К1ай даьре коч

                К1ай даьре коч

   Ч1оаг1а сатийна яр ц1аг1а, Хьавас б1аргеш хьадийлача.  «Т1ехьайисай-кх со?» - аьнна, керта чу дера цунна ц1аьхха.
  Шу даьннадар цун дас саг йоалаяь. Ч1оаг1а дезацар Хьавайна даь-сесаго ше 1уйранна сомайоахаш.  «Школе т1ехьаюс хьо», - оалар цо, в1алла «хьаг1атта» аргдацар. Цунна шийца бала боацаш сана хетар Хьавайна.
  «Ер харц да хьа, ер бакъахьа да хьа» алацар цо ц1аккха а. Дика да-кх Хьавайна шийна ховш, малаг1а дика да, малаг1а во да.
   Х1аьта таханарадар моллаг1а ди дацар. «Тахан, тахан, - йоахар Хьавас йижа уллашше, - тахан со яь ди ма дий, вешта цунна фу бала ба, со енна ди дале а».
  «К1ай даьре коч ма ювхадахь…» - дагадера Хьавайна шийна дукхадеза илли. Ч1оаг1а езар Хьавайна из к1ай даьре коч. Мишта хула-м хацар цунна из. Цкъа даь-наьнага хаьттадар цо, мишта хул из, аьнна. Цо мишта хул хьайийцача, кхы а ч1оаг1аг1а езаелар. «Сона-м саго эцаргьяц хьона из», - йоахар цо ший дагахьа.
    Хьава хьаг1еттача, маьнгена юххе латтача г1анда т1а улла цхьа к1ай х1ама б1аргаяйра цунна. Шорттига, сихаг1а яхача вож г1етта д1аяхар кхераш мо, д1ат1айода Хьава г1анда.
   Чехка-чехка деттале долалу Хьавай дог. Г!анахьа сана хетт цунна шийна гур. «К1ай даьре коч, к1ай даьре коч»- йоах цо ше-шийца.
   Даь-нанас йийцар мо хоза яр коч. Из хьабе а елла, г1анда т1а 1охайра Хьава. Шийна гур г1а долаш сана хетар цунна. Ше из бера 1ойиллача, сома а яьнна, коч йоацаш ше йисар кхерар из.
   Иштта из яг1аш, хьачуера даь-сесаг. Ший коч бе а йоалаш, яьг1а Хьава, ура а ийккха, марх1акхийтар даь-сесага.