Беш бетер дубхьнайи дюнья

БЕШ–БЕТЕР ДУБХЬНАЙИ ДЮНЬЯ

Я инсан, аьгъяйвуз му дюньяйин ляхнарикан?
Я инсан, аьгъяйвуз му дюньяйиъ уву гьап1раш?
Наанди гъилигишра улариз рябкъруб ву писвал!
Фунуб гьюкмихъ хъпехъишра ебхьруб ву инсан даккнивал!
Инсанарин арайиъ дийигъну хъпехъиш, улхуб шулу кефер ктагъбакан.
Мистаринна кавхйирин улхбар ву тмунур даккун ап1бакан,
чпин хил ктарди «кяфирин» ифи удубзбакан...

***

Гьюкумна дин саб духьна.
Сабди-сабдин йишв ккабалгура.
Гьюкмиз даккниб динди ап1дар.
Диндиз даккниб гьюкми ап1дар.

***
 
Динди инсан, мулах дап1ну, хюниси ккитра.
Гьюкми инсан, гуч1 тувну, улчвухура...
Ухдихъанмина мициб аьлакьайиз к1урайиб ву Вавилон.
Дарди хьуз дюнья дибисна ифи удубзру сар аллагьди
ва
дюнья дибисна кьяппавал ипрайи сарсана аллагьди.
Хъа инсанариз гъубзрайиб: думу аллагьарин адрац1ру тямягьяр гьурк1уб:
фициб жюрейиинди вушра сар-сарин ифи удубзуб
ва
сар-сарихъди, ап1ури куч1ларна алдатмиш, кьяппавал ап1уб...

***

Гьамци дюнья илт1ибк1на лук1аризна амрариз ва маллйиризна кавхйириз.
Филадизкьан аьгь ап1иди мициб саягъ Заанури?
Гьаддиз Дугъу ктагъну жугьдар инсаниятдиз Чан ният рабгъуз.
Гьаддиз Дугъан терефкрар къаршу удуч1вна аллагьариз.
Гьаддиз Заанур гъафну жилиина масанвал хьади.
Гьаддиз Дугъу дебккну саб хизан: жилир, хпир, веледар;
Аба, баб, ширинвал,
Инсанарин арайиъ ккунивал…

***

Хъа диналлагьди гьап1ра: тму кяфир ву, ап1инай даккун, йивну йик1ай, илипай налук…
Хъа гьюкумаллагьди гьап1ра: тму къаршу ву ихь аьдтариз, терг ап1инай думу, ясана кадаай дугъкан лук1…
Жвув инсан вуди гьибгъру, хъа жара кас душманси рябкъру диндира гьюкмира гъи
агъавал ап1уз ув’ин, инсан, гьаз гъитрава уву?

***

Гъач, кидикь учук, дициб  кфирвализ ва хявишназ къаршу вуйи Заанурин нур хьузди, 
Заанури ктагъдаригъди жвувра жугьуд хьузди,
фицики Жугьуд хьиди му дюньяйин думу Йигъан суд Ап1рур,

Гьадму Машиахди, суд ап1иди диндинра, гьюкминра ва вари аллагьаринра…

***

Аьгъю йибхь, инсан, увкан му дюньяйи гьап1раш!
Уву ккунди дин яв гъайгъушнаъ а к1урайва?
Уву дидиз гьякь гъапибси илт1ик1идиву кяфириз,
ва увкан,
ц1иц1иб-ц1иц1ибди гъубхъубдикан гьудрубк1ди,
гьамус диди ккун ап1иди яв ифи вари сат1лан…