1аббаса ж1али

                1аббаса ж1али

- Ай, д1адовла цигара! – ше ц1аг1ара аравоалашше а ц1ог1а тохар 1аббаса ший ж1али 1ехадеш воаллача шин к1аьнкага.- Аз из хьахеце, цо в1ашаг1доахаргда шо.
  Уж ши к1аьнк Рашиди Мажити вар. 1аббаса меттел цун ж1алена а к1ордабаьбар уж. Шоаш ишколе мел болхача хана картал дехьа дийхка латтача ж1алена х1ама ца тохаш т1ехбалацар уж.
  -Яьй, къаденна ж1ал, хьаарадала, дижа а ца уллаш, -  аьле ж1але буна кхера тохар. Ж1али хьаара а иккхе, з1анарах каетташ ма даггара 1еха долалора. Т1аккха кхы а ч1оаг1аг1а ц1ог1арч деттар к1аьнкаша, шокарч  етташ ураг1тувсалора, из футтардеш. Шоаш школера чубоаг1ача хана а из туржа1 оттадора. Ж1али дийхка латтандаь кхерацар уж цох. 1аббаса из шоашта т1ахецаргдоацилга а ховра. Наха, ч1оаг1а дика саг ва, оалар 1аббасах. Сесаг енна, цхьаь вахаш вар из, дезал цун бацар.
   Тахан тхьайсача сана дар 1аббаса ков. Бераш картах чухьежача коа саг вацар, ж1али ший бун чу тхьайса улар.
    Мажитеи Рашидеи бе ши г1адж йоаллар.
   -Волле, хьо эг1ара хьалвада, со маг1ара 1овод хьона, - аьлар Рашида.
   1аббаса карт яр гаьн-гаьно техача п1ендах яь. Цу картах г1адж хьекхаш, «т1ох-т1ох-т1ох» яхаш таташ деш шоайла в1аши духьалбайдар к1аьнкаш. Ж1али, з1анарах  каетташ, ма даггара 1еха доладелар. Ц1аьхха  з1анара цхьа ч1уг кагъеллар, ж1али мукъаиккха т1адедар к1аьнкашта.
   -Ва са Даьла! – ц1ог1а даьнна д1алилхар к1аьнкаш.
    Бакъда, картах т1ехьа а кхоссаденна, к1аьнкаш в1алла гаьна а балалехь т1акхийра царна ж1али. Т1ехьара т1акхоссаденна Рашид 1овожавир цо. Са чудоацаш сана, кулгашта к1ал корта хьула а баь аллийсар Рашид. Из вита а вита удаш водача Мажита т1ехьадедар ж1али. Т1акхийтта д1абарталвожавир цо Мажит а.
   -Юхадала!- ц1аьхха хьахезар 1аббаса ж1алега теха ц1ог1а. Цун ц1ог1а хьахозашшехьа хьадаьлар ж1али.
    Коара  араваьнна, 1отекха з1и а лаьца ж1али д1адигар 1аббаса шорттига. Берашка х1ама аланзар цо. Ала дезаш а дацар. Х1анз ховш дар, сов кхеравенна Рашиди Мажити т1ехьаг1а кхы ц1аккха ж1алена юхевоаг1аргвоацилга.