ГЬАЦІИШВАРИН КЬЯЛЯХЪ
Гьудгьудйирин,
тІипарин,
я никьаригъян дар му сесер
кІван гьевес бисру
гьацІишварин кьяляхъ
йиз ибарихъна хътІархьру,
нивкІ адарди,
хядар ктухуз
жилин гъваинна ахъин,
сусгиин деъну,
сарин кагъаз дарфиди,
гъамлуди,
удучІвнайириз.
Йиз гъян‘ан адахьурайиси
ерхьуразуз дурар,
амма дар,
я – дифаригъян,
зина
гьараригъ гъярснайиси.
Хядаригъян
йиз хяд гъабг’ган,
фикир фагьмихъна гъафиган,
язухъ шлу сесер
аьгъю гъахьизуз
ишлар-ккарагбар вуйиб
ич бабан,
заан хул‘ан
апІурайидар
гьацІишварин кьяляхъ,
кьяляхъ дарфи
ич абайикан дявдиан.
Хъа йизра – гъамар!
Гъамар – гьацІишварин кьяляхъ,
кагъзиз жаваб дарфиди,
гъапІну кІури кьан!
Гъамар-дердер
шулушра гьамцдар ишри!
Бабансдар
гьич саризра даришри!
...
ГьацІишварин кьяляхъ
зав рабгури шулу
дерник кайи уьлерси,
хядарихьди
аржлариинди
узу али дюн‘яйиз.
Му дюн‘яйинтІан
зав рабгури шулдар
бабси.
Гьац ишварин кьяляхъ
© Copyright: Рашид Азизов, 2017
Свидетельство о публикации №217040501891
Свидетельство о публикации №217040501891
Рецензии