Уччвуйи улупрур

                УЧЧВУЙИ УЛУПРУР

       – Я адаш, гьариз ккибтIуз йицраз дуфназа, – гъапи, абйир–бабарихьан гъулан тмуну кIулихъинди жара духьнайи Баршбегу.
       – Йицраз ккабхьну амиза, ипIайиз сацIиб дийигъ, – кIуру Рамиойи, – магьа чайра убхьура, уьл дипIну хъа гъарах.
       – Чухсагъул, адаш, сппар дижрикIди ушв гьибтри аьдат дариз. Узу душну ич хулаз уьл ипIурамиди яв йицраз ккабхьдиза.
       – Сарун диди гъипIнушул, хъапIну гъарах.
       Йиц хъапIну гъафи Баршбегу сацIиб йицраз ккибчну, чай убхъбалан кьяляхъ гьариз ахъиккна дутIнайи митйир гьюдюхюз уршариз гъягъюру. Гьар'ан гъафири чпин адашдин йиц деебтуру, хъа думу баркаван диш дапIну чан ахъиз гъябгъюру.

                ***

       Хъа йигъан, чпиз ургуз гакIвлариз гъягъюз ккун дубхьну, йицра хъапIну мярхяр ккитIуз чан балихьна гъафи, чай дубгъну айвандиккинди адаш гьауз удучIву Баршбегазна чан швушваз чекмийир алахьурайи Рамиойи кIуру:
       – Учвухьна йиз йиц узура хъчIюхюри гъюйи, дидиз фургьанди укI ккабхьнухьидичва.
       – Саб тикисибтIан дибчундарза, адаш, – гъапи Баршбегу.
       – Валлагьи саб жагв укIан ккабхьну, адаш, –  гъапи жилир ккуржруси швушвура.
       Швушван гъавриъ ахъу Рамиойи гъапи:
       – Яв саб жагв укIан туварзияв.
       Швушв машнаан уьру гъаши.
       Баршбегу, разишну кудутIну, чпин адашдиз гъапи:
       – Хуб ужуди гъапунва, адаш, мугъаз учв уччвуйи улупуз ккун гъабхьну.
       Хъасин жилири хпирихьинди илдицну кIуру:
       – Жвув уччвуйи улупбан бадали кучIлар апIбакан ари гьаци шулвуз. Вуйибси гъапнийиш гьапIрийихъа.