Бизин сююв айтылса да тенгсизге,
Юлдуз йимик минг асруда бир янгъан
Ошаш геле бугюн Арал денгизге,
Суву битген, амма аты сакълангъан.
Юрек гьалек, тюшген йимик челтирге
Чыкъма къабул бир тебинип тёшюмден…
Бизин сююв мени яргъа гелтирген,
Яратылгъан чыгъып яман тюшюмден.
Ахыр гюнден оьте сенсиз гьар гюнюм,
Тезден тюшген яшав ёлум энишге…
Тек гёз алдан таймай сени сюлдюрюнг,
Парх береген къыбла чыкъгъан гюнешге.
Сагъынч ойлар юрек майын сыдыра,
Язбаш гелген бир-биревге сыр чечген…
Юрек тартып, чыкъдым сени къыдыра,
Булакъ башгъа, увучунгдан сув ичген.
Гьар тамчысы сени эсге салса да,
Юрегиме яллыкъ бермей булакъ сув…
Сув басылтмас гьсиретлик къалса да,
Сувгъа батгъан, сувдай акъгъан баш сююв.
Юрек гьалек!
Юрек гьазир нетме де…
Гёзден буса гёзьяш агъа бурчакълап, --
Сюер эдим бугюн Гюнге етме де ,
Оьлмеге де бугюн сени къучакълап.
Сююв
© Copyright: Герейхан Аджиев, 2016
Свидетельство о публикации №216121301623
Свидетельство о публикации №216121301623
Рецензии