Азамат

(Яшлайын яшавдан гетген юртлум Азамат Гьажиевни эсделлигине)

Сенсиз ерде нече танглар къатажакъ,
Сенсиз гюнлер мунглу гетер, Азамат!
Гелген-гетген алгъыш-дуа айтажакъ,
Къув тёшекли къабурунгда рагьат ят!

Яшавубуз бир Аллагьны къолунда,
Сандыкъларда сакъласанг да санынгны…
Къара ажжал ёлдаш болуп ёлунгда,
Азирейил къыйды яшлай жанынгны…

Татли эди шербет йимик сёзлеринг,
Сукълана эди кёплер боюнг-союнгдан…
Гьасирет эди ата-ананг бийиме,
Язбаш булан этилежек тоюнгда.

Сюйгенингни тайдырмайлы ойлардан,
Къайтып гелдинг йыракъ Тюмень бойлардан,
Тек не амал, гёрюп оьрюн-энишин,
Яшлай батды яшавунгну гюнеши…

Язбаш булан къошулмагъа гереклер,
Борчлу этдинг умутланы бёлмеге…
Бир болгъанча эки сюйген юреклер
Зая эдинг къара ерге гирмеге.

Сени булан башы кёкге тиеген,
Дос-къардашны сенсиз гюню бошады,
Ата-ананг – жандан артыкъ сюеген,
Къанатлары сынгъан къушгъа ошады.

Сенсиз ерде нече танглар къатажакъ,
Сенсиз гюнлер мунглу гетер, Азамат!
Гелген-гетген алгъыш-дуа айтажакъ,
Къув тёшекли къабурунгда рагьат ят!