Игьалибе кагъат

                Игьалибе     кагъат

                Ассаламуг1алайкум , хирияв гьудул !
                Гьа , бице  щиб бугеб бат1ияб хабар ?
                Хараби кин ругел , хур-ах кин бугеб ,
                Хасел –их бигъанищ , щокълъи  ц1ик1анищ ?

                Гъалмагъир дагьлъанищ , даг1ба лъуг1анищ ,
                Дибирасул ваг1за рак1аз босанищ,
                Бикъулеб -хъамулеб хъвавулъ хут1анищ,
                Хъаравул теч1ого мегъал х1ет1улищ ?

                Х1аримазул ракьал х1алхьуда ругищ ,
                Х1ал рекъон жамаг1ат цойида бугищ ,
                Бицунеб, гьабулеб цо нухда ругищ,
                Рахъазде бахъунеб жамаг1ат бугищ ?

                Бегавулги какун , какдеги хьвадун,
                Камиллъи х1алт1уе лъугьунеб бугищ ,
                Лъимал адаб бугел рижулел ругищ,
                Жамаг1ат каказул камиллъи бугищ ?

                Маг1ишат т1ок1аца закаг1ат бахъи,
                Шарг1алъул нухдасан бачунеб бугищ,
                Чияр х1акъ бугеца т1аса лъугьаян ,
                Т1адаб борч т1убазе хиялго лъолищ ?

                Хваразде зиярат г1емер гьабулищ,
                Г1елму т1алаб гьабун г1олилал ругищ,
                Г1ибадат т1ок1к1ине х1ежалде арал,
                Х1арам ц1ехеч1ого хьвадулел ругищ ?

                Рохьазул зигарди лъуг1улеб гьеч1ищ ,
                Гьуинаб, кьог1аб лъин росдай г1олебищ,
                Г1адамазул рокъоб резил т1аг1елал ,
                Рикъа – хъамич1ого парахат ругищ ?

                Почол къалабазе турбаби рикъи,
                Колхоз хваралдаса дагьлъулеб гьеч1ищ,
                Гьанже хьиндалазул ахбазан курак,
                Завод –фабрикаялъ босулеб бугищ ?

                Лъай камил гьабулел мактабал ругищ,
                Мадраса х1алт1изе х1ал росдал бугищ,
                Х1урал г1ачиязе г1амал берцинал ,
                Г1ухьби щолел гьеч1ищ  жамаг1аталъе?

                Г1ак1иручнахъ ферма янгъизго бугищ,
                Рохьдой чали гьаби чумартго бугищ,
                Чукъурида жаниб къуватаб рихьи,
                Къот1ич1ого  бугищ?-, бицея гьудул .

                Балала делянка чанц1ул кьабураб,
                Бекьхва сагабазда боц1и кваналищ,
                Бакъда ц1ибилалъе мичилго ч1валищ ?
                Байдан бекьизе рукь росулъа щолищ ?

                Салихури сага , Кьенущи т1алъи,
                Т1аг1амаб пихъица гьарзалъун ругищ,
                Сагъи кафеязул квеналъул т1аг1ам,
                Т1олгояз беццулищ сапарчаг1аца ?

                Рек1ел пикрабини киг1анги руго,
                Керен чучун дуде рикьизе , гьудул,
                Дуца г1айиб ч1ваге ч1амуч1лъунилан,
                Г1олохъанал сонал цере т1амунин.

                Т1амчиде угьараб ургъалил чит1ир,
                Унтуй  дару г1адаб буго вац, дие ,
                Дица гьалда тана , къо – мех лъик1 дуе,
                Къвариг1елалъ ине заман щванин дий…
 
   
                2002 сон