Мартиндин т1улар

                МАРТИНДИН ТІУЛАР
 
       Дадайи муртйирра кади, картфарин, уьл кубсрубсиб дапІну, чан бицІидариз гьивну, деъну ипІру устлихъ дитнайи.
       Гъабариъ хизандиз варидариз сабси адабцІнайи.
       БицІину Мартинди, улихьнаси дипІнура ади, гъабраз кьюб муччвур йивну гъиту.
       – Узуз ккундимидарзуз.
       Дугъан гъвалахъ деънайи аьхюну чве Ренейиз гашди амийи ва чан гъаб хъидипІну, Мартиннубдихьинди муччвур гъубху.
       – Мукучан йиз гъабрак! – кІури Ренейин муччвур хъутІубкку Мартиндикан дадайиз хъял гъафи.
      – Хъа я бай, уву ккундариз дупну хътакундайна?
      – Узу йиз закуриз, школайиз гъягъяйиз гъибтурза.
      Устлихъ гъаншариъ деънайи Марсселайин гъян ухьри гъабхьи.
      – Я дая, яв хураг учуз гьаз гьивнийва, гьар чІев гъафиган адабцІнайин увуз дирипІди, беле саб гьяфтайиз гьубкІдийвуз!
      Марсселайин бюгьтнан мяна ачухъ апІури дадайи Мартиндихь саб-кьюб гаф ттатІу.
      – Хъа я бай, хураг гашди гъузуриз ипІуз вуйиб дарин?!
      – Му йиз пай дарин!
      Гъилигу гьялариан, Марсселайихьан Мартиндин му жаваб затра гьял апІуз шлубси дайи.
      – Хъа уву, яв пай вуди, гьитІикІну адагъайин шкаладар сундкьиан итІури шулна?!
      – Ккябяхъ уву! Увуна Ренейи итІрубкьан дарки!
      – Душну, Марссела, гьеле фукьан амиш акъин.

      ...
      – Магьа, дая! Гьатгъу вари дитІну паккетдихъ хъимбудар!
      – Фуж ву мурар гъитІур?
      – Узу дарза, дая, – гъапи Мартинди, дадайи гьерхайизра.
      – Хъа шли гъитІну?
      – Аьгъдариз.
      – Дици вуш мурарикан гьич саризра сабкьан тувидарзачвуз.
      – Мутуван, дая! – Мартин шадну кдутІу.
      – Гьа-а-а, – гъапи Ренейи Мартиндихьинди тІуб дазабгну, – магьа, му вари шкаладар гъитІу сул! Магьа ухьуз аьгъю гъабшиди шли гъитІнуш, – гъапи Марсселара дадара Мартиндихьинди мюгьтал улариинди гъилигу.
      Хъа мидкан асар гъабхьи Мартин, сарун кучидарза кІури, ишуз ттучІву.
      – Жан йиз бай, фици гьигъравуз яв тІулар? Эгер ухьу варди гьамци апІури хъюгъиш, ихь хал-хизан гъубзурин?! Хъа эгер увура яв тІулар дерчиш, ухьу фукьан заан шул? ВаритІанзаанурихьна рукьурийхьа... – гъапи дадайи чан веледарин айитІ, имбубтІан артухъ масанвал ва гьюрмат тІапІу.