Сулна суна

                СУЛНА СУНА

       …
       –…
       – Хъа я Сул, узу мегьел гъавриъ адарза, ув’ин гьамкьан гизаф ччвурар гьаз алш: СулЭфеди, КавхаСул, СулМягьямад, ГьяжжиСул, СулМалла, ИмамСул, СулШих, Суларин Сул... ва гьамушвхъантина жарадар…
       – Яв, жан Суна, йиз ччвурарихъ фукІара хътарив…
       – Яваша, байкІа Сул… извинтІляюсь, ЭфендиСул… шли иливнучв’ин дицдар, инсанарин зегьле гъахру ччвурар?
       – Ту астрафулах, ту астрафулах, ту астрафулах! Зегьле гъахрудар вуйиган  инсанари дурариз гьаци гьюрматарра апІуру гьа!
       – Хъа я СулГьяжи-жан, «астрйир» кІваълан гъярадарив гьа…  уву шубубан, думу ичв фу-вуш  «ту истарханар», гьаз узуз гъивра?
       – Суна-ханум, Ханум-Суна, хъа думу, душман урсарин «извинт-мизвинт» гафаригъ гьаз гъяйив?
       – Гъя пну фу ву-хъа? Яв кІвантІаригъра урсарин папрусна пул гъядарнив?
       – …ари шубубан гьаму узу гъапи гафар текрар гъап1иган, гьярам гафар гьялалназ илтІикІуру.
       – Халкьар аьлхъюз мигъитан, «гьялал», «гьярам» – мурар фйир вуяв?
       – Фйир шул, гьялал – маллайи марцц апІуб, кІуру гаф ву, хъа гьярам – дарапІуб…
       – Яни, СулМалла, фтиин вушра увуз налук иливуз ккунди авуз сарун?
       – Гъаци даруган, учу, Сулар, дюньяйиъ айикьан хьуб миллиард СуланСулар, яшамиш духьну ккундарин?
       – Хъа учуси, учвура лихай, халачи убхай, панзаригъ гъарахай…
       – Рягьятди пул гъадабгъуз шлу шартІар ади, надрыватца хьуз… кІул   либхурадарнив дарш?
       – Хъа, магьа, увура СулМягьямад, урус гаф гъапиди…
       – Учхьан, узу зиихъ гъапиганси, гьярамдикан гьялал апІуз шлуган, учхьантина гьудубчІвурайиб, удубчІвурайибра кмиди – вари гьялал ву…
       – Тфу кфир…, ИмамСул, вуш гьаддиз ичв удубчІвуб бицІи Сулариз масу туврачва… Чпин ипІурира шулу гьа…
       – ДирипІуз, Суна, дирипІуз чара адар, дурарра танхлихьна дуфну ккундарин, дурарира алифба дудубгъну ккундарин, дурарикра «гьялална-гьярам» тІилисим капІну ккундарин…
       – Хъа я, СулШих, учву халкьар алдатмиш гьаз апІури шулчва?
       – Хъа я, Суна, гьапІри яшамиш хьуча? Учу ич сул халкьдиз ккуниб апІрударуча… Дурариз даккниб фукІара апІдарча я апІуз ккадарча.
       – Хъа узу, халкь дарин?
       – Ваъ, Суна, инсанарикан, сулхалкь фила гъабхьиб ву? Арда ИНСАН мутІи шулин, дугъаз гьякьваликан аьгъюган! Эгер думу ИНСАН вуш исина ктучІвурин суларигъна, зина дурушди ЗАВАРИНУРИХЬНА!
       – Магьа увузра аьгъяди, СуларинСул, гьякьваликан?
       – Агъячуз, гукІундира ача, хъугъувал адарчуз, ккабхъуб бас апІурайидар вуча, ИНСАНАРИХЬАН тадабгъуз ужуб имдруган, учу чиб-чпи итІури хъюгъдича… Аьхирина аьхир, гьитІибкІуб фу ву, Суна, ич фициб аьхир шулуш увуз ужуйи аьгъявуз… Ичв АЬХЮР заансина учву гъахуз гьамус багарихьди гъиди, хъа ич аьхюрин – КАВХАСУЛАН руг-мугкьан имдар. Бахтаврар!
       – Учвура учуси бахтаврар йихьай…
       – Учуз ккапІнайи гучІ’валихьан гьиливурайидар вуча, бютюм вари дюнья… гьякьвалин рюгь адарчуз, учу зиълан малайикарси рякъюра кІури, ичв АЬХЮРИ гъаписи, айитІишвар варидарин дутІнайич, нефс ужуб дарич, бахилвали сикинди гъитрадарчу, къурзлувал айтІан удубчІвдарич, мураригъ гъяхъюр, мурари сагъди гъюдучІвуз гъитдар, гьюкуматдин гьюкумра, къушумра, полицияра, феэсбера гьамрарин хилиъ…
–…
      

       Йиз уьмур чахъ либхуз гъитра...
       Йиз пай тадабгъури чануб артухъ ап1ура...
       Ич1и юк1в хьади му дюньяйиз гъюраза...
       Ич1ибдиъ абхьну хъархъас кьяляхъ гьаъразу...
       Эй инсанар, фикир ап1инай учвкан гьап1раш...