Туьгьметдин таъсир

   Хейлин муаллимар, вилик-кьилик квай къанажагълу ксар са суфрадихъ ацукьнавай мярекат акуна заз и мукьвара. Са вуч ятlани шад гьалара къейдзавай абуру. Тlуьнар-хъунар ийизвайбуруз вахт гьикl акъатзаватlани чир жезвачир. Вахт вилик физвай хьиз, абурун гуьгьуьларни ачух жезва, рахунар –  гзаф ва гьевеслу. Вири кеф-кефиятдик квай. Анжах са касдилай гъейри. Са гъил ченедик кутунвай касди, вучиз ятlани, и шад мярекатдал шадвал ийизвач. Ава жеди са себеб. Зазни ваз талукь тушир са сирлу себеб. На хиялда, адан иштираквал гьакlан са чара атlай гьал я. Са артух рахунни ийизвач. Амма мярекатдин эхирра хьиз гъил ченедик квай касдай акъатай гафари заз адан кисунин, сефилдиз тухунин сир ахъайна. Вич лугьумир, ам сефилзавачир кьван. А касдин пагь атlанвай, пагь. Вуч себебдалди? – жузун мумкин я вуна, кlелзавайди. Гьахълу ва чарасуз суал я.
   Гъил ченедик квай кас, къанажагълу ксари мярекатдал муьжуьд гаф урус, пуд гаф лезги сад-садахъ галкlуриз лугьузвай «тостар» ван къвез, пагь атlана, тажуб хьана амай кьван. Мярекатдин эхирдалди дурум гуз алакьнатlани, гъил ченедик квайдавай сад-кьведаз туьгьмет тавунани акъвазиз хьанач.
   - Ибур рахунар туш, урусдалди рахазватlа, лезги чlал какадар тавуна, рахух. Ва я тахьайтlа анжах лезги чlалалди! – икьван чlавалди гъил ченедик кутуна ацукьнавайда кlвачел къарагъна, тамадади нубатдин гаф са чlехи муаллимдиз гудайла, вичин наразивал малумарна.
   - Ви чlал вад йисалай амукьдач, - гаф рахана муькуь къаншарда ацукьнавай са маса муаллим. Вични, хайи чlалал эдебиятдин эсерар теснифзавай яшлу муаллим я.
   - Амукьда, муаллим, амукьда! Виш йисара амукьда! – викlегьдаказ хълагьна, мярекатдин эхир жедалди гъил ченедикай хкуд тавурда.
   Амма гаф гайи муаллимди лезги чlалал рахунарна. Урус гафар садни акъатнач. Аквар гьаларай, насигьат квай туьгьметди адаз таъсирна.


2015