КАМК

КАМК

–Я дада, узу жейрансир вуйин?
–Вува, жан риш.
–Я дада, узу жавагьирсир вуйин?
–Вува, жан риш
–Я дада, узукьан гюрчегурра адарда.
–Адар, жан риш.
–Вуйиган, адруган узу сарира швуваз гьаз гъахурадар?
–Камк кавук, жан риш

Гюлейбатдин кІваъ айи хажалат гьич саб дерднахьра тевуз шуладайи. Магьа чан тай шубар вари швуваз душну веледарра хъиршнайиган, гъулаз хялижвди гъюрудариз ачухъ улариан дугъхьан гьич лигуз шуладайи. Къанна юкьуд йисаъ айи шураз, тахсир чан дадайик кайибси рякъюрайи.
Сабпи ражари ебхьурайиси, дадайи камк кавук гъапиган, Гюлейбатди гьамусдизкьан гьамци учІруди думу гафар фикриъ гъидисундайи ва камк кайи «Камклиз» дарман абгури гъалабулуъвалиъ учІву.
Зат дарди хьайиз кьанди вушра шуваз гъягъярза дупну, Гюлейбатди имбубтІан хъана артухъ чан бедендиз тюмер апІури гъаши. Дугъу гьар гвачІинган, чан хулаъ аьхю гюзгдин улихь улчІвмарихъан чІарар хътудуз ккебгъу. Йигъан шубубан тІубарин ва муркларин шибарилан лакар алдатури гъаши ва гьар гьяфтайик, хъибшу куш хътІубкъуз райондиз ккажаргъури кархьу. Гьар сяаьтнаан сяаьтназ кІвантІар уьруди, уларихъишвар укІуди, гарцІларин кІакІар ал рангнахьди  даблагди гъушиш, дугъаз чакан камк ктадабхьрайиси гьугъубжвуйи. Муганайиз дугъу  му чахъ зигурайи гъайгъушнар чІикъри– чІикъридитІан апІдайиш, хъа гьамус, дадайи кІурайи «камкликан» эсер дубхьнайири кми– кмиди апІури гъаши.
Аммаки, гьаци вушра, гьадмукьан, шуран чан хиялариан, уччву духьнашра, гьич сар жигьилинра Гюлейбатдик юкІв кабсдайи. Я думу сар шлиз вушра швуваз ча кІури, ярхла  гъуларианкьанна гъюрадайи. Анжагъ, вари гъуландари ушвниъ думу, имбубсана кьутІкьалди ва хявиди ахъу. Гюлейбатдин хиял вуйики, учв уччвур вуйиган варидариз чакан хъял вушул дупну. Штукк шубар чаин аьлхъруган, гьаци гъапнира вуйи:
–УчвутІан узу уччвур вуйиган, узкан хъял качвуз гьа!...

Шуран кІваз учв швуваз дурухди рягьят шлу гьял дайи, хъана, аьгь апІуз даршулайир, дадайихьна гъафи:
–Я дада, узу кІубнирра вуйин?
–Вува, жан риш.
–Я дада, узутІан зирекурра адарда.
–Адар, жан риш.
–Вуйиган, адруган узу сарира швуваз гьаз гъахурадар?
–Камк кавук, жан риш.
–Я дада, валлагь кимдарзук. Магьа лиг, йиз, тІюрхъяр кайи цІару машар гъатху вичун гъваларси духьнайиз, ва, карсу улчІмар хъимдарзугъ, хъашра, дярякърайи писписар кІару тушдихьди алацІунза ва ранг адру улариъ завар–гьюлерин укІушин тІапІунза. Хъа уву хъана, гьар гьерхиган, камк кавук  кІурава.
–Ав, жан риш, камк кавук. Саб гьарин цирклар, кІажар, кюлеркьанна сабсдар шлудар дар. Гьаци, гьяйванатар, ничхрар, аммаки, дурар вари, чпин айиси ухьуз варидариз багьа ва ширин вухьуз.  Эгер, мисалназ, жакьв дибисну дидин кІул ултІубкъиш, гьар жюре ширар гъивиш, думу жакьвди гъубзрин?

Гюлейбатдин кІулиъ дадайин гафарин мяна гьамус убчІвуз хъюбгъю. Учв вари химияйихьан  азад гъапІу ва уччву, гюрчег кушар гъюнарилансина деетуз гъиту. Хъа дугъан кІубанваликан ва зирекваликан чІалра пуз хай гъюрдар. Гьадмукьан дирбаш риш кудучІвнайи. Гъуландарира кІури шуйи:–Гьатму Гюлейбатдик фициб ляхин ктарин! Халис, ккибтІнайи йицсир вуда!...

Табиаьтди чаз тувнайи, жакьвси, гюрчегвалихъна дуфна кІури, хил’ан гьарсаб ляхин удукьуру кІури гьапІарва, швушваз дархурайиган. Гьамусра Гюлейбатдин кьисмат гьич сар жигьиликра кабснадайи. Ва гьаддихъди сабси, мюгьюбатвал дугъхьан гьаргандиз ярхла дубхьнайиси айи...–Я дада, узу бахтсуз вуйин ?
–Ваъ, жан риш.
–Я дада, узу аьрбахтсуз вуйин?
–Ваъ, жан риш.
–Я дада, узу мюгьюбатагьли дарин?
–Вува, жан риш.
–Вуйиган, узу сарира швуваз гьаз гъахурадар?
–Камк кавук, жан риш.
–Я дада, фу камк?
Жакьвси, йиз вуйирсир духьназа, аьхир.–Увуз, уву яв улариинди милиган. Уву увуз жарадарин улариинди лиг. Яв гафар– чІалар увуз, жарадарин ибариинди ергьуз гъит. Жакьвлиз жакьра кІурдар гьа, эгер дидин сес ва мелз имбудариз ширин дарш. Ари увук кайи камкра гьадму вуки, яв мелзнак кайиб. Фукьан гюрчегур, фукьан устад ишри, эгер мелзнан ярхишин жвуваз аьгъдарш, думу гьарган барбатІ ву. Камк бабкан шулайиган кади гъафиб, я табиаьтди капІрайиб дар, думу сагъ апІувал яв гъянаъ а. Жан риш, гьамусра кьан дар, гьадму камк кадапІ увкан ва хъасин вари яв кІван мурадарихъ хъахъдиву. Ва швувазра гъахурву...

Гафну гъван гъюдли апІуру кІури шулу. Ширин мелзну бахтра хуру ва мюгьюббатра. Гъит, Гюлейбатдихъра гьациб мелз ибшри!