Къар тюбюнде къаркъарасын къаралтып,
Шатман йимик узатагъан чиллени,
Узатаман, яш келпетинг яратып,
Сагъынчлыкъгъа есир этген еллени.
Болма ярай, къара къышда къарагъай
Сагъынадыр япыракъ ачар язбашны…
Ёлда янгыз къалгъаныма къарамай,
Сагъынаман мен де азиз къызъяшны.
Сагъынаман, топуракъ йимик тын къалгъан
Сагъынагъан харчны, сабур сабанны…
Бал сёзлени, гьашыкълыкъдан айтылгъан,
Бой сынмайлы агъымына заманны.
Оьмюр гете аршда учгъан юлдуздай,
Янгыз оьтген йылны йылгъа санаман…
Сени – гюндюз гюнеш болгъан, гече – Ай,
Сагъынаман, сагъынч отда янаман.
Сагъынаман
© Copyright: Герейхан Аджиев, 2016
Свидетельство о публикации №216121301628
Свидетельство о публикации №216121301628
Рецензии