Аьзраил

                АЬ3РАИЛ
 
       Селевкия бабан, хъайина-хътру, миш-дарш варит1ан ккуни, варит1ан багьа, варит1ан к1югъли хтул, чазра хабар адарди улариккан ккудургну, биц1идарихъди душну сабан хъуркьну адру кьюраккйирин хахар гъит1диз к1ури кет1ерццну гьамус ц1а алди хътургурайиси, ц1иб эгьйирра хъивну ахниъ ккаъну шубудпи йигъ гъябгъюрайиган, жандиз гьии дайи.
       "Жан Рабби, аьршариъ айи ич Адаш! –  к1ури Селевкия баб Раббийин Ужувлан Хабар к1уру китабдиъ айиси Иса Месигьдиз ккарагуз хъюгъю. – Уву яв масан Бай адмийиригъна гьаъну, Дугъу учхъанди Чан гунагь ктру Жан гъурбан дап1ну, хъана ч1иви духьну аьршариз гъушу Иса Месигьдин хатриан гьаму йиз хтулиз гьич саб заралкьан хуз мигъитана. Эгер, ич Агъа, думу йик1уз ккаш, дугъан ерина узу йик1ава. Узу гьам сяаьт вушра йиз жан гъурбан ап1уз гьязур вуза. Гъюруш, аьзряил узухьна гьаъ".
       Хтулин дерд-хажалатну Селевкия баб рябкъюр-рябкъюри ерц1урайи ва гьаддиз, сац1ибкьан фикир дердерихьан ярхла ибшри дупну, думу хиларигъ ляхинна дарди ктисурадайи. Чан ц1икбар ккуни хтулиз саб ицци-ужуб ап1арза к1ури, гьеле швушвазкьан бирмиш дарап1ди, хюйин тазра хилиъди, ахъин гъвалахъ хъайи ч1уру хулаз, думу хиялари, гьадму фикрар ади гъахурайи. Танхар айи хулазди урч1ар арццубси, дугъан улихьинди лизи машар гъяйиб, саб аьжаин мутму гьадабкуру ва гуч1 хьпан зягьматнаан Селевкия бабан ушвниан гьамцдар гафар ут1урччвуру: "Иццурайир узу дарза, аьзраил; йиз хтул ву. Думу заан хулаъ пичрахъ хъа..." Му гафар к1урамиди, гъвалхъантина, танхлиъ к1ул убччвну, хю дип1ну мушв’ан ут1убччвурайи к1ирхъин фун кубк1ну, чан чаз аьгъдарди гъвалахъинди, гъяргъ-п1арт1ниинди дахъу Селевкияйин дердер-гъамар сабпну хътат1нийи.
Кьаназ дих-дик1 имдруган удуч1ву швушваз чпин баб дук1найиси ч1уру хулаъ дитну рякъюру. Думу гьяракат дап1ну душну, шид дубхну машназ йибчуру. Баб яваш-явашди уягъ шулу ва:
       – Аьзраили, швушв, йиз хтул гъухнийин? –  пну гьерху.
       – Гьап1ру аьзраил? Уву гьарза улхурайва баб?!... Яв хтул гъудужвну чан дустарихъди ч1атаризра гъушну. Йиз шубуд йигъ вуйиз ушв дибисну Иса Месигьдиз ккарагури. Уву дердер мап1ан...
       – Дици вуш аьзраил узухьна гъюру, гьа-ра-ра-ай, жан Рабби, гьамус гьап1дик1ан...–  к1ури швушван хиларигъян гъючвюхну хъана ярхи гъаши. Амрихъан душнайирси дахънайирин фагьум, чаз учв биц1иди айиган, чпин абайи кдиту Раббийикан ва Дугъан Израил халкьдикан вуйи к1ваин алаъбари зат мидарди иблисдин ва диндин хъахънай фикрарихьан марцц гъабхьи.
       Саб сяаьтдиланси Селевкия баб, швушву кидибтну гъабхьибдин варибдин гъавриъ ахъиган, жаргъури хулаз гъюрайи хтулин гардандиъ архьуз, учвра дугъан гъаншариз гъажаргъу.
       – Жан хтул, аьзраил к1уру гафарихъ мухъугъан, Яв баб сарун куч1лин диндихьан, иблисдихьан азад гъахьну. Гирами Рюгьну узу марцц гъап1унзу. Аьзраил жан гъадабгъру малайик дар, хъа Раббийи Чазди кадагънайи Израилин баярилантина арайиз гъафи халкьдиз к1уру. Улихь вахтари аьрабари чпин дин дабгъури ихь халкьдиина гьюжмар ап1руган, Израил халкьдин чпиз хъялди вуйиган, дурар аьжал хру аьзраилар ву к1ури гъахьну. Гьамци думу иблисари ва шейт1нари жугьуд халкьдихьна даккнишин улупуб гужназ мажбур ап1уйи. Ихь аьршарин Адашди Чав дупна: Иса Месигьдихъ хъугърур зат йик1идар, гъач1ишра Исаси ч1иви хьиди, яна женнетдиъ ахъди, хъа хътругърур, зат хътрубгру ц1игъ ургиди, яна жегьеннемдиъ итди. Магьа Иса Месигьдихъ хъугъну узура ва ичв дадара Дугъаз ккарагунча ва саппа-сагъ гъап1унву. Магьа узуз амрихъан душну аьгъю гъабхьиб, яни йиз абайи узуз биц1иган гъапи гьамцдар гафар к1ваинна гъафнийиз. Магьа Гьамгъаз к1ур гьякь Аллагь – гъач1идар ч1иви Ап1руриз, аьзарлуйир сагъ Ап1руриз, Чав халкь гъап1у инсанарихъанди жан Тувуриз ва миллетарин арайиъ чвйир-чйиринси масанвал Т1ап1руриз, гьацира динарин гьялкьйириккан азадвализ Адаъруриз! Чухсагъул Увуз аьршарин ич Адаш, Бай ва Гирами Рюгь!
       Шадну кудут1найи хтули вари юк1в абц1ну гъапи:
       – Я баб, сарун аьраб гъудгнар мап1ан.
       – Ап1дарза, йиз масан! Кешккинайна узу думуган йиз абайихъ хъебехънийинна! Гьаму ухь’ин илт1ибкьнайи динди гьамциб йигъахъна гъахнийхьу гьа! Яшамиш ибшри азадвал! Яшамиш ишри ихь Агъа Аллагь ва ухьу, Ил’яс! Амин! Увура йип "Амин".
       – Амин! Хъа, я баб, "Амин" фу к1уру гаф ву?
       – Ав, Уву к1урубси ибшри, Рабби, к1уру гаф ву, –  пну бабу макар ап1ури Ил’яс хъана хабаъ т1ау.