Уьмур фу вуш, дубгъ

УЬМУР ФУ ВУШ, ДУБГЪ

Дюньяйиин варит1ан успагьи ва багьа уьлке,
гъарзариан удубч1вну, завузди, Кьилзи гьюлиланзина  гъябгъюрайи Ярдан нир айи,
ригъди дургнайи дагълар-тепйирикан ягъли яркврарна-багъар дап1найи,
дерйир-дюзенйирикан бистнарна-бахчйир арайиз духнайи
жвуван бабан багъри ватан Израиль, дарин!

Дюньяйиин варит1ан успагьи ва багьа шагьур,
дегь-заманйирианмина чпин аллагьариз биц1идар урккури гъахьи тепйирин али,
гьар тепейиккан булагъар ккудуч1вурайи гъярар хъайи,
аьрабарин уьж аллагьарихьан Давидди тадабгъну
жвуван Раббийин ччвур заан гъап1у Ерушалайм шагьур, дарин!

Дюньяйиин варит1ан успагьи ва багьа Хал,
Авраамди чан Исаак байра урккуз хъюгъю Мориа тепейиин  али,
Шломойи (Сулейманди) тикмиш гъап1у Дарамат дарин!
Аллагьариз икрам ап1рудари думу Дарамат дарабгъну,
гьамус дурари душв’ин чпин аллагьдиз лишнар дивнадарин…

Завариан улупуб тина ап1ури, гъап1уб ккидипури,
харжибдихъди дяви гъабхурача к1ури, имбубт1ан харжи ап1ури,
вари дюнья алдатмиш ап1ури, ужуб чпин диндин ликрихъ хъибт1ри,
инсандин яшайишдиз фук1а харж дарап1ди, халкьдин пуликан кефер ктагъури,
девлетлуйирихъди девлету дубхьнайи дин филадиз гъубзур к1урачва?   

Бабкан шула инсан, хъа йик1уз гъитра,  дугъкан шейъ дап1ну.
Бабкан шула инсан, эйси вуди, хъа йик1уз гъитра, лук1 кадаъну.
Бабкан шула инсан, чав шуз Гъитурихъди улхуз к1ури, хъа йик1уз гъитра думу, диндин гъуллугъчйирин ва чпи арайиз гъахи аллагьдин тямягьяр ац1ри.

Я инсан, гьаз хъугърава динарихъ?
Иблис гьюкумра, усрарин кешушра, аьрабарин шариаьтра, мусурмнарин маллара сат1иди саб гъаб’ан ип1урайидар ву –
увхьан, алдатмиш дап1ну, гъибисубдиинди дурари ув’ин агъавал ап1ура,
чпин ниятар яв мелзнахьди пуз гъитра,
яв хилариинди увусир йивну йик1ура… –
му гьаз убшрадарив, я инсан, яв к1ваъ…      

Гъуздива инсан му гьялкьяйиъ к1ул ивну, уву, инсанси, бабкан Гъахир, жилариинна гъяйиз.
Хъа гьадмуган рябкъидивуз, инсандин хил ктарди, завариан гъафи:
варит1ан успагьи ва багьа Уьлке – Адашдин Паччаллугъ;
варит1ан успагьи ва багьа Шагьур – Ц1ийи Ерушалайм;
варит1ан успагьи ва багьа Хал – Гирамишван Гирами йишв.
Ари гьаму ву женнет – РАББИ Иешуа Машиахдихъди гьаммишан хьуб яшамиш.