Жилин масанвал

ЖИЛИН МАСАНВАЛ

Хябяхъдихъна гъубгъу мархьлин
марццишну
чрушниин
рангар алауру
беневша.
ЧІяппряхярин
цІив-цІив чІветІери,
пархар апІури хлинццари,
шуру чарчар ктІурччвурайиси
мархьли кьяши гъапІу,
кІюлгъниъ эрхнайи,
жини сир уьбхюрайи
узхьан,
чІатинди удучІвнайирихьан,
фужкІа хъугъужвнамиш
булагъдихъ,
миж кади,
кІваин дубхьну ич мясляаьт
гюрюшмиш‘вализ гъюру.
Амма...
Латаъ дугъубжвнайи гюзгдиан
кьюб кІул гъяркъюнзуз:
саб – арсран рангари дабшнайиб
беневша жил ккади,
жил рибшвури –
кІулар архаинди,
жили лепйир хъаъри –
кІулар дифарик.
Аьламат!
ЯкьинтІан гъи гюрюшмиш‘вализ дуфнайкІан
булагъдихъна
узухьна
йиз мюгьюббат?!
Амма...
арсран кІул
йиз цІуху кушар вуйи.
Гъизилин кІул
гергми вазлин ухшар вуйи,
штун зиин
чиб-чпихъди гюрюшмиш духьнайи.
ВуйиштІан
жини сир
жили мюгьюббатди
уьбхюрайи
цІив-цІивар апІурашра
хябяхъдин мархьлин
беневша чрушнахь,
ачухъ вуйиб
арсразна
гъизилизна
беневшайиз
му жилин
мюгьюббатнахь...