Зарафат

      Августдин эхиримжи йикъара вири хуьрерин школайрай атанвай муаллимар райондин юкьвал алай культурадин кIвале совещаниедиз кIватI хьанвай. Совещаниедин кьилин докладчи райондин центрда яшамиш жезвай, вич чи хуьряй тир, райкомдин кьвед лагьай секретарь, Касбуба Азизханов тир. Докладда райондин образованиеда гьялна кIанзавай месэлайриз гьар жуьредин баянар гана,   ахпа школайрин гьазурвилерикай къейдер авуна. Са гафуналди, доклад са сятдилай гзаф кьван вахтунда кьилиз фена. Докладдин винел веревирдер башламиш жедалди вилик, совещаниеди ара атIана, муаллимриз са   цIуд декьикьа вахт  гана. И арада Касбуба, вичин хуьруьн муаллимрин патав, гьал – кеф хабар кьаз, хуьре гьихьтин хабарар аватIа акваз  атана. Хуьруьн муаллимрин арадай, Ватандин чIехи дяведин ветеран Дадаш муаллим вилик экъечIна ва Касбубадихъ элкъвена лагьана:
- Касбуба вун сагърай, вуна чи хуьруьн школадин тарифар гзаф авуна, чав лап дамахар гутуна. Пуд чкадал вуна чи школадин кIвалах лап рикIивай къейд авуна.
- ГьикIа? Бес Чеперин школадин тIвар кьунвай чка зи рикIел аламач эхир?
- Вун жуван докладдиз са виляй килиг хъувуртIа, ваз аквада: ана пуд чкадал вуна школайрин хъсан кIвалахар  къейд ийидайла лагьана: «…ва масабур», «…ва и жергедай маса школаярни». Гьа «маса», «масабур» лагьай гафарик чи школани акатзавачни мегер?