З1амига Мичурин

                З1амига Мичурин

   1уйран хьалг1етта 1аьмав Ибайг, в1алла малхал т1ехьа а висац. «Ма ч1оаг1а раьза хургва са да, со х1анз шийна б1аргагой», - йоах цо ше-шийца.
   Геттара хьалха г1оттар цун да, малх в1алла арабалалехьа.  «Малхага 1уйрадика ювца еза са»,-оалар цо, шийга, сена г1етт хьо сел хьалха, аьнна хаттар дича.
  Даьна тара хала г1ерташ малхал хьалха г1атта г1ертар Ибайг, бакъда, массаза хилацар из. Цхьан дийнахьа хьалг1еттача, шиъ-кхоъ ди доаккхар ийс-итт сахьат даьлча мара ца г1отташ.
   «Х1ама дергдац,- оалар дас,- дидика ювца кхувргда хьа». Т1аккха ше велалора. Ч1оаг1а хоза велар дар цун.
   1уйран Ибайг г1еттача: «Волле коа аравала, хьана хов ц1аккха а цхьаннена а цадайначох хьо кхетий а»,- оалар дас.
   Ара ваьле дукха ха йоаккхар Ибайго д1а-юха хьежаш латташ, бакъда, ший бун чу тхьайса улла Борзиг мара х1ама б1аргагацар цунна.
 «Фу дайра хьона керда?» - аьле, велакъажар да Ибайг чувеча.
 «Тахан хоза ди доаг1аргда вайна», - аьле, жоп лора Ибайго, воккхача сага кеп а оаттайий.
  «Даьра доаг1аргда…, х1аьта, малаг1а оалхазарца къамаьл хилар хьа, гаьнаша фу йоахар, лаьтто ший къайленаш гучаяьхарий хьона?» - дукха хаттараш дора дас.
  Бакъда Ибайг кхетацар цох. «Фу къайленаш я лаьттан, г1аьнаша фу аргда сога, царна мотт а мича хов».
  «Х1а-х1а, к1аьнк, - сабар а дий оалар дас, -1а дикаг1а ладувг1а деза. Хьайна х1анззалца 1аламцара ца дайнар леха деза».
   Даьна г1о деш хоза хетар Ибайга. Цхьан дийнахьа дас шийга га йог1ийтар цунга, в1алла ше кулг а ца тохаш. З1амига га яр из. Цхьабакъда, з1амигача Ибайгана йоаккха хетар из. Эггара хьалхаг1а к1оаг баьккхар цо, т1аккха, лоабатах худар а даь, гаьна овла лоабатача чу а 1етта, к1оага чу ег1ар цо га, шорттига лозаяр кхераш мо лаьтта кулгаца доха а деш к1оага чу хьекхар. Т1аккха когашца 1ото1адир.
  Из фу га я дас хьааланзар.
  Ц1аг1а книжкаш т1ара лехар Ибайго ше д1аег1ачундараш мо г1аьнаш дола га. Из кхор бар…
  Иштта шийца 1омавир из дас, совъяр д1а а йоаккхаш, гаьнаш я1а.
  Гаьнашта доал деш воала к1аьнк б1аргавайча, лоалахочо оалар: «Керда Мичурин хургва цох».
  Ибайга Мичурин мала хиннав хацар.
  Дег чу дижар Ибайга дас деш хина къамаьл. В1алла Ибайго ладувг1ий а ца хьожаш, ше-шийца деш сана дора дас хьехар:
  «Пришвина аьннад, чкъаьранна -хий, оалхазара-фо, аькханна-хьу, т1аккха вай уж мел йола х1амаш лорае еза, хьунаш, аренаш, лоамаш, …къаьстта лоамаш, - аьле т1атохар, - вай лоаман нах да».
  Ч1оаг1о ийр Ибайго юртара библиотеке ваха Мичурин, Пришвин малаш ба хьажа, цар кхоллам, цар вахар довза.