Сюювню багьасы

Кёп яшагъан не гёрмей,
Тюшмесек де биз тавдан,
Гюнню ахшам гёргендей
Озуп гетдик яшавдан.

Талайсызлар алжайды,
Оразлылар оралды…
Учуз, базар багьадан
Биз сатмагъан не къалды?!

Халкъгъа ортакъ сююв де
Тилимлейин пайлана…
Биздеги терс ойлагъа
Ичим-баврум айлана.

Юрекдеги гьислени
Болгъан йимик бир гьазы,
Намус тезден сатылгъан,
Сюювню бар багьасы.

Сююп чет ёллар булан
Юреклеге етмеге,
Гьазирлер кёп негер де
Сюювню тенг этмеге.

Шолай бош хабарлагъа
Тюшсе де кёп тынглама,
Англамагъа сюймеймен,
Мен болмайман англама:
Неге сююв тенг бола,
Гюнешге сом алтындай –
Гече бизин къалкъыны
Безей буса алтын Ай?!

Сююв сув тюгюл, ону
Тапсакъ да булакъбашда –
Сув агъып гете, сувдай
Аччы бола гёзьяш да.

Сююв шагьра ёл тюгюл –
Ёл бола аркъа-торкъа…
О бал деп де айтмайман,
Адам балдан да ялкъа.

Кёкдеги юлдузланы
Артдырса бир юз мингге,
Балики, етишежек
Сююв булан бир тенге.

Денгиз терендир, бизин
Сююв нечесе керен
Сувтюп гемелер батгъан
Океанлардан терен.

Узун Кааба ёлдан да,
Оьлчемеге генги ёкъ,
Биздеги баш сюювню
Тенглешдирме тенги ёкъ.

Сувугъун сонггъа къоюп,
Къатты болуп буз йимик,
Сюювюбюз яшавгъа
Татыв берген сув йимик.

Эмли атир ийисли
Чечек болуп гюл бавда,
Сююв булан насибим
Тапгъанман мен яшавда.

Шо сюювню беклигин
Сезме сюйсенг, ювугъум,
Гюнде гююп де къара,
Бил чиллени сувугъун!

Сюювню оьр энишин
(Къайнаса да къазанда)
Герти сююп билмейген
Англамас шо заман да!

Сююв тенгсиз, отун да
Тюшдю кёп-кёп гюйме де…
Яшамакъ не, гьавайын
Болмай бусакъ сюйме де…