КЬАБИ БАГЪДИЪ
Кьаби багъдиъ
жигьил шулза,
кьаби багъра –
жигьил
назук ччивар
ихтиятди
пейин хъабхьну
ккеркру
думу вахтар
кІваин хури,
кІашар дарши хилари
кІару руг рибгъури.
Кьаби багъдиъ
жигьил вуза,
Адашдин табшуругъар,
цирклар ришвруган
кІваин алаурайиси
цІицІрикІари:
– Багъ ухди кьаби шлуб ву даршиш гъайгъу.
Жвув кьаби ишри
Табшуругъар тамам апІури,
багъ дарибшри,
наслариз мейва хури.
Кьаби багъдиъ
узура
рябкъюр-рябкъюри кьаби шулаза
Адашдин табшуругъ
рябкъюрайиган тамам дарапІди,
гьапІну кІваълан.
Гъян
кьаби дубхьнайиз
жан – жигьил!
Жигьил жан кьаби гъабхьниз
юкІв архаинди имиди!
Багъра кьаби гъабхьну
жигьилдимиди,
кагьалвалиинди,
кюгьне тІалабарин
гъавриъ ахъуз даккнивалиинди.
Кьаби багъдиъ
кьаби жан
дийибгънайиз жигьилди,
фикрарик...
кІару руг тІибшури
кІашар али хилари…
Кьаби багъдиъ
© Copyright: Рашид Азизов, 2017
Свидетельство о публикации №217040501735
Свидетельство о публикации №217040501735
Рецензии