Президентдин пишкеш

    Назим духтурдиз и югъ гзаф четинди хьанвай.Пуд операция авунвай, ибурукай эхиримжиди тамам кьуд сятина давам хьана. Четин ва яргъалди давам жедай операцияр Назим духтурдиз вичи хирургвал авур 25 йисан къене вишералди хьанай.Адаз садрани азиятрихъайни к1валахда четинвилерикай кич1е хьайиди туш. Гьамиша к1уфал милайим хъвер алай, начагъбур неинки вичн къизилдин гъилералди, гьак1 хуш келимайралдини сагъар хъийизвай Назим духтур адан куьмек к1анзавайбуруз панагь тир. Гьар са начагъда,  "яраб операция Назим духтурди ийидат1а?" лугьуз, ялвардай.

    Ингье, къенин юкъузни ада галатун тийижиз зегьмет ч1угуна, пуд касдин уьмуьр яргъи хъувун патай алхишар къазанмишна. " Духтурвал авунай заз гьукуматди мажиб гузва,- фикирдай Назим духтурди,- Амма духтурвал ийизвай касди са вичин пешекарвилин кьин кьилиз акъудзавач, ада гьак1ни суваб патал инсанриз куьмек гузва."
    Гьелбетда, чпин багърийриз чара акур духтурриз инсанри садакьа яз пишкешар, савкьватар, гьатта пуларни гуда, амма Назим духтурди пул садавайни къачунач. Савкьватрикай лагьайт1а, бязи вахтара абур кьабул тавунни гунагь жеда. Са сеферда зулун мишекъат юкъуз больницадиз гьарайдал алаз 10-12.йиса авай гада гъана.Адан диде-бубадиз дуьнья мич1и хьанвай, иллаки бубадивай вичиз сабур гуз жезвачир.Мет-кьил гатазвай ам духтурдивайни секинариз жезвачир. Тади гьалда операция авун герек тир. Са сятинилай хьиз коридордиз операция авуна куьтягьна экъеч1ай Назим духтурдин вилик аялдин буба акъатна." Секин хьухь, ви гада хъсан гьалда ава, ам исятда палатадиз хкида,-лагьана Назим духтурди,- анжах ам ксурай, инжикили ийимир".идалай кьулухъ сагъ хъхьана к1вализ хъфей гададин буба са юкъуз са гьерни гваз Назим духтурдин к1вализ акъатна. Сифтедай Назим духтурдиз хъел атана, ада атайдаз вичн гьаятдай экъеч1ун буйругъна, Амма гададин бубади мадни к1евивал ийизвай: " Я стха,вуна зав зи кьин ч1уриз тазвани? За, гада сагъ-саламат хъхьайт1а, кьве гьер садакьа кьунвай, са гьер за п1ирел тухвана пайна, муькуьди ваз пишкешун хиве кьунай.За ваз " Волга " машин гъанвач хьи. Тавакъуйда, зав кьин ч1уриз тамир. Зун хуьруьнвийрин чина уьзуькъара жеда."


    И гафариз яб гайи Назим духтурди лагьана: "Сад лагьайди, ахьтин кьин кьуна к1андачир, мад гила вучда кьван, зун себеб яз вакай кьур кьин ч1урай кас тахьуй. Яхъ, тук1ук1 кван а "пишкеш".

    Назим духтур, вичин юлдашди чими хъувур хуьрек т1уьна,дивандал къаткана.Анжах къаткайла, адан беденди юргъунвал гьиссна, зарафат туш хьи вад-ругуд сятина операцияр авурдалай кьулухъ мад са операция хъувун.Яшари гила чпикай хабар гузва.Са легьзеда ял ягъунни хьуй, телевизордизни килигун хьуй лагьана. ам дивандал къулайдаказ секин хьана.

    Бирдан цлан сятини нянин 10 хьана лугьуз зенг яна, гьа и арада телефондини денг авуна. Мад больницадай тади гьалда ша лагьана хабарна.Ахвар тахьай йифер, рик1из к1андайвал ацукьиз тахьай межлисар, мехъерар, тамамариз тахьай хсуси к1валахар... Абур гьикьван хьана, гь икьван мад хъжеда! Назим духтур мад больницадиз рекье гьатна.Адан уьмуьрдин юлдашни ихьтин вакъиайрив фадлай вердиш хьанвай.

    Операция ийизвай столдал пиянзавай ва вичин руфуниз чук1ул сухнавай 30-35 йисан яшда авай жегьил итим къаткурнавай. Адаз раб янавай ва вич вичел алачир.Назим духтурди вичин куьмекчиярни галаз операция башламишна.Бирдан къатканвайда чапла гъил винелди хкажна, адан гъил, гьелбетда, медсестра Ханума кьуна. Ханум жегьилдин гъилел алай сятиниз килигиз амукьна.Назим духтурни сятиниз килигзавай.Патав гвай Али духтурди гьасятда гъиликай сят галудна ва ам сятинин далу патаз килигна. Анал кхьенвай:"Мирзоеву Н.М. От президента РФ".Духтурар гагь чеб-чпиз, гагь Назим духтурдиз килигиз хьана.Вичиз исятда суалар гун тавуй лагьана, Назим духтурди операция давамарунин буйругъ гана.

    Пуд сятда давам хьайи операция куьтягьна, жегьил итимдин уьмуьр къурхулувиликай хкатайла, духтурар ял ядай к1вализ экъеч1на,ина абур,адет яз,операциядикай рахадай, амма и сеферда ак1 хьанач.

    Абур вири назим духтурдиз ва солдал алай эцигнавай къизилдин сятиниз килигзаай.Виридаз и сят Назим духтурдиз Президентди чеченрин бандитри Дагъустандал гьужумайла ада дяве физвай чкайра вичин духтурвилин буржи намуслувилелди кьилиз акъудунай гайиди чизвай.А вахтунда Назим духтурдикай газетриз макъалаярни акъатнай. Амма гила а сят масадан гъилихъ галай...

    Назим духтурдин чинай адаз и месэладин патахъай лугьун четинзавайди аквазвай. Хъелни ажугъ акатнавай адан чин садазни икьван гагьди акурди тушир, я ада вич санал к1валахзавайбуруз ихьтин саягъда аваз къалурайдини тушир.Адан вилерикай са варз идалай вилик вич йифиз операция авурдалай кьулухъ к1вализ хъфизвай вахт карагна.Куьчеяр баябан тир,вацран мич1ери чилел агъавалзавай.Инлай анлай кузвай лампочкайрини куьчейриз тамамвилелди экв гузвачир.Назим духтурди к1вализ тади ийизвай.Ангье ат1а цлан пип1елай элкъвейла,адан куьче башламиш жеда.Амма цлан пип1ехъ элкъвей Назим духтурдин хурудал са ни ят1ани чук1ул эцигна ва пул акъудун буйругъна."Пул гвач" лагьайла, сят алудун эмирна.Назим духтурдиз и сят багьа тир.Къизилдинди я лагьана ваъ, пишкеш тирвиляй.Вични президентдин пишкеш.Уьлкведа шумуд касдин гъилихъ гала ихьтин сят! Амма хурудал чук1ул эцигнавай пиян угърашдихъ галаз гьуьжетиз жедани? Адан рик1е вуч ават1а, вич вуж ят1а низ чида? Йифен угъри, сят алудна, мич1и кучедай катна.

    Назим духтурди виридаз сят квахьна лагьанай.Ингье, гила ам жагъанва.садазни  сят и касдиз гьинай ят1а чизвач.Вичин хурудал чук1ул эцигна сят къакъудай алчах ада исятда ажалдикай хкудна. Гьа вич хьтин са алчахди руфунар какадарнавай ам рекьидай,эгер Назим духтур хьаначирт1а.Садан гъиле чук1ул ава-тарашун патал,муькуьдан гъиле чук1ул ава-уьмуьр хгун патал.Назим духтурдин гъиле авай чук1улди уьмуьр давамарзава,ам зурзазвач, ада уьмуьр - к1ант1а алчахдин хьуй-кьат1нач.

    Назим духтурди и кар  садазни ашкара авуначир, гена ада сят а касдин гъилихъ акал хъувун т1алабна."Белки а касдиз рекье-хуьле аватнаваз жагъана жеди.Сятинин далу патаз ам килиг тавунни мумкин я",-секинарна абур,Назим духтур к1вачел къарагъна.

    Кьве йикъалай операция авунвай итим палатадиз хкана. адан гьал хъса жезвай.Назим духтурдини адан гуьгьуьл кьазвай, са вад-ц1уд йикъалай ам лап сагъ хъжедайди лугьузвай. Анжах медсестра Ханумаз и кас вучиз ят1ани так1ан тир.адавай сак1ани и касдин гъилихъ Назим духтурдин сят галаз эхи жезвачир. Эхирни Ханума лагьана:"Ваз ихьтин багьа сят гьинай я,чан хва?" Туьквендай къачурди я лагьайла,Ханума,вичин гададизни къизилдин сят к1анзавай лагьана,адавай килигиз сят къачуна.Ам гьасятда далу патаз килигна ва ада к1евиз гьарайна: "Я къабандин хва, и сят вун исятда кьиникай хкудай Назим духтурдинди я хьи! Ам ваз гьик1 гьатна?"

Кравутдал къатканвайдан кьил винелди хкаж хьана ва гьа хкаж хьайи саягъда хъуьцуьгандал ават хъувуна.Адан ч1ал кьунвай, чина ст1ал иви амачир,вилер сифте элкъвейбур хьана,ахпа агаж хьайи кьекьебрай са хъиткьер амукьна. Сив ахъа жез агал жез, ам гьа гила мад чан гузвай гьуьндуьшкадин шарагдиз ухшар тир.Кич1е хьайи Ханум,сят тумбочкадал эцигна, Назим духтурдин гвяниз фена.Тади гьалда атай Назим духтурди секинардай раб яна.са декьикьадилай вич вичел хтай начагъда, кьве гъилини духтурдин гъил кьуна, минетна:"Назим духтур, заз лугьудай гаф жагъизвач (ам сятиниз килигна), зи и гъил ат1ут1".

    Накъвар къвезвай вилер акурла, Назим духтурди лагьана:"Ви гъил ат1ун герек къвезвач, ви рик1е авай ч1уру ният ат1ана к1анда.Ам анжах са вавай жедай  кар я. Гъил лагьайт1а,хъсан кар патал ишлемиша.Инсанар патал,чидайбур, тийижирбур...-Ада,вичин гъилихъ вичин сят акал хъувуна, давамарна:-Жуван гакъисагъ зегьметдалди, намуслувилелди къазанмишай сятни гъилихъ акала".