Сабиран бармак

Хуьруьн кимел акъвазна са к1ерет1 гадайри ихтилатар ийизвай. Са герендилай, хуьруьн школа галай патахъай, ч1ехи классра «военное дело» тарс тухузвай муаллим, Назир акъатна. Адан къуьнихъ гъвеч1и калибрадин винтовка галай. Винтовка, ч1ехи классра к1елзавай аялриз тарсара ам ишлемишдай ва адахъ гелкъведай жуьре чирун патал, военный кабинетда хуьзвайди тир. Назира ва адан къуьнихъ галай винтовкади итимрин фикир чпел желбна. Итимрин арадай, са еке руфун квай ва кьакьан буйдин жегьил гада Сабира, Назирахъ элкъвена, ягьанат кваз лагьана: Назир, вакай гъуьрчехъан хьанва тахьуй гьа! Тахьайт1а вунани а хабаррик квай тапан гъуьрчехъанди хьиз базардай къачур къуьр таракай куьрсарна, ви «къумпарадай» ягъизвани?
И гафар япарихъ галукьай Назиран гуьгьуьлдик са т1имил кьван хкьуна. Ада, вичиз хъел атайди чир тавуна, секин сесиналди лагьана: Ваъ Сабир, зун а вуна лагьай жуьредин къуьрер ягъизвай гъуьрчехъан туш, я зи тфенгни – къумпара туш ваз! Гъазвачт1а жуван бармак эцига а къванцел – Назира гъил туьк1уьрна 40-50 метрдин яргъал алай еке к1алубдин къван къалурна. И гафари Сабир са т1имил явашарна, амма къвалав гвай гадайри ам худда тун патал, адахъ элкъвена лагьана: Сабир, ваз вуч кич1езва, эциг жуван бармак, Назиран тфенгдин гуьлле 20 метрдилай анихъ фидайди туш! Гзаф зарафатарни тамашаяр к1андай Алиди, Назирахъ элкъвена хабар кьуна: ви «къумпарадин» гуьлле бармакдихъ галукь тавурт1а, вуна Сабираз ц1уд манат пул гудани? Назира гъил жибиндиз вегьена, ц1уд манатдин чар акъудна, гадайриз къалурна: Тфенгдин гуьлле бармакдихъ галукь тавурт1а и пул Сабиран жибидиз хъифида! Пул акурла, Сабиран гуьгьуьлар къумбар хьана, ада гьасятда бармак хт1унна къванцел эцигна, элкъвена гадайрин патав хтана.
Назира винтовка къуьняй акъудна, вилик квай Шуькуьр халудин ихтиярдалди тфенгдин луьле адан къуьнел эцигна, Сабиран бармак лишандик кутуна. Итимар вири кис хьана, къванцел эцигнавай бармакдиз килигиз акъвазна. Винтовкадин, са акьван к1еви тушир сесинин гуьгъуьналлаз, Сабиран бармак гьа алай чкадал хкадар хьана, къванцелай чилел аватна. Кимел акъвазнавай гадайрин к1ерет1ди бармак галайвал гьерекатна. Сабира тадиз бармак хкажна, гъил адан къене туна. Адан кьве т1уб, гуьлледи акъудай т1еквендай хъецел акъатна. Адаз а туп1арай Назиран хъуьрезвай шикил акуна. Чинин рангар ат1ай Сабира, вичин къур акъатнавай п1узарралди, явашдиз лагьана: Мад вучда кьван, са ц1уд манат пул къазанмишиз к1анзавай, хьанач…

Гьа и йикъалай кьулухъ инсанри Сабираз, адан аялриз, хтулриз, птулриз,… бармакда к1ац1, яни т1еквен авайбур, лугьуз эгеч1на.

Куьн куь бармакрал мукъаят яни, зи играмибур?