Югьандин кьюбпи кагъаз

       ЮГЬАНДИН КЬЮБПИ КАГЪАЗ

    
       Яшлу аьхюрихьан Раббийи кадагънайи агъа-ханумдиз – хъугърударин жямяаьтдиз ва дугъан биц1идариз саламар.
       Узу учву вари гьякьвалиъди ккун гъап1унзачву. Гьацира, гьякьвалин гъавриъ ахъу вариди учву ккун гъап1ну, фицики ухьуъ гьякьвал яшамиш шула. Му гьякьвал ухьухъди гьаммишандиз хъайиб ву. Учвуз Рабби Адашдихьан ва Дугъан Бай Иса Месигьдихьан гьякьвалиъди ва масанвалиъди уж’вал, рягьимлувал ва мясляаьт ибшричвуз.
       Яв саб кьадар биц1идар, ихь Адашди табшурмиш дап1найиганси, гьякьвалин рякъюъди гъягъюри гъяркъган, гизаф шад гъахьунза.
       Хъа магьа гьамус узу, багьалу вуйи агъа-ханум, саб ккун ап1ураза (му насигьят ц1ийиб даршра, сифте бинайианмина ухьуз тувнайиб ву): гъач, сари-сар масанди дисурхьа! Масанвал магьа гьаму ву: ухьу Раббийин табшуругъарихъди яшамиш хьуб. Му табшуругъ учвуз сифте бинайиан деебхьнайиб ву, ва гьаддихъди яшамишра духьну ккунду.
       Ихь арайиан дюн’яйиз гизаф куч1ляхяр душна. Дурари Иса Месигь, инсан духьну жилиина гъювал кьабул ап1урадар. Дицир адми куч1лях ва Месигьдиз къаршур ву.
      Лигай гьа, учву фу бадали гъилихнуш, гьадму ичв дубгруси дарибшри, хъа ичв пешкеш гьубк1ну учвухьна рубкьруганси ап1инай.
       Месигьдин аьгъювалар ч;юргъруриз ва дурар тамам дарап;руриз Рабби аьгъдар. Хъа Месигьдин аьгъювалар тамам ап1руриз Адашра, Байра аьгъя.
       Гьамцдар аьгъювалар хьади дяргърур гьич зат кьабул мап1анай, я ичв хулаз гъюз мигъитанай, я дугъаз салам мутуванай. Гьацир кьабул ап1рур, дугъан ч1уру ляхнарик ктикьура.
       Узуз хъана гизафубдикан учвуз бик1уб лазим вуйи, хъа узу кагъзииндина чернилиинди бик1уб ужу вуди гьисаб ап1урадарза. Мидин ерина, учвухъди машна-машди улхбан бадали ва ихь шадвал гьубк1уб хьпан бадали, багарихьди учву рякъюр пну, умуд кайиз.
      Раббийи кадагънайи яв чуччун веледари саламар хътаура.




       ЮГЬАНДИН ШУБУБПИ КАГЪАЗ
 

       Яшлу аьхюрихьан – узуз гьякьвалиъди ккун гъахьи, йиз багьа вуйи дуст Гайдиз.
      Йиз масан дуст, увуз варибдиъ хъуркьувалар ва мюгькам сагъвал хьпан бадали ккарагураза, хъа уву Рюгьниинди сагъ вуйивал узуз аьгъязуз.
      Гьамина гъафи гъардшари увкан, гьякьвализ яв аьгьтлу вуйиваликан ва яв дугъри уьмрикан ктибтиган, узу гизаф шад гъахьунза. Узуз йиз веледар гьякь рякъюъди гъярайиваликан ебхьубт1ан артухъ жара шад хабар адарзуз.
      Йиз масан дуст, уву гъардшарихъ зигурайи зегьметну, гьеле дурарин арайиъ мушв’ан дарудар ашра, яв дугъриваликан к1ура. Гъардшари яв масанваликан хъугънайидарин жямяаьтдин улихь ктибтнийи. Уву ужуб ляхин ап1идийва, эгер дурарихьди чпин рякъ давам ап1уз Раббийиз лайикь вуйи рякъ’ин алаънийиш. Дурар Месигьдин ччвур бадали рякъюъ уч1вна, ва хътругърударихьан фук1ара кьабул гъап1ундар.
      Гьаци вуйиган, гьацдар касариз, гьякьвалин гъуллугънаъ хьпан бадали, ухьу хил гьач1абккну ккунду.
      Узу хъугърударин жямяаьтдиз кагъаз гъибик1унза, хъа дурарин аьхюр хьуз ккуни Диотрефди, учу к1урайиб кьабул ап1урадар.
      Гьаддиз, эгер узу гъафиш, дугъу гьап1раш, ктибтидиза. Дугъу кьут1кьли гафариинди учук тахсрар кирчра, аммаки мидканра дугъаз гьубк1радар. Дугъу ихь гъардшар хяларди кьабул ап1урадар ва ап1уз ккунидарихьди гъитрадар, дурар хъугърударин жямяаьтлугъдианра кмиди ут1урккура!
      Багьа вуйи дуст, писвалихьна магьач1арккан, хъа – ужувлахьна. Ужувлан ляхнар ап1рур Раббийинур ву. Шли ч1урувал ап1ураш, думу зат Аллагь аьгъю гъахьир дар.
      Деметрикан варидари, гьякь рякъ’ин аливаликанра, ужуйи к1ура. Гьацдар гафар дугъкан учура к1урача, хъа ич шагьидвал, увуз аьгъюганси, гьякь вуйич.
      Хъана гизафубдикан узхьан увуз ктибтуз шуйзухьан, хъа кьалмииндина чернилиинди дици ап1уз ккундарзуз.
      Багарихьди уву машна-машди рякъюр к1ури умуд кайиз, ва гьадмуган гафар ап1идихьа.
      Саламат ишриву. Вари дустари увуз саламар хътаура. Увура, ччвурар дидисну, вари дустариз саламар йип.