах;ен. Ну хъули аркьусира.
МАЛЛА Магьар агарли х;у хъули рак;ахъес ралтарив гьат;и х;ела бег;тани?! Илгъуна ц;ахдеш чеках;ейсугу илдани.
ЗАЛИНА Дихьая х;ебиалли, х;ушала магьар. Магьар, магьар. Пайдаагарси, к;арза муруйчир хьунул руахъес пикридарибти  г;ямултира х;ушара!
МАЛЛА (пишяхъили)   Илгъуна саби, дила рурси, дунъяла г;ядат.
(Малла аркьян, Залинали х;улбазир нургъбачил далай х;ум-къумбиру)
ЗАЛИНАЛА ДАЛАЙ:  Алавчар анхъ саб или,
Анхълар ц;едеш лер или,
Хъалч бук;ули биалра
Руишав курлар ц;ябси?!

Ишра г;иниз саб или,
Мурт саррил шин дашуси,
Шинагар нагла гьалар
Руишав ну милигли?

Х;ябал мазализирив
Духъунти дила г;ямру,
Ралтарав иш бек;бяхълис
Даим бихахъес амру?!
(Ахмах хъули айц;ур)
АХМАХ Гьанна гьар сек;ал г;ях;ил дирар. Милицабира маллубира чеббикиб.
ЗАЛИНА Маза дедалли илди гьамадли чеббиркути саби. Чум дедирив чеббикахъес?
АХМАХ Х;ябал мазаличи кьабулбикиб.
ЗАЛИНА Нуни иткъира балулри илди дедни.
АХМАХ Секьяйда?
ЗАЛИНА Тумаливан т;яраили х;улбира сайра, ц;ерхьдешли вагвердесли кайзурси илини х;ярамти ах;енти х;едукни бюалуси саби.
АХМАХ Х;ярамта укаллира, х;ялалта укаллира наб багалаиуб.
БАТ;А (унзализибад бек; гьаббак;ахъили) даширая кьац;ли дукес.
АХМАХ Бусяг;ят! Аризи кьац;ли дукех;е.
ЗАЛИНА Ах;ерилзас! Вякьи варгвердайчи укен. Ц;ахси куцра х;ура.
АХМАХ Валлагьра ц;ахси ах;енра. Х;у набчи бурсириубх;ели х;ед жагаизесра асубирар!
ЗАЛИНА К;унвац;и х;улбала гьалавад! Наб х;ечил гъайрик;ес дигули ах;енра.
АХМАХ  Х;ед дигули риадли аркьяс (дураулхъан).

(пардав)

АНЦ;БУКЬ  Х;ЯБЪИБИЛ

Сурат цаибил

 Г;инизла гьалаб Саният ва Залина гъайбик;ули саби.
САНИЯТ Секьяйда бетаурсирив ил анц;букь? Гьарит;ес х;у чинар къарширикибсирив?
ЗАЛИНА Хъучир рузулри. Бег;ла г;ергъиси барх;и сабригу калунси, г;ур шилизирад аркьусири ну (симкьрулхъан).
САНИЯТ Карим дак;ух;ейубу?
ЗАЛИНА Х;ек;иб, музах;евхъун. Ну Каримлис г;яг;нили х;ерургусра.
САНИЯТ Марик;уд, Залина. Х;у илис секьяйда ригахъусирил гьарилли балуси саби. Бег;ла г;ергъиси барх;и биалри х;у чили-биалра уредили рургуд.
ЗАЛИНА Каримла неш гъудурриубси сари бик;утира леб.
САНИЯТ Гьуя, къяна бургар, гъари.
ЗАЛИНА Нура ил хабарличи рирхарули ах;енра, Саният. Урк;и изусини ца буру, авара агарсини – царх;ил.
САНИЯТ Ил халал к;ана сен чеббяхъибсирив?
ЗАЛИНА Ахмах бихьибси эмх;ени к;ана агарли дурарухъахъес къадагъабарибси саби.
САНИЯТ У-у-у!  Ч;умати законти кадирхьес вех;ихьилигу!
ЗАЛИНА Ил кьалли буэс, х;ед кариэс г;яг;нисину, их хъали балбара бик;и…
САНИЯТ Баририв, гъари?
ЗАЛИНА Мех;урриублирав ну, илдала ибта риркьес! Х;ералра х;еризурра.
САНИЯТ Гъайх~ебик;ив?
ЗАЛИНА Къалмакъар дариб. Ахмахли някъ балли ахъбуциб.
САНИЯТ Някъби чердикаб сунела, угъраш!  Х;у руахъес бусравх;ейк;ули, някъби ахъдурцулив?
ЗАЛИНА Илдас гьанбиркули саби г;ямрула г;ямрулис къараулта биркьули рих;ура или.
САНИЯТ Х;ебиалли, милиция кили т;ашбалта.
ЗАЛИНА Х;ерих;ура. Мазала х;енкь таманбиайчи т;ашбатаб, г;ур кьалли х;ерих;ура.
САНИЯТ Се мазала х;енкь сабив?
ЗАЛИНА Х;ябал мазализира, даршал къурушлизира сари дила г;ямру духъунти. Х;ябал маза милицалис дедибти сари, даршал къуруш – гьаррит;ес кибси машинала вег;лис. Ил балагь бак;ла Ока бихьибсилис, набзи бураллри, даршал къурушла мерличиб ну рег;си мас бедлугира… ну иличила ах;енра кьакьарик;уси, Саният. Каримли ну мучлах;ерирура, бег;тани хъули рукьяхъес х;ералтара, илдачир руэс дила ахъри агара. Се бирусив нуни?!
САНИЯТ Вари, вари! Ч;умариии, Залина. Гьанна х;ед бег;тани кумекх;ебиру. Нуша х;ела гьалмагъуни пикридулхъех;е се баралли г;ях;сил!
Барх;и г;ях;бираб, Залина. Ну аркьясра.
(Саният аркьян, Залина пикририк;ули кавлан)
ЗАЛИНА Наб чилинра кумекх;ебиру. Дила бирхауди беткайхъули саби.

(пардав)


Сурат к;иибил

Ахмахла хъали. Дивайчи кабиили Залина ва Г;яйшат.
ЗАЛИНА Г;яйшат, се-биалра пикрибарили, ну ишарад аррукабагу. Х;ечил рарх аррукабагу.
Г;ЯЙШАТ Се-биалра пикрибирех;е. Гьанна ишдачил къалмакъарли диркьесра балх;ебиркур. (Диг;янали) Адамтани дурути далулрив х;уни?
ЗАЛИНА Селичила?
Г;ЯЙШАТ Ахмах абдал сай бик;ули саби. рах-рахли ишала бек; гъудуркабируси саби бик;ар.
ЗАЛИНА Тамаша ах;ен. Духуси адамлис иткъира Ахмах х;ебик;ар.
Г;ЯЙШАТ Вари, сунези иличила мабурид.
ЗАЛИНА Пикрирулхъас.
Г;ЯЙШАТ Иш чарухъайчи ну аркьясра. Г;ях;ил кален (аркьян).
(Ахмах хъули айц;ур)
АХМАХ Се хабурти дуриба Г;яйшатли?
ЗАЛИНА Х;ед багьес дигулрив?
АХМАХ Дигулрану, бура.
ЗАЛИНА Х;у замана-замана мех;урирусири бик;ули саби адамти. Ил бархьсив?
АХМАХ  Х;у рирхауррив ил гъайличи?!
ЗАЛИНА Адамтачи ну сен рирхх;ерусирав гьат;и?
АХМАХ Сенк;ун ил къяна саби (Залинала някъ буцили ц;ац;абиру).
ЗАЛИНА Батаа дила някъ, изиарули саби. Имц;якь гъайадли абдултала юртлизи аркахъури.
АХМАХ Чебуцили андализи иргьис (столличибад касили кьям иргьу ва бут;а-бут;бирахъу).
ЗАЛИНА (Итил хъули рубшули) Лишаник;есра х;****улри, угъраш.
АХМАХ Абхьа унза!
ЗАЛИНА Х;уни абхьа. Абдултазиб ц;акь халаси бируси саби, бик;ар.
АХМАХ Хьулрухъадли дурарухъен!
ЗАЛИНА (дурарулхъан) Дурабси жагаси берх;и батурли хъули дебакайрару гьат;и адам?
АХМАХ Бархьси саби (мякьла гъамирар). Х;у буресцад вайси ах;енри, цацах;ели кьалли рахъ г;ях;си ретарулри…
ЗАЛИНА Вайдеш лебси урк;илизиб г;ях;дешра камх;ебирар (бушкала касили хъали ушкес карирар, Бат;а ва Хадижат лябкьян).
ХАДИЖАТ  Х;ед х;ялалдиъ, дила рурси. Илкьяйда вяшрик;адли, гьар сек;ал ункъли дирар.
БАТ;А Ахмах, унраличивси вец;ну х;ябра дурх;яла дудеш вебк;или сай, нуша ита аркьулра.
ХАДИЖАТ (Залинази) Гьанна нуша аркьулра, х;у рууду хъулир?
ЗАЛИНА Х;ушани дуг;иадаллира чиналра х;якьяс.
                (Хадижат ва Бат;а дурабулхъан)
ЗАЛИНА Х;у сен арх;якьулрив? Илдала унра сайли, х;ела ах;ену гьат;и?
АХМАХ (пишяхъили) Ну арукьясли, х;у ребшили аркьядгу.
ЗАЛИНА Вари, урухмак;уд. Гьанна дила пикри барсбиубли саби ва чиналра рукьес пикри агара. Ч;янк~ли шичи аркьясра, палтар дирцес шин агара.
АХМАХ  Рахъх;и маруудра.
(Залина шичи аркьян. Дивайчи герухъунси Ахмах усветалъан. Бат;а чаррулхъан)
БАТ;А (къалабали рух;нарулхъан) Эй, Ахмах! Се бирулри х;уни?! Сен сарицун шичи рархьири Залина?
АХМАХ (харчизурли) Се биублив? Ц;адикилив? Се вявдеш сарив?!
БАТ;А Г;инизла мякьлар машиналичи кариили аррякьи сари х;ела Залина, гьуйчиб къянарира батурли…
АХМАХ Ишбарх;и ралрикили лерри… Аркьян или гьанх;ебиккиб…
БАТ;А Ил мех;урси бек;лис се гьанбикеса? Гьанна илкьяйда уэн!
(пардав)
Сурат х;ябъибил
Университетла азбарлизибси скамейка. Скамейкаличи кариили Залина.
ЗАЛИНА (сунези сари) Х;ябилра кьакьал леб кьалли урк;и! Каримличи бархьибси телеграммалис я жаваб агара, я сай агара.  Телеграмма бархьлилра белк;унрав нуни? (сумкализи халт;рулхъан ва тетрать кайсу) Ишаб черновик леб (телеграмма буч;а). «Мях;яммадов Карим. Х;у биологияла факультетла деканатлизи жиирулри. Къалабали вак;ни тиладибирулра. Х;урматличил декан Ибрагьимов». Х;ябал барх;и диркули сари. Марли х;ек;ес вара?!
(Диг;янали Карим лявкьян ва скамейкала г;ела т;ашизурли Залинала х;улби кьяп;диру)
ЗАЛИНА (тирхьрухъи) Карим!!!
КАРИМ (т;ама барсбарили) Юх, ах;енра.
ЗАЛИНА Валлагьра сайри! Х;ела някъбала малх;ямдеш нуни хъумартурлира или гьанбиркулив, Карим?!
КАРИМ (х;улби даткаили) Х;илх;и дуравхъунра хъуливад. Бег;тас багьес дигулри сен деканатлизибад жибик;утил. Ну кьалли шакикира ил х;уни бархьибси биъниличи (скамейкала чевкад т;ях;ухъи Залинала мякьла кайрар). Гьу, сен сарри, Залина?! Руч;ес рирулрив? Ишбарх;и дурсри агарав?
ЗАЛИНА Наб дурсрала авара агара. Дурсрачила пикририк;ес мугьлат агара. Наб къиянни саби, Карим. Гьанна х;унира ну лайрак;иша или, урухк;улира.
КАРИМ Наб х;у жайчирра ах;ерлири, Залина. Амма дила бег;ти кьабулбиркур или гьанх;ебиркур.
ЗАЛИНА Се? Бег;ти?! Сен х;у илкьяйда вик;усири? Карим, дила г;язизси, се г;яйиб чебиулрив набчиб?
КАРИМ Нуни х;ечи г;яйиббирули ах;енра, амма бег;тала гъай ч;умати сари…
ЗАЛИНА Се гъай сарив?
КАРИМ Гьачамлис селра бурес х;ейрус. Ну илдачил гьачам гьат;и гъайухъес дигулра.
ЗАЛИНА (рисирили) Г;ур мурт чейури нуни х;у?
КАРИМ Вари, марисудра, Залина. Цакамси ях;бара. Жяг;ял ну х;ечи г;урра чарулхъас.
ЗАЛИНА Рирг;ях;ериргурав?
КРИМ Юх, х;ериргури. Дила дудеш зяг;ипли сай. Илбагьандан иличил жалухъесра наб дек;ли саби.
ЗАЛИНА Ах;ерси Карим! Х;ед ва х;ела юртлис ну ребк;айчи марли рирус, лаймарик;аба, тилади саби.
(Илдала мякьла суратуни кайсуси адам гъамирар)
ЗАЛИНА Карим, вашигу нуша к;илалра сурат кайсахъех;е!
КАРИМ Юх, г;яг;нили ах;ен. Ил имц;аси пикри саби. (Кисализи халт;ухъи, сурат бургу) Ма, иш дила сурат, бишт;аси биаллира…
ЗАЛИНА (разили) Баркалла, Карим.
КАРИМ Нуни кьалли чизилра сурат лугуси ах;енра.
ЗАЛИНА Сен? Дарман диру или урухк;улрив?
КАРИМ Секьяйда шакрикири?! Гьанна вайси замана саби. Адамтачи вирхес тях;яр агара.
ЗАЛИНА Х;ебиалли, Карим, жяг;ял нуша ишар г;урра къаршидиркутира.
КАРИМ Баягъи иш замана ишар рии. Гьанна кьанни саби. Аркьех;е.
ЗАЛИНА Барх;ехъла г;ях;бираб, Карим! (Карим аркьян, Залина илис г;ергъи х;еррик;ули т;ашрилзан)
(пардав)

Сурат авъибил

Каримла бег;тала хъали. Чяйли бужули кабиили Каримра илала халал узи Шамилра.
КАРИМ Шамил, гьанна наб Залиначи хъайчикайэс дигулра.
ШАМИЛ Се ири? Залина урх;ла хьунул риъниличила хъумкартурлирив?
КАРИМ Залина Ахмахличирад ребшили сари.
ШАМИЛ Ил х;ела къуллукъ ах;ен. Дигалли ребшаб, дигалли руаб. Х;ела г;ямруличила пикриик;ен.
КАРИМ Гьанна чила г;ямруличила пикриик;улрав ну? Дилайчила ах;енрав гьат;и?
ШАМИЛ Дудешлизи илди гъай мадикьахъид – ил бебк;ала изай уцили чех;еулрив х;уни.
КАРИМ Шамил, х;ед бархьдеш бурес дигули ах;енри. Х;ура х;етурри дудешли х;ед дигусиличи хъайчикайахъес. Итх;елира дудеш баягъи бебк;али изайзив калун.
ШАМИЛ Х;етурх;ели сари гьаннара дила г;ямру агъуличирра кьут;кьути.
КАРИМ Или биубх;ели сен х;уни наб кумек х;ебирулрив?
ШАМИЛ Дила гъайличи чилра лех;х;ейхъур.
КАРИМ Ил багьес х;ейрар. Х;уни кьалли гьачамлис гъаялра или ах;енри.
ШАМИЛ Нушала гъай дудешли аргъалли, т;ама-гьама ахъдирар.
КАРИМ Наб илдала авара агара, наб дигуси нуни леркис.
ШАМИЛ (Карим пялхъярирули) Х;у мех;уриублирив? Урх;ли гьаррит;унси, урх;личиб дуги берк;ибси, урх;лис магьарла хьунул ретаурсиличи хъайчикайэс секьяйда вирусирив?!
КАРИМ Вирусра, сари г;ях;ъулали илис шери рякьи х;ериалли.
ШАМИЛ (т;ама ахъбарили) Дудешли набзиван х;езира гьар сек;ал иргъахъу. Итх;ели х;ерик;ус х;ела къуллукъ лебал яра агарал.
Г;ЯЛИ (къалабали хъули ух;наулхъули) Се т;ама-гьама сари ишарти? Се бетаурли жалдик;утирав х;уша?
ШАМИЛ Каримла х;ези буреси леб, дудеш.
Г;ЯЛИ Агь, Карим, х;у хъули чарухъи уилрив. Гьу се бик;и х;ези деканатлизиб? се х;яжатбикилрив илдас?
КАРИМ Документунази ца къулбас кабатахъес жибик;утири. Гьу, дудеш, х;ела арадеш сен саби? Ишбарх;и къулайсигъунаригу?
Г;ЯЛИ Ишбарх;и ца мадар леб. Гьу, х;унира, алав х;ешули, бура се бетаурлил? Х;ед се бурес дигулрил.
КАРИМ Дудеш! Залина хъули чарриубли сари. Наб итичи хъайчикайэс дигулра.
Г;ЯЛИ Се ири х;уни, угъраш!
КАРИМ Дила г;ямру дила г;ямру сари ва наб дигуси рурсиличи хъайчикайэс ихтиярра набзиб саби.
Г;ЯЛИ Юх! Юх, илди гъай дебк;ахъа! Нагагь урх;ли гьаррит;унси рурси дила юртлизи т;алабрарадли…
КАРИМ Х;ела юртлизи х;екис…
Г;ЯЛИ Дила юртлизи х;ек;адли, ахиратлизи кьалли лявкьяд!
КАРИМ Се гъай сари х;уни дурути, дудеш?!
Г;ЯЛИ Набчи х;у ц;удар душманни вак;и. Гьанна вашен х;ед дигна! Дила х;ези г;ур дурести агара!
КАРИМ Агь, х;ябилра кьут;кьути гъай даргири х;уни, дудеш. Г;ур селра агарав х;ебурили калунси?!
Г;ЯЛИ Агара, нуни лерилра дурилра дурес г;яг;нити (чедяхъили унзара дураулхъан).
КАРИМ Х;езира ихди гъай саррив дудешли дурибти.
ШАМИЛ Г;е, сарри!
КАРИМ Адамти ах;енрая х;уша! (Някъра гьак;барили, дураулхъан)
(Дудеш г;урра хъули айцур)
Г;ЯЛИ Арякьуну Карим?
ШАМИЛ Арякьун. Х;уни, дудеш, илдигъунти кьяркьти гъайличил х;ела уршби игъбарагарбирахъулри…
Г;ЯЛИ Х;ушаб г;ях;си нуни ункъли баласра!
ШАМИЛ Балух;ели саби дила г;ямрула т;яг;ям бетахъахъибси, гьанна Каримра илгъуна агшиличи уршуси.
Г;ЯЛИ Г;урх;ели х;уша баркалла дик;удая наб.
ШАМИЛ Г;е, г;е, баркалла дик;ули т;ашх;едилзех;е, дудеш! (хъуливад хъярхъли дураулхъан)
(пардав)

Сурат шуибил

Залинала нешла хъали. Малла, Микаил ва Ахмахла неш г;урра чумал адам.
МИКАИЛ Чизибад ихтияр сасили х;у хъули чаррухъунсирив? Х;у руибси мерличи чаррии.
ЗАЛИНА Аллагь багьандан, дила узи, ну ит жагьаннаблизи чармарираба!
ХАДИЖАТ Ягъари, дила рурси, х;ед се вайбизурлив нушачиб? Ит гъайик;ули виалли нуни х;ейк;ахъис.
МАЛЛА Х;у халатала гъайличи лех;ахъи. Нушани г;ямру дерк;илра, дахъал чедаилра, нушала г;якьлура имц;али бургар. Ил х;ебарадли г;ур пашманрируд.
ЗАЛИНА Юх, х;ерирусра. Пашманрирусра илдачи чарриубли рукьясли.
ХАДИЖАТ Лебилра дила мас-давла х;ед балтасра, чарриубли рак;адли.
МИКАИЛ Х;у нушала гъайличи лех;ризи, Залина. Х;ед хъули чарриэс гьуни агарси саби.
ЗАЛИНА Ну г;ях;ъулали ита рякьунси ах;енри. Сен наб къиянси мерличир руэс х;яжатсив?
МИКАИЛ Се къиян чебихьилив х;ечи ихаб?
ЗАЛИНА Абдултала юртлизи викуси адмличил наб г;ямру дерк;ес дигули ах;енра…
ХАДИЖАТ (харчризурли) Абдулти ах;енти чемабааби х;уни г;ямрулизиб!
(Хадижат ва илис г;ергъи Микаил ах;енти лебилра дурабулхъан)
МИКАИЛ Х;у карушес г;ях;сири, чичилра лех;х;ейхъуси.
ЗАЛИНА (столиичибси дис хапбарили) Ма, дила узи, иш дис. Карушаба. Наб иткъира ишди г;ямру анц;дукьи сари. Карушаба, узи! (рисули, Микаилла кьяшмала гьала кьукьмусриркур)
МИКАИЛ (айзурли, Залиназибад дис чебису) Х;у мех;урриублирив? Нуни ца ити г;ядатлис бурибси гъайличи рирхауррив? Х;ела г;ямрула ихтияр х;езиб саби, Залина. Х;ед дигуси бара.
(Г;яйшатра Саниятра хъали абиц;ур)
САНИЯТ Кадиилраяв? Се тях;яр леба, Залина.
ЗАЛИНА (х;улби ушкули) Даширая, вайт;а ах;енра.
МИКАИЛ Х;ушала диг;яндешуни дурахъес ну аркьясра (дураулхъан).
Г;ЯЙШАТ Баркалла, Микаил, ил барес шакикнилисра.
САНИЯТ Ягъари, Залина, сен гьар сек;ал вайт;а детарутив? Х;уни Мях;ячкъалализив Карим чех;еирив гьат;и?!
ЗАЛИНА К;ина чеира. Бег;тази хьарбаэс вякьи, к;инайс чарухъунх;ели ил ц;акьли варсиублири. Илини дурибти дугьби гьаннара дила лих;базир зайдик;ули сари: «Залина, х;у набчирад черрерхи. Х;елара дилара г;ямрула бурх;ни, гьундури дек;ардиркули сари»…
САНИЯТ Гьуя, илкьяйда дек;ардикирав гъари?!
ЗАЛИНА Ца-чумал дус сайра хъачиках;ейэс, нура Ахмахличи чарх;ерухъес цалис цали чесили, дек;ардикира.
Г;ЯЙШАТ Илгъуна къунбар адам багьандан х;уни х;ела хъали буунри, Залина.
ЗАЛИНА Се рик;улри х;у? Сен х;уни Карим г;яйиблаирулри? Иличиб сегъуналра г;яйиб агара.
Г;ЯЙШАТ Г;яйиб х;ебиэсра асубирар, амма ишбарх;и илала мекъ саби.
ЗАЛИНА (тирхьрухъи) Се? Се ири? Ил биэс х;ебирар! (рисириили) Дила Каримли ил х;ебиру, илини ну лайх;ерик;ура.
Г;ЯЙШАТ Набчи рирхх;ерадли иш Саниятлизи хьарбаа. Иличиб дунъя т;ашбизурли х;ебиэс. Г;ур чилра агарав дунъяличив?!
ЗАЛИНА Наб чилра агара, дила чархлизирти жан кадерхур (Залина къагъриубли, багьлали ч;ябарличи кариркур)
Г;ЯЙШАТ Гьуя, се бирулрив х;уни?
САНИЯТ Залина, Залина! (к;илинра ахъруцили Залина дивайчи карирхьу, г;ур шин чахьдарили черсаргъахъу)
ЗАЛИНА Карим гъайлис марси адам сай или гьанбиркусири наб…
САНИЯТ Аллагь багьандан паргъатрии, Залина. Г;яйшат рархьли рик;ули сари. Ил агартира пергер жагьилти лебти саби. Х;ук;ун жагаси, духуси жагьил рурси сарри…
ЗАЛИНА Агара г;ур дила жагадеш я жагьдеш. Дила г;ямру керхурли сари ишбарх;и.
САНИЯТ Вари, илкьяйда марик;уд, Залина.
Г;ЯЙШАТ Цакамси бамсриахъа, русаэс къайгъибара. Илх;ели бек;лизи сагати пикруми ляркьян.
ЗАЛИНА Г;ях;си саби. Баркалла х;ушаб. Х;уша дик;уси бирисра.
(Г;яйшатра Саниятра аркьян. Залинали багьлали аризурли к;ап;ира ручкара кайсу ва х;ябкуб цалабирхъу. Г;ур дис кайсу ва стола дубличи Каримла сурат кабирхьу)
ЗАЛИНА Х;уни дила г;ямру ардухири, Карим, х;уни дила жан асири. Х;уни дила х;улбала шала бишахъунри, урк;ила тимхъани т;ашаири… Гьанна х;едцун балтулра иш дунъя! (Касили дис сунени сунес бурх;у. Хъули рух;нарухъунси нешла гьала х;или чях;рик;ули кариркур)
ПАТИМАТ Ва дила рурси, дила Залина! Се сабив х;уни барибси? Набчилра урк;ец;и барадри! (рисули, рурси ахъруцес ралрилзан).
ЗАЛИНА Г;ях;ил калена…
ПАТИМАТ (ахъли рисули) Дигайли ригубри, дила рурси! Карц;айли рерц;ири, дила рурси! Анц;кьили аррухири, дила ах;ерси, дила г;язизси…
(Хъули бахъал адамти бух;набулхъан. Вяв-ч;яр ва биса ахъдирар. Саниятли столличибси кагъар кайсу ва сценала гьала дубличи рит;ак;или ил буч;а)
САНИЯТ  Ардякьун гьанна, Карим,
Дила г;ямру заяли,
Х;ечи дихьибти дигай
Х;едаили мурадли.

Ардякьун гьанна, Карим,
Х;ела жагадеш урх;лис,
Марли, дигай дицирив,
Ах;ерси, х;уни маслис?!

Ардякьун гьанна, Карим,
Дила жагьдеш ц;яб х;яри,
Ну раркьиб дила нешла
Биц;ур михъирлаб урк;и…
(Саният г;елумрирар, жанях;лизив Карим дак;уулхъан)
КАРИМ Залина, дила ах;ерси, х;у чинарри?! Ну авадан арцанван ватлира ва мурталра х;ечил варх виэс х;ядурлира. Бег;тани бируси мекъ чус чуни бараб!!!
(ил хъули айц;ур, лебилра г;елумбирар, Каримли дивайчир Залина чериу, дуц;ли вак;или, илала гьала кьукьмусиркур)

Бег1ла г1ергъиси кагъар белк1ун Залинани, сунела урк1илизиб гьигь лебалли.
 (Саниятли Каримлис Залинала кагъар гьабурцу)