Жвув уьрхюз чара ап1инай!

                ЖВУВ УЬРХЮЗ ЧАРА АПІИНАЙ!

       Гьюрматлу табасаран агьлар!
       Узхьан, узуз гъеебхьубдикан ва аьгъю гъапІубдикан, учвуз хабар деребккди гъузуз хьибдарзухьан. Фицики, му узуз пуз ккунди айи гафарна ляхнар, бицІи ляхнар дар! Дурар саб герендизтІан дарди дар, ясана, жара китабарси, узкан ктагъдар дариз, я, кІваъ саб фу-вуш ади, шли-вуш хъаъну я алаъну, дикІурадарза.
       Ккундушра-ккундаршра, учвуз, ичв аьхюдар ачвуз ва гьадрари кІуруб апІурайидар вучва. Дюз вушра-даршра, учвуз дерккнайи аьдтар хъаърайидар вучва. Ичв разивалиинди-ниразивалиинди, учвухьди, шлиз вая фтиз вуш, икрам апІруз гъитри ачвухьди… УчвутІан узу лап асккан, бицІи адми вуза ва, узу учву апІурайидарстар апІуз лайикь вудикьана гьисаб апІурадарза, гьаз гъапиш, йиз фагьмихьан дицдар аннамиш апІуз шуладариз. Хъа аннамиш гъапІуб, магьа, учвуз ебхьай!
       Ухьу вари фагьумлу адмийир вухьа, сацІиб фикир апІухьа: дюньяйилан ухьу фу дупну ва фу дапІну гъягъюз ккахьа? Гъушдар, наади «итди»: жегьеннемдизди дарш женнетдизди?!
       Ухьу гьарсари, саб метлебнахъна хъуркьуз, зурба чарйир зигури шулхьа – хулар дивуз, бализ швушв хуз, риш швуваз хъауз, ужуб гъуллугъ ккубкьуз…. – вари терефар агури шулхьа, айтІанзина ахтармиш апІури шулхьа, гизаф дучІвубкьну, хъа гьял апІури шулхьа….
       Мурар гьаргандиз вуйи ляхнар вуйинхъа? Ухьу, гьаму цІиб вахтназ вуйибдихъан гьамкьан аьзиятарна жафйир зигураш, хъа ухьуз гьаз ккундар гьаммишандиз вуйи метлебнахъ хъуркьуз?! Гьаргандиз вуйи уж’вал абгуз?!
Гьаргандиз вуйи уж’вал фу ву – женнет! Ухьу мидихъ гьаз аьзабна-аьзият зигурадар?! Гьаз гъапиш Женнет ухьуз фу вуш аьгъдархьуз ва дидкан адмийириз ктибтуз, иблисди гъитрадар, фицики душвайишв, инсанар уьрхру Заанурин хал ву. Хъа жегьеннем? – му иблисдин хал ву, ва дидкан гьаммишан ктибтура ва гьарсарин ушвниин ал.
        Ухьуз варидариз аьгъяхьуз: гьарсарин урчІарихъ аьжал ккилибгура! Хъа ухьуз саризра гьаз аьгъдар, ихь урчІарихъ, Чаз дих апІидайкІан кІури, ухьу халкь ГъапІур ва Уьрхрур ухдихъанмина ккилигурайибдикан?! Мидканра халкьдиз ачухъ апІурадар!
        Ухьуз вардиз аьгъяхьуз, гъиямат йигъан, дюньяйин суд апІуз «Иса пайгъамбар» гъюрубдикан. Хъа, Учв, «Иса пайгъамбар», Фуж вуш, ачухъди Дугъкан пуз гъитрадар. Думу, гьацир «пайгъамбар», фуж ву варидюньяйин суд апІуз?
        «Иса, дурариз рякъюри, аьршариз за гъахьну ва дифру Думу дурарихьан ккеркру. Дурар дикъатниинди завариз лигури имиди, дурарин улихьна лизи ккурттар али кьюр жви ачмиш шулу. Дурари гъапну: “Галилей уьлкейин агьлар! Завариз лигури, мушв’ин гьаз дийигъначва? Учвуз, Думу фици аьршариз за гъахьнуш, гъяркъюнчвуз. Ва гьадму Иса, учвуз аьршариз за шули гъяркъиганси, кьяляхъра гъиди”». (Лях.1:9-11)
        Гьеле учву икрам апІрудариннра суд АпІрур, аьжалинра, иблисдинра суд АпІрур ву Думу! Ари, Аллагь Гьацириз кІур.
        СацІиб фикир апІинай: йиз суд АпІруриз икрам дарапІди, сарун шлиз апІуза, эй эллер!? Суд апІрур дайкІана жаза гьадабтІрурра, хил алдабгърурра!
        Гьаз ихь абйири: «Аллагьисан» кІури гъахьну кІурачва? Наънан, ихь халкьдиз, ужубна-харжиб аьгъя кІурачва? Гьаддиз узу, Аллагь Исайин, Суд апІуз гъюру Исайин, йиз гунгьарихъанди ифи удубзу Исайин, Чан ужагъдизди – Женетдизди гъач кІуру Исайин, ва Чав инсаниятдиз дебкку уж’вал кьабул дарапІрудар иблисдихъди жегьеннемдиъ итру Исайин терефкар вуза. Дугъан кьудрат зурба фу!
        Варидюнья арайиз гъабхи Гьадму Аллагьдин, аьсрариан аьсрариз ад ибшри! Амин! Гафназ, Дугъан ччвурарикан саб, «Аминра» ву. Гьаддиз «Амин» пуб’инди гьаци АпІурайирин, гьаци хьузди, ччвур кІваин апІурахьа.
        Учву, Думу Аллагьдин терефкар фици хьуча кІури зат суал тувидарчва, гьаз гъапиш, иблисдиз чан хил’ан учву деетуз ккун хьибдар. Хъа Думу Заанурикан учвуз деебхьну ккундузуз ва гъеебхьнура шулчвуз, гъиямат йигъан Дугъу суд апІруган, «учуз Увкан гъеебхьундарчуз», дарпбан бадали, ясана «Увкан деебхьнайи Рашидли ктибтундарчуз», дупну, уз’инди тІуб алалапІбан бадали, мидкан к1уразачвуз.
        Хъа Думу Заанур агуз ккунириз, Думу дихъиди, хъа Дицир Заанур даккнириз, агурашра дихъидар – дугъан Заанур жарар хьиди. Ари гьадму жара аллагьди гъит учв уьрхри!
        Гьюрматлу улматар, гьюрматлу касар! Ебхьай фу каш «ЦІийи Йикьрар» кІуру Гирами Китабдик: «Эгер уву яв ушвниинди: “Иса Агъа ву”, - кІури, Заанури Думу гъачІидаригъян чІиви гъапІубдихъ, юкІв хъипну хъугъиш, уьрхидиву. Гьарсар, юкІв хъипну хъугъур, Заанурин улихь гьякь хьиди; ушвниинди чан хъугъуваликан ктибтрур уьрхиди. (Рим. 10:9-10) …хъа хътругъуриин гьаммишандиз Заанурин хъял хьибди». (Югьан.3:36)
        «Думу, устйири нигь дапІну ва хъасин мурччван кІулин гъван гъаши Гъван ву. Фицики заварин кІанакк инсанариз тувнайидарикан, ухьуз уьрхювал тувру, сарун жара ччвур ккадар». (Лях. 4:11-12)
        «Гьаммишан Заануриз, Дугъан ччвур рабгъури, ушвниан удучІвурайи тярифнан гъурбнар Исайилантина хидихьа. Уж’вал апІуз ва фук1а гьудрубкІрудариз лазим вуйиб тувуз кІваълан магьарханай – мицдар гъурбнар Заануриз кабалгрудар ву» (Жугьд. 13:15-16)
        Учву саб хъебехъай: «Сифте Гаф айи, Гаф Заанурихь хьайи, Гаф Заанур вуйи. (Югь.1:1)
        Гаф Инсандиз илтІикІуру ва ухьухъди яшамиш шулу. (Югь.1:14)
        Думу, Чав арайиз гъабхи му дюньяйиз гъафну, хъа му дюн’яйиндариз Думу кьабул гъахьундар. Думу жвувандарихьна гъафну, хъа жвувандари Думу гьясбикк гъапІундар. Учв кьабул гъапІдариз ва Чан ччвур дибисну хъугъдариз Дугъу дурариз Заанурин веледар хьувал багъиш гъапІну. Дурар инсанарин ниятариинди, ясана адмийириз ккун гъабшиган бабакан шлудар дар. Думу веледар Заанурихьан ву». (Югь.1:10-13)
        Магьа гъуз уву, Заануриз: «йиз багъри Адаш» дарпиди! Гьаддиз Думу ”Адашра…“ ву!
        Сарун сацІибтІан имдар улубкьуз къиямат йигъ. Заанур Исайи магьа думу йигъкан фици кІураш:
        «Лигайгьа, шликІа учву алдатмиш дарапІбан бадали, ихтият йихьай. Фицики гизафдар: ”Гьадму узу вуза“ кІури, Йиз ччвурнаккди гъиди ва гизаф халкьар алдатмиш апІиди.
        Учвуз багахь ва ярхла дявйирикан гъеебхьиш, гучІ мапІанай: гьаци дубхьну ккунди айиб ву, хъа гьаци хьувал сабан аьхир вуди хьибдар.
        Халкь халкьдиин ва паччагьлугъ паччагьлугъдиин алархьиди, варишвариъ жилар тІурччвури хьиди, гаш абхъди. Мурар бедбахтваларин, бицІир апІругандин аьзабарси, сифте кІулар ву.
        Ихтиятди гъузай, гьаз гъапиш мажлисариъ жазйир гьадатІидичвуз, мистариъ урччвидичву.
        Узкан шагьидвал апІбан бадали, Узлантина паччгьарин ва гьякимарин улихьна гъахидичву.
        Хъа сабан аьхир гъяйиз вари миллетариз Ужувлан хабар деебхьну ккунду.
Учву суддиз гъухиган, фу кІуруш, дидин гъайгъушнаъ махьанай: гьадму сяаьт учвуз кІуруб, фу тувнади гъабшиш, гьадму йипай – учву кІури хьидичва, хъа Гирами Рюгьну ичв мелзниинди пиди.
        Чвуччву чве йикІуз масу тувди, хъа адашди – бай. Веледари, абйир-бабариз къаршу удучІвну, дурар йихиди.
        Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапІиш, думу дюрхну хьиди.
        Учвуз, Заанур гьясбикк ккадру алчагъвал лайикь дарушваъ шули гъябкъиган (урхурайир, мидин мяна фу вуш, гъаври ахъну ккунду), Ягьудия уьлкейиъ айидар дагълариз гьергри.
        Хъа фуж гъваин алди гъабшиш, улдудучІври ва чан хулаз фукІа гъадабгъуз дурушри.
        Фуж хутІлиъ ади гъашиш, чан палтариз хулаз дурушри.
        Гъагъдиъ айидаринна нанайихъ бицІидар хъайидарин гьадму йигъари гьял пис хьибди! Мици кьюрдну дарибшри пну, ккарагай.
        Гьадму йигъари гьациб бедбахтвал хьибдики, дициб Заанури дюн’я арайиз гъабхихъанмина гьамусдиз гъабхьундар, ва гьамдихъантинара хьибдар!
Ва эгер гьадму йигъар Раббийи кам гъапІундайиш, гьич фужкІара ккадархьидайи. Хъа Чан кадагънайидар бадали Дугъу гьадму йигъар кам гъапІну.
        Эгер учвуз думуган ”Лиг, Месигь гьамшвахь хьа“, вая ”Лиг, гьатушвахь хьа“ гъапиш, мухъугъанай. Гьаз гъапиш кучІлин месигьар ва кучІлин пайгъамбрар ачмиш хьиди. Эгер удукьуруш, гьеле кадагънайидарра чпихъинди илтІикІуз дурари аьламатнан лишнар ва аьжайиб ляхнар улупиди.
        Гьаци вуйиган, ихтиятди гъузай. Узу учвуз вари улубкьруб улихь имиди гъапунзачвуз.
        Хъа гьадму йигъари пис бедбахтваларин кьяляхъ ”Ригъ ктІубшвиди, вазли акв тувидар, завариан хядар ахьди ва завар ккадаршвиди“.
        Гьадмуган дифариинди зурба кьувват ва гьяйбат хъади Инсаниятдин Бай гъюри рякъиди.
        Гьадмуган Дугъу, дюн’яйин юкьбиб терефарихъан жилин саб кІулхъан тап гьатмунуб кІулихъна кадагънайидар уч апІуз малайикар гьаъди.
Инжирин гьархъан мисал гъадабгъай: дидин кюлери кьюкьяр апІруган ва кІажар адашвруган, хьад багахь шулайивал аьгъю шулучвуз. Гьаци учвузра, гьамрар гъяркъган, гьадму вахт, ичв раккнихъ хъайиси, багахь дубхьнайивал аьгъю апІинай.
Заварна жилар ккадахьиди, хъа Йиз гафар дургидар! Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя.
        Гьаци вуйиган, лигай, ккилигури ва гьязурди гъузай. Думу вахт фила улубкьуруш, учвуз аьгъдарчвуз.
        Думу вахт, чан хал ва гьардиз рубкьру ляхин лукІариин гъибтну, хъа гъаравлиз «ул иливну маахан» дупну, гъушу хулан эйсийихь тевуз шулу. Учвура ул иливну мааханай! Учвуз аьгъдарчвуз, аьхир, хулан эйси фила гъюруш: хябяхъган, гьацІишваринган, сяаьт сабди, даттари уьъйир апІруган, даршиш гьиринган. Хабарсузди Думу хъадакну гъафиган, учву даахнади Дугъаз дярякъри гьа! Узу учвуз кІурайиб варидариз кІураза: ул иливну мааханай». (Марк 13:5-37)
        Магьа учвуз, гъиямат йигъ улубкбан лишнарикан Заанури Чан Гирами Китабдиъ улихьмиди дупнайи гафарра гъеерхьунчвуз.
        «Хъа узуз цІийи зав ва цІийи жил гъябкъзуз – кІура Югьанди Гирами Китабдиъ. – Гьаз гъапиш сифтейин заварна жилар гьаргандиз гъудургнийи ва гьюлер сарун имдайи.
         Узуз Гирами Шагьур – цІийи Ерусалим гъябкъзуз. Думу завариан Заанурихьан, жилириз ккилигурайи швушвси кабалгну, ис гъабхьнийи.

         Узуз тахтналан кІурайи аьхю дих гъеебхьзуз:
         “Магьа Заанур дуланмиш шлу йишв,
         Думу адмийирихъди сатІиди яшамиш хьиди!
         Дурар Гьадгъан халкьди хьиди!
         Ва Заанур гьадрарихъди хьиди ва гьадрариз Думу Заанур хьиди.
         Дугъу дурарин уларилан гьарсаб нивгъ марцц апІиди.
         Аьжал сарун хьибдар,
         сарун дердер, ишлар, иццрушнар хьидар,
         гьаз гъапиш муганайиздинуб вари гьаргандиз гъубшну”.

        Тахтниин Деънайири гъапи:
        ”Лиг, Узу вари цІийиб арайиз хураза!“
        Хъа гъапи:
        “БикІ, му гафар вари гьякь ва дугъри ву”.
Дугъу гъапизуз:
        ”Тамам гъабхьну! Узу – Альфа ва Омега, Эвел ва Аьхир вуза. Гъах духьнайириз уьмрин булагъдиккан Узу чІанади шид убхъуз гъитдиза. Гъалиб гъахьириз Узхьан гьаму вари ирсди рубкьиди. Гьацириз Узу Заанур хьидиза, хъа думу Узуз бай хьиди. Хъа гучІбяхярин, масу туврударин, намуссузарин, йивну йихрударин, кьяппйирин, фалчйирин, идолариз икрам апІрударин ва вари кучІляхярин йишв цІииндина гугутдиинди убгурайи дагар ву. Му кьюбпи аьжал ву“. (Ачмиш 21:1-8)
        “Магьа, Узу багарихьди гъидиза! Ва гьардиз, чав гъапІу ляхнариз дилигну, тувру Йиз кьимат Узухьди хьазухь. Узу вуза Альфа ва Омега, Сарпир ва КкудубкІрур, Эвел ва Аьхир”.
       Хушбахтаврар ву чпин палтар урччурайидар! Дурариз уьмрин гьарихьна ихтияр а, дурарихьан Шагьриъ урнарианмина учІвуз шулу. Амма ***ир, фалчйир, кьяппйир, йивну йихрудар, идолариз икрам апІрудар, кучІал ккунидар ва думу арайиз хрудар вари Шагьрин чІатинди гъузди.
        ”Узу, Исайи, учвуз гьаму шагьидвал тувну, жямяаьтарин улихь ктибтуз Йиз малайик гьаунза. Узу вуза Давудрин Ччив ва Кюл. Узу вуза гвачІиндин аку Хяд“.
        Рюгьнура ва швушвура кІура: гъач!
        Хъпехъурайирира гъит, йипри: гъач!
        Дахаргнайирра: гъит гъюри!
        Шлиз ккундуш, гъит, уьмрин шид чІанади гъадабгъри!
        Гьаму китабдин пайгъамбарвалин гафар ерхьурайидариз узу улихьмиди кІураза: эгер шли гьаму гафариин фукІа-мукІа иливиш, дугъ’ин Заанурира гьаму китабдиъ ктитурайи бедбахтвалар иливиди; хъа эгер шли гьаму пайгъамбарвалин китабдикан фукІа-мукІа ктабгъиш, гьаму китабдиъ ктитурайи уьмрин гьаркан ва Гирами Шагьрикан Заанури дугъан пай ктабгъиди.
        Шли гьамдикан шагьидвал апІураш, Дугъу кІура:
        “Ав, Узу багарихьди гъидиза!”
        Ав гьаци ибшри, гъач, Агъа Иса!
        Агъа Исайин уж’вал варидариз ибшри!» (Ачмиш 22:12-21)

       Инсан динди уьрхидар! Инсан, инсаниятдихъанди Чан ифи удубзу, варидюньяйин       суд АпІрури уьрхиди! Амин!
       Жвув уьрхюз чара апІинай, эй эллер!
------------