Гьяжи мягьямад эфенди

                ГЬЯЖИ–МЯГЬЯМАД–ЭФЕНДИ


       – Кциркъну касиб!
       – Наши? Душман!!!
       – Кциркъну! Кьюкь…!
       – Йиз уларихьан дургин апІин! Рякъюз мигъитан! Уюгъ!
       – Гьа-а-ай уюгъди имийин-н-на!
       – Хулаз дих гъапІунна??? Узу дугъан гьарган кьяляхъди хъайир вуйи-и-ин!!!     Хърибчури!!
       – Кьюкь духьна…
       – Хъана дивандиин дитунна? Узуз рякъяйиз адаъ яв, гардандихъ хъайи хюл!
       – Хюл дардина гъидикькьан рябкъюри имдар…
       – МакІан узуз дидкан… Узу дугъан язухъ зигуз… узу думу йивну гатІабхьуз кІурайир… Йиз дивандилан алдаъ!!!
       – Хъюрхъли айибси рябкъюру…
       – Уву, жан, йиз ужагъ хъюрхълихь ттибтІуз… Пылесос дюбгъну фукьан вахт вуяв…? Кьул дутІну гъябгъюраяв гьа! Вари гьаддин фун’ан адапІури…
       – Чан гьаци дабтІна…
       – Вай-гьарай, вай-гьарай… накь дубччнамиза гьа ккипнайи бархалра…
       – …касиб…
       – Узу рихшанд апІури узуз касиб кІурана? «ДабтІайиз» дарш рякъдайвуз узу фици кюкнаъ вуйиш… Гьамкьан йисари увухъна яв бичарихъ дилихну узуз гъапи гьаму саб кІваъ мани гъабши гаф бадали… аьхиримжи раж ибшри… эдерчуб марцц апІарза…
       – …йиф алабхьну…
       – Узу панзаригъян гъюдучІвайиз йиф алабхьну марцц гъапІунна… хьуз шлу ляхин дар… Ригъ кьялхъянди гьудубчІвуз мигъитан гьа, жилир!
       – Дидиз сарун гьудудубчІвуз мумкин адар…
Хпир гьяракатниинди хулаз гъажаргъу…
Думу гьаци, кьяляхъра утІурччвІу…
       – Жан, жилир, масан, жилир… Жан жилир, масан жилир… … урнарихъ гьапІрайир вува … наана гъягъюз гьязур духьнава… гъач ихь хулаз… узу яв кьяляхъ хъергнайир дарза… дарш, сад йигъ гъядябхъну кІури, гьадгъаз дих апІуз гъярана… минди гъуз, гъузгъун…
       Хпир урнарин чІатинди удучІву, ва, фу лигурва… урнарихъ гюмбет хъа… йифу ккапІну, кьюкь духьна…
       – Кциркъну, касиб… Вайгьарай, жан эллер!!! Узу гьаз гьамкьан писди му аьжуздиинна гьюжум гъапІнийи… Магьа гьамцибу гьа, жилирин ушвниан адахьру гафарихъ ккудубкІайиз хъпебехъувал… Хъа шулдайин-хъа, гьамускьана, му хал авадан хьуз ужурихьан, гъакІну зюрдеригъ гъяди гъахьи Гьяжи-Мягьямад-Эфенди, пуз…