Лекьендинни Пеленгдин чамарар Басня

   Датlана чукурунарзавай, вичинни шарагрин уьмуьр давам хьун патал гьекьни каф хьана гьерекатдик квай Лекьен акур Пеленгди лугьуда:
   - Вилера къанихвал ргаз, тlимил кат-галтуг ая.
   Ягьанат жида хьиз галукьай Лекьендин сабур часпаррай акъатна:
   - Кар-кеспи авачирвиляй вуна ар ягъуникди тlеквенра авай кьиферайни витl акъатдач. 
   Жавабдин метлебдин гъавурда акьурдалай кьулухъ, ийир-тийир квахьай Пеленгди, вичин йигинвилихъ инанмиш яз, Лекьендиз вичихъ галаз чамарриз экъечlун тагькимарда.
   - Экъечl майдандал! -  тешвиш хьанач Лекьен.
   Зарб къачур Лекьенни Пеленг руг кьилеллаз катзава. Меслят хьайи пендив агакьнавачиртlани, Пеленг са хейлин мензилдин вилик акатнавай. Кьулухъ вил ягъиз, гъалибчидин хвешивилик кваз, гьуррадал ацалтна, ада Лекьендиз къив гузвай.
   Легьзеярни арадай фенач, къвердавай зарбвал артух жезвай Лекьен гар хьиз фена, пендив агакьна.
   Пеленгдин лаплапар кlватна. Пендив кьван хъфидай жуьрэт амукь тавур ам рук галайнихъ хъфена.   
   Баснядин мана: Са бязи инсанрини вилик эцигнавай са гьихьтин ятlани макьсаддив ва я дережадив гьеле агакь тавунмаз, агакьдатlани чин тийиз, гуя агакьна алатни авунвай хьиз, лайихсуз ва лазимсуз амалар ийида.

04.10.2016