Ша ккIиз...

1- сегьне.   Куьчедин   юкьвал   кьве   итим   гьалтзава.

- Яда,  чхадилай   алатай   чIидгъер   хьтин   вуна   накь   заз   гьелегьар   кьазвайди   тирни?
- Я   цIайлапанди   ягъай   хъархъу   кIанчI   хьтинди,  бес  вун   тирни   зи   пакун   тIвалар   гьисабзавайди?
- Вуна   зал   къал   акьалдмир   гьа,   за   ви   нерин   тар   кьуна   чан   акъудда.
- За   а   ви   далдам   хьиз   авай   руфун   мих   фейи   машиндин   чарх   хьиз   падда.
- Заз   ви   музейдиз   вахкузвай   скелет   гьайиф   къвезва,   та-хьайтIа. . .   Вуна   зун   спортсмен   тирди   рикIелай   ракъурмир   гьа,   заз   боксдай   сад   лагьай   разряд   авайди   я.
- Вун   хьтин   спиртсменар   няни   хьайила   зи   жугъунин   кIане   дарманар   акатай   кьифер   хьиз   ярх   жезвайди   я.   Ваз   боксдай   разряд   аватIа,   заз   катунай  ава. . .
- Ви   кIуфал  вуч   гзаф   шуькIуь   кIвенкI   хьанва?   Ам   алу-дун   завай.   Вун   эгер   ви   бубадин   хва   ятIа,   ша   ккIиз!   Къа-лура   жуван   викIегьвал.   
- Де   ша!
- Де   ша!
- Ша,   ша,   акван   низ  пис  жедатIа!

               2 – сегьне.  КкIиз   фидай   рекье:
- Яда,   чун   накь   вучиз  чуьруьк   хьайиди   тир?
- Валлагь,   зи  рикIел   хъсандиз   аламач.   Чи   столдихъ   вад – цIуд   кас   кьван   галай. . .
- Яда,  заз   чиз   чи   арада   са   акьван   къал   хьанвач.
- Зани   гьакI   фагьумзавай. . .

       3 – сегьне.  Пивнойдин   ракIарив   агакьай   абур    микьна- тIисдин   эсердик   акатайбур   хьиз   акъваз   хьана.
- Ви  жибинда   затI   амачни,   дуст?
- Папан   сандухдай   са   манат   жагъана. . .
- За   са- кьве  манат   дахдин   киседай   сикIна.   Це   лагьа-найтIа,   гьич   кьве   кепекни   гудайди   тушир. « Вуна   зав   вах-кайди   авани?»  лугьуда.
- АкI   ятIа   квез   килигзава?   Виликди!
- Виликди,  зи   дуст.  Кьена   фидай   дуьнья   я  им.
Са   сятинилай:
- Агь. . .  гь,  акI   жедач. . . ч,   вал   нубат   атанани?   Хкваш,  гьинай  кIантIани. . .
- Зав  кепекни   гумач,  дуст.  Аламаз   гузвач,  валлагь,  гузвач.
- Вала   вун   кьилихъди   акIурай,   кепеюгъли,  ваз   гьамиша  за  гьинай   гъида.   Пул   гумачтIа,  кикягъа,  вакай   мад  заз   дуст   жедайди   туш. . .
- За   гьамиша   ваз   гудайла   хъсан   тирни?   Къе   садра   вуна. . .
- Агь,  кицIин   хва,   вуна   заз   гана?
- Вуна   ви   кIуф   хуьх, тахьайтIа   за   ви   сарар   гьажикIа-дин   тварар   хьиз   авадарда.
-  Вуна   зин?   Я   кьей   хва,  за   вун   фалужди   ягъай   верч   хьиз   шулу  авуна   ахъайда.
- На?
- За.
- Зун?
- Вун.
- Де   хъсан.  Зун   пака   рахада   вахъ   галаз,  къе   ваз   хатур   хьуй.
- Белли,  белли,  жува   хъфена   далудихъ   хъицикьар     ку-туна   хъша.

     4-сегьне.  Пакад   юкъуз   абур   мад   куьчеда  гьалтзава.

- Яда,   вун   тирни   накь   заз   гьелегьар   кьазвайди.
- Вун   тирни   зун   шулу   авуна   ахъайзавайди?
- Заз   вун   эхиримжи   вахтара   хъсан   аквазвач.  Ви   кIуфал   руькуьндал   кьван   кIвенкIв   хьанва.
- Ви   кIуфук,   заз   аквазвайвал,   чIуру  иви   гзаф   хьанва.  Ви   пIузарар   залийри   хъвайиди   хьиз   авун   завай.
- Вун   гьакI   рахазвани?  Де   ша  кван   атIа   цлахъ.
- Де   ша.
- За  ваз   ккIиз   чирда.
- Бес,  бес,  ви   бубадин   пешени   гьам   тир   эхир.  Сад   вахъ   галукьин   хьи. . .
Гаф   сиве   акIай   ам   ва  адан   дуст   пиво   гузвай   чкадин   ракIар   акурла   кьведни   са   геренда   лал   хьана,  кьилер   куьр-сарна   акъвазна.   Ахпа   абуру,   чпин   жибинар   ахтармишай-далай   кьулухъ,   мад   винидихъ   къалурай   сад   лагьай   сегьне   башламиш   хъувуна:
- Ви   жибинда   затI   амачни,  дуст?
- Папан   сумкадай   са   манат   жагъана. . . .