К1АТ1ЛИТ1АР

                КІАТІЛИТІАР


                1
       – Гъулаз, хпир, телевизорар ужу апІрур дуфна кІур, душну гъач пидиза.
       – Йип жилир. Гъарах тяди удучІвну гъягъяйиз. Гьавай, Иовна Саламон, хялижв гъяйиз гьяракат дапIну машинккайихъ йикк убччвай, хъа Деберайи хуларигъян мургул гъядатри.
       Вари хизан алархьну, хялижв гъяйиз хулаъ къайда дебкку ва ипІруб апІуз гьязур гъапІу.
       Магьа лисунра дубхьну хябяхъра шула, амма телевизорар ужу апІрур гъюрадар.
       – Дебера, ихь баяриз масухъди вушра уьл див, хъа гъубччву йикк, хялижв гъяйиз холодильникдиъ ив.
       – Уву кІурубси апІарза, дая, хъа Иовна Саламон хулаъ адар. Дурар уьлерра кудутІну, мярхярра гъадагъну яртуз гъушну.

       Кьандиси хулаз, машназра амкІ идипури Саламон гъюру.
       – Адашди, дая, телевизорар ужу апІрур чпин шагьриз гъушну кІури увукна пуз гьаунзу. Гьамус хьадукра гъюрза кІурайи кІур.

                2
       Хъа йигъан йицІбариккна, гвачІинган чаз гьиву ичІи чай бегелмиш дархьу Иовди, гьамус мугъан кІваин накьдин ляхнар наънан гъахьнин, дадайи дугъаз, душну ихь ***из бижвам ккубз гъапиган, гьерхру:
       – Накь гъубччву йикк набшдиячв?
       – Хъа увура адайна хулаъ, кІатІлитІар дапІну гъитІуб гьапІруб вуйи, –   зарафатлудиси гъапи дадайи.
       – Хъа-ва-адайза! – кІуру гьялак гъахьи Иовди.
       – Гьамгъан паяр нашдияв, Дебера? – дадайи, машниин гьич саб жюрейин инчІра алдарди, Саламондихьинди улиндар дапІну гьерхру.
       – Узуна Деберайи гъитІунча, – гъапи Саламонди, Иовдихьинди гьяйифвал зигруси лигури.
       Гьамци дупну ккудубкІайизра Иов, чан аьхюну гъардшиинна чучч’ин хъжаргъури, курсри, йивури алархьу. Хъа дадайиз хъжагъури: "Думгьа, яв кІатІлитІар гьиврудариз апІин яв бирмишар! Агу лигуза узу му хулаъ фукІара апІуру-у-у-уш!" – му, урчІар-урчІарикан йивну, хул’ан ишури удучІву.
       – Я бай, йирхьудпи классдиъ урхураза кІурава, уву фйир апІурава саб-кьюб кІатІлитІ ккуркьундариз кІури. Уву сач, сабпи апрелди, ичв адаш шагьриан гъюра кІури кучІлар дапІну автобусдин улихьнакьан чпи гьаъган, гъи мурарин увуз гъапІу кучІал ву. Гьеле лиг холодильникдиз, тумгьа гьатушваъ накь учву гъубччву йикк! – гьамци дадайи хянакк мурччваъ ишури учІвнайи Иов ккарцурайи.
       Иовди, дадайи чахьна гьачІабккурайи хил йивну хлурчч тинди гьидипну, зиихъ мурччваъ айи холодильникдихьна душну, абццну лигуру ва чан жандиъ убхьурайи гъизгъинвал ккядябхъну кІваз рягьят гъабхири кІуру:
      – Дурарра, гьаму узуси, чпин кучІлар сабпи апрелдиъ апІуз гьаз гъузундар. Гьамци гучІар ккаъруб вуйин?!
      Вари Иовдиин аьлхъюз хъюгъю.
      Гьамци дугъ’ин "КІатІлитІар"…