Аладинан суьгьуьрдин лампа

               
                ВОЛШЕБНАЯ ЛАМПА АЛАДИНА. 
               
        (Современная пьеса-сказка для детей на лезгинском языке.)

               
               

                ИШТИРАКЗАВАЙ КСАР:
1)Аладин-8классдин ученик
2)Асият,Муса,Эмиля,Али,Маният,Пери ва маса аялар-Аладинан са классда к1елзавай юлдашар.
3)Марият хала-Аладинан диде
4)Муаллим
5)Тараш,Аруш,Шк1лам-хулиган гадаяр
6)Джин

                САД ЛАГЬАЙ ПЕРДЕ.
Класс. Переривдин вахт. Рушари классда кьулерзава.

Муса.(къецелай хквезва). Мад руг твазвани классда,кьейи чанар? За куьн муаллимдиз лугьудайди я.

Асият. Гьина аквазва ваз руг?

Муса. Бес кьуьл авурла руг гьатзавачни?

Эмилия. Садазни таквазвай руг ваз гьинай аквазва? Али руг авани классда?

Али. Аквазвач кьван. Ваз вуч ава,я кьей хва,авурай ман чпиз кьуьлер.

Муса. Ваъ,за гьик1 хьайит1ани лугьудайди я муаллимдиз.

Маният. Куь куьн къалди ава е?. Лугьурай вичиз.(кьуьлер давамар хъийида.)

Муалим. Йоъ,вуч хъсан кьуьлер ийизва рушари?

Муса. Ингье,ингье лагьанайни,лагьанайни за,кьей чанар.Муаллим ,руг тунва абуру
      классда.

Пери. Авайди туш,муаллим,чна (КВН-да къалурдай кьуьл чирзавайди я.

Муса. Авазва.авазва,кьейибур.

Муаллим. Я Муса,вуна гьикьван арза ийида рушарилай? Гадайриз кутугнавач
        эхир,рушарилай арзаяр авун.

Муса. Гьагь ,муаллим,ваз а кьейи чанарин ч1урувилер!

Пери. Вуч ийизва чна?

Муса. Фягь! Йикъа 10 гъуд тевегьай вахт авач хьи куьне зи далудиз. Куьне
       гатадай кьван зун к1усни еке жезвач.(Чинеба хъуьреда)

Эмиля. Гила мадни гатада чна вун.

Муаллим. Гьан,хьана,аялар. Чна классдин час башламишда. Къе вири авани?

Аялар. Ваъ. Аладин авач.

Муаллим.  Гьик1? Накь заз адан диде акурди я,мад тарсар ахъай хъийидач лагьайди
           я эхир.

Асият. Чидач муаллим. Ам ерли гьаятрани аквазвач.

Муса. Заз акуна,заз акуна ам. Агъа мегьледа авай,вуж тир-е абур.
Аруш,Тараш лугьудайбурухъ галаз авай ам.

Муаллим. Тарашар вучтинбур я,яда?

Муса. Э-э.муаллим, ат1а рекетар лугьудайбур вуч-е? Гьабурухъ галаз авай.

Али. Ви кьил ч1ур хьанвани я кьей хва? Кими эхтилатар вучиз ийизва?

Муса. Эхь авай,авай! Заз са пуд йикъан вилик акуна.

Муаллим. Де хьана! Куьрелди,аялар,къе куьне к1вализ фена Аладин аку. Пака ам
        тарсара хьурай.

Пери. Гьан муаллим,ак1 хьайила чун хъфидани?

Муаллим. Гьик1 хъфидани? За квез тапшуругъ гайиди тир. К1вале диде бубайривай
         халкьдин мисалар чира лагьана.

Эмиля. Квекай лугьуда,муаллим?

Муаллим. Мисал яз дуствиликай,акьулдикай,ахмакьвиликай.

Муса. За лугьудани,за лугьудани?

Муаллим. Лагь,Муса.

Муса. Аш акурла къвез,лаш акурла катдайбур.

Асият. Ина дуствиликай вуч ава?

Муса. Гьик1 вуч ава,кьейи чанар? Аладинавай контрольный работа списать
        ийидайла,адаз къеле гузвайди тир,гила къуншидал алаз,фена ам вучиз
        школадиз къвезвачт1а чириз к1анзавач. Белки ам кефсуз я жеди.

Асият. Кьежей мез я к1ани патахъ элкъведа.

Маният. Кьве п1узни сарар мез хуьн патал ганвайди я!

Асият. Эвел фагьум ая,ахпа рахух.

Муса. Дуст кьун регьят я,хуьн чет-и-ин!

Пери. Гафар фараш,крар ява-а-аш.

Эмиля. Гафар яргъи,крар куьруь.

Пери. Акьуллудаз гафунихъай,ахмакьдаз лашунихъай кич1еда.

Муаллим. Яваш кван!(телефон кьада) Эхь зун я. Яб гузва. Гъавурда гьатна. Эхь
        къведа. Аялар зенг авунвайди Аладинан диде я. Ам к1вале ксанвалда.
        Вичиз яб гузвач,тарсуниз ракъуриз жезвач лугьузва. Фена чира кван,вуч
         хьанват1а. Белки кефсузава жеди. Алад,Али вунни Асият.


               КЬВЕД ЛАГЬАЙ ПЕРДЕ.
                .
  Айвандик Марият хала ацукьнава. Ада Аладиназ эверзава.

Марият хала. Аладин,я чан хва,бес я ксайди,къарагъа т1ун вун.
(Гьаятдай эвердай ван къведа)

Али. Марият хала,Аладин к1вале авани?

Марият хала. Ам вуж я? Али яни? Эхь я бала,авазва?

Асият. Марият хала,чаз Аладин акуна к1анзавай.

Марият хала. Я чан балаяр,завай ам экуьнилай къарагъариз жезвач.

Али. Экуьнилай вучтинди я? Ам школадиз текъвез са гьафте я.

Асият. Ам заз гьич гьаятрани аквазвач.

Марият хала. Ша,я чан баляр,куьн рахух адахъ галаз.

Али. Аладин,яда. Къарагъа кван садра. Гьич юзани ийизвач.
      Яда,гьей,кьеркьеш,къарагъа кван садра,им гьи вахт я ксанвайди?

Аладин. Квахь ман инлай,зав ахвар гице т1ун. Фягь,са хъсан ахвар аквазвай заз
        исятда.

Али. Яда,ваз чидани сятдин шумуд ят1а? Къарагъ кван ,квахь мисикай!

Аладин. Ваз чидани-е,Али,заз ахварай вуч аквазвайт1а? За Асиятабурун багъдиз
        гьахьна машмашар чуьнуьхиз. Са хъсандиз чранвай машмашар.

Марият хала. Гьак1 хьайила ингье атанва ви дувандиз Асият.

Али. Эхь,атанва. Исятда машмаш чурурда ада ви. Гъваш Асият анлай са верг.

Аладин. Акъваз,яда,за гьеле багъдал вегьенвач хьи,гьак1 ахвар я акунвай.

Асият. Аладин,им гьи вахт я вун ксанвайди?

Аладин. Бах,вуна вири хуьуруьз эверин мумкин я, зун беябурун патал.

Асият. Чаз садани эверайди туш. Чун муаллимди ракъурнавайди я.

Аладин. Вуч хьанва кьван?

Али. Зат1ни хьанвачни?

Аладин. Вун...(Аалидиз чинеба гъуд къалурда)

Али. Яда, зун ваъ-е,вун тарсара авачиз са гьафте хьанва(патав ацукьна)
     ЙОЪ.ВАХЪАЙ П1АП1РУСДИН НИ КЪВЕЗВА ХЬИ?

Аладин. Атурай ман . Итимдихъай п1ап1русдин ни татана,квен ни къведа?

Али. Итим?Квахь кван кьей хва,къарагъ месикай.(далудиз са капашни вегьена къарагъарда).

Асият. Марият хала,Аладин дегиш хьанва,адахъ вуч хьанва?

Марият хала. Низ чида я чан бала,няниз квахьзава,йифиз к1вализ хквезвач.
         КЬуланфериз хтана ксузва пака няналди.

Асият. Бес чаз вучиз лагьанач.

Аладин. Бес я ман,Асият!Куьн вуча,полиция яни?

Али. Эхь. К1ан хьайит1а,полицияни я.

Асият. Аладин,вуна ак1 вучиз лугьузва? Чун ви дустар я. Классда авай вири
       аялри, муаллимри вун хабар кьазва. Марият халадиз килиг,гьик1 ават1а.
       (Куьчедай Аладиназ эвердай,уьфтер ядай ван къведа).

Аладин. Де мад хьана. Гъавурда гьатна. Зун фена к1анзава.(фида)

Марият хала. Аладин, я хва! Ингье гьа ик1 ава гьар юкъуз!

Али. Аладин,акъваз!(Адан гуьгъуьниз катда.)

Асият. Марият хала,ваз кич1е жемир,чун адахъ галаз рахада. Пака белки чи
      муаллимни къведа. Чна ваз куьмек гуда..


                ............

                ПУД ЛАГЬАЙ ПЕРДЕ.
Нянин вахт.Кьуьчедал гадаяр ацукьнава,са акьван яргъа тушиз мекъерин демер
ава. Музыкадин ван къвезва.
 
ТАРАШ. Къвезва шараг.

АРУШ.  Лап хъсан(кап-капунивай гвягъиз)Къе няниз чна чи кар аквада.

АЛАДИН.Куьне заз эвернавайни,гадаяр?

ТАРАШ.Я кьей хва,салам-калам амади тушни?

АЛАДИН.Саламалейкум...

Тараш.(Ажугъдалди)Вин салам вуча...(Вилер экъисна Аладинал фида)Са к1ус
       культурни хьана к1анда.Шарагризни чун хсаба амач!

ШК1ЛАМ.Акъваз я бра-а-ат,адакай гьеле акьван итим хьанва-а-ач.Къведа адазни
       акьул(Аладинан къуьнелай гъил вигьеда)Тушни Аладин?

АРУШ.Тараш,вуна адаз хъсан т1вар гана-е.Шараг!Къенин йикъалай чна ваз Шараг  лугьуда!
АЛАДИН.Зал т1вар алайди я!

ТАРАШ.Йоъ, адан вик1егьвал аку-е.

ШК1ЛАМ.Квез адавай вуч к1анзава,я братар?Гьакъикъатдани адал вижевай т1вар ала.
      Аладин!Махарик квай т1вар.АЛАДДИН!Кямир адак. Ма , Аладин,ч1угу сад.
        (сигарет гуда)
Аладин.Сагърай,заз ч1угваз к1анзавач.

ТАРАШ.Бахдикай кич1езвани,кьей хва?

АРУШ.Пагь са бах авани яда?Школада классдин руководительдикай хабар авани ваз?
     Гьар йикъуз классдиз къвез,ни ч1угваз,сигаретар гвайбур жагъурзава.

ШК1ЛАМ.Накьанбурукай сад элкъуьра адаз,Аруш.

АЛАДИН.Ваъ,ваъ, ам к1андач!За адетдинди ч1угвада.

ШК1ЛАМ.Ч1угуна тур сад,яда,регьят жеда ваз.

 АЛАДИН.          Ваъ,ам ч1угурла заз пис жезва,йифизни ахварал физвач...

АРУШ.Я чан браток,йифиз нормальный гадаяр ксузвайди туш.Физвайди я гьар жуьре-    дин к1валахар ийиз,кефер ч1угваз.

АЛАДИН.Акъваз...Зи классда к1елзавай аялар къвезва(Игис жез к1ан жеда.)

Асият.Аладин,вун яни?Зун ви гъавурда гьатнач,Чун ви патав мугьмандиз атайла,
        вун экъеч1на катна.
ПЕРИ.Аладин, вун школадиз хквезмачни?

ЭМИЛЯ.Аладин аку!Рушар,Аладин ина ава!

ПЕРИ.(Аладин вуна сигаретар ч1угвазвани? (гъиле игисарнавай сигарет акуна)               

ТАРАШ.Эй,шарагар,алад куь физвай чкадиз.

МАНИЯТ.Чна вагай хабар кьазвач,чун фидани лагьана.

ТАРАШ. Йоъ,им аку! Цыпленок! (вилер экъисна адал фида)

ШК1ЛАМ. Акъваз яда,аялрин тай жемир.

ПЕРИ. Аладин,ша чахъ галаз демериз.

АРУШ. Зун къведани квехъ галаз (Перидин гъиликай кьада).

ПЕРИ. Квахь инлай(эцяда).

ТАРАШ. Ибур аку яда,за исятда...(аялрал тепилмиш жеда)

АСИЯТ. Вуна попроб ая!(адан хура акъвазда)

ТАРАШ. (Сад лагьана кьулухъ гадар жеда.) Йоъ!

АСИЯТ. Ина вахъай кич1е касни авач! Аладин,вун нин тай хьанва?
(Аладин кьил куьрсна акъвазнава).

ТАРАШ. За исятда,за исятда ам падда...за...зун ахъагъа!

АСИЯТ. Ахъагъа,кьамир кван ам. Килигин ни вуж паддат1а. Аладин ша чахъ галаз.

ШК1ЛАМ. Гьиниз я братан?Вун нин тай жезва?

ПЕРИ. Эгь,Аладин,чаз вун чир жезмач. Ша,рушар,ч1угурай вичиз сигаретар.

ТАРАШ. Брыс,брыс!

АСИЯТ. Брыс жуван вахаз лагь!.

ТАРАШ. Брыс,лугьузва за квез(мад дели жеда).

АРУШ. Вун абурун тай туш. Вун абурулай са кьадар вине ава. Абур вуча бахдихъай
       дахдихъай,кич1ела к1валяй къерехдиз кам къачуз тежезвай дембягъар.

ШК1ЛАМ. Бес я,мораль к1елайди. Кардал машгъул жен.

АРУШ. Вучида,братан?

ШК1ЛАМ. Гьик1 вучида? План рик1елай фенвани?

АРУШ. План? А-ан план.

ШК1ЛАМ. Эхь план. Тараш,хълагь садра вучидат1а.

ТАРАШ. План ихьтинди я. Чаз пул герекзава. Анжах ам гьак1 жагъидай шеъ туш.
      Я к1влахна к1анда.... и гъилеривай залан к1валахар жедайди туш.
       Ят1ани пул жагъурдай маса рехъ авазва.

ШК1ЛАМ. Куьрелди лагь.

ТАРАШ. И магазинда пул ава. Заз нянихъ акуна,пул кассада амазма.
      Рак хкудиз,дак1ар хаз жедач. Шак чал фида. Са амалдар рехъ ава.

ШК1ЛАМ. Куьрелди!

ТАРАШ. Кьулухъ галай подсобкадин дак1ардик са гъвеч1и форточка ква. Анай анжах
       Шар... Аладин я гьакьдайди.

АЛАДИН. Зун?...Завай...ваъ ваъ!

ШК1ЛАМ. Тади ийимир братан!

АЛАДИН. Завай жедач!

ШК1ЛАМ. Вун итим яни,дахьайт1а паб? Кич1е жемир ви далудихъ чун гала.

АЛАДИН. Жедайди туш завай.

ТАРАШ. Я кьей хва. Бес фицякь ат1а кьуьзуь къуншидин к1валяй цурцун къапар
       чуьнуьхдайла хьанай хьи вагай.

АЛАДИН. Гьабурни куьне гъиз турди я зав.

АРУШ. Хьурай т1ун. Тухдалди недай шоколадар пряникар хьана ваз,къазанмишай
      пулунихъ.

ТАРАШ. Я кьей хва,школадин музейдай куьгьне экспонатарни вуна гъайиди туширни?

АЛАДИН. Абурни куьне кич1ерар гана гъиз турди я.

ТАРАШ. Са лампа вазни хьаначни?

АЛАДИН.Вахкуда гьамни за квев. Вучзава за адакай.

ТАРАШ. Лал хьана фида вун!

АРУШ. Фидайди я,фидайди я ам.

ШК1ЛАМ. Бес я. Квез адавай вуч к1анзава? Куьгьне гъалат1ар къуьхуьнарун итимвал
        туш хьи. Квез ада..ну..фидач лагьанач хьи. Гьа, Аладин?

АЛАДИН. А магазин захъ галаз к1елзавай рушан дахдинди я.

АРУШ. Гьа-а-ан! Ваз к1анзавай  рушан лагь маан.

ШК1ЛАМ. Айиб авач. Садазни чир жедач. Им эхиримжи сефер я.

АЛАДИН. Ак1 куьне фейи сефердани лагьайди тир.

ТАРАШ. Короче, Фида вун. Точка. Пулунилай гъейри са кьуд бутылка эрекьни
       къачу,пуд блок сигаретарни.

ШК1ЛАМ. Пул вири къачумир. Ак1 хьайила иесидиз чир жеда.

АЛАДИН. Им эхиримжи сефер я.

АРУШ. Хъсан я.

               
                4-ПЕРДЕ
    Мариятан к1валин вилик квай гьаят.

АЛАДИН. Алчахар,алчахар!(вичи вичин кьил гатазва)Зун хьтин к1амаш жедани?Гила
         инсанрин чиниз гьик1 килиг хъийида?

МАРИЯТ ХАЛА. Вуч хьана я бала? Вун нив рахазва,вахъ вуч хьанва?

АЛАДИН. Зат1ни.

МАРИЯТ ХАЛА. Бес вун нив рахазва?

АЛАДИН. Садазни. Бах. Зи буба вучиз кьейиди я?

МАРИЯТ ХАЛА. Вахъ вуч хьанва?

АЛАДИН. Ам вучиз кьенай ?

МАРИЯТ ХАЛА. Пияндиз машин гваз кьвалалай аватна. Гьадазни за гзаф минетдай
         хъвамир лугьуз. Ваз чидани,Аладин вунни буба хьиз ч1уру рекьяй
         физвайди ?

АЛАДИН.(явашдиз дидедиз ван текъведайвал) "Агь,диде,ваз гьеле чизвач,зун
      гьихьтин ч1уру рекьяй физват1а. Ваз хабар авач закай угъри хьанвайди. Зун
      к1арчийрин дуст хьанва. Алчахар! За лампа къачуна лугьузва. Кьиле акьурай
      ам куь! Къала гьик1 хьанай ам(къекъвезва лампадихъ)Ингье ам. За идакай
      вучзавай?(чилел гадарзава,ахпа вахчузва са пекинал михьзава.
  (Садлагьана мич1и жезва ахпа ц1ай гум акъатзава. Лампадай джин акъатзава).

ДЖИН. Уууу-уфт. Пагь къвалар кт1ана хьи зи,иеси кьей дар лампада агъзур йисуз
     агална. Лагь,агъа,ви къулугъ!

АЛАДИН.(Кич1е хьана чин к1еви авуна чилел ярх хьанва) Эй,вун вуж я?

ДЖИН. Зун вуж я? Эгьей,им аку зун тийижирди!? Ваз чидачни зун вуж ят1а?
      Я Багъдатда,я Тебризда,я Дербентда зун тийижир са киц1ни амай туш.

АЛАДИН. Махар ахъаймир,вун вуж я?

ДЖИН. Я агъа Аладин,бес зун, Джин,ви рик1елай алатнавани?

АЛАДИН. Идаз зи т1варни чизва,им ахвар ят1а,дахьайт1а Тараша заз туьк1уьрнавай
       къемеда?

ДЖИН. Ахвар туш.

АЛАДИН. Ваз завай вуч к1анзава?

ДЖИН. Зааз? Заз са зат1ни.Зун ви къулугъда акъвазиз гьазур я,лагь ви къуллугъ!

АЛАДИН. За идавай вуч т1алабда?

ДЖИН. Завай т1алабмир,заз буйругъ це,зун ви лук1 я.

АЛАДИН. (вик1егь жеда). Я? Хъсан я. Ават1а,ават1а... Ат1а тарце авай пехъ яна
      вегь кван!(явашдиз)акван идавай жедат1а. Фегь! Я ламран хва Джин,гьич
       т1убни галукьар тавуна,тарцин кук1ва авай пехъ вегьена.

ДЖИН. Вуна заз экъуьгъ вучиз ийизва я агъа?

АЛАДИН. Явашдиз лагьай гафарин ванни къвезва. А пехърел чан хкваш,язух я адан.

ДЖИН. Башуьсте,агъа!

АЛАДИН. Ават1а гила агъа мегьледа авай пуд къачагъ инал гъваш!

ДЖИН. Пуд вучиз?Абур 40 хьана к1анзавайди я.

АЛАДИН. Гьелелиг а пуд бес я. ТАРАШ,АРУШ,ШК1ЛАМ.

ДЖИН. Башуьсте,агъа.(гьарай кьилелаз АРУШ,ШК1ЛАМ,ТАРАШ кьулу-кьулухъ,къвала-
     къвалахъ,чпин хуш авачиз са таквадай къуватди гьаятдиз гъизва)

ТАРАШ. Им вуч аламат я,ина гьик1 хьанвайди я?

ШК1ЛАМ. Абайш,аман зи кьил!Вуна за эцямир,кьей хва!

АРУШ. Аман зи к1вач!Ви зи к1вачив вуч гва?

АЛАДИН. Гьан кван,къарагъ к1вачел.

ТАРАШ. Йоъ,им аку е! Шараг!Аман зи къвал! Им вуч аламат я.Им вуж я зун ягъайди?

АЛАДИН. Къарагъ алчах! Квез квек садани т1емни акакь тийидайди хьиз авайни?

АРУШ. Братан,

АЛАДИН.Тамавай жанавур я ви братан.

АСИЯТ. (Тади кваз къведа) Аладин,чун вахъ къекъведай кьван шулу хьана.

ТАРАШ. Гадаяр и циц1иб аку! Им туширни накь чахъ галаз беребирзавайди?

АСИЯТ. Вуж я циц1иб? Ак1 хьайила,вуна вун лекь яз хсабзава ман?

ШК1ЛАМ. Яда ,адан вик1егьвал аку-ее.

АРУШ. Ам са гьина ят1ани акурди хьиз ава ман заз.

ТАРАШ. За исятда чирда адаз. (Асиятал тепилмиш жеда).

Асият. (Тараш пек хьиз чилиз яда). Вун лекь туш,пехъ я! (Тараш мад къарагъна
       Асиятал фида.Руша адаз самбодин приём авуна гъил алчударда).

ТАРАШ. Аман зи гъил хана,куьмек це,ядаяр.

АСИЯТ. Спортдал машгъул хьухь,гадаяр,ихьтин явакьанрин гъиляй ажуз тежедайвал!

АРУШ. Гьан,зи рик1ел хтана! И руш самбодай Дагъустандин чемпионка я.

АЛАДИН. Асият,акъваз! За исятда абур чинердив гуьлуьз вегьез тада.
(Гьаятдиз са к1ерет1 аялар ва муаллим къведа)

АЛИ. Ина вуч хьанва,я гадаяр? Ибуруз вуч хьанва? Абур хшракандин пацув ягъай
     т1вет1ер хьиз ава хьи.

ПЕРИ. Я аламатар,ина вуч хьанва?

АЛАДИН. Вири аламатр и лампада ава. Квекай чуьнуьхдай са зат1ни авач.(Лампадивай гъил гуьц1да)

ДЖИН. Лагь ви къуллугъ агъа!(аялриз кич1е жеда ва абур гьарнихъ сад катда).

АЛАДИН. Акъваз кич1е жемир. За куьн гъавурда твада.Куьне суьгьурдин лампадикай
      мах к1елайди яни?

АЯЛАР. Суьгьуьрдин лампа? Аладинан суьгьуьрдин лампадикай яни?

АЛИ. Вуна дуьз лугьузвани,Аладин?

АЯЛАР. Я аламатар!

АЛАДИН. Лагь вучидат1а,кич1е жемир. И чинерди за вуч ая лагьайт1а,гьа к1валах
       ийизва. Фикир ая,лагь квез вуч к1андат1а?

ПЕРИ. Ават1а чаз са туьк1вей школа эциграй!

АЛАДИН. Лагь мад вуч ийидат1а?

АЯЛАР. Рекьера асфальт цаз тур.
      -Спортзал эциграй!
      -Авай кьван хулиганар,угърияр,бандитар,рэкетар квадаррай!
      -Чи школада авай тарсар чир тийизвай,ч1уру к1валахар ийизвай гадаяр дуьз
        рекьел хкурай.


АСИЯТ. Абур жедай к1валахар туш. Абур чна зегьмет ч1угуна авуна к1анзавай
        к1валахар я.

МУАЛЛИМ. Дуьз лугьузва Асията. Абур садни регьятвилелди жедай крар туш.

МАРИЯТ ХАЛА. Я балаяр,я чан балаяр! Гьак1 жедай крар яни абур?

МУАЛЛИМ. Къе суьгуьрдин лампа Аладинан гъиле ава. Акъудда ада чи виридан
        т1алабунар кьилиз. Пака гьатда са ажугълу касдин гъиле,ахпа вуч жеда?

АЯЛАР. Бес вучида?

МАРИЯТ ХАЛА. Зегьметдалди арадал гъана к1анда гьар са шеъ. Кьегьалри хьиз
      к1ела,къачу пешеяр,ахпа эциг квез школаярни,рекьерни,муькъверни.

МУАЛЛИМ. И гадаярни угърияр яз ханвайди туш. Абуру са т1имил йисарин вилик чи
        школа куьтягьайди тир. Чи диде-бубайрин,муаллимрин тахсир я абур ч1уру
         рекьяй фин. Вахтунда иесвал авунач.

АЛАДИН. Ак1 хьайила за лампадиз вучда?

АРУШ. Зав гице,братан.

ТАРАШ. Ваъ,кьей хва. Зав гице!

АСИЯТ. Ацукь чкадал! Ша Аладин чна ам  гьуьлуьз вегьеда. Къуй садан гъилени
      гьат тавурай!

АЯЛАР. Эхь,ша вегьен!

АЛАДИН. Бах,багъишламиша. Зун ягъалмиш хьана.(фида)

МУАЛЛИМ. Акьуллу гада я,ви хва,Марият хала. Ада хъсандиз к1елни ийизва.
       Гележегда адакай ваз хъсан куьмекчи жеда.

  Вири иштиракчийри сегьнедал экъеч1на и мани язава.


    ВИРИ РЕКЬЕР АЧУХ Я ЧАЗ,АЧУХ Я.
    ЮГЪ-КЪАНДИВАЙ МУБЛАГЬВИЛЕР АРТУХ Я.
    АНЖАХ ЯТ1АН(И) РЕКЬЕРАНИ ХУЬЛЕРА
    ВАЛАР-ЦАЦАР АРУШ ЖЕЗВА К1ВАЧЕРА.

           ПРИПЕВ
    ЖУВАН ХАЛКЬДИН ДУЬЗ АДЕТАР
    КВАДАРДАЧ ЧНА,АЯЛАР.
    П1АП1РУСНИ ИЧКИ НЕГЬ ИЙИН,
    БУБАЙРИН КЬИЛ АГЪУЗ ТИЙИН.
 
    КАМ МЯГЬКЕМ ВЕГЬ,ЖЕЗ ТАХЬУРАЙ ТАТАБАР.
    ДУСТАР,ЯХЪА ЗЕГЬМЕТ,ИЛИМ КТАБАР.
    ЗЕГЬМЕТ Ч1УГУ АБАД АВУН ПАТАЛДИ
    ЖУВАН ХУЬР-К1ВАЛ,Т1ВАР МАШГЬУРА ВАТАНДИН.